JAVA E LUTJES per Bashkimin e te Krishtereve

[NoName]

“KU JANË DY OSE TRE TË BASHKUAR NË EMRIN TIM,
ATY JAM EDHE UNË, MIDIS TYRE”

Mateu 18, 18-20

* * * * * * * *

LUTJA E BESIMTARËVE 18 JANAR


M. Vëllezër e motra, Zoti ka premtuar se do të vijë të banojë në ata që ruajnë fjalën e tij. Ta pranojmë jetën e tij në ne dhe le t’ia besojmë lutjen tonë.

L. Të lutemi së bashku e të themi:
Mblidhi bijtë e tu o Atë.

- Për të gjithë barinjtë e Kishës, që në lajmërimin e ungjillit të gjallërojnë në besimtarët vetëdijen e pagëzimit që i ka rilindur si bij në shpirt të të njëjtit Atë, të lutemi: Mblidhi bijtë e tu o Atë.

- Për të gjithë njerëzit, që të zbulojnë shenjat e pranisë së Zotit në ndodhitë e jetës dhe të historisë dhe t’i hapen Krishtit, Shpëtues i vetëm, të lutemi: Mblidhi bijtë e tu o Atë.

- Për të gjithë besimtarët në Krishtin, që në lutjen e përbashkët dhe në dialogun e ndërsjellë të mësojnë të kapërcejnë ndarjet dhe të kërkojnë rrugët e bashkimit të plotë, të lutemi: Mblidhi bijtë e tu o Atë.

- Për bashkësinë tonë, që të jetë vend mirëpritjeje, mëshire e simpatie për çdo njeri, të lutemi: Mblidhi bijtë e tu o Atë.


M. O Zot, Atë i Zotit tonë Jezu Krisht, përmbushi lutjet tona për bashkimin e të krishterëve dhe na jep Shpirtin e dashurisë e të paqes, që të gjithë bijtë e tu të mund të jenë në një zë në shpalljen e besimit dhe në pëlqim të ndërsjellë në të dhënit lavdi. Për Krishtin Zotin tonë. Amen.

[NoName]

LUTJA E BESIMTARËVE 19 JANAR


M. Vëllezër e motra, Krishti ka ngritur një lutje të apasionuar për bashkimin ndërmjet të gjithë besimtarëve. Përmes tij i drejtohemi Atit qiellor.

L. Të lutemi së bashku e të themi:
Na bëj të përsosur në bashkim, o Zot!


- Për Kishën, që të nxisë vëllazërimin dhe dialogun mes popujve dhe kishave motra dhe të jetë dëshmitare e dashurisë dhe mirësisë së Zotit që i thërret të gjithë në Mbretërinë e tij të lutemi: Na bëj të përsosur në bashkim, o Zot!

- Për të gjitha bashkësitë e krishtera, që të bashkohen për t’i dhënë falënderje Zotit Krijues dhe Atë dhe të bashkëpunojnë bujarisht për përparimin e vërtetë në drejtësi e në paqe, të lutemi: Na bëj të përsosur në bashkim, o Zot!

- Për ata që kërkojnë Zotin me zemër të sinqertë, që në ndodhitë e jetës të ndjejnë praninë e Zotit, t’i hapen besimit dhe të provojnë ndihmën e tij të provanisë, të lutemi: Na bëj të përsosur në bashkim, o Zot!

- Për bashkësinë tonë, që në të të rriten njësimi i ndjenjave dhe i zemrës, qëndrueshmëria në lutje, dashuria vëllazërore dhe shkëputja nga të mirat materiale, të lutemi: Na bëj të përsosur në bashkim, o Zot!


M. Përmbushi o Atë lutjet tona dhe drejtona në krijimin e bashkimit të vërtetë ndërmjet nesh, duke iu bashkangjitur Zotit Jezus me sinqeritet besimi dhe duke bashkëndarë me vëllezërit shpresën që vjen prej teje. Për Krishtin Zotin tonë. Amen.

[NoName]

LUTJA E BESIMTARËVE 20 JANAR


M. Vëllezër e motra, Zoti na ka thënë të lutemi jo vetëm për veten, por edhe për të gjithë njerëzit. Shpirti Shenjt na ndriçoftë mbi nevojat e vërteta të kishës e të botës.

L. Të lutemi së bashku e të themi:
O Zot na mëso të lutemi!


- Për Kishën, që të dijë të shpallë të vërtetën e Krishtit duke respektuar kulturat dhe ndjeshmërinë e popujve, të lutemi: O Zot na mëso të lutemi!

- Për të gjithë besimtarët, që në lutje të gjejnë forcën për të kapërcyer çdo vështirësi, guximin për të dëshmuar besimin e tyre, rastin për të forcuar shpresën, të lutemi: O Zot na mëso të lutemi!

- Për takimet tona të lutjes, që të liruar nga çdo interes egoist, të bëhen përvojë e dashurisë falas të Zotit dhe shprehje e mikpritjes vëllazërore në Jezusin, të lutemi: O Zot na mëso të lutemi!


- Për ne këtu të bashkuar në emër të Krishtit, që të kemi vetëdijen se lutja bashkon me Zotin e na bashkon mes nesh dhe se është rregull për një bashkësi të vëmendshme ndaj vëllezërve, të lutemi: O Zot na mëso të lutemi!


M. O Zot që njeh të gjitha nevojat tona materiale e shpirërore dhe dëgjon me durim lutjet tona, na jep hirin që të ndjejmë nevojën për t’u lutur dhe, mbi të gjitha, na mëso të lutemi si të pëlqen ty. Për Krishtin Zotin tonë. Amen.

[NoName]

LUTJA E BESIMTARËVE 21 JANAR


M. Vëllezër e motra, të vetëdijshëm se duhet të falim gjithmonë, edhe armiqtë, i drejtohemi Hyjit, Atit tonë që për së pari na ka dashur dhe në Krishtin na ka falur.

L. Të lutemi së bashku e të themi:
Na fal Zot për dashuri të emrit tënd!


- Për Kishën, që të jetë bashkësi vëllazërore mirëpritjeje dhe pajtimi që nuk refuzon e nuk dënon askënd, të lutemi: Na fal, Zot, për dashuri të emrit tënd!

- Për të krishterët, që të bëhen të aftë për të dëshmuar se dhurata e bashkimit, që vjen nga dashuria e Zotit, është më e fortë se ndarjet e krijuara prej njerëzve, të lutemi: Na fal, Zot, për dashuri të emrit tënd!

- Për atë që ndihet i vetëm dhe nuk ka gjetur dashuri, që të zbulojë dashurinë e Atit qiellor dhe të gjejë në vëllezërit miqësi e mirëkuptim, të lutemi: Na fal, Zot, për dashuri të emrit tënd!

- Për ne këtu të pranishëm, që ndjejmë të gjithë vështirësinë për të dashur të afërmin tonë si Krishti, që të mos lodhemi së luftuari kundër egoizmit tonë, i cili na mbyll ndaj të tjerëve, të lutemi: Na fal, Zot, për dashuri të emrit tënd!

M. Na bëj, o Atë, persona sinqerisht të hapur ndaj faljes, që të bëjmë të mundur realizimin e një shoqërie më të drejtë e mirëpritëse. Për Krishtin Zotin tonë. Amen.

[NoName]

LUTJA E BESIMTARËVE 22 JANAR


M. Vëllezër e motra, çdo ditë e jetës sonë është një hir i Zotit, një rast i vendosur në duart tona për të bërë mirë dhe për të ndërtuar bashkimin e paqen. T’i thërrasim Atit të mëshirshëm, që të ruajë çdokënd prej nesh në ecjen tonë të besimit.

L. Të lutemi së bashku e të themi:
Atë i Shenjtë na mblidh në bashkim!


- Për Kishën e shpërndarë në botë, që të ketë ndërgjegjen e gjallë të të qenit një familje e mbledhur në bashkim, që është e drejtuar prej Zotit dhe e njësuar në forcën e Shpirtit, të lutemi: Atë i Shenjtë na mblidh në bashkim!

- Për të gjithë përgjegjësit e kombeve që të angazhohen për të kapërcyer hendeqet e urrejtjes dhe të dhunës dhe që bota të njohë më në fund një epokë vëllazërie dhe paqeje, të lutemi: Atë i Shenjtë na mblidh në bashkim!

- Për ata që janë në nevojë dhe për të varfërit, që atyre t’u arrijë buka e shumëfishuar nga solidariteti dhe bujaria e operatorëve të paqes, të lutemi: Atë i Shenjtë na mblidh në bashkim.

- Për ne këtu të pranishëm, të thirrur në njësimin e besimit, të dashurisë e të shpresës, që të jetojmë shpirtin e dashurisë së Zotit dhe të ndihemi të bashkuar në përkim të ndërsjellë e në paqe, të lutemi: Atë i Shenjtë na mblidh në bashkim!


M. Jepi popullit tënd, o Atë i mëshirshëm, të provojë gjithmonë hirin tënd dhe ndihmën tënde atërore në ndërtimin e një familjeje të vetme, të pajtuar në dashuri dhe të angazhuar në ndërtimin e paqes. Për Krishtin Zotin tonë. Amen.

[NoName]

LUTJA E BESIMTARËVE 23 JANAR


M. Vëllezër e motra, fjala e shpëtimit që Krishti na ka sjellë duhet të përhapet. Të kërkojmë që Shpirti Shenjt të nxisë mesazherë të shumtë e të zellshëm të Lajmit të Mirë.

L. Të lutemi së bashku e të themi:
Mbështete, o Zot, misionin tonë!


- Për Kishën dhe barinjtë e saj që, besnikë ndaj misionit të marrë, të shpallin Ungjillin me guxim edhe përmes vështirësive të cilat mund të paraqiten në indiferencë ashtu sikurse në përndjekje, të lutemi: Mbështete, o Zot, misionin tonë!

- Për misionarët dhe misionaret, që të provojnë gëzimin ngushëllues të Krishtit që i pret në zemrën e çdo burri e të çdo gruaje, të lutemi: Mbështete, o Zot, misionin tonë!

- Për bashkësitë kishtare, që në shumëllojshmërinë etnike e në pasurinë shumëformëshe të dhuratave të bëhen vend në të cilin njihet dhe përqafohet fuqia e dashurisë së Hyjit, të lutemi: Mbështete, o Zot, misionin tonë!

- Për ne këtu të mbledhur nga dashuria e Krishtit, që të kemi ngushëllimin e të diturit se Shpirti është i pranishëm në Kishë dhe e drejton në misionin ndaj njerëzve si protagoniste, të lutemi: Mbështete, o Zot, misionin tonë!


M. Zot Jezus, ti do që fjala jote e shpëtimit t’u çohet të gjithë njerëzve. Vazhdo të nxisësh apostuj me zemër bujare e besnike, që mesazhi yt të arrijë botën mbarë. Ti që jeton e mbretëron me Atin dhe Shpirtin Shenjt në shekuj të shekujve . Amen.

[NoName]

LUTJA E BESIMTARËVE 24 JANAR


M. Vëllezër e motra, ta ngremë lutjen tonë tek Hyji Atë i cili vazhdon t’i dërgojë profetë kishës së tij, që të shpallin planin e tij të dashurisë.


L. Të lutemi së bashku e të themi: Hyj i dashurisë na dëgjo!


- Për kishën, që në dashurinë kundrejt të afërmit të shfaqë fytyrën e mëshirshme të Zotit të saj, të lutemi: Hyj i dashurisë na dëgjo!

- Për bashkësitë e krishtera, që të mund të zbatojnë gjithmonë thirrjen e tyre në shërbim të vëllezërve me gjeste konkrete dashurie, të lutemi: Hyj i dashurisë na dëgjo!

- Për të sëmurët, të vuajturit dhe të gjithë ata që ndodhen në vështirësi ekonomike dhe morale, që përmes solidaritetit dhe mirëpritjes së vëllezërve, të gjejnë mbështetjen dhe ndihmën e nevojshme, të lutemi: Hyj i dashurisë na dëgjo!

- Për bashkësinë tonë, që të jetë gjithnjë e angazhuar në të mirën e përbashkët dhe në pranimin e atyre që kanë nevojë për ndihmë dhe ngushëllim, të lutemi: Hyj i dashurisë na dëgjo!


M. O Atë, që shumë herë na ke dëftuar mëshirë, dëgjoje lutjen tonë dhe na jep dhuratën e Shpirtit tënd, që të dimë t’i duam vëllezërit tanë me të njëjtën dashuri me të cilën ti na do. Për Krishtin Zotin tonë. Amen.

[NoName]

LUTJA E BESIMTARËVE 25 JANAR


M. Vëllezër e motra, ta ngremë lutjen tonë të përbashkët tek Ati ynë qiellor, që ka dërguar Birin e tij në botë për të rindërtuar unitetin e familjes njerëzore dhe për të mbledhur bijtë e tij të shpërndarë andej këtej.


L. Të lutemi së bashku e të themi:
Mblidhi bijtë e tu, o Atë.


- Për barinjtë e Kishës, që në shpalljen e ungjillit ta ripërtërijnë tek besimtarët vetëdijen e pagëzimit që i ka rilindur si bij në shpirt të të njëjtit Atë, të lutemi: O Zot, jepi paqe ditëve tona.

- Për të gjithë besimtarët në Krishtin, që në lutjen e përbashkët dhe në dialogun e ndërsjelltë të mësojnë se si t’i kapërcejnë ndarjet dhe se si të kërkojnë rrugët e bashkimit të plotë, të lutemi: O Zot, jepi paqe ditëve tona.

- Për ata që punojnë në organizata humanitare dhe të vullnetarizmit, që ta kryejnë shërbimin e tyre bujar në shpirtin e dashurisë sipas shembullit të Krishtit, të lutemi: O Zot, jepi paqe ditëve tona.

- Për ne këtu të pranishëm, që nga kjo eukaristi të kemi më shumë forcë për t’u kthyer tek Hyji me zemër të re e të pastër, duke u vënë në dispozicion të vullnetit të tij, të lutemi: O Zot, jepi paqe ditëve tona.


M. O Hyj, Ati i Zotit tonë Jezu Krishtit, që ka dhënë vetveten për të shpëtuar njerëzimin, dëgjoji lutjet për bashkimin e të krishterëve dhe na jep shpirtin e dashurisë dhe të paqes, që të gjithë bijtë e tu të jenë të njëzëshëm në shpalljen e besimit dhe në lavdërimin tënd. Për Krishtin Zotin tonë. Amen.