5 vjetori i ndarjes nga jeta e Gramoz Pashko

[Inteligjentja]

Ngushellime familjeve te viktimave. Eshte vertete per te ardhur keq sesi njerez te nderuar zhduken ne kete fare feje. Per me teper babe e mire. Mjere ajo nene e ajo moter! U prehshin ne paqe!

[romeoOOO]

Njeri i madh, Ekonomist i arritur....ngushellimet familjeve te viktimave!
Ishalla gjenden trupat dhe sqarohet kjo situate.



p.s ke plotesisht te drejte Antipatrea!

[Leila]

I lini mor keto budallalliqe.

Po ajo qe i ndodhi Gramoz Pashkos vite me pare me vajzen... e rastesishme ishte, po rrahja e tij... dhe ajo e rastësishme... po tani pas disa kohesh qe foli kunder nje plani ne bankat shqiptare... e rastesishme duket ngjarja?
Aq me teper nuk eshte e rastesishme kur ky personalitet ka qene CUDITERISHT pa asnje njeri tjeter prane ne Himare, si te ishte nje qytetar i thjeshte dhe jo personalitet politik dhe nje nga VIP-at e ekonomise shqiptare.

Ngushellimet e mia vajzes se tij dhe bashkeshortes se tij Mimoza Pashko (Ruli) si dhe familjeve te ekuipazhit dhe familjeve te njerezve te tjere qe e shoqeruan ne kete fund tragjik duke humbur dhe ata jeten e tyre.

[AgainstAllOdds]

Kur te vjen , thojne hapi deren se s'ke ca ban tjeter...!
Deti ja vuni syrin dhe deti e mori..!
Ngushelime familjarve te te ndjerve..!

[kolombi]

Kur degjon lajme te tilla,fjalet ose teperojne ose jane te varfra per te shpehur qofte edhe nje ngushellim.

Zakonisht pas vdekjes te gjithe thone dy fjale te mira,por Gramoz Pashko vertet do ngelet ne kujtesen e te gjithe atyre qe perjetuan etjen e diteve te para te demokracise,si nje nga pishtaret e saj.

Ngushellime te sinqerta familjeve te viktimave.
Prezenca e djalit te tij ne helikopter i ve kapakun kesaj tragjedie.

[Lioness]

Ngushellime familjes ...
... fatkeqesi e paimagjunueshme per ta, fatkeqi edhe per vendin. Eshte humbje e thelle.

[Brari]

gazeta panorama
---


rrezimi i helikopterit
ngjarja

Ngjarja orë pas ore, nga Himara në Adriatik


Shpëtimi i Pashkos kthehet në tragjedi, 6 të humbur





Mesditën e së dielës, një ditë e zakonshme pushimi në bregdet është ndërprerë papritur në mes jo vetëm për Gramoz Pashkon, por edhe për familjen e tij dhe pushuesit e tjerë që ndodheshin aty pranë.

Profesori i ekonomisë kishte shkuar për pushime në bregdet katër ditë më parë, i shoqëruar edhe nga familja e tij. Aksidenti ka ndodhur mesditën e së dielës në plazhin e Himarës, kur Pashko ka notuar në det në drejtim të një shkëmbi e më pas është ngjitur aty. Nën diellin verbues, 51-vjeçari ka qëndruar ulur në shkëmb dhe më pas ka tentuar të lëvizte. Një rrëshqitje, më pas një përplasje në shkëmb dhe Gramoz Pashko ka rënë në një tjetër pjesë të shkëmbit e më pas në ujë pa ndjenja. I dëmtuari kishte pësuar plagë nga të cilat ka rrjedhur gjaku, i cili ka tërhequr vëmendjen e pushuesve të tjerë aty pranë. Personazhi i njohur i politikës është nxjerrë në breg pas ndërhyrjes së disa pushuesve, të cilët më pas kanë lajmëruar autoritetet lokale.

Pas trajtimit të parë në spitalin më të afërt të Gramoz Pashkos, një helikopter i nisur urgjent nga Tirana ka mbërritur rreth orës 17:00 të së dielës në qendrën spitalore “Nënë Tereza”, në Tiranë. 51-vjeçari i mbërritur në Tiranë me helikopter ka hyrë në spital në gjendje kome dhe me disa fraktura të shkaktuara prej përplasjes me shkëmbin. Pak kohë më pas, rreth orës 19:10, në qendrën spitalore ku qëndronte Pashko kanë mbërritur kryeministri Sali Berisha bashkë me ministrin e Shëndetësisë, Maksim Cikuli, deputeti Engjëll Bejtja, si dhe shefi i kabinetit të Kryeministrisë, Arben Imami. Autoritetet shqiptare kanë filluar kontaktet me homologët italianë.

Në orën 21:00 kur në Tiranë po diskutohej nisja e Pashkos në Greqi, spitali i Barit ka sjellë konfirmimin se mund të kuronte të sëmurin. Ministria e Shëndetësisë ka filluar përgatitjet ndërsa po shqyrtoheshin variantet e transportit drejt Italisë. Rreth orës 21:57, helikopteri i Shërbimeve Qeveritare “Bell 222” është ngritur nga oborri i qendrës spitalore universitare “Nënë Tereza”, në Tiranë, në drejtim të Barit. Në bordin e tij, veç të dëmtuarit ndodhej edhe djali i tij dhe katër persona të tjerë, si mjeku dhe stafi i fluturimit. Nisja është realizuar normalisht ndërsa rreth orës 22:00, helikopteri ka bërë xhiron e kontrollit rreth kullës së Rinasit dhe më pas ka kaluar mbi Durrës dhe ka hyrë në hapësirën detare të fluturimit.
Deri rreth orës 22:17 komunikimi i stafit të fluturimit me kullën e Rinasit ka qenë normal. Kur ora shënonte 22:17, komanda e kullës së Rinasit i kërkon stafit të fluturimit të helikopterit të ndryshojë frekuencat e radios dhe të hyjë në kanalin italian, për të komunikuar me autoritetet ajrore të vendit fqinj. Ky është momenti i fundit i komunikimit, kur piloti konfirmon komandën.

Rreth orës 11:20 të mesnatës së diel, mësohet se komanda ajrore italiane ka marrë sinjalin e fluturimit nga helikopteri me të cilin po transportohej Gramoz Pashko. Sipas burimeve nga kapitaneria e Portit të Durrësit, ka qenë ora 23:25:47 e së dielës kur njësia speciale për kërkimin dhe rikuperimin e të humburve S.A.R me qendër në Romë ka lëshuar një sinjal për të gjitha mjetet që ndodheshin duke lundruar në detin Adriatik.
Në orën e 23:25, qendra speciale në Romë kishte marrë sinjalin për emergjencën që ka pësuar helikopteri shqiptar në fluturim drejt Barit. Më pas nuk dihet çfarë ka ndodhur me helikopterin, pasi kjo është koha kur ai dyshohet të ketë pësuar aksidentin fatal. E ndërsa tragjedia kishte ndodhur në Adriatik, fati i gjashtë personave ishte mbështjellë me mister. Baza ajrore italiane nuk po konfirmonte mbërritjen e helikopterit, ndërsa kthimi i tij nuk ishte mësuar.

Në këtë kohë, rreth orës 00:30 minuta, ka filluar operacioni i verifikimit. Mjete fluturuese dhe detare kanë shkuar në koordinatat e fundit që kishte raportuar helikopteri për të verifikuar. Misteri ka vazhduar deri rreth orës 03:00 të ditës së djeshme, kur autoritetet italiane kanë lajmëruar rrëzimin e helikopterit shqiptar me gjashtë persona në bord. Në këtë kohë, ka filluar operacioni i kërkim-shpëtimit. Ky operacion është ndjekur nga ministri i Mbrojtjes, Mediu, ministri i Brendshëm, Olldashi, ai i Shëndetësisë, Cikuli dhe ministri i Transporteve, Basha. Operacionet e kërkimit janë ndjekur gjatë gjithë natës nga ambasadori italian në Tiranë, Ianuçi.

Rreth orës 06:00 të mëngjesit të djeshëm, lajmi është publikuar edhe në Shqipëri. Rreth orës 10:00 politikanë, deputetë dhe kolegë të Gramoz Pashkos kanë shkuar te familja e tij në Tiranë për t’i shprehur ngushëllimet gruas dhe vajzës së 51-vjeçarit. Rreth orës 11:30, ministri i Brendshëm, Sokol Olldashi, ka dalë në konferencë shtypi duke pohuar se në helikopterin e rrëzuar ndodhej edhe djali 24-vjeçar i Gramoz Pashkos. Ndërkaq rreth orës 12:00 të ditës së djeshme, Prokuroria e Tiranës lajmëroi se kishte filluar hetimin e ngjarjes.

Rreth mesditës është sekuestruar një sasi e konsiderueshme provash dhe dokumentesh që tregojnë për gjendjen e helikopterit, udhëtimet dhe problemet e tij teknike. Ministria e Mbrojtjes ka ngritur komandën e operacionit të kërkim-shpëtimit duke aktivizuar katër motovedeta, një anije të madhe ushtarake të quajtur “DRAGAMINA” dhe një helikopter të forcave ajrore. Zona ku dyshohet se mund të ketë rënë helikopteri, është identifikuar në një sipërfaqe 37 milje e gjerë dhe 25 milje e gjatë, në largësi nga vija kufitare e Durrësit, rreth 45 kilometra.

Operacioni i kërkimit ka vazhduar gjatë gjithë ditës deri në orët e mbrëmjes. Rreth orës 15:40 të ditës së djeshme, mediat italiane, por edhe autoritetet shqiptare kanë lajmëruar gjetjen e gjurmëve të karburantit të helikopterit që ishte aksidentuar. Rrëzimi dyshohet se ka ndodhur rreth 45 milje larg bregdetit të Durrësit dhe afërsisht 70 milje në largësi të brigjeve italiane të Puljas. Kërkimet në zonë kanë vazhduar për rreth katër orë, ndërsa rreth orës 17:27, operacionet e kërkim-shpëtimit për helikopterin e rrëzuar janë ndërprerë. Errësira dhe kushtet e detit si dhe mungesa e çdo shenje ka shkaktuar edhe anulimin e kërkimeve. Rreth orës 20:00 mjetet detare dhe fluturuese të ushtrisë dhe policisë shqiptare janë kthyer në bazat e tyre për të filluar kërkimet ditën e sotme që në orët e para të mëngjesit. Mbrëmjen e djeshme rreth orës 19:57, të afërmit dhe familjarët e Gramoz Pashkos kanë kërkuar që shteti të bëjë të pamundurën për gjetjen e trupave të gjashtë personave të zhdukur. Dy orë më vonë, rreth orës 22:00 njësitë speciale italiane kanë aktivizuar në det mjete speciale kërkimi me ultratinguj, të cilat janë në gjendje të zbulojnë objektet në thellësitë e ujërave të detit.




Zbulohen koordinatat e rënies së helikopterit

Qendra Kombëtare e Kërkim-Shpëtimit në Itali në bashkëpunim edhe me strukturat speciale të Ministrisë së Mbrojtjes, kanë përcaktuar ditën e djeshme rreth orës 16:00 koordinatat e sakta të zonës ku ka rënë helikopteri. Sipas burimeve zyrtare nga Ministria e Mbrojtjes, por edhe nga autoritetet e tjera të aviacionit shqiptar, koordinatat e përcaktuara si zonë ku mendohet të jetë helikopteri janë : A4053N-1800E, B4121N-1800E, C4053N-1856E, D4121N-1856E.



Prokuroria nis hetimet. Merren në pyetje specialistët e aviacionit: Besojmë se shkak ishin kushtet e motit

Dialogu i pilotëve me kullën e Rinasit
Hetuesit sekuestrojnë regjistrin e shërbimeve të helikopterit

Trashgim Sokolaj & Afrim Imaj

Prokuroria e Tiranës filloi dje hetimin për rrëzimin e helikopterit të Shërbimeve Qeveritare në ujërat e detit Adriatik.

Lajmi u konfirmua nga zyrtarë të organit të akuzës, të cilët kanë pohuar për gazetën, se ngjarja po ndiqet nga dy prokurorë, një zëvendësprokuror dhe dy oficerë të Policisë Gjyqësore. Kjo trupë hetimi e ngritur menjëherë pas sinjalizimit për ngjarjen, ka realizuar ditën e djeshme dhjetëra veprime procedurale në kërkim të shkakut të aksidentit dhe rrethanave të tij. Prokuroria e Tiranës sqaroi se procedimi penal i filluar tashmë ka nisur me iniciativën e organit të akuzës, për shkak të pasojave të rënda që ka pasur aksidenti.

Sekuestrimet
Zyrtarët e Prokurorisë thanë se gjatë hetimeve të zhvilluara ditën e djeshme, janë sekuestruar një mori materialesh, të cilat mund të hedhin dritë mbi shkaqet e ngjarjes. Hetues të Prokurorisë së Tiranës kanë sekuestruar shiritin ku janë regjistruar komunikimet mes kullës së Rinasit dhe pilotëve që drejtonin helikopterin. Ndërkaq, në dosjen hetimore kanë përfunduar edhe dokumentet ku është zbardhur ky komunikim. Më pas, grupi i hetimit ka mbërritur në repartin e helikopterëve të shërbimeve qeveritare. Oficerët e Policisë Gjyqësore kanë qëndruar aty për disa orë. Fillimisht është sekuestruar regjistrimi i shërbimeve të helikopterit, ku ndodhen të shkruara të gjitha lëvizjet, udhëtimet, provat, remontet, defektet teknike dhe parametrat e sigurisë. Më pas, është sekuestruar edhe dosja e mjetit fluturues, ku janë hedhur të gjitha problemet teknike që ai ka pasur, raportet e kontrolleve që i janë bërë atij, si dhe ndërhyrjet e specializuara për ndreqjen e defekteve teknike që ka pasur helikopteri.

Aksidenti
Prokuroria tha se nga të gjitha veprimet hetimore që janë bërë ditën e djeshme, ende nuk mund të flitet për asnjë pistë hetimi. Organi i akuzës tha se numri i veprimeve procedurale që janë bërë ka qenë i madh, porse i pamjaftueshëm për të arritur në përfundime rreth shkaqeve të ngjarjes. Veç sekuestrimit të provave shkresore dhe dokumentare, hetuesit kanë marrë në pyetje disa specialistë dhe ekspertë, të cilët kanë qenë të mendimit, se shkaku i aksidentit mund të kenë qenë kushtet natyrore në të cilat është ndodhur mjeti fluturues në momentin e aksidentit. Megjithatë, ky pohim i bërë nga specialistët dhe ekspertët e aviacionit dhe ushtrisë nuk u ka mjaftuar prokurorëve, të cilët janë duke bërë hetime në disa pista për shkakun e ngjarjes.




DIALOGU I PILOTIT ME KULLËN E RINASIT

Zbardhet komunikimi i plotë dhe fjalët e fundit të pilotit me kullën e Rinasit. Gazeta “Panorama” ka mundur të sigurojë ditën e djeshme gjithë komunikimin e kullës së Rinasit me pilotin shqiptar, deri në momentet e fundit dhe çastet kur ai nuk i është përgjigjur apelit.
Ora 21:57: “Kulla Rinas”, jam “Zulu Alfa” (Avioni Shqiptar) “Hotel Oskar Vita” (Identiteti, targa e avionit), më lejo të bëj lëshimin e motorëve.
-Ora 21:58: “Kulla Rinas” ju lejoj lëshimin e motorëve.
-Ora 21:59: Ju kuptova, po bëj lëshimin e motorëve.
-Ora 22:03: “Kulla Rinas”, më lejo ngritjen...
-Ora 22:03: “Zulu Alfa” të lejoj ngritjen...
-Ora 22:06: “Kulla Rinas”, jam mbi bregdetin e Durrësit.
-Ora 22:06: Ju kuptova...
-Ora 22:16: “Kulla Rinas”, kontaktoni në radio për t’u futur në frekuencën italiane. (Eshtë momenti kur helikopteri kalon ujërat territoriale dhe duhet të zbatojë komandat e kullës së komandimit të shtetit fqinj, që është në dijeni të fluturimit të radhës dhe të kursit përkatës).
-Ora 22:17: Përgjigju “Zulu Alfa” ku je...
-Ora 22:17: Radari humbet kontaktin me helikopterin. Nga ky çast humbet çdo lloj komunikimi me personelin që fluturon me të.
Gati 20 minuta ka zgjatur fluturimi i helikopterit presidencial me numrin e identifikimit “ZA Hotel Oskar Vita”. Më tej asnjë zë. Makth e tension në kullën e komandimit. Që nga ai çast asnjë shpresë se mund të ketë shenja jete në avionin presidencial me fatin tragjik.



Kontradita, Ministria e Brendshme dhe Mbrojtja: Moti ishte i mirë

Ekspertët: Humbja e lartësisë, nga iluzioni optik
Agjencitë italiane: Aksidenti ndodhi nga kushtet atmosferike

TIRANE - Shkaqet e vërteta të rrëzimit të helikopterit qeveritar nuk janë zbuluar ende. Agjencitë italiane të lajmeve, kanë pretenduar dje se prej ditësh ishte parashikuar një kohë e papërshtatshme në Adriatik dhe në Jon. Sipas tyre turbulencat e ajrit si pasojë e stuhisë në det, mund të kenë qenë shkaqet e aksidentit. Ndërkaq Ministria e Brendshme dhe Ministria e Mbrotjes në TIranë thanë se në momentin e nisjes së helikopterit nuk ka pasur shenja për përkeqëim te kushteve atmosferike mbi det. Pilotët dhe ekspertët e aviacionit dyshojnë se shkaku i vetëm që mund të ketë qenë fatal për rrëzimin e helikopterit ka qenë një iluzion që kanë pasur pilotët gjatë fluturimit. Pilotët mund të kenë shmangur ndonjë turbulencë në ajër, dhe kjo ka bërë që helikopteri të humbasë lartësinë. Drejtuesve të mjetit fluturues u është krijuar një iluzion, duke mos pasur horizont pamor. Sipas ekspertëve, fluturimet në det janë më të vështirat. Kjo pasi, si gjatë ditë, ashtu edhe gjatë natës, mungon horizonti, pasi ai duket i njëjtë. Zyrtarë dhe specialistë të fushës së aviacionit kanë pohuar se, pavarësisht kushteve atmosferike të motit, fluturimet gjatë natës mbi hapësira detare paraqesin probleme dhe vështirësi të mëdha. Sipas deklarimeve të pilotëve dhe teknikëve të fluturimit, edhe herë të tjera janë ndeshur probleme të tilla në raportimet mes pikave të kontrollit ajror dhe pilotëve, kur mjetet e fluturimit kanë qenë në hapësira detare. Sipas specialistëve fenomeni sjell probleme në orientim. Pikërisht për shkak të këtyre eksperiencave të pilotëve dhe specialistëve, është vendosur që fluturimet në orë të vona mbi sipërfaqe ujore apo detare, të zhvillohen me një staf të plotë drejtimi. Ky ka qenë edhe shkaku pse, veç pilotit kryesor dhe një tjetër piloti që ndodhej në kabinën e drejtimit të helikopterit, pranë tyre ka qenë edhe një teknik avioni dhe njëkohësisht specialist i mjeteve ajrore. Sipas specialistëve, prania e dy pilotëve në kabinën e drejtimit të helikopterit krijon mundësi, që edhe në rast të shfaqjes së “iluzioneve” tek njëri drejtues i mjetit, ky fenomen nuk shfaqet tek piloti tjetër, i cili ka mundësi manovrimi me mjetin fluturues. E gjithë skema e shfaqjes së atij që quhet iluzion i pilotit, është një fenomen që ndodh kur mjeti fluturon në diferencë të ulët me sipërfaqet ujore, të cilat gjatë kohës së natës, ngjasojnë në ngjyrë dhe strukturë me qiellin. Humbja e lartësisë në këto kushte, sipas specialistëve, mund të kuptohet vetëm nga pilotët e vjetër dhe të specializuar, ata me eksperiencë, si dhe nga ata punonjës të shërbimeve ajrore, të cilët kanë kaluar eksperienca të tilla gjatë ushtrimit të detyrave të tyre.

----
rrezimi i helikopterit
reportazh

Ç’ndodh në familjen Pashko një ditë pas tragjedisë


Kuja e gruas së Gramozit: Aman më ktheni djalin





Vaji, lotët dhe dhimbja, mbizotëronin dje në katin e katërt në pallatit ku banon familja Pashko, në rrugicën pas stadiumit “Qemal Stafa” që të nxjerr në rrugën e Elbasanit.

Që në orët e para të mëngjesit, dera e familjes Pashko ishte e hapur për të gjithë miqtë, që kishin zbritur pranë bashkëshortes së profesorit Gramoz Pashko. Moza, kishte mbetur vetëm me vajzën Fjonën dhe natën e kishin kaluar nën ankthin e humbjes së helikopterit që transportonte për në Itali profesorin.
Moza, nuk kishte pasur kohë as të vishej. Në mëngjes ishte me një palë tuta dhe me një bluzë me viza të bardha e të kuqe, sikurse ishte kthyer dy ditë më parë nga Himara drejt e në spitalin “Nënë Tereza” e më pas në shtëpi.
“Jo, jo, nuk lahem. Do të pres Rubenin një herë pastaj”. Mes vajit, dhimbjes, lotëve, bashkëshortja e zotit Pashko, Moza Pashko, një nënë rreth të 50-ave, herë herë kthjellohej për situatën dhe herë herë i dukej sikur gjithçka do të ndryshonte shpejt.
“Pse më more djalin me vete”, qante gruaja ndërsa i drejtohej të shoqit për të cilin dukej se i kishte humbur shpresat. Ndërsa për Rubenin 24-vjeçar ende jo. “Aman më ktheni djalin” përsëriste herë pas here nëna mes dhimbjes dhe lotëve që nuk i shteronin. Nuk harroi t’i kujtonte njerëzve të afërt që i kishin mbushur shtëpinë që në mëngjes se ajo dreq vize Shengen e munguar në pasaportën e saj kishte shkaktuar gjithë tragjedinë për të birin. Nëse Moza do të kishte pasur një vizë, do të ishte ajo në helikopter dhe jo Rubeni, për të shoqëruar bashkëshortin drejt spitalit të Barit ku Gramoz Pashko do të kurohej nën shpresën e rikthimit në jetë. Vetë Moza nuk sqaron për të afërmit ndonjë gjë më shumë se çfarë kishte ndodhur atje në Palasë, ku u gjet gjysmë i gjallë e gjysmë i vdekur në ujë trupi i profesorit. Duket shumë e lodhur dhe vetëm mendon për djalin, dhe vajet i ka vetëm për të.
Në mesditë, familja Pashko është vizituar nga dhjetra e dhjetëra njerëz të politikës, profesoratit, miq të familjes, të afërm, të cilët sapo kishin mësuar për tragjedinë kishin zbritur pranë gruas për t’i dhëns shpresa dhe zemër për gjetjen nga fundi i detit të dy njerëzve të saj. Ajo ishte veshur në mesditë me të zeza dhe priti me radhë pothuajse gjithë politikanët, duke filluar që nga ata të Partisë Demoratike, e deri tek zyrtarët e lartë të PS.
Që në mëngjes shtëpia u mbush me miqtë më të afërt. Ra në sy prezenca e shefit të kabinetit të Berishës Arben Imamit, dhe më pas pothuajse të gjithë ministrat: Genc Ruli, Fatmir Mediu e Sokol Olldashi. Më vonë edhe nga PS: Bashkim Fino, Andis Harasani, Valentina Leskaj e Arta Dade, por edhe kryetari i PS, Edi Rama, Skënder Gjinushi, Paskal Milo e Neritan Ceka. Rreth mesditës ishte edhe Ilir Meta që ka vizituar familjen Pashko. Nuk ka shkuar akoma pranë familjes ish-kryeministri Fatos Nano, me të cilin Pashko ka pasur marrëdhënie shumë të mira dhe ka punuar si këshilltar i këtij të fundit gjatë qeverisjes pas ’97.
E ndërsa njerëzit hynin e dilnin pa fund nga familja, pa pasur mundësi të thonë ndonjë fjalë më shumë në orën 17:.35 minuta, në familje zbriti kryeministri Sali Berisha i shoqëruar nga bashkëshortja Liria, të cilët u pritën në hyrje nga ministri i Brendshëm, Sokol Olldashi. Ata qëndruan gjatë në familjen e profesorit, rreth 45 minuta dhe në dalje, u vunë re fare qartë sytë e përlotur të kryeministrit. E kishte dhënë edhe vetë në mbledhjen e grupit parlamentar se shpresat dalëngadalë sa vinin e shuheshin. Por brenda në familje kishte dhënë të gjitha garancitë se shteti do të bënte maksimumin për të gjetur trupat.
Nëna e djalit 24-vjeçar ishte akoma në pritje të të birit. “E nisëm edhe djalin me të që ta shoqëronte, të kishte shpirtin e tij afër. E nisëm që t’i shpëtonin jetën, por Zoti ua mori atë”, ishin fjalët që u thoshte herë pas here ndonjë prej të pranishmëve.
Deri në orët e vona të mbrëmjes, në familjen Pashko kishin zbritur pothuajse të gjithë deputetët dhe përfaqësuesit e forcave politike dhe shtëpia nuk po gjente akoma qetësinë. s.k



Pashko, ekonomisti i gjithë qeverive

Dr. Gramoz Pashko është ndër themeluesit e parë të PD në fillim të viteve 90. Anëtar i Kuvendit të Shqipërisë dhe në vitin 1991 edhe në postin e ministrit të Ekonomisë dhe zv.kryeministër. duke u përballur kështu me reformat e para ekonomike të një vendi që po ndryshonte tërësisht sistemin. Vitet e fundit të qeverisjes së PD (pas 96) e gjetën Pashkon në front të kundërt me politikat qeveritare të së djathtës, sidomos për sa i përket skemave piramidale. Me fitoren e zgjedhjeve të ‘97 nga e majta, ekonomisti i njohur iu bashkëngjit kabinetit të ish kryeministrit Fatos Nano duke shërbyer si këshilltar ekonomik. Më vonë, në vitin 2002 me themelimin e Universitetit privat New York në Tiranë, Pashko ishte në detyrën e Rektorit të këtij universiteti. Zgjedhjet e vitit 2005 e gjetën atë sërish kandidat për deputet duke u rikthyer edhe një herë pranë PD. Pashko ka lënë pas një literaturë dhe studime të shumta në fushën e ekonomisë.



Kreu i ekzekutivit ngushëllon gjithë familjarët e viktimave
Berisha: Bashkë me kohën po na pakësohen edhe shpresat

“Miku ynë i shtrenjtë, personaliteti i shquar i jetës politike dhe botës intelektuale të vendit, një ndër themeluesit më kryesorë të Partisë Demokratike, promotori i reformave të tregut në Shqipëri, Gramoz Pashko, humbi gjatë udhëtimit për në spitalin e Barit”. Kështu e nisi fjalën dje në mbledhjen e grupit të PD, kryeministri Berisha.
Shefi i ekzekutivit në prezencën e kamerave garantoi deputetët, por edhe opinionin se po bëhen përpjekje intensive për gjetjen e helikopterit, të rënë në detin Adriatik rreth mesnatës, duke hyrë 17 korriku. Ndërkohë që sipas Berishës ministri i Brendshëm, ministri i Mbrojtjes, ambasadori italian në Tiranë dhe struktura të tjera të shtetit janë angazhuar që gjatë natës së djeshme në ndjekje të këtij problemi. Kryeministri Berisha ngushëlloi edhe familjarët e viktimave të tjera që gjendeshin në bordin e helikopterit të rrëzuar.
“Fatkeqësisht, bashkë me orët që kalojnë zbehen edhe shpresat tona. Është një fatkeqësi e jashtëzakonshme që na i mbush zemrat me dhimbje. Në këto çaste, mendimet dhe ndjenjat tona janë te familjarët e Gramozit, te Rubeni, te familjarët e Demushit, të Vangjelit, 2 pilotë të shkëlqyer, trima, kurajozë, prindër dhe familjarë shembullorë te familja e Qemalit, inxhinierit të talentuar të aviacionit, te familja e Aleksandrit, mjekut humanist, i cili sapo ishte kthyer nga studimet jashtë dhe u nis për të shpëtuar jetën e mikut tonë”, tha kryeministri. Po ashtu ai u shpreh se sakrifica e të gjithë atyre që shoqëronin Gramozin ishte një sakrificë sublime në emër të dashurisë njerëzore. “Dashurisë së fëmijës për prindin, e Rubenit për Gramozin, dashurisë së mjekut për jetën e pacientit, të përkushtimit dhe dashurisë së pilotëve për të mos kursyer asnjë lloj ndihme për njeriun në nevojë”, tha Berisha duke përfunduar se të gjithë qëndronin pranë familjarëve të të ndjerëve.



Vajza
Dhimbja e Fjonës

Fjona, vajza rreth 30 vjeçare e doktor Gramoz Pashkos, ka përjetuar njëlloj dje padijen dhe mungesën e informacionit për të atin dhe vëllain e saj 24 vjeç Rubenin. Paraditen e djeshme vajza është parë shumë e shokuar rreth shtëpisë me disa shoqe të saj. Madje nuk ka ngurruar që rreth ambienteve të shtëpisë në rrugën e Elbasanit, të pijë edhe një kafe me shoqet e saj me të cilat ndau dhimbjen e gjithë asaj nate. Jeta e vajzës së familjes Pashko nuk ka qenë aq e qetë gjatë këtyre viteve. Kështu në jetën e saj edhe në të ardhmen, shtohet një dhimbje më tepër pas kësaj tragjedie që ndodhi në familjen ku ende nuk ka asnjë informacion për dy njerëzit e dashur, të atin dhe të vëllain me të cilin ishte jashtëzakonisht e lidhur.




Debat për tragjedinë, opozita kërkoi shtyrjen e diskutimeve dhe më pas bojkoton seancën

Parlament, PS: Sot të heshtim
Topi: Ne seriozë, kujtoni Nanon me vakanca gjatë 9 Janarit

Tragjedia e ndodhur në Adriatik, ku është zhdukur helikopteri presidencial në bordin e të cilit transportohej për në Bari (Itali) ish-ministri i Ekonomisë, Gramoz Pashko, në gjendje kome dhe në bord pesë persona të tjerë, është kthyer sërish në një mollë sherri mes pozitës dhe opozitës në seancën e djeshme në Kuvend.

Opozita i ka kërkuar kryetares së Kuvendit, Jozefina Topalli, që të ndërpresë seancën e Parlamentit në mënyrë që në ditën e djeshme, shteti dhe strukturat e qeverisë të impenjoheshin me tragjedinë e ndodhur dhe nga ana tjetër, të shmangej debati parlamentar për çështjet me të cilat maxhoranca dhe opozita nuk ishin dakord. “Unë propozoj ndërprerjen e seancës. Me këtë gjendje të sotme, unë personalisht nuk mund të debatoj për ndonjë argument tjetër. Unë shoh që këtu janë ministrat, ai i Mbrojtjes dhe ai i Brendshëm, por duhet të jetë kryeministri Berisha ai i cili duhet të vijë dhe të japë informacione”, kërkoi ish-kreu i grupit parlamentar të PS, deputeti Gramoz Ruçi. E menjëhershme ka qenë përgjigja e ardhur nga kampi i mazhorancës. Kryetari i grupit parlamentar të PD, Bamir Topi ka kërkuar vazhdimin e seancës dhe sipas tij po tregohet impenjim maksimal i shtetit për të zbardhur këtë tragjedi. “Instrumentalizimi i këtij problemi, tentativa për t’i dhënë një natyrë tjetër problemit dhe për të deformuar situatën nga ana e grupit socialist më duket aspak fisnike, aspak qytetare”, tha Topi nga foltorja e Kuvendit. Ai kërkoi vazhdimin e punës si një kërkesë e natyrshme edhe për marrjen e vazhdueshme të informacionit. Topi nuk harroi që të kujtonte tragjedinë e 9 Janarit. “E kemi të freskët atë tragjedi. Vetëm për t’i kthyer reston kësaj opozite që atëherë ka qenë në qeveri, të gjithë e kujtojmë dhe e dimë fare mirë se kryeministri i asaj kohe kur ndodhi tragjedia vazhdonte vakancat. Ndërsa sot është impenjimi maksimal i të gjitha strukturave”, tha Topi. Por Bujar Nishani përforcoi më tepër “ngacmimin” ndaj opozitës.
“Cinizmi politik i opozitës nuk njeh kufij. Por ngjarja nuk duhet të përdoret në këtë aulë. Parlamenti të vazhdojë punën e tij” tha Bujar Nishani, i cili shkaktoi edhe reagime nga deputetët e opozitës që menjëherë pas kësaj bojkotuan sallën e Parlamentit.

Raporti
Dy ministrat, Fatmir Mediu i Mbrojtjes dhe Sokol Olldashi i Brendshëm deklaruan dje nga foltorja e Kuvendit se shteti shqiptar në bashkëpunim me strukturat italiane po bëjnë të gjitha përpjekjet për operacionin e kërkimit.
“Jemi të hapur për hetimet e institucioneve të shtetit për të gjetur shkaktarin e kësaj tragjedie, por gjithçka u bë për të shpëtuar jetën e profesor Pashkos”, tha Mediu në sallën e Kuvendit, duke theksuar se Prokurorisë i është vënë në dispozicion edhe informacioni i nevojshëm. Por edhe për ministrin e Mbrojtjes, sa më shumë kalon koha, aq më të vakëta janë edhe shpresat. “Situatat janë të disfavorshme, sepse në mesditë ka pasur edhe det, e pavarësisht situatës së vështirë ne vazhdojmë kërkimet”, tha Mediu.



Deklaratat

Gramoz Ruçi: Ne duhet të marrim informacion të plotë për ngjarjen. Në planin shpirtëror asnjë koleg nuk mund të vazhdojë me debatet. Unë propozoj ndërprerjen e seancës. Kreu i qeverisë të vijë të informojë Parlamentin pse ndodhi tragjedia dhe cilat ishin masat e marra për të arritur në të vërtetën e kësaj ngjarjeje.

Fatmir Mediu: Situata deri tani është dramatike. Nuk kemi shenjë të helikopterit dhe të të kërkuarve. Kemi lokalizuar gjurmë vaji. Situatat janë të disfavorshme, sepse në mesditë ka pasur edhe det dhe me gjithë vështirësitë, vazhdojnë kërkimet. Duhet të bëhet analizë pse ndodhi ngjarja, por dua të siguroj gjithë deputetët se jemi përpjekur të bëjmë maksimumin për zotin Pashko. Helikopterin një pjesë e mirë këtu e njohin. Eshtë një helikopter i mirë me dy motorë, shërbimet i bën në Gjermani në mënyrë të përvitshme. Pilotët e kanë bërë në mënyrë të vazhdueshme rrugën dhe nuk kanë pasur probleme.

Pandeli Majko: Ne e shohim që rendi i ditës këtu ka mjaft probleme. Bamir Topi ngriti zërin për opozitën por vendimi ynë nuk është marrë para një ore. Ka rreth një muaj që kushtet tona janë të qarta dhe të hapura për reformën zgjedhore. Por unë mendoj se seanca duhet të mbyllet për të mos vazhduar debatet dhe qeveria të ndjekë me interes situatën me tragjedinë e ndodhur.

Kastriot Islami: Ka një traumë. Vetëm heshtja jonë sot do të ishte fjala më e mirë për të mos krijuar perceptim negativ për të gjithë klasën politike. Me heshtjen tonë të japim mesazhin për të gjithë kolegët ndaj bashkohem me idenë e ndërprerjes së seancës për ditën e sotme. Sepse mund të kishte ndodhur edhe më keq, pasi dihet çfarë rruge ka bërë helikopteri dje.

Sabit Brokaj: Aspekti njerëzor është kryesori. Humbja ishte shumë e madhe sepse humbën njerëzit. Helikopteri presidencial nuk i plotëson kushtet dhe ne e njohim këtë mjet. Ka probleme, por që nuk kanë të bëjnë me qeverinë por me standardet që duhen parë profesionalisht.

Bamir Topi: Për këtë tragjedi janë angazhuar të gjitha strukturat e shtetit. Të gjithë e kemi të freskët tragjedinë e 9 Janarit; vetëm për t’i kthyer reston kësaj opozite që dje ka qenë në qeveri, por ju e dini fare mirë që kryeministri i asaj kohe vazhdonte vakancat. Maxhoranca ka ndjeshmërinë e madhe sepse bëhet fjalë jo vetëm për një koleg, por edhe një ndjeshmëri e lartë shoqërore.

Tritan Shehu: Ndihma mjekësore nuk ka munguar me të gjitha mundësitë dhe është një ndihmë e kualifikuar. Për problemet e tjera duhet të diskutojnë specialistët, pasi të merret informacioni i nevojshëm dhe të gjenden provat. Pavarësisht nga kjo që ndodhi, çdo gjë u bë për t’i ardhur në ndihmë atij njeriu.

[Brari]

vazhdimi

rrezimi i helikopterit
reportazh

Ja kush është mjeku anestezist që humbi jetën në aksident


Sandër Baloi të premten mori diplomën e masterit




Rezarta Delisula
Ka vetëm pak ditë që mori diplomën e masterit, apo siç quhet ndryshe, studimet pasuniversitare. Doli shkëlqyeshëm, por nuk mundi të shijojë kënaqësinë pas gjithë atyre orëve mbi libra, apo t’i jepte drekën e premtuar miqve.

Aleksandër Baloi, mjeku i specializuar reanimator, u aksidentua në helikopterin që shoqëronte në Itali Gramoz Pashkon. Eshtë e lehtë të gjesh shtëpinë e Sandrit. Na thonë që e ka diku përballë Pediatrisë, por grupet e njëpasnjëshme të mjekëve të veshur me të bardha, na orientojnë drejt. Nga hyrja e pallatit një mjek reanimator del duke qarë e pasi ndahet me miqtë drejtohet nga spitali.

Shpresë
Shtëpia e mjekut ndodhet në një pallat të ri, në katin e 6. Orët e para të mëngjesit të djeshëm dhe lajmi i helikopterit të rrëzuar në detin Adriatik, kanë qenë traumatizuese për familjen. Të dielën Sandri e kishte kaluar me gruan e tij, mjeke gjinekologe në Maternitetin e vjetër dhe nënën. Pas telefonatës urgjente ai kishte dalë nga shtëpia në mbrëmje, duke i lajmëruar të mos bëheshin merak. Dy dyert e katit të 6 janë të hapura, e mes tyre janë vendosur karrige. Shtëpia e Sandrit është e thjeshtë. Në dhomën e pritjes qëndrojnë së bashku e ëma, e motra dhe gruaja. Rreth tyre shumë familjarë e të afërm. Nëna e Sandrit, që është rreth të 60-ave, mbahet fort. Zija ka pllakosur, edhe pse familjarët qëndrojnë me shpresën se mos djali i tyre i ka shpëtuar aksidentit. Ministri, Maksim Cikuli, zv/ministrat Arben Ivanaj dhe Zamira Sinoimeri, ish-ministri dhe kryetari i Komisionit Parlamentar të Shëndetësisë, Tritan Shehu, drejtori i QSUT-së, Paskal Cullufi, shumë mjekë e kolegë, si dhe mjekë nga Materniteti i Tiranës vizituan familjen Baloi, që në orët e para të mëngjesit e në vijim. Fqinja përballë përgatit kafe dhe raki për ata që vijnë. Të shpërthyera vajesh ndizen nga lajmet që shfaqen në televizor. E ëma është ulur pranë ekranit. Ka veshur një fustan blu me të bardhë, jo rroba zie. Shpresa e mban më të fortë. Ora shënon 14:00 e mesditës dhe shfaqja në ekran e kryeministrit Berisha dhe fjalët e thëna për pilotët, mjekun, Gramoz Pashkon dhe të birin, shkaktoi reagim. Nëna që deri në ato momente u mbajt e fortë, plasi në ngashërim, duke përmendur emrin e të birit dhe duke parë në ekran djalin e gjallë, teksa transportonte në helikopter ish-deputetin e aksidentuar. “Më jepni një aparat ta fotografoj kështu”, thoshte nëna e Sandrit, duke i rënë gjunjëve me duar.

I vogli
Teksa e ëma takonte miqtë e Sandrit, që vinin në shtëpi grupe-grupe, ajo tregoi se si djali i saj në vogëli ka qenë i sëmurë e jeta e tij ishte në rrezik. Që pas shërimit djali vendosi të studiojë mjekësi. Aleksandër, apo Sandër Baloi, ka lindur më 22.06.1966 në rrethin e Mirditës. Studimet i kreu në Universitetin e Tiranës në fakultetin e Mjekësisë, në vitet 1985-1991. Pas shkollës ai punoi si mjek i përgjithshëm në spitalin e qytetit të Rrëshenit dhe në Qendrën Shëndetësore të Fierzës. Në vitet 1996-1999 ka kryer specializimin për mjek anestezist reanimator pranë klinikave të qendrës spitalore universitare “Nënë Tereza”, Tiranë. Në vitin 2002-2003 ka kryer specializimin njëvjeçar për mjek anestezist reanimator në spitalin e Bichat-Claude-Bernard në Paris, Francë. Pas kryerjes me sukses të specializimit është rikthyer për të shërbyer në QSUT pranë shërbimit të Anestezi-Reanimacionit. Orët e punës i kalonte pranë pacientëve në ndjekjen postoperatore të tyre dhe veçanërisht të atyre me probleme të transplanteve renale. Kolegët thonë se etja e tij për dije e për të qenë një mjek sa më i zoti, nuk mbaroi me specializimin në Francë. Javës që shkoi ai mori diplomën e masterit. Përkushtimi e bëri Sandrin të ishte një ndër mjekët më të përzgjedhur në raste emergjente. Por fati i mjekut 40-vjeçar anestezit-renimator, ishte aty, në luftë për të shpëtuar një pacient në rrezik për jetën.



Në Llogara
Aksidenti i ’89, pilotë e mjekë humbën jetën

Në luftë për të shpëtuar jetë njerëzish. Ky është misioni i pilotëve dhe mjekëve, të cilët, duke formuar ekuipazhe të përbashkëta, shkojnë atje ku jetët janë në nevojë. Një ngjarje e rëndë, nga më të rëndat e ndodhura në vendin tonë është 22 nëntori i vitit 1989. Nga qafa e Llogarasë, dy autobusë me studentë të vitit të fundit të Institutit Bujqësor të Kamzës rrëzohen në greminë. Një pjesë e madhe e tyre humbën jetën në vend, ndërsa të tjerë luftonin me vdekjen. Dy helikopterë të ndihmës së shpejtë, që ishin në gatishmëri bashkë me një ekip mjekësh, u nisën për të shpëtuar të mbijetuarit, por tragjedia u thellua edhe më tej. Për shkak të motit shumë të keq, dy helikopterët u përplasën në Palas, ndërsa pilotët dhe mjekët humbën jetën para se të arrinin në destinacionin final. Zv.komandanti i Regjimentit, Vangjel Pistoli, Agron Galanxhi, Tafil, Veledin Resuli, Pandeli Zhupa dhe Enver Haka ishin në ekuipazhin e pilotëve, e bashkë me ta edhe tre mjekët e infermierët që ishin nisur nga Tirana për të shpëtuar jetën e studentëve. Ushtarakët e Regjimentit të Farkës që ranë në këtë aksident ajror janë shpallur “Dëshmorë të Atdheut” më 22.04.1996 dhe prehen në Varrezat e Dëshmorëve të Kombit.



“Kemi humbur një pjestar të familjes tonë të madhe”

Mjekët: Gabim nisja e helikopterit në darkë
Si e përjetuan kolegët në spitalin nr.2 aksidentin fatal

Të mbledhur në dhomat e vogla, korridoreve me dritë dhe në oborrin e spitalit nr.2, bisedat vërtiteshin vetëm tek një njeri, miku i tyre Aleksandër Baloi, i cili ndodhej në krye të detyrës për të shpëtuar jetën e një pacienti, atë të Gramoz Pashkos. Pak janë ata mjekë e infermierë, që flasin për ish-deputetin. Thonë që djali i tij 24-vjeçar insistoi që ta çonin jashtë e që pacienti pak shpresa kishte për të jetuar. Shumë prej tyre mendojnë se ishte gabim nisja e një helikopteri natën. “Mund të prisnin mëngjesin, sepse shpresat ishin të vakta”, thonë disa mjekë, ndërsa infermiere të tjera diskutojnë që ai ishte gjysmë i vdekur. Këto të fundit thonë se kur barrela doli nga dera e urgjencës, kishin parë vetëm fytyrën e deputetit të fashuar e me oksigjen, ndërsa të gjithë nxitonin për te fusha e Infektivit, ku u nis helikopteri. Ndërkaq, për Sandrin dinin shumë detaje. Që ai kishte qenë pushim të dielën, ku e kishte shtëpinë, me kë jetonte, nga ishte...dhe mbi të gjitha që ishte mjek i njerëzishëm dhe specialist i mirë. Aleksandri punonte te reparti i Urologjisë, por duke qenë një ndër anestezistët më të mirë ai thirrej sa herë kishte urgjenca, apo për shoqërimet jashtë shtetit. Në repartin e Urologjisë mjekët e shokët e tij na tregojnë se Sandri ishte djalë i mbarë e kjo duket, pasi në fytyrat e të gjithëve shihet dhimbje. “Çfarë djali ishte, të gjithë mjekët në spital kanë qarë sot”, na thotë një infermiere, e para që pyesim te spitali 2 për mjekun 40-vjeçar. Të gjithë lajmin për helikopterin e rrëzuar e kanë marrë vesh në mëngjes, e po kështu pjesa më e madhe e tyre e mësuan po në mëngjes që Sandri ishte nisur me të. Kolegët e tij të Urologjisë tregojnë se prej disa muajsh ata ishin bërë shumë të afërt e hanin dreka bashkë në fundjavë. Përveçse e lavdëronin si njeri të qetë e të gjindshëm, ato thonë se profesionalisht Sandri ishte ndër më të mirët në zanatin e tij. “Eshtë njësoj sikur humb një njeri të shtëpisë, sepse kështu ishim bërë ne me njëri-tjetrin”, thonë infermieret e Urologjisë me sytë e ënjtur nga të qarët. Ndihet një lloj nervozizmi i shkaktuar nga humbja e kolegut të tyre. Që prej vitit 1989, kur tre mjekë dhe infermierë humbën jetën në mënyrë tragjike në Llogara, incidente të këtij tipi s’ka pasur më. Mjeku, Ilir Ohri, që asistoi në gjithë aksidentin e djeshëm, është i lodhur dhe i rrënuar. Të njëjtën pamje kanë edhe punonjësit e tjerë të urgjencës, e sidomos kolegët e tij të Urologjisë. Një pjesë e kirurgëve dhe mjekëve kanë shkuar në shtëpinë e Sandrit që hapi dyert që në mëngjes, të tjerë nuk guxojnë, nuk dinë ç’t’i thonë nënës së mjerë dhe nuses së re. Një prej mjekëve na tregon se nuk ka pirë kafe e raki në shtëpinë e Sandrit, pasi trupat e viktimave të aksidentit ende nuk janë gjetur. Humbja në det e Aleksandër Baloit ka prekur të gjithë mjekët e spitalit nr.2, ndërsa flasin me superlativa për mikun e tyre të ndjerë.




INTERVISTE/ Mjeku himarjot: Desh u mbytëm me gomonen e policisë

“Pashko 30 minuta në det pasi u përplas me shkëmbin”
“Edhe unë rrezikova jetën për të shpëtuar Gramoz Pashkon, por fati e deshi që të shpëtonim”.

I tronditur nga lajmi i rrëzimit të helikopterit, Jani Gjoka, mjeku që erdhi nga Himara me gomone për t’i dhënë ndihmën e parë Pashkos, tregon për gazetën se në çfarë gjendje e gjeti politikanin, direkt pas incidentit. Deti i trazuar ka rrezikuar edhe gomonen e policisë së Himarës që të përmbysej, por fatmirësisht mbërritën të gjallë deri në plazhin e Dhralës, pas një gjysëm ore të frikshme mes dallgëve.

Zoti Jani, në ç’orë morët njoftimin se Gramoz Pashko kishte rënë pa ndjenja dhe ndodhej në gjendje kritike për jetën?
Ka qenë ora 13:30 e së dielës, kur punonjësi i policisë së Dhërmiut më njofton se Gramoz Pashko ishte në gjendje kome në zonën e Dhralës dhe duhej shkuar në ndihmë të tij urgjentisht. Ndërkohë punonjësi i policisë, Fadil Shehu, erdhi në Himarë, ku dhe më shpjegoi se çfarë kishte ndodhur. Vlerësuam situatën e krijuar, morëm medikamentet e nevojshme dhe u bëmë gati për disa minuta. Për të shkuar më shpejt hipëm në gomonen e policisë. Pas disa minutash erdhi gomonia e policisë, por për të shkuar në vendngjarje patëm shumë vështirësi, sepse dallgët arrinin në 5 ballë. Disa herë rrezikuam jetën, pasi dallgët mund të përmbysnin gomonen. Por fatmirësisht shpëtuam dhe mbërritëm në vendngjarje për 30 minuta udhëtim të tmerrshëm.

Ku ishte trupi i Pashkos kur ju mbërritët në vendngjarje?
Trupi i Pashkos ishte midis shkëmbinjsh, në buzë të detit pa ndjenja, i rrethuar nga familjarët e tij, miq dhe shokë që ndodheshin me të. Kur u afrova, ai nxirrte shkumë nga goja dhe nga hunda, si dhe kishte rrahje të shpejta të zemrës. Në pjesën midis dy syve kishte një plagë, një të çarë, e cila me sa duket i kishte shkaktuar traumë cerebrale. Së bashku me mjekun e Dhërmiut, i cili kishte mbërritur para nesh, i dhamë ndihmën e nevojshme dhe së bashku me personat që ndodheshin aty e vendosëm në barelë dhe me litar, me vështirësi të madhe e kemi nxjerrë nga shkëmbinjtë. Na u desh rreth 20 minuta përpjekje, pasi terreni ishte shumë i vështirë dhe gjithë shkëmbinj. Pas disa minutash erdhi dhe ambulanca e Dhërmiut dhe e Himarës me shumë vështirësi, sepse rruga është shumë e vështirë. Sapo erdhi ambulanca i vendosëm oksigjenin për t’i dhënë frymëmarrje artificiale. Nga ana tjetër ishte njoftuar ministria, e cila kishte nisur helikopterin dhe na thanë të mos e lëviznim sepse do ta merrte helikopteri për ta transportuar për në Tiranë. Helikopteri ka arritur pas 40 minutash dhe pati vështirësi të mëdha në ulje, por piloti ia doli falë ndihmës së forcave të policisë së Vlorës. Në vendngjarje ndërkohë kishin ardhur shumë mjekë dhe vetë drejtori i spitalit të Vlorës, Luter Nuraj. Pas uljes së helikopterit, mjekët e ardhur nga Tirana i bënë ndërhyrje tjetër dhe me shpejtësi e hipën ne helikopter me barelë, ku dhe u transportua për në Spitalin Ushtarak të Tiranës.

Çfarë i kishte ndodhur Pashkos?
Mësova se Pashko kishte shkuar në plazh që herët në mëngjes së bashku me familjen e tij dhe disa miq të tyre. Deri në zonën e plazhit kanë shkuar me një makinë tip fuoristradë të fuqishme, sepse rruga është shumë e vështirë dhe një pjesë e konsiderueshme është zhavorr. Pasi kanë qëndruar disa orë janë futur në det për t’u larë disa persona, mes të cilëve dhe Gramozi. Vendi ku ata po laheshin ka qenë plot me shkëmbinj. Të tjerët kanë dalë nga uji, ndërsa Pashko ka vazhduar të notojë dhe disa minuta më vonë. Në një moment ai ka hipur në një shkëmb, nga ku dhe ka përshëndetur me dorë personat që ishin me të. Për rreth 30 minuta më vonë ai nuk është parë më dhe familjarët të shqetësuar kanë nisur ta kërkojnë të alarmuar. Dhjetë minuta më vonë, me vështirësi kanë dalluar midis shkëmbinjsh e dallgësh trupin e tij përmbys, me fytyrë në ujë. Kanë ndërhyrë me vështirësi dhe shpejtësi sepse deti kishte dallgë dhe siç thashë, zona ka shumë shkëmbinj të rrezikshëm. Ata kanë arritur ta nxjerrin nga deti në një cep, ku dhe nuk vinin dallgët, por pa e nxjerrë në terren të hapur, pasi lartësia e shkëmbinjve ka qenë rreth 3 metra dhe për ta nxjerrë nga andej duhej litar dhe barelë. Me mënyra të ndryshme i është dhënë ndihma nga të pranishmit, por prapë nuk është përmendur. Kur nuk ka pasur asnjë shenjë përmirësimi, atëherë kanë njoftuar policinë, spitalin e Vlorës dhe mjekët e Dhërmiut.

Pse i ishte shkaktuar plaga?
Mendoj se Pashko, pasi ka hipur në shkëmb i ka rrëshqitur këmba dhe ka rënë në det. Koka i ka rënë në një shkëmb, ku dhe ka marrë goditjen dhe çarjen midis syve, sipër hundës, e cila i ka shkaktuar traumë cerebrale të menjëhershme, si dhe gjendjen e komës. Nëse familjarët nuk do të ndërhynin shpejt, trupi i tij mund të ishte fundosur dhe mbytur.



Cikuli: Helikopteri qeveritar, zgjidhja më e shpejtë që kishim

“Në fillim paniku ishte i madh dhe nuk dihej ende çfarë kishte, disa mendonin që mund të ishte infarkt. Nuk ishim pra në dijeni se çfarë kishte ndodhur. E vërteta është që ai është gjendur, është nxjerrë në breg me simptomat e të mbyturit. Ndërkohë që kishte dhe një shenjë në kokë, një plagë, çka të bënte të mendoje që ndoshta kishim të bënim me një aksident gjatë zhytjes në ujë”. Kështu rrëfen ministri i Shëndetësisë momentet e para të ekzaminimit të Gramoz Pashkos. Cikuli ndodhej në Vlorë kur mësoi lajmin e aksidentit që kish pësuar miku i tij në Himarë. Menjëherë ai dërgoi në vendndodhje një helikopter të shëndetësisë për t’a transportuar Pashkon në Qendrën Spitalore Universitare.
Pas panikut që përfshiu të gjithë ekzaminimet e para të trurit, palcës dhe zemrës, rezultuan me defekte relativisht jo të rënda. Problemin më të madh e kishin pësuar mushkëritë, të cilat ishin të mbushura me ujë, pas qëndrimit një kohë të gjatë pa ndjenja në det. “U fillua një oksigjenim shumë intensiv, por duhet të kuptoni që pasojat e hipoksisë janë të rënda në radhë të parë për trurin. Pra, ne nuk dinim bilancin e kores së trurit së mikut tonë. Përveç kësaj, duke qenë mushkëritë të tejngopura me ujë, e dinim që në ditët që do të pasonin do të kishte shumë probleme, infeksione dhe insuficencë respiratore”, vijon Cikuli. Sipas tij, pas konsultës me mjekët më të mirë reanimatorë dhe neurokirurgë, u vendos që Gramozit i duhej bërë një trajtim në një klinikë më të mirë se QSUT. “Nuk është puna se nuk mund ta ofrojnë mjekët e QSUT-së këtë, por që të bëhet bilanci kortikal dhe një reanimacion intensiv i cilësisë së lartë, ka dhe vende që e bëjnë shumë më mirë dhe që japin më shumë garanci për jetën sesa ne”, sqaron Cikuli. Sipas ministrit, helikopterët e Ministrisë së Shëndetësisë nuk kanë pajisje për natën e ky ka qenë shkaku që u mor helikopteri më i mirë në vend dhe i pajisur për të tilla fluturime natën. Ka pasur disa variante për transportin e Gramoz Pashkos, një avion nga Greqia, nga Kosova dhe nga Italia, pasi shteti dhe ambasadat e huaja po interesoheshin shumë, por, sipas Cikulit, helikopteri qeveritar ishte varianti më i shpejtë dhe më i sigurt që doli. re.de



--
rrezimi i helikopterit
reagimi i familjareve

INTERVISTA/ Flet Isufi, vëllai i pilotit të zhdukur: Telefonata e fundit


“Demushin po e prisnim, ishte 1-vjetori i vëllait”




Florenc Bakillari
Isuf Heba mezi i përmban lotët. Ndalon shpesh dhe fshin sytë. Vëllai i pilotit Demush Heba pret me ankth një përgjigje për fatin e të afërmit të tij. Thuajse i kanë humbur shpresat se vëllai i tij është ende gjallë.

“Demushi ishte një pilot i shkëlqyer dhe një ushtarak model. Dje donte të vinte, pasi kishim vitin e vdekjes së vëllait tjetër. Por nuk e la detyra”, rrëfen Isufi. Mes dhimbjes, Isuf Heba tregon për jetën e të vëllait. Kontaktet e fundit që kishte pasur me të. Dyshimet për urdhrin e nxituar që ngriti në ajër helikopterin tip “Bell 222”, që përdorej nga Garda e Republikës. Mes pikëllimit Isufi kërkon nga shteti që të bëjë të pamundurën për të gjetur trupin e vëllait të tij. Po kështu të mendojë edhe për dy fëmijët e Demush Hebës, të cilët mbetën jetimë, pasi vëllai i tyre ra në krye të detyrës.

Cilat ishin kontaktet tuaja të fundit me vëllanë?
Ne sot kishim njëvjetorin e vëllait, Agimit, i cili vdiq ditën e zgjedhjeve në 3 korrik si pasojë e një infarkti. Fola në telefon me Demushin dhe i thashë të mos vinte, por ai këmbënguli. Kam folur në telefon dje rreth orës 20:00 dhe më tha se do të nisej. Sapo kishte ardhur nga Pogradeci, me kryeministrin dhe do të gjente ndonjë makinë që të vinte deri në Shkodër. Aty do të dilte ta priste vëllai tjetër me makinë dhe do të vinte në Malësinë e Madhe. Nuk e di, por kishte një parandjenjë që duhet të vinte patjetër, edhe pse i thashë disa herë që të rrinte në Tiranë. Nga ora 21:00 më mori në telefon dhe më tha se nuk vinte dot, pasi e kishin kërkuar. Duhet të fluturonte përsëri, këtë herë për në Itali. Fillimisht nuk u shqetësuam pasi fluturime të tilla ai ka bërë me dhjetëra.

Kush ju lajmëroi se helikopteri që drejtonte vëllai juaj kishte humbur?
Kanë marrë telefonatë nga Garda e Republikës. Unë u nisa menjëherë nga Malësia e Madhe. Kanë ardhur disa nga drejtuesit e Gardës dhe vetë komandanti i saj. Na kanë siguruar se po bëjnë të pamundurën për t’i gjetur. Mbase janë ende gjallë dhe kanë mundur të shpëtojnë. Por unë kam enigmat e mia në kokë. Ende nuk dimë asgjë. Të vetmet gjëra i kemi mësuar nga televizioni dhe ato që tha komandanti i Gardës. Demushi ishte një nga pilotët më të mirë që kanë pasur forcat ajrore shqiptare. Po ashtu edhe Vangjel Çondi ishte pilot model. Nuk besoj se mund të jetë ndonjë gabim i pilotëve. Ata ishin profesionistë, pasi nuk ishte hera e parë që fluturonin.

Pse dyshoni se diçka nuk ka shkuar me helikopterin?
Nuk e di, por deri në orën 20:00, im vëlla nuk dinte ende se do të fluturonte për në Itali. Ai sapo kishte sjellë kryeministrin Berisha nga Pogradeci. Helikopteri nuk është kamion që e ndalon kur të duash, e mbaron punë. Nuk e di në çfarë kushtesh teknike ka qenë mjeti. Kush dha urdhrin për t’u nisur me helikopter. Si ka qenë koha në det dhe pse helikopteri nuk u shoqërua nga një mjet tjetër. Kush e verifikoi gjendjen teknike para se të nisej. Ata u nisën me mjaft urgjencë dhe urdhrat janë dhënë në momentet e fundit, mbase me telefon. Gjatë gjithë kohës kur helikopteri ka qenë i ulur afër Qendrës Spitalore, dy pilotët nuk kanë zbritur nga helikopteri. Mbase është shpejt për të folur.

Çfarë prisni nga shteti tashmë?
Ende nuk jam i qartë. Këtu janë shumë njerëz që vijnë dhe ikin. Duhet të bëhet e pamundura për të gjetur helikopterin së bashku me trupat. Të gjenden personat që autorizuan ngritjen e tij në ajër. Çfarë plani ishte bërë për fluturimin. Po kështu të mendojnë edhe për fëmijët e Demushit, i cili ra në krye të detyrës, edhe pse shpresoj ende se ata mund të jenë gjallë.



Familjarët: S’flasim, kemi shpresë
“Vangjeli kishte 30 vjet që fluturonte”

TIRANE - Vangjel Çondi kishte gati 30 vjet që fluturonte. Një pilot i aftë dhe mjaft korrekt, veti këto që kishin ndikuar që Vangjeli të drejtonte helikopterin me të cilin fluturonte kryeministri dhe presidenti. Kishte ardhur që i vogël, nga Saranda dhe pasioni i tij ka qenë fluturimi. Diplomohet me rezultate të shkëlqyera dhe emërohet në repartin e Helikopterëve në Fark. Më pas kalon në shërbim të Gardës. Ditën e djeshme në shtëpinë e pilotit Çondi, në rrugën “Ndreko Rino”, familjarët ende shpresonin në një mrekulli duke menduar se njeriu i tyre është gjallë. Vangjeli banonte në katin e katër të pallatit të pilotëve. Pallati nuk ka shumë kohë që është ndërtuar dhe banorë të tij janë disa pilotë të forcave ajrore. Familjarëve të shqetësuar ende nuk iu besohej ajo që kishte ndodhur. I vëllai i Vangjelit, shpreson ende. “Nuk dua të flas tani. Ne nuk i kemi humbur shpresat, mbase më vonë mund të flasim”, e mbyll vëllai i pilotit Vangjel Çondi. Por edhe pse shpresonin gratë e familjes Çondi ishin veshur me të zeza. Ndërkohë që një nga të afërmit, sqaron se Vangjeli ka qenë një pilot mjaft i mirë. Kishte një jetë që fluturonte dhe e njihte qiellin si shtëpinë e tij”. Së bashku me Demush Hebën, ata kishin qenë në Pogradec për të marrë me urgjencë kryeministrin Berisha, i cili pushonte në vilën qeveritare. f.b



E shoqja priste mesazhin nga Italia
“Pamë helikopterin e Demushit te lajmet”

Hasan Lekaj, një mik i familjes Heba ka qenë i pranishëm në momentet kur gruaja e Demushit dhe të afërmit e tjerë kanë mësuar lajmin e hidhur për zhdukjen në Adriatik të helikopterit me 6 persona në bord. "Ai lajmëroi të vëllanë se po nisej në një shërbim urgjence dhe ndoshta nuk kthehej deri të hënën. Kur mësuam për lajmin e aksidentit të Gramoz Pashkos te lajmet, aty dalluam dhe helikopterin e Demushit, se këtu te ne vetëm një është i tillë. Ndërsa e shoqja po priste nga momenti në moment që Demushi t'i sillte mesazh që kishte arritur shëndoshë e mirë, siç bënte zakonisht, por kjo nuk po ndodhte dhe pse kaluan 2-3 orë. Dyshuam se kishte ndodhur ndonjë gjë e keqe dhe vetëm në mëngjes mësuam për tragjedinë e ndodhur në det". Lekaj kujton se Demushi, ndonëse i larguar prej 26 vjetësh nga fshati i lindjes, në Reç ishte një shembull për banorët e zonës dhe një idhull për fëmijët për profesionin e tij. "Nuk mund të kalonte ndonjë avion apo helikopter mbi zonën e Reçit dhe të gjithë bërtisnin: Po kalon Demushi. Kjo është e vërtetë sepse sa herë që ai ishte me shërbim në zonat veriore nuk e linte pa u rrotulluar 2-3 herë mbi zonën e Reçit në shenjë përshëndetje për ne", tregon Lekaj. Piloti 46-vjeçar u nis me shërbim drejt Italisë vetëm pak kohë nga kthimi prej një tjetër shërbimi, duke vlerësuar shpëtimin e jetës së një njeriu para detyrimit familjar që e priste, pa menduar se do të rrezikohej dhe jeta e tij.



Historia e Demush Hebës, përshëndetej nga Moisiu
Majori që fluturoi me personazhet VIP

TIRANE- Presidenti Moisiu kishte krijuar aq besim te majori Demush Heba saqë pas disa fluturimeve për në Pogradec dhe Sarandë, kreu i shtetit kishte filluar ta përshëndeste pilotin si një koleg të tij. Pilotët e tjerë dhe stafi i aviacionit qeveritar tregojnë se Moisiu, një ushtarak me përvojë, sa herë që lëvizte me helikopterin “Bell 222” të drejtuar nga Demush Heba përshëndeste në formulën ushtarake. Edhe personazhe të tjera VIP të politikës shqiptare ishin ambientuar me pilotin që nuk ishte ndarë asnjëherë nga helikopteri elitë i Shërbimeve Qeveritare Shqiptare. Në orare të zgjatura dhe punë të vështirë, e për më shumë me përgjegjësinë e drejtimit të një helikopteri në të cilin ndodhet kryeministri, presidenti, apo ambasadori. Kjo, sipas kolegëve, ka qenë karriera dhe detyra e Demush Hebës. Sipas burimeve, Heba është titulluar pilot në vitin 1982 dhe aktualisht mbante gradën e majorit. Në vitin 1978-1982 ka mbaruar Akademinë e Lartë Ushtarake në Tiranë. Demush Heba vinte nga Malësia e Madhe dhe me mjaft punë arriti të mbaronte me rezultate të shkëlqyera shkollën e lartë. I martuar me dy fëmijë, Demushi banon në një apartament në katin e parë në pallatin nr. 208, në hyrje të rrugës “Mine Peza”, sapo kalon “Zogun e Zi”.



Fluturimet e “Bell 222” pas remontit në 31 maj në Gjermani
Helikopteri i tragjedisë solli Berishën nga Pogradeci

Mjeti fluturues, i cili është bërë mesnatën e të dielës objekt i një aksidenti, me pasojë zhdukjen e gjashtë personave, ishte helikopteri më i mirë i Shërbimeve Qeveritare në Shqipëri.

Me këtë helikopter ka udhëtuar drejt Pogradecit në fundjavë kryeministri, Sali Berisha, i cili pas një qëndrimi 1-ditor, ku është takuar edhe me homologun e tij kosovar, ka zgjedhur të rikthehet në Tiranë me të njëjtin mjet fluturues. Kthimi i kreut të qeverisë shqiptare në Tiranë ka ndodhur vetëm pak orë para se i njëjti helikopter të merrte komandën e nisjes në drejtim të Italisë. Por përshkrimi i distancës nga Tirana në Pogradec dhe rikthimi në kryeqytet, nuk ka qenë lëvizja e parë e kryeministrit Berisha me helikopterin që u aksidentua të dielën. Sipas burimeve qeveritare, helikopteri “Bell 222” kishte udhëtuar drejt Kosovës, gjatë vizitës së zhvilluar atje nga kryeministri Sali Berisha. Mjeti fluturues ishte vënë në dispozicion të grupit të gazetarëve dhe punonjësve të tjerë të medias, që janë marrë me mbulimin e vizitës së bërë nga kreu i qeverisë shqiptare në Kosovë. Sipas burimeve nga Garda e Republikës, helikopteri është vënë në përdorim pas datës 31 maj 2006, kur është kthyer nga remonti që i është bërë në Gjermani. Remonti sipas burimeve ka zgjatur më shumë se shtatë muaj, kohë gjatë të cilës helikopteri nuk është vënë në përdorim. Burimet e Gardës, janë shprehur se helikopteri ishte një nga më të mirët që ndodheshin në Shqipëri, dhe se remonti i tij kishte kushtuar 1.5 milionë dollarë, sa çmimi fillestar me të cilin ishte blerë mjeti fluturues i prodhimit amerikano-kanadez më shumë se 20 vite më parë. Burimet thanë se remonti ishte kryer në uzinën e specializuar në “Baden Baden”, të Gjermanisë. Sipas burimeve nga Garda e Republikës, dy pilotët që ndodheshin duke drejtuar helikopterin, në momentin kur ndodhi aksidenti, kanë qenë drejtues të përhershëm të mjetit fluturues. Zyrtarët konfirmuan që helikopteri ishte drejtuar nga i njëjti pilot që në momentin kur ka mbërritur në Shqipëri, pasi ishte blerë më qëllimin e lëvizjes së personaliteteve qeveritare. Shenjat dhe sinjalistika karakteristike e helikopterit ishin ndërtuar në mënyrë të tillë, që të merrnin konfirmim për çdo lëvizje në hapësirat e huaja territoriale. Burimet nga Garda e Republikës janë shprehur se helikopteri është vënë në përdorim edhe nga ish-kryeministri Nano, i cili në fakt mësohet se nuk është lejuar asnjëherë nga stafi i tij i sigurisë që të fluturonte natën me këtë mjet. t.s/a.i



Te dhenat

I blerë në vitin 1985
Çmimi 1.5 milionë dollarë
Remonti në Gjermani, përfunduar 31 maj 2006
Model 222B
Kapaciteti i vendeve: 1-2+7-8
Dimensionet
Gjatësia e helikave: 12.8m (42ft)
Gjatësia e Mjetit: 12.85m (42’2ft)
Pesha bosh: 2,223kg (4,900lb)
Pesha maksimale: 3,742kg (8,250lb)
Amplituda: 532km (333miles)
Lartësia maksimame: 15,800ft (4,815m)



Fluturimet nga 1990 të ish-presidentit të parë te përdorja nga ambasadorët
“Bell 222”, presidenciali që shërbeu për Alian, Moisiun dhe diplomatët

Afrim imaj


TIRANE - “ZA Hotel Oskar Vita” është identiteti i helikopterit qeveritar “Bell 222”, i cili u aksidentua një natë më parë në ujërat e Adriatikut. I destinuar për fluturime speciale, me një ekuipazh pilotësh e teknikësh nga më të mirët. Ish-presidenti, Ramiz Alia, ka qenë i pari personalitet i lartë që ka fluturuar me helikopterin qeveritar “Bell 222” (ZA HOV). Në vijim kanë qenë qeveritarët demokratë të ardhur në pushtet pas zgjedhjeve të 22 marsit 1992, që kanë provuar të udhëtojnë me helikopterin, e quajtur tashmë Presidencial. Nga figurat më të larta politike që kanë fluturuar me të kanë qenë ish-sekretari i Mbrojtjes, i SHBA-së, Uilliam Perri, i cili e ka përdorur avionin presidencial nga stadiumi “Qemal Stafa” në brigjet e Zallherrit, ku trupat amerikane “Renxher” zhvillonin një stërvitje të përbashkët me komandot shqiptare. Kanë fluturuar ndërkaq me helikopterin qeveritar “Bell 222” ish-ambasadori i SHBA-së, Limpreht, Mariza Lino, ish-përfaqësuesi i OSBE-së në Tiranë, Dan Everst dhe mjaft personalitete të tjera të huaja, që kanë shërbyer në vendin tonë. Ish-kryeministri, Nano, ka qenë disa herë mysafir i ekuipazhit të këtij avioni dhe i ka qëlluar që me të të vizitojë një pjesë të madhe të zonave të vendit. Presidenti Moisiu ka bërë disa fluturime, sidomos në Sarandë dhe Pogradec, ku ka qenë i pranishëm në takime të ndryshme politike. Vetëm pak ditë më parë ka udhëtuar me këtë avion për në Kosovë kryeministri Berisha. Kryeministri Berisha është regjistruar tashmë në librin e fluturimeve të Bellit 222 “ZA HOV”, si personaliteti i fundit që ka udhëtuar me të në itinerarin Pogradec-Tiranë, vetëm pak orë se ky të aksidentohej në ujërat e Adriatikut. Me mbresa nga më të mirat janë ndarë me pilotët e avionit presidencial të gjithë VIP-at që kanë pasur rastin të fluturojnë me të. Nuk është e rastit që mjaft syresh janë njohur me ta gjatë fluturimeve dhe kanë vazhduar miqësinë edhe më tej. Interesant ka qenë reagimi i presidentit Moisiu, që në çdo kontakt me ta, madje edhe kur nuk janë në detyrë, është përshëndetur me pilotët ushtarakisht.
--

rrezimi i helikopterit
intervista

Flet shefi i njësisë së helikopterëve të shëndetësisë, Aleksandër Koli: Më mirë të ishte nisur në mëngjes


“Pse s’u nis helikopteri i Shëndetësisë”

Koli: S’mund të udhëtonim natën. Po prisnin një çarter nga Bari


Bbrikena Demiras
Helikopterët e Ministrisë së Shëndetësisë nuk mund të udhëtojnë gjatë natës, kur ndriçimi është i dobët, apo në kushte të këqija atmosferike.

Madje, një mision i tillë, sipas Aleksandër Kolit, shefit të njësisë së transportit mjekësor të Ministrisë së Shëndetësisë, është i vështirë për të gjithë pilotët në Shqipëri. Në një intervistë për gazetën “Panorama” ai tregon detajet e shoqërimit nga Palasa në Tiranë të profesorit Gramoz Pashko, si dhe planin rezervë të fluturimit për orët e para të mëngjesit.

Helikopterët e Ministrisë së Shëndetësisë bënë transportimin e pacientit për në Tiranë. Kur e morët urdhrin për t’u nisur në detyrë?
Rreth orës 13:00 morëm urdhër nga ministri i Shëndetësisë për të dërguar helikopterin në Palas, duke më shpjeguar me saktësi edhe vendin se ku duhet të uleshim, pra se ku ishte pacienti, sepse Palasa shtrihet në një territor të gjerë dhe mund të mos e gjesh tamam vendin se ku duhet të ulesh. Kështu u nis helikopteri, 20 minuta pas marrjes së detyrës përcaktuam vendin, që ishte në afërsi të bregut. Në fillim u ul në një vend tjetër, sepse nuk panë njerëz të mbledhur dhe nuk e kuptuan vendndodhjen e saktë, pastaj na dhanë një informatë tjetër me telefon, pasi u lidhëm me ekuipazhin, na dhanë një informatë më të saktë, një shenjë që aty pranë ishte një skaf dhe e morën. Sjellja e pacientit u bë në rregull.

Për sa kohë është bërë transporti nga Palasa në Tiranë?
Transporti nga Palasa në Tiranë është bërë për 40 minuta, kaq është koha e fluturimit, plus edhe që pati më shumë pesha në helikopter, pasi hipën pacienti, e shoqja, mjekët dhe pilotët. Kjo vonon 4-5 minuta më tepër. Në kthim helikopteri i ra anës gjithë bregut, nga Karaburuni për në Vlorë, pra u zgjat pak udhëtimi, sepse nuk mund të kalonte sërish nga Qafa e Llogarasë, sepse do të duhej më tepër kohë.
Në orën 7, pata sërish një telefonatë nga ministri i Shëndetësisë për të parë mundësinë e një udhëtimi tjetër me helikopter për në Bari. Fluturime ne kemi kryer për në Bari, por jo në këtë orë. Duke llogaritur edhe kohën që do të duhej për të marrë pacientin nga spitali, për ta transportuar në helikopter, nisja mund të bëhej rreth orës 20:00. Fluturimi nga Tirana për në Bari zgjat zakonisht 1 orë e 30 minuta me helikopterin tonë, për shkak të shpejtësisë dhe do të kryhej në kushte errësimi. Gjë që nuk lejohet kategorikisht për këtë helikopter, sepse nuk është i pajisur me instrumentet e fluturimit natën, ka edhe plot gjëra të tjera që duhet të merren parasysh për këtë lloj fluturimi. Eshtë një fluturim jo i lehtë, jo vetëm për pilotët tanë, por edhe për pilotë të tjerë, sepse këtu tek ne mungon infrastruktura e fluturimit natën.

Përveç infrastrukturës së fluturimit natën, a janë të pajisur helikopterët me pajisje mjekësore?
Unë mund të flas për fluturimin, ndërsa pjesa shëndetësore u përket mjekëve të marrin vendime. Ne nuk duhet të krijojmë përplasje mes nevojës urgjente që ndjen mjeku dhe mundësitë reale teknike le të themi që ka helikopteri, apo edhe të resurseve njerëzore, sepse mblidhen të gjitha bashkë. Për helikopterin tonë ishte e pamundur që të kryhej. Fillimisht ramë dakord me ministrinë tonë që këtë fluturim ta kryenim në orët e para të mëngjesit të ditës së sotme. Ne përgatitëm edhe planin e fluturimit, morëm numrin e fluturimit, kërkuam klarencën, procedurat normale që ne ndjekim si zakonisht. Rreth orës 8 të darkës u dha edhe një ide tjetër, që të vinte në Rinas një avion i huaj charter për ta marrë dhe ne mund të kryenim vetëm një urgjencë, për ta marrë nga spitali dhe për ta çuar në Rinas. Këtë lloj fluturimi nate, ne mund ta kryejmë sepse është koha e shkurtër, jo më shumë së 6-7 minuta. Aq më tepër që edhe Rinasi ka pista të gjera dhe nuk ka vështirësi për uljen e helikopterit. Si përfundim u mor vendimi që të transportohej me helikopterin e presidencës.

Nëse do të ishte nisur me helikopterin e Ministrisë së Shëndetësisë pra, kjo do të ishte bërë vetëm një ditë më pas?
Natyrisht, ne fluturojmë gjatë ditës dhe në kushte të mira vizuale, jo në mjegull, muzg, kur ka reshje, etj.

Ju informoheni normalisht para se të niseni në detyrë për kushtet atmosferike?
Natyrisht, para çdo lloj fluturimi ne pyesim shërbimin meteorologjik për kushtet e veçanta të motit, sidomos kur kemi dyshime. Parashikimi i situatës sinoptike në vendin tonë jepet në mënyrë të përgjithshme dhe ne shpesh herë jemi të detyruar që të marrin informacion edhe nga vendi ku duhet të ulemi. Sidomos duke njohur që vendi ynë ka një klimë malore dhe që konditat e motit ndryshojnë menjëherë dhe në mënyrë të papritur, për më tepër që nuk ka infrastrukturë të rregullt meteorologjike në vend, sidomos në zonat ku duhet të ulemi. Në zona të thella, ne detyrohemi të marrin në telefon njerëz që njohim, policinë në atë komunë për të parë si janë konditat. Edhe kjo në shumë raste nuk ndihmon, sepse ata shikojnë vetëm pjesën e tyre, por nuk mund të parashikojnë çfarë ka përgjatë rrugës. Nuk janë në gjendje të gjithë njerëzit të japin konditat e fluturimit që më duhen mua. Dhe shpesh herë ne nuk kemi mundur të ulemi në zona shumë të thella dhe që s’kanë pasur terren për t’u ulur helikopteri.

Do të ishte më mirë që helikopteri të nisej në mëngjes, apo në darkë?
Po, do të ishte më mirë që të nisej në mëngjes. Gjendja shëndetësore e pacientit në fakt përcaktohet nga mjekët dhe ne gjithmonë jemi një lloj konflikti. Mjekët shikojnë gjendjen e pacientit dhe kanë plotësisht të drejtë, ne shikojmë konditat teknike të kryerjes së kësaj detyre. Këtu biem ndesh dhe urgjenca humanitare të shtyn dhe merren vendime të nxituara, ose të pastudiuara, që mund të kenë edhe pasoja. Ndërsa në rastin konkret kjo nuk ka të bëjë. Mirë do të ishte që udhëtimi të kryhej ditën, në orën 4-5 të mëngjesit, por ne nuk mund të flasim për atë që ka ndodhur. Kjo është pjesë e jetës, e fatit dhe në radhë të parë një gjë që e ka shoqëruar gjithmonë këtë lloj pune.



Qemal Koni
Presidenti i Republikës, Alfred Moisiu, me propozim të Ministrit të Rendit Publik, i akordoi Kapiten Qemal Bilal Koni “Medaljen e Mirënjohjes” me motivacionin “Për gatishmëri të lartë dhe përkushtim në kryerjen e detyrës, pranë njësisë speciale të helikopterëve”.
Demush Heba
Presidenti i Republikës, Alfred Moisiu, me propozim të Ministrit të Rendit Publik, i akordoi Major Demush Hajdar Heba “Medaljen e Mirënjohjes” me motivacionin “Për gatishmëri të lartë dhe përkushtim në kryerjen e detyrës, pranë njësisë speciale të helikopterëve”.
Vangjel Çondi
Presidenti i Republikës, Alfred Moisiu, me propozim të Ministrit të Rendit Publik, i akordoi N/Kolonel Vangjel Kiço Çondi “Medaljen e Artë të Shqiponjës” me motivacionin “Për kontribut të vyer në shërbimin pranë njësisë speciale të helikopterëve, për gatishmëri të lartë dhe përkushtim në kryerjen e detyrës”.


gazeta panorama

[Brari]

RD
--

Kryeministri Berisha shpreh dhimbjen për ngjarjen tragjike në ujërat e Adriatikut


Pashko, personaliteti i shquar i botës intelektuale të vendit


Kryeministri Sali Berisha shprehu dje dhimbjen e thellë për ngjarjen tragjike të zhdukjes të helikopterit shqiptar në ujërat e Adriatikut, i cili po transportonte zotin Gramoz Pashko për kurim të mëtejshëm në një klinikë të Barit dhe ku ndodheshin edhe dy pilotë e tre civilë. Në mbledhjen e djeshme të Grupit parlamentar të Partisë Demokratike, Kryeministri Berisha informoi mbi "përpjekjet intensive për gjetjen e helikopterit që po transportonte zotin Gramoz Pashko për kurim të mëtejshëm në një klinikë të Barit". Në këtë drejtim, zoti Berisha theksoi se, "në operacionin e kërkimit të helikopterit janë angazhuar ministri i Brendshëm, Sokol Olldashi, ministri i Mbrojtjes, Fatmir Mediu, ambasadori italian, Massimo Ianucci, si dhe forcat ajrore dhe detare italo-shqiptare, të cilët kanë zbardhur mbrëmë natën, në ndjekje të këtij problemi".

"Fati është i pamëshirshëm dhe fatkeqësisht, bashkë me orët që kalojnë, zbehen edhe shpresat tona për të takuar përsëri. Kjo është një fatkeqësi e jashtëzakonshme që na i mbush zemrat me shumë dhimbje, por në këto çaste mendimet dhe ndjenjat tona janë te familjarët e personave që humbën jetën në këtë ngjarje tragjike", u shpreh Kryeministri Berisha.

"Në këto çaste, mendimet dhe ndjenjat tona janë tek familjarët e Gramozit e Rubenit, tek familjarët e Tanushit, të Vangjelit, 2 pilotë të shkëlqyer, trima, kurajozë, prindër dhe familjarë shembullorë, tek familja e Qemalit, inxhinierit të talentuar të aviacionit, tek familja e Aleksandrit, mjekut humanist, i cili sapo ishte kthyer nga studimet jashtë dhe u nis për të shpëtuar jetën e mikut tonë. Ndërsa të gjithë ne prisnim që Gramozi të kapërcente traumën e aksidentit në Palasë, fati u dëshmua sërish i pamëshirshëm. Por fati është fat, para tij fuqia ndonjëherë është e pamjaftueshme, ndaj duhet ta përballim atë me forcën e dashurisë dhe të lutjes", tha më tej zoti Berisha.

Duke shprehur dhimbjen për këtë ngjarje tragjike, Kryeministri vlerësoi figurën e zotit Gramoz Pashko, si "një nga miqtë më të shtrenjtë, personalitet i shquar i jetës politike dhe botës intelektuale të vendit, një ndër themeluesit më kryesorë të PD-së, si dhe promotor i reformave të tregut në Shqipëri".

"Me forcën e dashurisë dhe me lutjet tona, ne duhet të përballemi me këtë ngjarje. Sakrifica e të gjithë atyre që shoqëronin Gramoz Pashkon është sakrificë sublime në emër të dashurisë njerëzore, dashurisë së fëmijës për prindin, të dashurisë së mjekut për jetën, dhe të përkushtimit të pilotëve për të mos kursyer asnjë lloj ndihme për njeriun", tha Kryeministri Berisha.






Qeveria, pranë familjes Pashko dhe familjeve të pilotëve dhe të reanimatorit, të cilët gjendeshin në krye të detyrës


Operacionet e shpëtimit menjëherë pas humbjes së lidhjes me helikopterin


Në konferencën e djeshme për shtyp, ministri i Brendshëm, Sokol Olldashi, shprehu dhimbjen për ngjarjen e pazakontë të rrëzimit të helikopterit që po transportonte Gramoz Pashkon për në Itali. Olldashi deklaroi se, "të dielën në mbrëmje, në orën 22.18 helikopteri që transportonte drejt Barit, në Itali, zotin Gramoz Pashko, ka shkëputur kontaktin me radarët dhe prej atij momenti po vazhdojnë operacionet e kërkimit për të". Ministri i Brendshëm tha se: "Helikopteri, u nis në orën 21.57 nga Qendra Spitalore Universitare "Nënë Tereza", në Tiranë, në drejtim të Barit.

Në bordin e tij ndodheshin:

Gramoz Pashko, i vitlindjes 1955,

Ruben Pashko, i vitlindjes 1982,

Vangjel Çondi, pilot, i vitlindjes 1950,

Demush Heba, pilot, i vitlindjes 1960,

Qemal Koni, asistent i fluturimit, i vitlindjes 1950 dhe

Aleksandër Baloj, mjek reanimator në Qendrën Spitalore "Nënë Tereza", i vitlindjes 1966.

Në orën 22.17 minuta, helikopteri ka patur kontaktin e fundit radiofonik me kullën e Rinasit, ndërkohë që një minut më pas, në orën 22.18 ai është zhdukur nga radarët dhe më pas komunikimet me të janë ndërprerë. Koordinata e kontaktit të fundit me të është 41*17'30" N dhe 18*51 '30"E.

Distanca nga bregu është 27 milje detare, afërsisht 45 kilometra në Perëndim të Durrësit.

Menjëherë pas ndërprerjes së sinjalit, kanë filluar operacionet e shpëtimit, të cilat janë intensifikuar në agun e sotëm. Katër anije të Forcave Detare Shqiptare dhe dy helikopterë po patrullojnë zonën, ndërkohë që edhe autoritetet italiane kanë vënë në dispozicion të operacionit 4 anije dhe një avion kërkimi".

Ministria e Brendshme shpreh dhimbje për këtë ngjarje jashtëzakonisht të rëndë dhe u gjendet pranë familjes Pashko dhe familjeve të pilotëve dhe të reanimatorit, të cilët gjendeshin në krye të detyrës.

Në përgjigje të pyetjeve të gazetarëve, Olldashi ka pohuar, se helikopteri me të cilin ishte nisur Pashko për kurim në Itali ishte i gatishmërisë së lartë.

Ministri Olldashi hodhi poshtë mundësinë e një defekti teknik të helikopterit si shkak të rrëzimit të tij. "Helikopterit i është bërë një remont kapital në Gjermani para një muaji e gjysëm, ka qenë i pajisur me të gjitha mjetet, sinjalistikën dhe ka qenë në gjendje shumë të mirë teknike", theksoi ministri Olldashi. Ndërsa, duke iu referuar të dhënave të Institutit Metereologjik në vend, ministri tha se, kushtet e motit gjatë fluturimit të së dielës në mbrëmje të helikopterit kanë qenë të mira. Sipas tij, kapaciteti i helikopterit të Gardës ka qenë prej 8 personash, ndërkohë që në bordin e tij ndodheshin gjithsej 6 persona.






Po bëhen të gjitha përpjekjet për gjetjen e helikopterit dhe personave që ishin në bord


Mediu: "Kushtet atmosferike e lejonin fluturimin"


Ministri i Mbrojtjes, Fatmir Mediu, u shpreh dje se, "menjëherë pas humbjes së komunikimit mes helikopterit që po transportonte zotin Gramoz Pashko për një kurim në një nga spitalet e Italisë me kullën e kontrollit të Aeroportit "Nënë Tereza", të gjitha organizmat dhe shërbimet e specializuara u ngritën në kushtrim".

Në një konferencë për shtyp dhënë në mjediset e Ministrisë së Mbrojtjes, zoti Mediu ka sqaruar të gjitha hapat e ndjekura nga shteti shqiptar menjëherë pas humbjes së helikopterit.

Mediu pohoi se, "në bordin e helikopterit gjendeshin 6 persona - mjeku i shoqërimit të zotit Pashko, dy pilotët Vangjel Çondi dhe Demush Heba, tekniku i fluturimit Qamil Koni dhe i biri i zotit Pashko, 24 vjeçari Rubin Pashko".

Ministri i Mbrojtjes, duke e cilësuar këtë ngjarje si shumë të rëndë, i shprehu ngushëllimet më të sinqerta dhe njërëzore familjes së zotit Gramoz Pashko, familjeve të pilotëve Vangjel Çondi dhe Demush Heba, familjes së teknikut të helikopterit Qamil Koni dhe familjes së mjekut Aleksandër Baloi.

"Përpjekjet për të kontaktuar në orët e vona të natës së djeshme e deri më tani nuk kanë rreshtur nga ana e strukturave të specializuara dhe të bashkërenduara të Ministrisë së Mbrojtjes, asaj të Rendit, të Ministrisë së Komunikacionit dhe distrikteve Detare Durrës e Vlorë. Pas pamundësimit të komunikimit, u dhanë menjëherë detyrat për fillimin e operacionit të kërkimit dhe shpëtimit, menjëherë pas humbjes së lidhjeve radiolokative të helikopterit me Qendrën e Komunikimit të Kullave të Drejtimit Rinas", sqaroi më tej zoti Mediu. Sipas tij, që në momentin e marrjes së sinjalit të humbjes së kontaktit, nën drejtimin e Kryeministrit Berisha, situata është ndjekur me përgjegjësi maksimale dhe pa ndërprerje.

"Ministria e Mbrojtjes ka mbajtur dhe po mban lidhje të pandërprera dhe ka koordinuar e bashkëpunuar me Ministrinë e Brendshme, Ministrinë e Transporteve, Ministrinë e Shëndetësisë etj. Qendra e Bashkuar Operacionale në SHPFA, strukturat përgjegjëse të ndjekjes së situatës ajrore në Forcat Ajrore dhe ato të kërkim shpëtimit në gatishmëri e funksionim të plotë, ka marrë situatën në dorë menjëherë në koordinim të plotë me strukturat e duhura", tha ministri i Mbrojtjes.

Më tej, zoti Mediu tha se, "gjithashtu, është mbajtur kontakt i pandërprerë me Shtabin e NATO-s në Tiranë, Komandën e NATO-s në Napoli Itali, Komandën e KFOR-it në Kosovë, ambasadën italiane, ambasadën amerikane, ambasadën greke. Dëshiroj që të gjithë t'i falenderoj për gatishmërinë, humanizmin dhe mbështetjen e ofruar".

Duke iu përgjigjur pyetjeve të gazetarëve mbi ngjarjen, zoti Mediu sqaroi se, "vendndodhja e helikopterit në momentin e humbjes së kontaktit, lokalizohet në koordinatat 41 gradë, 17 minuta, 30 sekonda në Veri dhe 18 gradë, 51 minuta dhe 30 sekonda në Lindje".

"Brenda të gjitha rregullave dhe në përputhje me parametrat e përcaktuar në raste të tilla, në orën 02.30 filloi dalja e anijeve të Forcave Detare në det dhe në orën 04.30, operacioni konsiderohet i filluar në rajonin e kërkimit. Në mënyrë të njëkohshme është koordinuar me palën italiane, e cila është angazhuar me mjetet e veta në këtë operacion", tha zoti Mediu.

Ministri i Mbrojtjes theksoi se, "rajoni i operacionit të kërkimit është rreth 27 milje detare larg nga brigjet tona, me gjerësi rreth 40 milje detare dhe thellësi rreth 35 milje detare". "Operacioni po zhvillohet i përbashkët me palën italiane. Rajoni është ndarë në dy pjesë, pjesa lindore nën përgjegjësinë e palës shqiptare, dhe pjesa perëndimore nën përgjegjësinë e palës italiane. Operacioni po kryhet me lundrim e kontroll në drejtimin veri - jug dhe anasjelltas", sqaroi zoti Mediu.

Sipas tij, Forcat Detare Shqiptare kanë angazhuar katër anije, si dhe janë mbështetur nga një helikopter i Forcave Ajrore, i cili ka kryer patrullim e kontroll nga ajri. "Pala italiane ka të angazhuara katër anije, si dhe është mbështetur nga një avion kërkim shpëtimi, i cili ka kryer fluturim e kontroll në të gjithë rajonin e operacionit. Operacioni po vazhdon dhe do të vazhdojë deri në kryerjen përfundimtare. Në përputhje me ecurinë e rezultateve të zhvillimeve operacionale, po punohet që ai të përshkallëzohet. Po bëhen të gjitha përpjekjet që në bashkëpunim me Komponentin Detar të Komandës së Bashkuar të NATO-s në Napoli - Itali dhe me Forcat Detare italiane të planifikohen e të intensifikohen veprimet operacionale në interes të operacionit të kërkimit", u shpreh ministri i Mbrojtjes.

Në lidhje me fillimin e një hetimi nga ana e Prokurorisë për ngjarjen, zoti Mediu tha se, "është detyrë e Prokurorisë së Përgjithshme që të hetojë dhe zbardhë këtë tragjedi. Nga ana e Ministrisë së Mbrojtjes do të jepet e gjithë asistenca e nevojshme në këtë hetim".

I pyetur në lidhje me kushtet atmosferike gjatë fluturimit të helikopterit, zoti Mediu tha se, "kushtet atmosferike e lejonin fluturimin". Gjithashtu ministri i Mbrojtjes vlerësoi edhe profesionalizmin e pilotëve që drejtonin helikopterin, duke shtuar se, "kjo nuk ishte hera e parë që ato kryeninin një udhëtim të tillë".



.......

[Dita]

Fatkeqesi shume e rende! Kur e degjon, te duhet te ulesh, se te ngjan e pabesueshme, se si mund te denohen aq fate njerezish pernjeheresh e te ngresh syte nga qielli. E fati i nje babe e nje biri njekohesisht! E tmerrshme, gjynah!

Fjalen e fundit, ate me ngushellimet lijeni, kur te kete siguri. Mos ndillni me shume, se c'ka ndodhur!