Ne Liban

[ATMAN]

Hezbollahët duan rrëzimin e qeverisë

1 milion vetë në shesh kundër kryeministrit


Qindra mijëra protestues nga hezbollahu dhe aleatët e tij të opozitës pro-siriane, morën pjesë, të premten, në një manifestim në Bejrut, ku kërkuan dorëheqjen e Kryeministrit të mbështetur nga Perëndimi, Fouad Siniora, i cili ishte mbyllur në zyrën e tij, i rrethuar nga qindra policë dhe ushtarë. Hezbollahu dhe aleatët e tij, mobilizuan bazën për këtë protestë dhe u siguruan mbështetësve nga i gjithë Libani, autobusë ose edhe kuponë nafte falas, për të mbërritur në kryeqytet. Turma, që sipas policisë ishte rreth 800 mijë, krijoi një det me flamuj libanezë që mbushën krejt qendrën e qytetit. Zyrtarët e hezbollahut thanë se numri i protestuesve ishte rreth 1 milion, shifër kjo sa një e katërta e popullatës së Libanit. Siniora, ndërkohë, ndoqi taktikën e injorimit të turmave, që shpejt mbushën çdo rrugë. Ndërsa ngado në Bejrut raportoheshin probleme me trafikun, fraksionet proqeveritare bënin apele për qetësi. "Siniora, jashtë! Ne duam një qeveri të lirë!", thërrisnin protestuesit me megafona. "Ne duam një qeveri të pastër", shkruhej në një pllakat dhe pikërisht kjo është bërë edhe motoja e opozitës. Ushtarët e armatosur rëndë dhe policia, mbylli të gjitha rrugët drejt qendrës duke ngritur barrikada. Pavarësisht nga garancitë e dhëna prej hezbollahut, se protesta do të ishte paqësore, masat e rrepta të sigurisë u ndërmorën për shkak të frikës se protestuesit mund të përfshiheshin në përleshje mes fraksioneve pro dhe anti-siriane, ose se mbështetësit e hezbollahut mund të sulmonin zyrat e qeverisë. Por, ndërkohë, vetë njerëzit e sigurisë së hezbollahut, krijuan dy linja mes protestuesve dhe forcave të sigurisë, për të parandaluar përleshjet. Duke nisur kështu një fushatë të paralajmëruar prej kohësh, për të shtrënguar qeverinë e Libanit të mbështetur nga SHBA, të dorëzojë pushtetin, hezbollahu dhe aleatët e tij pro-sirianë, thanë se demonstrata do të pasohet nga një seri protestash të tjera. Protestat vijnë pas luftës së kësaj vere mes hezbollahut dhe Izraelit, që shkatërroi pjesë të Libanit. Rezistenca e fuqishme e guerilasve, kundër trupave izraelitë, e ngriti mbështetjen e shiitëve për hezbollahun, në qiell, duke e nxitur këtë të fundit, të kërkojë më shumë fuqi politike. Hezbollahu gjithashtu mendon se Siniora nuk bëri aq sa duhej për ta mbështetur atë gjatë luftimeve. Grupet pro-qeveritare, në këmbim, fajësojnë hezbollahun se ka nxitur luftën, duke rrëmbyer dy ushtarë izraelitë, çka në të vërtetë ishte preteksti i fillimit të luftës me Izraelin. Siniora, ndërkohë, ka premtuar se qeveria e tij nuk do të rrëzohet, duke paralajmëruar në televizionin kombëtar, se "pavarësia e Libanit është e kërcënuar dhe se sistemi i tij demokratik, tashmë është në rrezik". Mbështetësit e qeverisë akuzojnë Sirinë se qëndron pas fushatës së hezbollahut, duke u përpjekur të rifitojë influencën e saj të humbur mbi fqinjin e saj më të vogël. Hezbollahu dhe aleatët e tij, thonë në kundërpërgjigje se vendi ka rënë nën dominimin e Shteteve të Bashkuara dhe ata kanë humbur të drejtën e tyre për qeverisje. Hezbollahu kishte kërcënuar se do të dilte në protesta në rast se ai dhe aleatët e vetë nuk do të merrnin të drejtën e vetos në kabinetin qeveritar, një kërkesë kjo që Siniora dhe partitë anti-siriane e kanë refuzuar. Qëllimi i protestave është të rritet presioni popullor për të çuar në një paralizim të qeverisë dhe më pas edhe në dorëheqjen e saj.

shqip.com