VMRO-DPMNE dhe PDSH formojne qeverine e re

[bOndi_oo7]

BDI-ja prej të hënës në protesta masive


“Tashmë prej të hënës do të ndërmerren aktivitete konkrete për shprehjen e revoltit”

A thua PSE?
Aq i shijshem qenka pushteti. hehee,per pushtet qka nuk ben njeriu.

Po kesaj radhe nuk besoj se do mund te ja arrijne qellimit, sepse njerezit nuk hane bar.
Provoni ju aktivistet e BDI-se qe jeni rrite me plazma keksa edhe pas protestave ngjituni ne Sharr ta shifni se sa "fllad"eshte atje.
Jo jo i nderuar Davius, nuk behet lufte e as protesta "masive gjithpopullore"-sic i quani ju, me keta njerez qe i ka momentalisht BDI.

Bash do me interesonte a do vijne ne protesta aktivistet e BDI-se nga Strumica, Shtipi dhe Kavadarci.

Shendet!

[vrojtuesi]

BDI-ja prej të hënës në protesta masive

Tetovë /04/08/ 09:05

Protesta masive prej të hënës, 07.08.2006, do të organizojë Bashkimi Demokratik për Integrim (BDI), për ta shprehur pakënaqësinë me mospërfshirjen e partisë në qeverinë e ardhshme në Maqedoni.


Ermira Mehmeti, zëdhënëse e BDI-së, deklaroi se partia ka vendosur të mbetet në Kuvend dhe të mos kthehen mandatet e deputetëve, ndonëse ka pasur edhe kërkesa të tilla nga anëtarësia.

“Tashmë prej të hënës do të ndërmerren aktivitete konkrete për shprehjen e revoltit”, deklaroi Mehmeti.

BDI-ja në zgjedhjet e fundit parlamentare fitoi më së shumti vende parlamentare në mjediset me elektorat shqiptar dhe në bazë të kësaj kërkon të jetë parti në pushtet, me qëllim që atje t`i artikulojë interesat e shqiptarëve të cilët ia dhanë besimin në zgjedhjet e lira parlamentare

Pata fituar një simpati për BDI-në në bazë të paraqitjeve të tyre dhe asaj që shifsha e dëgjojsha gjat vizitave të shpeshta që kisha në Shkup. Mirëpo kjo që thot ky tani nuk më hyn në kokë!

- Si mund ta detyron dikend që ta marrë patjetër në Qeveri nëse atij i konvenon apo i mjafton tjetri?

- Po për çka janë zgjedhjet, atëherë?

Sipas kësaj edhe PDK e Hashim Thaqit po u deshka me dalë në protesta pse LDK nuk e ka përfshi ate në Qeverinë e Kosovës por AAK-në e Ramushit!

[Davius]

- Si mund ta detyron dikend që ta marrë patjetër në Qeveri nëse atij i konvenon apo i mjafton tjetri?

Atj s'i konvenojne 17 deputete shqiptar dhe mbi 6 ministra, atij i konvenojne 11 deputete ( - 2 deputet Leka dhe Krasniqi = 9 deputete ) dhe vetem 3 ministra shqiptare!

- Po për çka janë zgjedhjet, atëherë?

BDI-ja, nese nuk ke informata i ka fituar zgjedhjet ne kampin politik shqiptar!

- Sipas kësaj edhe PDK e Hashim Thaqit po u deshka me dalë në protesta pse LDK nuk e ka përfshi ate në Qeverinë e Kosovës por AAK-në e Ramushit!

Ketu flitet per tjeter gje, flitet per perfaqesim nacional, jo vetem si parti ke te don te merr ai ne pushtet, se neser nje parti e vogel fiton nje deputet dhe neser ate e merr ne pushtet!

Gjerat jane me te thella se sa mendoni ju, nuk eshte ketu interes partiak, por interes kombetar te jete BDI-ja ne pushtet, sepse ka fituar vullnetin e popullit!

[miki_al2001]

do bllokohe n te gjitha ceshtjet shqiptare me sa shof sepse na perfaqeson pakica.
ulja e flamurit maqedon do ti merzise disa "shqiptare te ndershem" ketu ne forum.
ku ka qeveri me qafsh.

[Livia5]

Arbën Xhaferri: BDI-ja proteston kot, ne do të qeverisim
"Katër vitet e kaluara shërbyen për stërvitje politike, nxënien e përvojës së aguridhëve"

Nga YLLI PATA

Maqedonia po përjeton ndryshimet e njëpasnjëshme politike, ndërkohë që edhe pozita e shqiptarëve po përjeton një përplasje dramatike. Pas vendimit të Kryeministrit aktual, Nikolla Gruevski, për koalicion qeveritar me PDSH-në e Arbën Xhaferrit, nisën polemikat e forta. BDI-ja e Ali Ahmetit, e cila
fitoi 17 deputetë, bojkotoi seancën e parë të Parlamentit, si protestë ndaj mospërfshirjes së saj në qeveri. Ndërkohë, kreu i PDSH-së, Arbën Xhaferri, në një intervistë ekskluzive për "Shqip", i konsideron normale zhvillimet e fundit...

Zoti Xhaferri, tashmë ështëvendosur: PDSH-ja në qeveri. Por çfarë do të përfitojnë shqiptarët në Maqedoni?

Deri më tani, në dallim nga partitë e tjera shqiptare që kanë qenë në qeveri, 8 vjet PPD-ja dhe 4 vjet BDI-ja, vetëm PDSH-ja në periudhën e qeverisjes me VMRO-në, 1998-2002 ka bërë transparente platformën e saj. LSDM-ja, si trashëguesi i dinakërisë së periudhës komuniste, ku të drejtat zëvendësoheshin me favore që i jepeshin një elite politike, këtë metodë pune e përsëriti edhe gjatë qeverisjes me BDI-në. Këto dy parti nuk e bënë publike, transparente platformën e koalicionit, kështu që sërish jemi në pozitë, që punët t'i vëmë në vijë nga e para, ndonëse do të hasim vështirësi të mëdha. Nga ana tjetër, periudha e kaluar katërvjeçare nuk u ndërlidh me përvojat e mëparshme politike, por filloi nga e para dhe shërbeu për stërvitje politike, nxënien e përvojës së aguridhëve, të rishtarëve politikë dhe përfaqësuesve të tyre në institucionet e ndryshme të shtetit. Jemi të vetëdijshëm për realitetin e dallimeve që ekzistojnë mes partive të ndryshme politike, qofshin ato maqedonase apo shqiptare, prandaj përgatisim një strategji moderne të koalicionimit, në të cilat do të përkufizohen temat ku shfaqet përputhja e plotë e përcaktimeve politike, pastaj temat ku përafërsisht qëndrimet janë të njëjta dhe në fund temat ku nuk përputhen qëndrimet. Në këtë mënyrë do të trasojmë rrugën për një qeverisje racionale, duke i ikur përplasjeve stihike dhe befasive të panevojshme. Populli shqiptar, prej kësaj qeverie duhet të presë reforma ekonomike, përmirësim të jetës sociale, mbrojtje, siguri, transparencë, avancim të vazhdueshëm të proceseve që shpijnë në strukturat evropiane, veriatlantike, implementim real të Marrëveshjes së Ohrit dhe avancim të sigurt të drejtave të shqiptarëve. Qeveria e re po lind me një përplasje mes partive shqiptare.

Si mund të shuhet konflikti?

Përplasja është e kotë, është pasojë e frustracioneve normale të një strukture që e humb pushtetin dhe begatitë që i sjell ai. Them e kotë ngaqë: askund në Kushtetutë, as në Marrëveshjen e Ohrit
nuk shkruan se koalicioni duhet të bëhet mes partive etnike, që kanë fituar shumicën e votave; BDI-ja deri më tani veten e përkufizonte si parti qytetare, duke hapur degë dhe nëndegë në Maqedoninë Lindore, ku anëtarësoheshin edhe maqedonas në dallim nga PDSHja, që nuk turpërohej nga ideja e një partie që vetëkufizohet me idenë që t'i artikulojë interesat etnike të shqiptarëve. Përnjëherë kemi një situatë të re, ku BDI-ja trumbeton se është parti etnike. Edhe sikur të ishte e tillë kjo nga aspekti juridik, politik dhe madje moral nuk ka fare peshë; po ashtu, BDI-ja vetveten e përkufizonte si parti e majtë në dallim nga VMROja, që përkufizohet si parti e djathtë; VMRO-ja dhe PDSH-ja aderojnëmnë grupin e partive popullore evropiane në dallim nga LSDM-ja dhe BDI-ja, të cilat aderojnë në grupin e partive të majta evropiane; parregullsitë në zgjedhje vënë në dyshim pretendimet e BDI-së, se ka fituar shumicën e votave; mandatari ka të drejtë kushtetuese që të bëjë koalicion me kë të dojë. Po qe se ai do të përcaktohej për BDI-në, ne nuk do të çonim pluhur, as që do të hetohej nervozizmi në nivel shoqëror;fundja është e domosdoshme që në Parlament një parti shqiptare të funksionojë si parti opozitare. Insistimet e kësaj partie, që të jetë pjesë e qeverisë, përkrahjen që ajo merr nga të ashtuquajturit analistë të paguar dhe të instruktuar nga qarqe joformale janë brengosëse vetëm për ata që kanë një interes nga kjo punë dhe nuk mund të cilësohen si dramë shoqërore. Të shkruash letra z. Solana dhe zyrtarëve amerikanë, që këto ditë heqin të zitë e ullirit me krizat e mëdha botërore, në Liban, Palestinë, Iran, Kore Veriore dhe të imponosh një temë triviale, siç është pjesëmarrja e një partie politike në qeveri është indikator i papjekurisë që e rrënon imazhin e shqiptarëve, që gjithnjë e më tepër perceptohen me ngjyrime negative, si një shoqëri që ka reagime joproporcionale për çështje banale. Këtë përshtypje si për shqiptarët sistematikisht e ndërtojnë qarqet antishqiptare kudo në botë.

Cilat janë dikasteret që do të mbulojë PDSH-ja dhe ministrat përkatës?

Shqiptarët zakonisht shfaqin interes për ministri që kanë të bëjnë me interesat e tyre të veçanta në fushën e arsimit, kulturës, ekonomisë, pushtetit lokal, shëndetësisë dhe kryesisht do të përqendrohemi që të veprojmë në këto dimensione.

Siç mësohet, këto ditë ka qenë në Maqedoni edhe zoti Sabri Godo. Si e vlerësoni rolin e z. Godo si ndërmjetës?

Me sa e njoh z. Sabri Godon, ai gjithmonë shfaq një sensibilitet të respektueshëm për çështjet e shqiptarëve në përgjithësi dhe përpiqet të japë kontributin e tij në tejkalimin e mosmarrëveshjeve. Unë e respektoj angazhimin e tij fisnik, pa marrë parasysh natyrën e misionit të tij, privat apo zyrtar.

[Livia5]

SHBA-të presin që BDI-ja në opozitë do të mbështes reformat

Shtetet e Bashkuara të Amerikës në mënyrë indirekte mbështetën Qeverinë e ardhshme të Maqedonisë në të cilën nuk do të participojë BDI-ja, të cilës drejtpërdrejt i dërguan porosi që “si opozitë t`i mbështesë reformat”.


“SHBA-të do të punojnë me cilëndo Qeveri që është formuar në pajtim me Kushtetutën e Maqedonisë… Lidhur me koalicionin, i takon Maqedonisë që të vendosë se si të formojë Qeveri”, deklaroi zëvendës-ndihmësja e sekretarit shtetëror në Stejt Departament, Rozmari Di Karlo, në intervistën për Zërin e Amerikës.
Bashkimi Demokratik për Integrim (BDI) ishte partner i fuqishëm në Qeveri, promovonte zbatimin e Marrëveshjes së Ohrit dhe reformat në integrimin evroatlantik, vlerësoi Di Karlo dhe për këtë arsye qeveria amerikane konsideron se “BDI-ja dhe partitë tjera do të vazhdojnë edhe si opozitë t`i mbështesin reformat e njëjta”.
SHBA-të presin që Qeveria e re të vazhdojë me reformat ekonomike, politike dhe në sferën e mbrojtjes, porositi Di Karlo.
Deklarata e Di Karlos vjen në momentin kur BDI-ja vendosë se si ta shprehë revoltin e vet, që nuk është marrë si pjesë e koalicionit në pushtet.

[Davius]

EMIN AZEMI: PADREJTËSI NDAJ BDI-SË DHE VOTUESVE

"Unë mendoj se partitë dhe politikanët duhet të ulen dhe të vendosin një rregull, para së gjithash mes shqiptarëve. Mendoj që shqiptarët këtu kanë një hile mes vetes. Ata nuk do duhej të shpejtojnë se cili do të shkojë në qeveri, por do të duhej të merren vesh mes vete", thotë, pos tjerash, anlisti nga Shkupi, Emin Azemi.


RADIO EVROPA E LIRË
Tashmë duket se situata është disi më e qartë dhe në qeverinë e Maqedonisë do ta kemi Partinë Demokratike Shqiptare dhe jo koalicionin BDI-PPD. A mendoni se kjo është e siguritë se do të ndodhë, apo ende mund të ketë hapësirë për ndryshime?

EMIN AZEMI
Deri para pak kohe ka pasur dilema nëse do të hyjë dhe Bashkimi Demokratik për Integrim në qeveri apo jo. Mirëpo pas deklaratës së vetë mandatarit Gruevski, se në qeverinë e ardhshme nuk do të ketë vend për BDI-në, tanimë gjithçka është e qartë.

Ka pasur komente dhe dilema rreth kësaj nëse është apo s'është mirë. Një pjesë e analistëve të cilët kanë përkrahur opinionin, sidomos maqedonas dhe një pjesë e shqiptarëve, e krijuan një opinion se qeveria, mandatari ka të drejtë të ftojë në koalicion cilëndo parti politike dhe kjo është në rregull deri diku. Mirëpo kur të marrin parasysh situatën e votave dhe të vullnetit të popullit, atëherë mendoj se lënia jashtë e një partie politike, e cila ka marrë shumicën e votave, është një padrejtësi, jo vetëm ndaj asaj partie, por edhe ndaj votuesve, të cilët ia kanë dhënë besimin asaj partie politike. Tani shtrohet pyetja si të veprohet në të ardhmen… a do të shkojnë shqiptarët sipas logjikës se cila parti maqedonase fiton dhe ata do të shkojnë pastaj në koalicion? Apo do të vazhdohet me atë që unë mendoj se duhet të jetë, që shumica e votave e përcakton edhe pushtetin dhe hyrjen në qeveri.

RADIO EVROPA E LIRË
Ju pak më parë shtruat dhe vetë pyetjen se çfarë efekti dhe çfarë ndikimi do të ketë ky rast në proceset e ardhshme zgjedhore në Maqedoni?

EMIN AZEMI
Unë mendoj se partitë dhe politikanët duhet të ulen dhe të vendosin një rregull, para së gjithash mes shqiptarëve. Mendoj që shqiptarët këtu kanë një hile mes vetes. Ata nuk do duhej të shpejtojnë se cili do të shkojë në qeveri, por do të duhej të merren vesh mes vete. Dhe është një provokim do të thosha unë i vetë politikanëve maqedonas, të cilët përmes lëvizjeve të tilla, duan që shkaktojnë dy efekte. Duan të bëjnë një përçarje në kampin politik shqiptar dhe duan të bëjnë një riformulim të proceseve të deritanishme politike që kanë ndodhur në Maqedoni. Kjo, për arsye se partia që erdhi në pushtet në Maqedoni, njihet si kritikuesja më e fuqishme e reformave në procesin politik që kanë ndodhur gjatë këtyre viteve në Maqedoni. Unë, ashtu si një pjesë e madhe e shqiptarëve, brengosemi se mund të ketë stagnim të këtyre proceseve pas 2001-shit me Marrëveshjen e Ohrit dhe me ndryshimet kushtetuese, e kështu me rradhë. Në të mirë të qytetarëve të Maqedonisë do të ishte megjithatë që partitë që dalin nga vullneti i plotë të elektoratit, ato të jenë dhe bartëse dhe vazhduese të proceseve politike.

RADIO EVROPA E LIRË Pra të supozojmë se përbërja e qeverisë, siç thatë ju më pare, është ajo që është, do të thotë me PDSH-në dhe pa BDI-në. Sa mendoni se do të funksionojë kjo qeveri dhe do t'i shtyjë përpara reformat për të cilat ju folët pak më parë?

EMIN AZEMI
Kjo qeveri, sipas mandatarit, para së gjithash, ka një platformë të mirë ekonomike, siç e ka prezantuar deri tani dhe në Maqedoni ka se çfarë të punohet edhe në sferën ekonomike, sepse politika deri tani ka qenë shenja dalluese e të gjitha proceseve. Mirëpo unë frikësohem se nën këtë angazhimin ekonomik do të ngelin nën hije disa procese politike, që lidhen me avancimin e mëtejshëm të të drejtave të shqiptarëve, kur dihet se në Maqedoni ende nuk ka një ligj për përdorimin e gjuhës shqipe në të gjitha nivelet, kur në Maqedoni ende nuk ka një ligj që përcakton statusin e forcave të policisë në njësitë e administrimit lokal dhe nuk ka një ligj për shenjat shtetërore siç është hymni, stema e kështu me radhë. Prandaj unë kam frikë se në këtë aspekt do të ketë tensionime të brendshme në parlament dhe këto ligje që i përmenda unë nuk do mund të kalojnë as me shumicën e Badinterit, që mungon tani për tani. Dhe kjo nuk do të arrihet pa ndihmën e Bashkimit Demokratik për Integrim. Mendoj që është një qeveri që do të funksionojë me probleme dhe me kriza të vogla brenda parlamentit dhe brenda institucioneve të shtetit.
Intervistoi: Fatmir Bujupi

[Davius]

Koalicioni qe do te ndaje Maqedonine

(Analize nga Koço Danaj)


Duket se tashme ne Maqedoni koalicioni qeveritar eshte bere nje fakt i kryer. Por ai ka disa veçori qe duhet vene ne dukje qysh tani.


Koalicion pa ngjyre politike

Duket se do te kemi te bejme me nje koalicion pa ngjyre politike, pavarsisht se çfare thuhet dhe çfare propagandohet. Mjaftojne vetem tre shembuj per te vertetuar pohimin e siperthene. Ne gjirin e PDSH te drejtuar nga Xhaferri qe eshte partnerja shqiptare e Gruevskit, ka disa muaj qe ben pjese nje nga drejtuesit kryesore te LPRK me vone LPK e me vone te UCK e me vone te qeverise se perkohshme te Kosoves, Bardhyl Mahmuti. Arber Xhaferri ne nje perpjekje te deshperuar e argumentoi kolicionin e tij me Gruevskin per shkak te bindjeve politike te perbashketa. (Te djathta). Por ai e di fare mire se Bardhyl Mahmuti ndihet shume keq me kete perkufizim te bindjeve politike. Veshtire se Mahmuti do te deklaroje ndonjehere se ai eshte i djathte, te pakten per ata qe e njohin ate prej shume kohesh.(Babai i ShpatGjirokastres dhe i Vatanit ndihet keq kur i thone qe je i djathte).

Shembulli i dyte ka te beje me ekzistencen ne gjirin e PDSH te nje rryme te konsideruar enveriste. Xhaferri dhe Thaçi e njohin shume mire kete rryme brenda partise qe drejtojne. Pas vitit 2001 dhe shperberjes se UCK, kjo rryme eshte forcuar dukshem perballe pragmatisteve te PDSH. Akoma nuk dihet se sa kjo rryme do te pranoje bashkejetesen me nacionalistet e Gruevskit dhe Georgievskit dhe nxenesit e Dosta Dimovskes, apo do ti kundervihet kesaj rryme. Shembulli i trete ka te beje me perfshirjen ne qeveri te fraksionit te larguar nga LSDM. Majtisti qe merr pjese ne nje qeverie te vetquajtur te djathte e ben me te prekshem pangjyresine e qeverise Gruevski qe do te krijohet ne Maqedoni.


Kundershtaret dhe partizanet e Ohrit ne nje qeveri

Ndersa dukuria e dyte thelbesore e ketij koalicioni eshte bashkimi ne te njejten qeveri te te gjitha atyre qe votuan kunder Marreveshjes se Ohrit me ata qe realizuan kete marreveshje. Jane 443 mije qytetare te Maqedonise qe votuan ne menyre «demokratike» kunder kesaj marreveshjeje. Gruevski dhe Andovi ishin nder organizatoret kryesore te referendumit famekeq. Ndersa sot qeveria do te krijohet me kundershtaret dhe partizanet e Marreveshjes. Moratoriumi qe kerkon Gruevski lidhur me te ashtuquajturin program ekonomik eshte ndoshta sfida me e madhe qe ai I ben Marreveshjes se Ohrit. Pranimi nga ana e shqiptarve I kesaj sfide, eshte heqja dore e tyre nga firma e hedhur para 5 vjetesh. Duket se Gruevski dhe shoket e tij akoma nuk e kane kuptuar se Marreveshja nuk ishte vetem per shqiptaret, por edhe per maqedonet. Ashtu si shqiptaret qe nuk kane kuptuar akoma se Marrveshja para se te jete teresi ligjesh, eshte mendesi dhe mentalitet.


Ndarja e Maqedonise

Dhe vime keshtu tek problemi I fundit. Moszbatimi I Marrveshjes se Ohrit do te thote ndarja e Maqedonise.
Duket se ky do te jete edhe qellimi I koalicionit Gruevski-Xhaferri. Ne mars-prill 2001, regjizori-kryeminister i Maqedonise, Lupço Georgievski kerkoi ndarjen e saj ne kushte te favorshme per ate dhe te pafavorshme per shqiptaret. Por Xhaferri nuk e pranio kete teze. Ndersa ne maj 2001 kur UCK kishte zoteruar Luginen e Vardarit, Georgievski u terhoq vete dhe ngarkoi Akademine e Shkencave per te mbajtur gjalle tezen e ndarjes se saj. Gazeta Veçer e dates 25 maj botonte harten e ndarjes se Maqedonise. Jane te njohura arsyet perse nuk u realizua ky skenar ate vit.
Por skenari ekziston akoma. Dhe duket se ndarja e Maqedonise do te jete synimi thelbesor i koalicionit Gruevski-Xhaferri.


Sa «Shqiperi» do te marrin shqiptaret ?

Problemi kryesor per shqiptaret nuk eshte thjesht ndarja. Perderisa nacionalistet e VMRO-DPMNE nuk duan te jetojne me shqiptaret eshte normale qe edhe shqiptaret te mos pranojne te jetojne me ata. Problemi themelor eshte se sa «Shqiperi» do te perftohen nga ndarja. Kete duhet ta pohoje dhe per kete duhet te punoje udheheqja e PDSH-se, Xhaferri-Thaçi-Mahmuti. Ndersa Ahmeti duhet te kuptoje se kombi-politik eshte akoma nje fiksion shume i zbehte ne Ballkan.

[vrojtuesi]

Atj s'i konvenojne 17 deputete shqiptar dhe mbi 6 ministra, atij i konvenojne 11 deputete ( - 2 deputet Leka dhe Krasniqi = 9 deputete ) dhe vetem 3 ministra shqiptare!

BDI-ja, nese nuk ke informata i ka fituar zgjedhjet ne kampin politik shqiptar!

Ketu flitet per tjeter gje, flitet per perfaqesim nacional, jo vetem si parti ke te don te merr ai ne pushtet, se neser nje parti e vogel fiton nje deputet dhe neser ate e merr ne pushtet!

Gjerat jane me te thella se sa mendoni ju, nuk eshte ketu interes partiak, por interes kombetar te jete BDI-ja ne pushtet, sepse ka fituar vullnetin e popullit!

Si duket duke hapur tema të panumërta për të mbizotëruar në Forum e për të ia bajtur dertin Kosovës, Shqipërisë dhe Maqedonisë nganjëherë nuk po ke kohë që të jeshë më i saktë në përgjigjet tua por po flet çka ta do zemra!

Tani shiko çka shkruan sot "Koha ditore":

BDI-ja fillon protestat, SHBA-ja përkrah qeverinë e re

Arben Ratkoceri

... SHBA-ja, duke përkrahur qeverinë e re mes VMRO dhe PDSH-së, ka kërkuar nga BDI-ja që të jetë opozitë konstruktive.

... SHBA-ja do të punojë me cilën do qeveri që është formuar në pajtim me Kushtetutën e Maqedonisë dhe lidhur me koalicionin e ri , i takon Maqedonisë që të vendosë se si do ta formojë qeverinë...

Tung e shifemi në temat tjera!

[Davius]

Ne komentin qe kam lene me poshte, cdo pike apo presje eshte e sakte, te pelqen apo s'te pelqen ai realitet qe kam shkruar!

PS:

Per gjerat qe nuk kane te bejne me postimet apo temat, eshte e udhes te me kontaktosh ne privat nese te mundon apo te duhet sqarim plotesues, sepse qe dy here verej se ke permendur emrin tim ne publik, nje gje qe eshte kundershtim me rregulloren e forumit apo kulturen e debatit!

Citat nga tema kultura e debatit:

2. Diskutoni mbi temen e jo mbi personin

Nje shprehje e famshme tani ne kete forum thote tekstualisht: "Njerezit e medhenj diskutojne mbi idete, njerezit medioker diskutojne mbi ngjarjet, njerezit e vegjel diskutojne mbi njerezit!". Kjo shprehje eshte kuptimplote. Kjo sherben si nje barometer per te matur shkallen e kultures se secilit prej nesh qe diskutojme ne forum: ka nga ata qe jane anetare te respektuar pasi diskutojne e sjellin gjithmone ide te reja; ka nga ata qe pergjithesojne duke u nisur nga episode apo ngjarje te vecanta; ka edhe nga ata qe diskutojne mbi njerezit.

Lexo me gjeresisht per kete gje:

Kultura e Debatit