Ekstradohet nga Italia i fundit i bandës "Gjepali"

[Albo]

Banda/ Agjentët italianë dorëzojnë në Rinas 37-vjeçarin e akuzuar edhe për trafik narkotikësh

Masakra e Durrësit, ekstradohet autori

Policia: Bashkim Haxhia në grupin "Gjepali", 5 vrasje në një ditë

Florenc Bakillari

Ekstradohet nga Italia i akuzuari si anëtar i një prej bandave më të rrezikshme të Durrësit në vitin 1997.

Bashkim Haxhia, 37 vjeç, i akuzuar për pesë vrasje, katër rrëmbime personi dhe grabitje, është marrë në dorëzim nga oficerët e Interpol Tirana dje në aeroportin e Rinasit. Bashkim Haxhia akuzohet për bashkëpunim në serialin e përgjakshëm të vrasjes së pesë personave brenda 24-orëve, ndodhur në qershor 1997 në Durrës. Pasi është arrestuar kohë më parë në Milano, Bashkim Haxhia u ekstradua ditën e djeshme nga agjentët italianë të Interpolit. Shqiptari është hetuar për disa krime të kryera në vendin fqinj, si shpërndarje droge dhe trafik prostitucioni. Sipas burimeve zyrtare të policisë, Bashkim Haxhia është dënuar me 20 vjet burg nga Gjykata e Apelit të Elbasanit, së bashku me Astrit Gjepalin, i cilësuar si kapo i bandës, Naim Qerimin dhe Mirush Jarecin, anëtarë të grupit. Ata, sipas policisë, dyshohet se kanë qenë edhe anëtarë të bandës së Lulzim Berishës, edhe ky i arrestuar nga policia në Tetovë të Maqedonisë në prill të këtij viti.

Ekstradimi
Interpol Tirana e kishte futur në zonën e kuqe të personave shumë të kërkuar Bashkim Haxhinë. Ky i fundit, sipas burimeve, mbeti jashtë 20-shes së parë të personave të shumëkërkuar ku bënin pjesë Alfred Shkurti, Enver Dondollaku, Lulëzim Berisha dhe disa anëtarë të "Bandës së Lushnjës". Pas arrestimit të personave që ndodheshin në radhën e parë të vijës së kuqe, emrat u zhvendosën. Burime zyrtare të policisë thanë se pas rinovimit të dosjeve dhe plotësimit të tyre me elemente shtesë, autoriteteve italiane u është dërguar kërkesa për ekstradimin e Bashkim Haxhisë. I kërkuari 37-vjeçar ishte arrestuar më parë në Itali, pasi akuzohet nga Prokuroria italiane për shpërndarje të lëndëve narkotike. Pasi ka mbaruar dënimin në Itali, Haxhia është nisur me avion për në aeroportin e Rinasit, ku është marrë në dorëzim nga agjentët e Interpol Tirana.

Vrasjet
Bashkim Haxhia është gjykuar në mungesë së bashku me tre shokët e tjerë të bandës, Astrit Gjipali, Naim Qerimi dhe Mirush Jareci. Ata janë akuzuar nga Prokuroria se vetëm brenda 24 orëve, në datat 15 dhe 16 shtator të vitit 1997, kanë vrarë pesë persona dhe kanë plagosur disa të tjerë. Viktimat e tyre kanë qenë shtetasit Luan Plaku, Kajmak Kullolli, Bilal Neza, Gëzim Beqiri e Nazmi Kopshti, ky i fundit punonjës policie. Prokuroria ka kërkuar dënimin me burgim të përjetshëm për Astrit Gjepalin; 25 vjet burg për Naim Qerimin; 25 vjet burg për Mirush Jarecin dhe 20 vjet burg për Bashkim Haxhinë. Sipas akuzës, anëtarët e grupit vepronin në akset rrugore duke ndaluar mjetet që kalonin dhe grabitur ato. Kështu, sipas akuzës, më 16 qershor 1997 Astrit Gjepali dhe bashkëpunëtorët e tij ka vrarë shtetasin Luan Plaku në Durrës dhe vetëm disa orë më vonë ai ka qëlluar në kodrën e Rrashbullit dy persona të tjerë në një "Fuoristradë", duke i plagosur rëndë ata. Në një lokal në fshatin Fllohë në Durrës, Astrit Gjepali dyshohet se ka kryer vrasjen e dytë, ndodhur në orën 17:00, ndaj Bilbil Nezirit. Seria e vrasjeve vazhdon, kur në orën 23:00 të mbrëmjes së po asaj dite ekzekutohen edhe dy persona të tjerë, Kajmak Kullolli dhe Gëzim Beqiri, tek "4 rrugët" në afërsi të Shijakut. Seria e vrasjeve të asaj dite është mbyllur me vrasjen e punonjësit të policisë Nazmi Rapishti, në kodrën e Rrashbullit.


Anëtarët e grupit

Astrit Gjepali Dënuar me 25 vjet burg
Naim Qerimi Dënuar me 25 vjet burg
Mirush Jareci Dënuar me 20 vjet burg
Bashkim Haxhia Dënuar me 20 vjet burg



Aktakuza e Prokurorisë për grupin që terrorizoi Durrësin

Gjepali tha: "Nuk do të të vrasim, se boll kemi vrarë sot"

TIRANE - Sipas aktakuzës së lexuar nga prokurori në sallën e gjyqit në maj 2003, viktimat e serialit të vrasjeve kanë qenë persona të thjeshtë. Ata nuk kanë pranuar t'u japin makinat personave të akuzuar për vrasjet, të cilët kryenin rrëmbime të dhunshme automjetesh. Natën e pesë vrasjeve, siç citohet në dosjen e Prokurorisë, Astrit Gjepali i ka thënë njërit prej të dëmtuarve "Nuk do të të vrasim, se boll kemi vrarë sot". Veç vrasjeve të bëra në Durrës, Prokuroria i ka faturuar Gjepalit edhe një ekzekutim të ndodhur në Zvicër. Ylli Majaci është ekzekutuar rreth orës 19:40 më 23 mars 1993 në Zyrih. Prokurorët e kanë cilësuar grupin e drejtuar nga Gjepali, ku bënte pjesë edhe Bashkim Haxhia, si "tmerrin" e zonës së Shijakut. "Kryerja e vrasjeve fillimisht në Durrës e më pas në fshatrat përreth në një kohë të shkurtër dhe pa arsye vërteton se Gjepali ka pasur si synim krijimin e terrorit në rrethin e Durrësit", janë shprehur prokurorët. Një prej viktimave të grupit të Gjepalit ishte Luan Plaku. Ai po udhëtonte me makinë së bashku me një mikun e tij, të quajtur Altin Çuka. Rreth orës 16:00, Astrit Gjepali dhe Naim Qerimi i kërkuan makinën. Kur Luan Plaku nuk e dorëzoi mjetin, ata e kanë vrarë. Pasi kanë rrëmbyer disa makina, të akuzuarit kanë shkuar për t'u hedhur karburant. Kanë mbushur makinat dhe kanë vrarë punonjësit që u kërkonin paratë e naftës. Efektivi i policisë është vrarë më vonë, pasi Gjepali e kishte thirrur për t'i thënë se "i kishte inat policët", thuhet në dosjen e akuzës.

Panorama