Prokuroria e Tiranës ka filluar procedimin penal për vëllezërit Berisha dhe 21-vjeçarin Ruçi, pas incidentit
Procedim penal nipave të Berishës
Dritan Berisha: Policia sqaroi ngjarjen, por unë nuk kam qenë shkaktar i incidentit
Dashamir Biçaku
TIRANE- “Po, ka ndodhur një incident, por që tashmë është sqaruar dhe policia ka kryer veprimet e saj mbi këtë ngjarje”. Kështu ka pohuar për “Shekullin” nipi i kryeministrit, Dritan Berisha, i cili pretendon megjithatë se incidenti është fryrë nga mediat. Punonjësi i zyrës së Interpol-Tiranës nuk ka dashur të komentojë më gjatë ngjarjen e ndodhur mbrëmjen e së mërkurës, në afërsi të hotel “Dajtit”. Ndërkaq, policia e Tiranës ka sqaruar nëpërmjet një njoftimi zyrtar incidentin që solli procedimin penal si për nipat e Berishës, ashtu edhe për studentin 21-vjeçar. Sipas këtij njoftimi, mësohet se incidenti ka ndodhur mes vëllezërve Dritan dhe Agron Berisha e Nelson Ruçit, pas fërkimit të makinave të tyre. Mësohet se vëllezërit Berisha, të dy punonjës të Policisë së Shtetit, udhëtonin me automjetin e markës “Mercedez- Benz”, me targa TR 8133. Makina e drejtuar prej Nelson Ruçit ka qenë një “Mercedez- Benz E Class 220”, me targa TR 4016 K, i drejtuar nga Nelson Ruçi. 41-vjeçari Dritan Berisha ka mohuar të ketë qenë ai shkaktari i incidentit me armë, të ndodhur mbrëmjen e të mërkurës në bulevardin “Dëshmorët e Kombit”, por nga ana tjetër, zyrtarët e policisë së Tiranës kanë pohuar se kishin bllokuar dy armë pistoleta, të tipit “Bereta”, që u përkisnin dy vëllezërve Dritan dhe Agron Berisha, përkatësisht specialist i zyrës së Interpolit si dhe oficer i Policisë Gjyqësore, pranë Prokurorisë së Krimeve të Rënda.
Ngjarja
Mbrëmjen e të mërkurës, rreth orës 21:00, Dritan Berisha dhe vëllai i tij, Agroni kanë qenë duke udhëtuar në bulevardin “Dëshmorët e Kombit”, ndërsa pranë semaforit, automjeti i vëllezërve Berisha është konfrontuar me atë të drejtuar nga 21- vjeçari Nelson Ruçi. Për shkak të fërkimit të automjeteve, këto të fundit janë dëmtuar, pa shkaktuar dëme në protagonistët e incidentit. Menjëherë pas incidenit, dy vëllezërit i janë prezantuar 21- vjeçarit Ruçi si oficerë policie. Pas kësaj mësohet se palët kanë shkëmbyer grushta mes tyre dhe janë goditur keqas me njëri- tjetrin. Pas grindjes dhe shkëmbimit të grushtave, Nelson Ruçi ka tentuar të largohet nga vendngjarja me automjetin e tij, i cili ka pasur të thyer xhamin e pasmë për shkak të fërkimit me makinën e vëllezërve Berisha. Pikërisht pas kësaj tentative, njëri nga vëllezërit Berisha, pikërisht Dritani, ka qëlluar dy herë në ajër me armën “Bereta”, pjesë organike e punës së tij. Ndërkaq menjëherë në vendngjarje kanë mbërritur oficerët e policisë gjyqësore të komisariatit nr.1, të cilët edhe kanë nisur veprimet hetimore për zbulimin dhe zbardhjen e të vërtetës së ngjarjes së ndodhur.
Hetimi
Gjatë këqyrjes së vendit të ngjarjes, ekspertët e policisë kanë bllokuar dy gëzhoja të dala nga një armë “Beretë”, që sipas policisë i përkasin armës së Dritan Berishës. Po kështu, policia ka bllokuar edhe dy automjetet e protagonistëve të incidentit, në gjendjen në të cilën ato kanë qenë. Ndërkaq, veç ekspertëve dhe hetuesve të policisë kriminale të komisariatit nr.1 dhe të drejtorisë së Policisë së Tiranës, këqyrje të vendit të ngjarjes kanë kryer edhe ekspertët dhe specialistët e policisë rrugore të kryeqytetit për të përcaktuar shkaktarin e mundshëm të incidentit të ndodhur mes mjeteve, që më vonë ka precipituar në një konfrontim e më pas me të shtëna arme në ajër. Pasi kanë marrë edhe dëshmitë e tre të shoqëruarve, policia e Tiranës ka filluar procedimin penal si për nipërit e kryeministrit Berisha, ashtu edhe për Ruçin 21-vjeçar. Policia e Tiranës ia ka kaluar materialet e kësaj çështjeje prokurorisë së kryeqytetit, e cila do të vendosë për fatin e këtij procedimi si për vëllezërit Berisha ashtu edhe për Nelson Ruçin.
BERISHA
Nipi i kryeministrit Sali Berisha, punonjës në zyrën e Interpolit, ka pranuar incidentin e ndodhur në bulevardin “Dëshmorët e Kombit”, megjithëse ka shtuar se ai apo vëllai i tij nuk kanë qenë shkaktarë të incidentit
POLICIA
Pasi ka marrë dëshmitë e tre protagonistëve të incidentit, policia e Tiranës, në bashkëpunim me organin e akuzës ka filluar procedimin penal në gjendje të lirë për dy nipat e kryeministrit dhe 21-vjeçarin Ruçi
23/06/2006
KATEGORIA: Kronike nga Tirana
Shekulli
Përgjigju Duke Cituar
Postuar më parë nga Humdinger
Krijoni Kontakt