Presidenti Sejdiu kërkon mbështetje për pavarësinë në OKB

[ARIANI_TB]

Zijadin Gashi, Prishtinë


Presidenti i Kosovës, Fatmir Sejdiu do ta përfaqësojë Kosovën në mbledhjen e Këshillit të Sigurimit që mbahet më 13 korrik, ku për procesin e deritashëm negociues do të raportojë dhe kryenegociatori Marti Ahtisari. Në këtë takim, i dërguari i Kombeve të Bashkuara për statusin e Kosovës do të paraqesë një pasqyrim të ecurisë së deritanishme të procesit negociues. Pjesëmarrja e Sejdiut në Këshillin e Sigurimit, është bërë e ditur sot pas një takimi që presidenti i Kosovës zhvilloi me zëvendësshefin e UNMIK-ut, Steeven Shock. Ky i fundit tha se vizita e presidentit të Kosovës në Nju Jork dhe situata e përgjithshme në Kosovë, ishin temat kryesore që i kishin diskutuar gjatë takimit:
“Ne biseduam për vizitën e presidentit në Kombet e Bashkuara, si edhe për gjendjen e sigurisë”, tha Shock, duke shtuar se me presidentin janë pajtuar plotësisht për rëndësinë që ka zgjidhja sa më e shpejtë e statusit të Kosovës:
“Se përse duhet të zgjidhet statusi i Kosovës gjatë këtij viti, kjo është e thjeshtë, sepse do të ishte në të mirë për tërë rajonin, do të sillte beneficione për Kosovën, beneficione për Serbinë dhe rajonin, si në aspektin e sigurisë, ashtu edhe në atë të zhvillimit ekonomik”, tha Shock.
Në anën tjetër, presidenti i Kosovës nuk ka dashur të komentojë asgjë në lidhje me udhëtimin e tij në Këshillin e Sigurimit në Nju Jork. Por ai tha se institucionet e Kosovës po vazhdojnë të angazhohen në përshpejtimin e përpjekjeve për zgjidhjen e statusit të Kosovës:
“Duke pasur parasysh nevojën e përshpejtimit të aktiviteteve rreth çështjes së statusit të Kosovës, rreth problemeve të jetës së përditshme dhe çka mund të bëjmë në rigjallërimin apo rigjenerimin ekonomik të Kosovës dhe një veçanti të posaçme rreth asaj, se cili do të jetë kujdesi ynë i vazhdueshëm edhe ndaj të gjithë qytetarëve, duke pasur parasysh edhe një kujdes ndaj komuniteteve pakicë, mendoj se në këtë qasje ne jemi thellësisht të preokupuar bashkërisht dhe do të kemi ndihmën edhe të zotit Shock edhe të gjithë ekipit që ky udhëheq, që të ecim më shpejtë në këtë fazë”, theksoi Sejdiu.
Në sesionin e 13 korrikut, do të marrë pjesë dhe kreu i shtetit të Serbisë. Mediat kosovare njoftojnë se krahas Ahtisarit, i cili do të paraqes një pasqyrë të procesit të deritashëm negociues, me fjalimet e tyre para Këshillit të Sigurimit do të paraqiten dhe shefat e delegacioneve nga Kosova e Serbia, prandaj pjesëmarrja e presidentit Sejdiu, thuhet se është e pashmangshme. Gjatë fazës së parë të procesit negociues, Ahtisari dhe zëvendësi i tij Albert Rohan organizuan gjashtë takime Prishtinë – Beograd të mbajtura në Vjenë, ku u diskutua për decentralizimin, pozitën e pakicave, trashëgiminë kulturore dhe çështjet ekonomike. Për asnjërën prej këtyre temave, nuk është arritur ndonjë marrëveshje apo harmonizim qëndrimesh. Ndërkohë që pas 13 korrikut besohet se do të kalohet dhe në fazën e dytë, atë të takimeve në nivele më të larta, që do të shënojë dhe fillimin e bisedimeve për vetë përcaktimin e statusit të Kosovës.

[brrrrrrr]

Presidenti paraqet kërkesat e Prishtinës zyrtare. Kërkohet mbështetja e ndërkombëtarëve

Kosova kërkon pavarësinë në OKB

Sejdiu merr pjesë në seancën e Këshillit të Sigurimit

PRISHTINE

Presidenti Fatmir Sejdiu do të kërkojë pavarësi për Kosovën në mbledhjen e nesërme të Këshillit të Sigurimit. Para nisjes për në Nju Jork, Sejdiu është takuar me udhëheqjen më të lartë të Kosovës, ku ka konfirmuar kërkesat drejtuar OKB-së si dhe mbështetjen që ka marrë nga faktorët ndërkombëtare për paraqitjen në Këshillin e Sigurimit. "Mund të them se ka një mbështetje të fuqishme nga të gjithë përfaqësuesit e institucioneve dhe të opozitës, pjesëmarrës të përbashkët në ekipin e unitetit, në këtë rrugë për të plasuar qëndrimin tonë dhe arritjet e Kosovës dhe për vizionin tonë në Këshillin e Sigurimit", - tha Sejdiu.
"Ky është një moment shumë i rëndësishëm që t'u adresohem të gjithë anëtarëve të Këshillit të Sigurimit, me aspekte të zhvillimit të përgjithshëm dhe të vizionit tonë politik".
Presidenti Sejdiu, në prag të nisjes së tij për në SHBA, tha se do të kërkojë një konferencë ndërkombëtare të donatorëve për Kosovën e pas statusit. Ai theksoi se ka pasur edhe një debat për kërkesat që i ka shtruar Albert Rohan para pak ditësh dhe se sipas tij, këto kërkesa do të plotësohen. Presidenti Fatmir Sejdiu ka komentuar edhe idenë e një takimi të nivelit më të lartë me Beogradin, duke thënë se pala e Kosovës nuk ka marrë ndonjë ftesë dhe e gjithë ideja e takimit tani për tani është në nivel të thashethemeve. Sejdiu tha se pala e Kosovës ka një formulë shumë të qartë, që pavarësia e Kosovës është e panegociueshme. Ndërkaq, nga Këshilli i Sigurimit do të kërkohet pavarësia dhe që Kosova të ketë vendin e saj në Këshillin Sigurimit të OKB-së. Kjo është hera e parë që një përfaqësues i Kosovës flet në një mbledhje të Këshillit të Sigurimit, megjithëse jo në cilësinë e përfaqësuesit zyrtar. Kosovën në mbledhjet e deritashme të Këshillit të Sigurimit e kanë përfaqësuar shefat e misionit të UNMIK-ut, ndërkaq në cilësinë e vëzhguesve dy herë kanë marrë pjesë Kryeministrat e Kosovës, ish-Kryeministri Kosumi dhe Kryeministri aktual, Agim Çeku. Edhe Kryeministri i Serbisë, Vojisllav Koshtunica, do të marrë pjesë në një sesion të Këshillit të Sigurimit, ku do të bisedohet për statusin e Kosovës. Koshtunica ndodhet aktualisht në Uashington, ku sipas medias do të këshillohet nga autoritetet amerikane të luajë rol konstruktiv në bisedimet për të ardhmen e Kosovës.

Nga "Gazeta Shqiptare"

[Llapi]

UNMIK-u thotë se kryetari Sejdiu në OKB do të ketë vetëm “takime private”...

Zyrtarë të Administratës së përkohshme ndërkombëtare në Kosovë njoftuan se kryetari i Kosovës, Fatmir Sejdiu, në Këshillin e Sigurimit të Organizatës së Kombeve të Bashkuara do të ketë vetëm “takime private”.
Zëdhënësi i UNMIK-ut, Georgy Kakuk, e bëri këtë njoftim në konferencën e rregullt për gazetarë. “Takimet e Sejdiut në Këshillin e Sigurimit do të jenë private, e jo zyrtare, dhe sa di unë takimet as që do të mbahen në sallën e Këshillit të Sigurimit, për këtë do ta quaj takim jashtë sallës”, tha ai.
Në anën tjetër, zyrtarët kosovar deri tash nuk kanë pohuar as mohuar këtë njoftim.
RTK 12/07/2006 15:36:45

[Llapi]

Pavarësi pa prapashtesa

Kryetari i Kosovës, Fatmir Sejdiu, u kthye nga
SHBA-ja, ku raportoi para Këshillit të Sigurimit.
Ai u shpreh i inkurajuar për mbështetjen, që ka
marrë në kryeqytetin e botës, ndërsa nuk e
mohoi mundësinë që pala kosovare të bëjë edhe
më lëshime në kërkesat e kryenegociatorit
Ahtisaari


Arben AHMETI
PRISHTINË, 14 KORRIK - “Mund të
them se tek të gjithë ekziston bindja
se pavarësia e Kosovës është opsioni
më real dhe më i mundshëm.
Në bisedat që unë kam zhvilluar
me përfaqësuesit e të gjitha
shteteve, ata kanë pasur një konsideratë
për veprimet që ne i kemi
bërë, edhe në proceset e Vjenës,
por edhe në zhvillimet e tjera. Kemi
mbështetje dhe do ta përshpejtojmë
procesin e pavarësimit. Prapashtesa
nuk ka”, deklaroi numri
një i Ekipit Negociator, kryetari i
Kosovës, Fatmir Sejdiu, me t’u
kthyer nga SHBA-ja, ku para
Këshillit të Sigurimit ka dhënë një
raport për zhvillimet në Kosovë.
Z. Sejdiu, i pritur në aeroport
nga kryeparlamentari Berisha,
falënderoi të gjithë ata që janë
angazhuar që Kosova kësaj radhe
të paraqitej në Këshillin e Sigurimit
nga një përfaqësues legjitim i
popullit. Ai e vlerësoi si shumë të
rëndësishëm zërin e institucioneve
kosovare në OKB. “Ishte nevojë
që në Këshillin e Sigurimit ta
japim vizionin tonë për Kosovën,
për të ardhmen, për pavarësinë e
saj. Falënderoj të gjithë ata që u
angazhuan në këtë drejtim. Pas
fjalës që e kam mbajtur kishte një
debat të rëndësishëm nga vendet
anëtare të KS-së”, tha z. Sejdiu. Ai
shpjegoi se gjatë qëndrimit në
kryeqytetin botëror, Nju-Jork, ka
pasur takime të ndryshme me përfaqësues
të shteteve të ndryshme
në OKB, por edhe me personalitete
të tjera ndërkombëtare. “Unë e
paraqita të gjithë atë që e kemi arritur
si rezultat i një pune, duke
dhënë premtimin se do të jemi në
procesin e ndërtimit të një shteti
sovran dhe të së drejtës, në të cilin
të gjithë qytetarët, edhe pakicat, do
të jenë të barabartë”, vuri në pah z.
Sejdiu.
Duke e vlerësuar si të dobishëm
debatin mes shteteve anëtareve në
KS, që ka vazhduar pas fjalimit të
tij, kryetari Sejdiu e cilësoi si korrekt
vlerësimin e kryenegociatorit
Ahtisaari, se pala kosovare është

më konstruktive në bisedime. “Jemi
në një proces, në të cilin kemi
kontribuar shumë, dhe vlerësimi i
Ahtisaarit se pala kosovare është
më konstruktive është real. Ne do
të kemi konsideratë për të gjitha
kërkesat, që po na bëhen dhe që e
kanë arsyen e vet”, tha z. Sejdiu,
duke mos e mohuar mundësinë
që pala kosovare të bëjë edhe më
tutje lëshime.
Për kryetarin e Kosovës nuk
është shqetësuese deklarata e përfaqësuesit
të Rusisë, i cili ka thënë
se OKB-ja nuk mund të imponojë
zgjidhje për Kosovën dhe se ajo
duhet të gjendet nga palët në
bisedime. “Mendoj se Rusia do të
jetë një faktor i rëndësishëm në
proces. Unë kam pasur një bisedë
mjaft konstruktive me përfaqësuesin
rus në KS, ku besoj që edhe
Rusia do të jetë në kompozicionin
e përgjithshëm”, tha z. Sejdiu.
Ndërkaq, duke mos dashur t’i
komentojë deklaratat e kryeministrit
serb, Voislav Koshtunica,
në KS, kryetari i Kosovës, Fatmir
Sejdiu, ritheksoi se pavarësimin e
Kosovës nuk do të mundë ta ndalë
askush.
“E drejta për vetëvendosje e popullit
të Kosovës është e natyrshme
dhe nuk mund ta mohojë askush”,
potencoi z. Sejdiu.
Raportimi i kryetarit Sejdiu në
Këshillin e Sigurimit, ndonëse në
një takim joformal të këtij institucioni,
megjithatë është paraqitja e
parë e një përfaqësuesi legjitim të
Kosovës në këtë organ të OKB-së.