Ate Lino Nikolai (50 vjetori i meshtarise se tij)

[NoName]

Atë Lino Nikolai, mesha në 50 vjetorin e mështarisë së tij, në fshatin Kodër Rrëshen

* Mirdita.net *

Kodër Rrëshen. Ka qënë e veçantë mesha e rradhës në kishën e fshatit Kodër Rrëshen në Mirditë. Ajo ka konciduar me 50 vjetorin e të parës meshë të ngritur prej tij. Ndërsa ideja e atë Linos për të zhvilluar meshën e radhën në këtë 50 vjetor të tijin me veladonin e bardhë, pikërisht në fshatin Kodër Rrëshen, ka grishur banorët e këtij fshati për ti bërë kësaj dite një përcjellje dinjitoze, ashtu siç në të vërtet e meriton atë Lino. Afër mesditës së djelë, këmbanorja ka njoftuar fillimin e meshës në ditën e 50 vjetorit të meshtarisë së priftit të këtij fshati atë Lino Nikolai. Banorë të shumtë, besimtarë katolikë, kanë tejmbushur ambientet e brëndshme të kësaj kishe të ringritur nga themelet gjatë viteve të demokracisë. Janë të gjitha moshat të cilët kanë mbushr kishën, që tek të vegjëlit, të rriturit, dhe më të moshuarit. Mesha si gjithnjë, pothuajse pa asnjë ndryshim nga e zakonshmja udhëhiqet nga atë Lino. Ndërsa në ambientet e jashtme është një situatë tjetër. Vetë banorët e Kodër Rrëshenit kanë oraganizur një surprizë për klerikun e nderuar nga të gjithë, duke e kthyer post-meshën në një moment festiv. Gjithshka është mundësuar me sponsorizimin e dy bisnezmenëve banorë të këtij fshati, z Bardhok Filopati dhe Bardhok Jushi. Ndërsa është gjetur përkrahja pa rezerva e drejtorit të kulturës në bashkinë e Rrëshenit, z Pjetër Marku, i cili sëbashku me bashkëpunëtorët e tij, ka mbërritur këtu për të mundësuar mbarëvajtjen e aktivitetit artistik. Janë këngëtarët tashmë më në zë të ansamblit “Mirdita”, që për më shumë se një orë mbajnë të mbërthyer vëmendjen e qindra banorëve të cilët sapo kanë dalë nga mesha. Janë Gjin Dona, Prena Beleshi, Kastriot Kola dhe Gjovalin Filopati që me këngët e tyre përcjellin jehonë festive. Rast pas rasti, marrin fjalën edhe besimtarë të cilët vlersojnë kontributin e madh të atë Linos, në ringritjen e besimit të ndrydhur rëndë që nga viti 1967, ashtu edhe në planin e zhvillimit të fshatit si në arsimin, infrastrukturë etj. Ndërsa vetë atë Lino, herë pas here, në shënjë modestie thotë se këto nuk janë të vërteta por zoti do t’ju falë.

Pak Histori
Ndonëse duan të harrojnë, bashkëkohës kujtojnë dhe përshpërisin nën zë se në mesin e vitit 1967, disa të rinj të mashtruar nga politika e kohës fillojnë një ndeshje në oborrin e kishës së vjetër. Ndërsa prifti i fshatit Kodër Rrëshen, Injac Dema vijonte i qetë meshën e tij pa e menduar se kjo do të ishte e fundit për shumë vite me rradhë. Në mes të saj loja ndërpritt dhe këtë individë futen në kishë duke i thënë priftit që të largohej se tashmë fshati nuk kishte më nevojë për të. Prifti i qetë u kundërpërgjigjet se unë po largohem jo se ju nuk keni nevojë për mua por më mirë thoni se kështu u kanë thënë. Prifti largohet duke lënë një peng përveq tjerash edhe një bibliotektë tepër të rrallë për të cilën askush nuk e di se ku ka përfunduar........... . Por vetëm në vitin 1994, pra pas afro 27 vitesh pas largimit të atë Injac Demës, për herë të parë do të shfaqej në fshat atë Lino Nikolai. Puna e tij qe e vështirë si fillim, pasi 27 vite ati- krisht, kishin bërë punënë e tyre. Por me kujdes dhe pasion gjithshka ka shkuar në vëndin e saj. Në qëndër të fshatit pak metra larg kishës e cila u shëmb nga komunizmi, është ringritur një kishë mjaft e bukur dhe funksionale. Pas ngritjes së kishës, atë Lino ka krijuar një ambient të jashtëm tepër të kulturuar. Është bërë rrethimi varrezave e madje sistemimi i tyre në mënyrën më të kulturuar. Janë ngritur edhe objekte social kulturore që fëmijët e fshatit të kalojnë momente të kulturuara argëtimi. Atë Lino ka stimuluar edhe punënë në fshat. Pikërisht aty kur dikur gjëndeshin ferrat, atë Lino ka mbjellur rreth 600 rrënjë rrushi. Ndërsa ka mundur që me fonde të mbledhura nga vetë ai të ndërtojë një shtëpi mjaft të bukur për njërin prej banorëve më të varfër të fshatit. Janë shumë punë të inicuara nga ai të cilat kanë ndikuar dukshëm në përmirësimin e jetës social-kulturore të këtij fshati.

Atë Lino Nikolai, prifti i Kodër Rrëshenit
Njehem më mirë se kudo në fshatin Kodër Rrëshen. Kaloj shumë mirë mes këtyre njerëzve të cilët më respektojnë shumë. Asnjëherë nuk kam menduar që të largohem prej këtij vendi, biles kur në marsin e vitin e mbrapshtë 1997, në këto ditë të vështira për ne, nga ambasada italiane jam thirrur për të ikur në Itali. Unë nuk pranova, pasi preferova të rri me banorët e Kodër Rrëshenit. Qëndrimi im këtu më bën shumë të kënaqur, edhe pse ndoshta nuk jam një bari i mirë, falë zotit nuk jam as rrogëtar që këtë punë po e bëj për para. Pra jam shumë i kënaqur me qëndrimin tim këtu për të vazhduar jetën tonë. Nuk kam ardhur këtu e nuk rri këtu për para, por që sëbashku të mund të bekojmë në dritën e zotit në rrugën e zotit.

Bardhok Filopati, ndërtues i kishës së Kodër Rrëshenit
Ati Linon e njohim që në meshën e parë të tij në Kodër Rrëshen. Mesha e parë u bë tek muranat e kishës së shëmbur shumë vite më parë e që tashmë janë bërë lulishte. Padër Lino, atëherë nuk dinte të komunikonte me ne për shkak të gjuhës, por filloi dhe shumë shpejt mësoi gjuhën tonë me të cilën komunikon normalisht. Është Italian por që në të vërtetë është ambientuar shumë mirë me ne të fshatit, sepse është një njëri i thjeshtë i cili din t’i bëjë për vete njerzit si me fjalë por edhe me ivestime.

Cilat janë disa nga këto ivestime që ka bërë padër Lino, megjithëse disa prej tyre duken që këtu?
Investime këtu kanë qënë të mëdhaja dhe pot ë them se një shtet i tërë apo bashkia nuk ka mundur të bëjë aq sa ka mundur të bëjë vetë padër Lino. Jo vetëm këtu por edhe në fshatra të tjera ka bërë ivestime sëpari në ndërtimin e objektet e kultit të cilat kanë qënë të shkatërruara, por edhe në kopshte, çerdhe, shkolla, ambiente sportive etj.

Në vitin 97 pothuajse të gjithë të huajt ikën nga vendi ynë ndërsa pader Lino nuk e bëri një gjë të tillë. Si e komentoni këtë?
Është një prift mjaft guximtar pasi 97 ishte një vit shumë i vështirë edhe për ne shqipatrët, jo më për të huajt që gjëndeshin këtu. Ky vendosi të qëndronte këtu dhe nuk ndërpreu udhëheqjen e meshave në të gjitha fshatrat që ka në axhendën e tij. Ka pasur edhe incidente të vogla në atë kohë, por ati Lino i ka shmangur me shumë vendosmëri. Në vitin 97 dikush i pati kërkuar me forcë që ta bekonte se donte të bënte një vrasje, pra një krim, por ai nuk u përkul përpara këtij lloj presioni. Kam qënë vetë me të në atë moment. Ti mund të bësh ç’të duash, por unë nuk mund të bekoj njerëz për krime, por vetëm në rrugën e zotit-këmbënguli padër Lino, duke bërë të mundur që të shmangte një krim të rëndë. Unë këtë mund ta quaj më shumë se një prift në planin fetar, dhe më shumë se sa një kryetar bashkie në planin e ivestime.

Pjetër Marku, drejtor i Qëndërës Kulturore Rrëshen
Unë nuk jam nga fshati juaj, por shumë më ka rastisur të jem në këtë fshat. Në këtë kuadër unë jam në dijeni të të të gjithë aktivitetit të padër Linos në këtë fshat. Atë që ai ka bërë në Kodër Rrëshen, nuk e ka bërë askush dhe askund. Vërtetë janë bërë shumë kisha, por të për të përqëndruar punën që e ka bërë këtu ky misionar zor se është bërë tjetërkund. Unë e vlerësoj edhe këtë që ju banorë të Kodër Rrëshenit, keni organizuar me rastin e 50 vjetorit të meshtarisë së parë të atë Linos. Kjo është një vlerë që ju i jepni atij, por edhe vehtes si njerëz të kulturuar. Ky është një prift që ka kaluar thjesht, ky ka lënë një vepër për të cilën do të kujtohet gjatë.

Fran Preçi, oraganizator i këtij takimi
Sot, për meshtarin tonë, At Lino Nikolai është një ngjarje shënuar. Ai, pikërisht sot mbush 50 vitë kur për herë të parë veshi veladonin dhe me fjalën e zotit në gojë, celebroi meshën e parë. Atëherë ishte i ri ndërsa sot e kanë mbuluar thinjat, por sidoqoftë atë Lino Nikolai për banorët e fshatit tonë, mbetet një figurë e shquar e Kishës Katolike, një simbol i shkëlqyer i fisnikërisë, bujarisë dhe personalitetit dhe me të drejtë të gjithë banorët e fshatit tonë e nderojnë me rrespektin më të lartë, dhe për punën që ai ka bërë për komunitetin e fshatit tonë, gjithmonë do ta respektojmë maksimalisht. Për të festuar këtë 50-vjetor, shoqata “Agimi”, dega Rrëshen, në bashkëpunim me qëndrën kulturore në Mirditë, organizuan edhe këtë koncert festiv.

Preng Jushi, kryetar i fshatit
Edhe pse ndodhi ajo që ndodhi, ne nuk i humbëm lidhjet me zotin. Besimi mundi të mbijetojë në ato vite që u ndalua me ligj dhe po festojmë përvjetorin e 50 të mesharisë të një bariu të devotshëm, i cili pa u lodhur udhëtoi nëpër Europë për të kërkuar ndihma kudo nëpër famulli. E sot famullia jonë ka tre kasha ku fjala e zotit na ngroh shpirtrat dhe na ndriçon rrugën. Padër Lino do të hynte në jetën tonë ashtu i urtë, fjalë pak dhe punë shumë. Do të ndjehej si në vëndlindjen e tij. E vendosi kremtimin e mshatrisë së tij këtu, jo pa qëllim. Ai don të jetojë mes nesh sa të jetojëe shpirti i tij. Kjo tokë katedralesh një ditë do ta rrjeshtojë atë në altarin e prelatëve të mëdhenj, edhe famulltarin tonë të nderuar padër Linon.