AMC, 15 milionë dollarë detyrime ndaj tatimeve

[Era1]

ERT urdhëron firmat AMC dhe Vodafone për tarifa celulare sa mesatarja europiane
Ilirjan Agolli
01-07-2006


Enti Rregullator i Tele-komunikacioneve (ERT) bëri të ditur sot se tarifat e reja të telefonisë celulare për vitin 2006 janë sa mesatarja e tarifave europiane. ERT u detyrua të nxjerrë një urdhër mbi tarifat e reja të interkonjeksionit për kompanitë e telefonave celularë Vodafone dhe AMC, pas dështimit të negociatave të tyre me kompaninë shtetërore të telefonisë fikse, Albtelekom.

Në përpjekjet për të ulur tarifat e celularëve u përfshi disa javë më parë edhe Koalicioni Shqiptar Kundër Korrupsionit (ACAC), bashkimi më i madh i organizatave jo-qeveritare. ACAC dhe disa media vendore pohuan se kishin gjetur disa shkelje në veprimtarinë e 2 kompanive celulare, të cilat zbatonin në Shqipëri cmimet më të larta në Europë. ERT publikoi sot urdhrin për uljen e disa tarifave të telefonisë celulare, pas dështimit të negociatave mes Albtelekom dhe Vodafone e AMC.

Drejtori ekzekutiv i ERT, Hydajet Kopani, thotë se me këtë urdhër që del për herë të parë synohet barazia midis operatorëve në treg si dhe ulja e tarifave për përdoruesit e shërbimeve telefonike.

"Tarifat për shërbimet e telefonisë së lëvizshme të Shqipërisë janë më të larta krahasuar me tarifat e njëjta të vendeve të tjera. Ndërsa niveli i përdorimit të telefonisë së lëvizshme, si ata me kontratë ashtu edhe ata me parapagim, është më i ulët se në vendet e tjera".

Zyrtarët e ERT-se pohuan se në periudha të mëparshme të dy kompanitë e telefonisë celulare kanë arritur me Albtelekomin marrëveshje anormale si ato në vitin 2000; në mesin e vitit 2004 ERT ndërhyri për t'i anulluar dhe korigjuar marrëveshjet e konjeksionit, ndërsa tani dështuan negociatat me Albtelekomin për marrëveshje të re, derisa u arrit tek ky urdhër që parashiko n tarifa sa mesatarja europiane.

"Marrëveshjet e mëparshme të interkonjeksionit, vecanërisht ato të vitit 2000, janë përkufizuar si marrëveshje jonormale në tregun e telekomunikacionit. Ne mendojmë se në ecurinë e mëtejshme, me urdhrin përkatës krijohen kushtet për një barazi mes operatorëve në respekt të lojës së tregut".

Koalicioni Shqiptar Kundër Korrupsionit (ACAC) ka vërejtur një seri shkeljesh ligjore në marrëdhëniet midis dy kompanive të telefonisë celulare AMC e Vodafone dhe shtetit shqiptar e Albtelekom. Koalicioni ka kërkuar ndërhyrjen e menjëhershme të shtetit dhe të ERT për të shmangur shkeljet e mëparshme në marrëveshjet e interkonjeksionit, si dhe fillimin sa më parë nga puna të kompanisë së tretë të telefonisë celulare Eaglemobile, një licensë kjo që e zotëron Albtelekom, për të bërë të mundur uljen e cmimeve të celularëve në Shqipëri, të cilët vlerëoshen si ndër më të lartët në rajon dhe në Europë.//


Nga Zeri i Amerikes

[Albo]

Kryetari i komisionit Ceka denoncoi edhe faljen e 15 milionëve për AMC

Vodafone iu hoq gjoba 4 mln dollarë


Ministria e Financave pranoi ankesën para 3 korrikut


Ministria e Financave i ka falur një detyrim prej 4 milionë dollarësh kompanisë celulare Vodafone. Vetëm një ditë pas denoncimit të kryetarit të komisionit hetimor parlamentar, Neritan Ceka, për amnistinë 15 milionë dollarëshe që mund të ketë ndërmarrë ministria e Financave pak ditë para zgjedhjeve të 3 korrikut 2005, Gazeta ka arritur të zbulojë një dokument ku vërtetohet falja e një detyrimi prej 496 milionë lekësh të reja ndaj Vodafone. Pas këtij fakti, pritet që komisioni hetimor të shtrijë aktivitetin e tij edhe në këtë pjesë tepër të dyshimtë të marrëdhënieve të kompanive celulare me shtetin shqiptar.

Dokumenti
Pas nisjes së hetimeve të komisionit parlamentar për telefoninë, Dega e Tatimpaguesve të Mëdhenj pranë Drejtorisë së Tatimeve deklaroi se kompanitë AMC dhe Vodafone kishin një borxh të pashlyer ndaj tatimeve. Ndërsa për AMC, bëhej fjalë për detyrime prej 15 milionë dollarësh, në rastin e Vodafone flitej për një shumë prej 6.9 milionë dollarësh. I pyetur nga anëtarët e komisionit hetimor për këto detyrime të pashlyera që nga viti 2001 ministri i Financave Ridvan Bode la të kuptohej se ato ishin eleminuar nga shteti. Një dyshim të tillë e thekson më tepër një dokument i tatimeve që zbulon faljen e një shume prej 4 milionë dollarësh ndaj Vodafone.
Në shkresën e dërguar në 3 korrik 2006 nga Dega e Tatimpaguesve të Mëdhenj në komisionin hetimor, pranohet fakti se ka një ndryshim të detyrimeve të Vodafone nga viti 2005 në vitin e ri fiskal. Po sipas të njëjtës degë tatimore, në 4 mars 2005, kompania Vodafone rezultonte “me një detyrim prej 6.9 milion dollarësh ndaj tatimeve”. Kjo vlerë i dedikohej mosdeklarimit të saktë të TVSH-së, Tatimit mbi të Ardhurat dhe Tatimit në burim si dhe gjobave të vendosura nga tatimet. Por një vit më pas ka një ndryshim rrënjësor të situatës. Tatimorët zbulojnë faktin se Vodafone “ka ankimuar shumën prej 496 milionë lekësh ( bëhet fjalë për detyrimet e Tatimit mbi të ardhurat) pranë Komisionit të Apelimit Tatimor pranë ministrisë së Financave dhe është hequr prej këtij të fundit”. Ndërkohë, drejtuesit e kësaj dege nuk kanë dhënë asnjë shpjegim për argumentimin e heqjes së këtij detyrimi dhe gjobës së vendosur nga tatimet. Ndërkohë, një tjetër detyrim prej 40 milionë lekësh është ankimuar në gjykatë dhe ndodhet në proces gjykimi. Dokumentacioni i tatimorëve shpjegon se “pjesa tjetër e detyrimeve është derdhur në buxhetin e shtetit”.

Hetimi
Kryetari i komisionit hetimor, Neritan Ceka u shpreh vetëm dy ditë më parë se ekziston dyshimi për një amnisti të kryer nga ministria e Financave për detyrimet tatimore të kompanive celulare. Kryetari Ceka zbuloi se këto falje detyrimesh disa milionë dollarëshe janë kryer para korrikut të vitit 2005, në periudhën para rotacionit të pushtetit. Por edhe ministri i ri i Financave, Ridvan Bode u shfaq mjaft evaziv përpara anëtarëve të komisionit hetimor, nëse kishte patur apo jo falje të detyrimeve të pashlyera nga kompanitë celulare.


Detyrimet e Vodafone

Për TVSH
TVSH 77.021.170 lekë
Dënimi 56.439.498 lekë
Gjithësej 133.460.668 lekë

Për tatimin mbi të ardhurat
Tatim Fitimi 238.811.003 lekë
Denim tatim fitimi 253.093.129 lekë
Gjithësej 491.904.132 lekë

Tatim në burim
Tatim në burim 35.736.757 lekë
Denim Tatim Burimi 35.736.757 lekë
Interesa Tatim Burimi 2.693.545 lekë
Gjithësej 74.167.059 lekë

Total 699.531.859 lekë
(Detyrimet janë përcaktuar deri në mars 2005)

GSH