1998, Bombe ne kishen Ortodokse te Shkodres

[angeldust]

Kini degjuar per nje gje te tille? Lexoni dhe me pas jepni pergjigjet tuaja duke komentuar. Faleminderit!

http://www.shkoder.net/al/98gus.htm

Eksploziv në kishën ortodokse të Shkodrës
19 Gusht 1998
Burime nga ministria e Rendit Publik thanë të mërkurën për ENTER se rreth orës 02.50 të ditës së mërkurë, në kishën ortodokse të qytetit të Shkodrës, në rrugën Vasil Shanto ka ndodhur një shpërthim eksplozivi. Sipas burimeve lënda e eksplozivit është vënë në pjesën e pasme të kishës dhe ka shkaktuar dëme vetëm në këtë pjesë pa shkaktuar viktima në njerëz. Burimet thanë se menjëherë në vendngjarje kanë shkuar forca të shumta policie dhe grupi hetimor i cili ka kryer veprimet e para hetimore. Sipas burimeve nga ekspertiza akoma nuk është përcaktuar tipi i eksplozivit të përdorur dhe sasia e tij. Burimet thanë se nga organet hetimore po punohet në disa pista për zbardhjen e ngjarjes, por nuk dhanë komente për pistat e hetimit të ngjarjes.

Komunitetet fetare në Shkodër dënojnë shpërthimin në Kishën Ortodokse të qytetit
20 Gusht 1998
Komunitetet fetare në Shkodër dënuan të enjten, në një deklaratë të përbashkët, vendosjen e lëndës eksplozive në Kishën Ortodokse të qytetit. Tre komunitetet fetare të qytetit, e cilësuan këtë akt, si "të qëllimshëm, që synon të dëmtojë harmoninë dhe bashkëjetesën paqësore në mes besimeve fetare".
Në një deklaratë shtypi, famullitari i së vetmes kishë Ortodokse të Shkodrës, At Aleksander Petani, dënoi këtë akt të shëmtuar, i cili, tha ai, "është realizuar nga njerëz të papërgjegjshëm, banorë të errësirës". At Petani shprehu besimin se "pavarësisht nga qëllimet që kanë pasur ata që vendosen lëndën eksplozive, ne ortodoksët do të ecim në rrugën e mirëkuptimit dhe dëshirës së sinqertë që ka karakterizuar gjithmonë marrëdhëniet e tre besimeve fetare në qytetin tonë". At Aleksander Petani, tha se sot punëtorët kanë filluar riparimin e dëmtimeve të kishës dhe brenda dy-tri ditësh do të rifillojnë shërbesat fetare.
Kisha Ortodokse, e Shkodrës është ndërtuar dy vjet më parë me lëndë drusore në qendër të qytetit. Pritet që së shpejti në po këtë vend të fillojnë punimet për ndërtimin e kishës së re. Gjatë shpërthimit që ndodhi ne orën 02.50 të së mërkurës, është dëmtuar altari dhe pjesa e pasme e kishes.

Konferenca Ipeshkvnore e Shqipërisë: çdo vepër kundër Kishës është kundër vetë Zotit
20 Gusht 1998
Konferenca Ipeshkvnore e Shqipërisë ka dëenuar shpërthimin e ditës së mërkurë në Kishën Ortodokse në Shkodër. Në një komunikatë shtypi të Konferencës Ipeshkvnore të Shqipërisë, thuhet se kjo ngjarje ka tronditur thellë në zemër të gjithë besimtarët katolikë.
"Kisha, është tempulli i Zotit. Çdo vepër kundër Kishës është edhe kundër vetë Zotit. Populli ynë e ka provuar shumë mirë se çdo të thotë ngritje kundër Zotit, pasojat e së cilës po i vuajmë edhe sot", thuhet në komunikatë.
"Në emër të të gjithë besimtarëve katolike ne Ipeshkvijtë e Shqipërisë e gjykojmë këtë vepër të rëndë kundër tempullit të Shenjtë dhe shprehim keqardhjen tonë të plotë duke ju mështetur Zotit që Ai të jetë gjykatësi i vertetë i personave, shkaktarë të kësaj ngjarjeje", përfundon komunikata.