Në përfundim të kampionatit, bilanci i Ferrarit dhe i Shumit është i gjithi pozitiv.
Ka qenë kampionati i rekordeve për Majkëll Shumakerin ky që sapo ka përfunduar. Gjermani ka arritur dy rekorde shumë të rëndësishme: ai mban numrin më të madh të fitoreve në Formulën 1, rekord që më parë mbahej nga Alen Prost, dhe ka barazuar Manuel Fanxhion në rekordin e kampionateve botërore. Të vetmin rekord që ende nuk ka arritur është ai i "pole-position"-it, që mbahet nga Airton Sena. Në sezonin 2002, Shumakeri ka arritur të fitojë 11 gara dhe fitoret e tij në përgjithësi janë 64, duke kaluar dy rekordmenët e viteve '90, Prost dhe Sena. Ky i fundit, braziliani Sena, ka vdekur në vitin 1994 dhe që nga ajo kohë mban rekordin e "pole-position"-eve, me 65 të tilla. Në vend të dytë në këtë klasifikim renditet Majkëll Shumakeri, me 50. Edhe për sa u përket xhirove më të shpejta, gjermani i Ferrarit është i pari. Në karrierën e tij ka regjistruar 51 herë xhiron më të shpejtë të garave.
Renditjet e veçanta për kampionatet e fituara, fitoret në përgjithësi, "pole-position"-e dhe xhirot e shpejta gjatë garave:
Kampionate:
Fanxhio dhe Shumaker 5, Prost 4, Brabham, Stjuart, Lauda, Pike dhe Sena 3.
Fitore: Shumaker 64, Prost 51, Sena 41, Mansell 31, Stjuart 27, Klark 25, Lauda 25.
"Pole-positione": Sena 65, Shumaker 50, Klark dhe Prost 33, Mansell 32, Fanxhio 29.
Xhiro më të shpejta: Shumaker 51, Prost 41, Mansell 30, Klark 28, Hakinen 25, Lauda 24.
Ferrari
Një nga skuderitë dominuese të Formulës 1. Kryesimi i saj ka zgjatur katër vjet dhe, gjetë kësaj kohe, skuderia e Maranelos është mundur t'i përmirësojë rekordet e saj. Për sa u përket kampionateve të fituara, Ferrari kryeson renditjen e skuderive, me 11 gara të fituara. Më pas vjen Williams-i, me 9 gara, një më shumë se McLaren-i. Me 15 fitore në 17 çmime të mëdha, që ka arritur këtë sezon Ferrari, i ka çuar në 159 fitoret në përgjithësi. Më pas vjen McLaren-i, me 135 fitore, ndërsa Williams-i renditet shumë prapa, me 108 fitore. 158 janë "pole-position"-et që ka arritur skuderia italiane, ndërsa Williams-i dhe McLaren-i kanë arritur 122 dhe 109. Edhe për sa u përket xhirove më të shpejta gjatë garave, Ferrari është në krye, me 159 të tilla, duke lënë pas Williams-in, me 122, dhe McLaren-in, me 109.
Klasifikimi i skuderive sipas kampionateve që kanë fituar, fitoreve në përgjithësi, "pole-positioneve" dhe xhirove të shpejta gjatë garave:
Kampionate: 11, Williams 9, McLaren 8, Lotus 7, Cooper 2, Brabham 2.
Fitore: Ferrari 159, McLaren 135, Williams, 108, Lotus 79, Brabham 35, Benetton 27.
"Pole-positione": Ferrari 158, Williams 119, McLaren 112, Lotus 107, Brabham 39, Renault 31.
Xhirot më të shpejta: Ferrari 159, Williams 122, McLaren 109, Lotus 71, Brabham 41, Benetton 36.
Krijoni Kontakt