Statusi perfundimtar i Kosoves - lajme, analiza, komente

[ideus]

Këshilli i Sigurimit i Kombeve të Bashkuara mbrëmë e vlerësoi pozitivisht progresin e arritur në Kosovë, por kërkoi angazhim edhe më të madh nga institucionet për ndërtimin e një shoqërie shumetnike. Shumica e vendeve anëtare u shprehën për nevojën e zgjidhjes sa më të shpejtë të statusit të Kosovës, duke tërhequr vërejtjen se zvarritja e mëtejshme mund të shkaktojë destabilizim të gjendjes.

Vendet anëtare të Këshillit të Sigurimit të Kombeve të Bashkuara fokusuan rëndësinë e vazhdimit të angazhimeve në procesin e standardeve. Ata ofruan përkrahje edhe për bisedimet ndërmjet Prishtinës dhe Beogradit që udhëhiqen nga kryenegociatori Marti Ahtisari. Gjithashtu zgjidhja e statusit brenda një periudhe të shkurtër, nga shumica e ambasadorëve u vlerësua shumë e rëndësishme për ruajtjen e stabilitetit. Një kërkesë e tillë u parashtrua edhe nga shefi i UNMIK-ut Soren Jesen Petersen, i cili paraqiti raportin e fundit për gjendjen në Kosovë.“Pas shtatë vitesh shoqëria është e padurueshme që të ec përpara dhe do të jetë rrezik i madh që Kosova të mbetet në këtë status kuo për një periudhë edhe më të gjatë”.Përfaqësuesi i Shteteve të Bashkuara në Këshillin e Sigurimit, tha se duhet bërë përpjekje që për statusin të arrihet tek zgjidhja e negociueshme brenda këtij viti, pasi vonesa do të rris jostabilitetin.“Ne i ftojmë të gjitha palët që të jenë realiste për rezultatet e procesit të statusit. Përsëris se nuk do të ketë kthim të Kosovës në gjendjen e vitit para 1990, nuk do të ketë ndarje dhe nuk do të ketë bashkim të Kosovës me ndonjë shtet tjetër. Kosova duhet të jetë shumetnike dhe zgjidhja duhet të jetë e pranueshme për popullin e Kosovës” tha përfaqësuesi amerikan.Ndërkohë, shefja e qendrës serbe për Kosovën Sanda Rashkoviq – Iviq në këtë mbledhje përsëriti qëndrimin e Serbisë për autonomi substanciale. “Serbia kundërshton rihartimin e kufijve dhe çfarëdo zgjidhjeje që do ta bënte një anë fituese e një humbëse, nuk do të jetë e mirë” tha Iviq.Respektimi i të drejtave të pakicave, sidomos të serbëve ishte një çështje tjetër e vlerësuar e rëndësishme. Shefja e qendrës serbe për Kosovën Sanda Rashkoviq – Iviq, adresoi një varg kritikash për UNMIK-un dhe institucionet për atë që e cilësoi vazhdim idhunës ndaj serbëve. Në fund të debatit me shembuj konkret Petersen ndërkaq iu kundërpërgjigj qëndrimeve të saj.“Numri i rasteve me dokumente është 101 e jo 197. 9 prej tyre mund të kategorizohen si ndëretnike” tha Petersen.

Ndryshe, nga radhët e vendeve anëtare të përhershme, Rusia ishte më kritikja për zhvillimet në Kosovë. Përfaqësuesi i saj tha se procesi i standardeve nuk është i kënaqshëm. “Duhet të ekzistojë liria e lëvizjes dhe liritë e garantuara për pakicat e posaçërisht për serbët. Decentralizimi dhe ruajtja e trashëgimisë kulturore e fetare është ende larg nga zgjidhja” tha ai.Anëtarja tjetër e përhershme e Kina ndërkohë, vlerësoi se në procesin e standardeve ka pasur përparime, por mbesin ende shumë sfida në lëmin shoqëror e ekonomik. Përfaqësuesi i Austrisë në emër të Bashkimit Evropian tha se zbatimi i standardeve është i rëndësisë vendimtare për të ardhmen evropiane për Kosovën. Kjo ishte mbledhja e fundit në të cilën u bë vlerësim i procesit të standardeve. I pranishëm ishte edhe kryeministri i Kosovës Agim Çeku.

[ideus]

Nëse procesi i statusit ngadalësohet apo ndalet, atëherë mendoj se durimit do t’i vijë fundi. Kështu ka deklaruar shefi i UNMIK-ut, në largim, Soren Jessen-Petersen pak pas mbledhjes së Këshillit të Sigurimit, i cili bashkë me kryeministrin Agim Çeku, kanë thënë se Kosova bëri edhe një hap përpara drejt zgjidhjes së statusit. Duke sqaruar qëndrimin e tij lidhur me përshpejtimin e procesit të statusit, Petersen ka thënë se ky nuk është kërcënim apo shantazh, por është pranim i realitetit në terren. Pra, duhet të kalojmë nga gjendja e status quo-së në qartësi. Në konferencën e përbashkët për media në Nju Jork, kryeministri Çeku u zotua se qeveria e tij do të kujdeset për serbët e Kosovës njëjtë si për të gjithë qytetarët e vendit.

“Këshilli i Sigurimit i dërgoi porosi të qartë Beogradit që të mos vazhdojë t’i mbajë peng serbët e Kosovës”, tha kryeministri Çeku, duke e vlerësuar takimin. Gjatë një konference të përbashkët për mediat me shefin në largim të UNMIK-ut, Jessen-Petersen, kryeministri u zotua se Qeveria e Kosovës do të kujdeset për serbët, ashtu si për të gjithë qytetarët e vendit.“Mendoj se Beogradi e mori porosinë nga KS që t’i lejojë serbët e Kosovës të angazhohen, dhe nëse iu dëshiron të mirën, atëherë duhet ta bëjë këtë. Dua të shfrytëzoj këtë rast që t’i ftoj autoritetet e Beogradit t’i lejojnë serbët që t’i bashkohen Qeverisë së Kosovës, e cila do të kujdeset për ta si për të gjithë qytetarët e vet”, ka thënë kryeministri Çeku.Ai tha po ashtu se referendumi në Malit të Zi ka hapur dinamikë të re në rajon, duke u angazhuar për realizimin e parimeve të njëjta edhe në rastin e Kosovës. “Këtë parim ne e kërkojmë edhe për Kosovën.

Kosova ka qenë gjithashtu pjesë e federatës dhe populli i Kosovës do ta tejkalonte çdo kusht të referendumit, jo me 55 përqind por me 95 përqind”, është shprehur Çeku.Ndërkaq, shefi i UNMIK-ut, Jessen-Petersen, gjatë adresimit të tij është përqendruar kryesisht në nevojën e përshpejtimit të procesit për zgjidhjen e statusit. Ai ka përsëritur parimet e Grupit të Kontaktit, ndërsa ka theksuar që zgjidhja të përmbajë edhe garanci për sigurinë e serbëve. “Nëse procesi i statusit ngadalësohet apo ndalet, atëherë mendoj se durimit do t’i vijë fundi. Ky nuk është kërcënim apo shantazh, por është pranim i realitetit në terren. Pra, duhet të kalojmë nga gjendja e status quo-së në qartësi”, ka thënë Petersen.Petersen e sqaroi gjithashtu edhe çështjen e zgjedhjeve të ardhshme lokale në Kosovë. “Ato janë shtyrë sepse tani serbët nuk do të merrnin pjesë. Nuk e kemi caktuar kohën, por jemi pajtuar që ato të mbahen 3 deri në 6 muaj pas definimit të statusit”, tha Jessen-Petersen.

[ideus]

"Është gabim nëse dikush pohon se shqiptarët e Kosovës mund të bashkohen me Shqipërinë. Këtë askush në bashkësinë ndërkombëtare nuk e mbështet. Nëse realizohet pavarësia e Kosovës, atëherë një nga kufizimet gjithsesi do të jetë ndalimi i bashkimit me Shqipërinë", deklaroi Rohan për gazetën e Beogradit "Politika".
"Ndërkaq rajonet e tjera shqiptare në Maqedoni dhe në Serbinë Jugore nuk do të kenë të drejtën të minojnë integritetin e shteteve të tyre. Në këtë mënyrë do të pengohej vazhdimi i procesit të shkëputjeve", tha Rohan. Sipas tij, për zgjidhjen e statusit të Kosovës mund të gjendet edhe zgjidhja sipas së cilës askush asgjë nuk nënshkruan.

"Nëse Këshilli i Sigurimit vendos diçka, atëherë askush nuk duhet të nënshkruajë", është shprehur Albert Rohan. Po kjo gazetë sot ka publikuar në faqen e parë "lajmin ekskluziv" se, sipas burimeve të saja të sigurta në SHBA, Marti Ahtisari ka prezantuar në Nju Jork idenë që bisedimet mbi statusin e Kosovës të fillojnë qysh në korrik dhe atë me takimin direkt në shkallë më të lartë. Ahtisari angazhohet për atë që bashkësia ndërkombëtare ta organizojë një tubim ku pranë tavolinës së njejtë, në ballë të delegacioneve të veta, do të gjendeshin Vojisllav Koshtunica dhe Agim Çeku. Në zhagronin diplomatik ky lloj i takimeve quhet "takim i elefantëve" kurse burimi i saj pohon se Ahtisari i ka bindur anëtarët e Grupit të Kontaktit se nuk ka mënyrë më efektive për tu hapur negociatat e mirëfillta mbi statusin e Kosovës

[ideus]

Presidenti amerikan George Bush gjatë qëndrimit në kryeqytetin austriak ka thënë se SHBA-ja po punon me aleatët evropianë për t’i sjellë Kosovës qëndrueshmëri, duke shtuar se gjatë vizitës së kryeministrit serb në Shtetet e Bashkuara, ai do t’i bëjë thirrje zotëri Koshtunica t’i njohë nevojat e shumicës shqiptare në Kosovë, në shkëmbim për garanci që të drejtat e pakicës serbe do të respektohen.

Po ashtu në një takim me një grup studentësh në Bibliotekën Kombëtare të Austrisë, presidenti Bush tha se roli i SHBA-ve është inkurajimi dhe mbështetja e dialogut si dhe puna drejt një zgjidhje paqësore. "Zgjidhja duhet të përmbushë nevojat e shumicës dhe gjithashtu të ketë parasysh edhe të drejtat e pakicave", ka thënë presidenti Bush për të shtuar se zgjidhja duhet të jetë "hap pas hapi".
Kancelari Schusel thekson se në Ballkan ka ende çështje të hapura të cilat i diskutoi në hollësi në bisedimet me Presidentin Bush. "Lidhur me Kosovën, vazhdojnë negociatat nën udhëheqjen e Marti Ahtisarit dhe Albert Rohan të cilat po zhvillohen në Vjenë. Zyra e zotit Ahtisari ndodhet këtu, dhe ne po bëjnë sa të mundemi për të ndihmuar procesin", tha Kancelari austriak Wolfgang Schuessel.

[Irfan]

Shqiptar te dashur do e bashkoj edhe nje tekst,dhe sipas kesaj analize shohim se KOSOVA a ka fitu pavarsin e plot ne duar te shqiptarev....!!!
LUS MODERATOREV TMOS E FSHİN!

KOSOVA E VOGËL DHE FUQITË E MËDHA

Me emrin e Allahut,Meshiruesit,Meshirbersit

MEXHID YVEJSI, GJAKOVË

22.02.2006.Gjakovë

“Politika është në vendin e dytë të profesioneve më të vjetra në botë. Prandaj edhe ka ngjajshmëri me atë që është në vendin e parë.”

-Ronald Reagan



Kosova e vogël, me mbi 10 mijë kilometra katrorë, me rreth dy milionë banorë, prej të cilëve mbi 90 përqind shqiptarë, paraqet një rast të veçant që ka tërhequr interesimin e madh ndërkombëtar.

Interesimi i madh ndërkombëtar nuk është aq i madh për Kosovën e vogël, për shumicën shqiptare, por interesimi aq i madh është për pakicën e e vogël joshqiptare…!

Pse për pakicën e vogël joshqiptare gjithë ky interesim aq i madh bashkësisë i ndërkombëtare? Vetëm që Kosova mos të jetë shqiptare…!

Bashkësia ndërkombëtare duke priviligjuar pakicën dhe duke diskriminuar shumicën, me këto veprime jonjerëzore, antihistorike, dëshiron me zor të krijojë një Kosovë shumëetnike…!

Kosova e vogël me probleme aq të mëdha! Kosova e vogël ka probleme të mëdha ekonomike, mungesë kronike të energjisë elektrike, numër të lartë të papunësisë, numër edhe më të lartë të pakënaqësisë në mes të popullsisë… Por, problemi më i madh i Kosovës së vogël është statusi i pazgjidhur, siç po quhet herë i ardhshëm, herë statusi final ose përfundimtar…

Statusi përfundimtar, sipas një diplomati perëndimor, e tha, si me shaka: ” është kur të përshëndetemi nga kjo dynja…!” Sipas këtij perëndimori, statusi i Kosovës, si duket, është bërë objekt humori…!

Takimi i Këshillit të Sigurimit i 14 shkurtit 2006, në New York, ku u diskutue për Kosovën, u cilësuar se ka shënuar njërin prej kapitujve më të rëndësishëm në historinë më të re të Kosovës, ku mori pjesë edhe kryeministri i Kosovës, Bajram Kosumi.

Kryeministri i Kosovës, Bajram Kosumi, me t’u kthyer në Prishtinë, i ngazëllyer deklaroi se ajo që ndodhi në Këshillin e Sigurimit ishte një faqe e re historike e marëdhënjeve të Kosovës…

Po, kjo ishte një faqe e re, faqe e re, por e një libri të vjetër…! Kosovës për herë të parë i është hapur dera në OKB. Po, por i është hapur dera kryeadministratorit të Kosovës, z. Petersen, kurse i është mbyllur goja kryeministrit të Kosovës…! Kur të mbyllet goja, ka përfunduar loja…!

Në takimin e Këshillit të Sigurimit, përfaqësuesit e nëntëmbëdhjetë vendeve theksuan se Kosova duhet të përmirësojë standardet dhe në veçanti, të zbatojë decentralizimin, në mënyrë që të zgjidhet statusi. Shumë përfaqësues theksuan se Kosova duhet të konsiderohet rast unik…

Kosova e vogël, jo vetëm që “duhet” të konsiderohet rast unik, por Kosova nën UNMIK është bërë që nga qershori i vitit 1999, rast unik, testues, eksperimentues, një rast unik, një vend mik-për çdo armik…!

Kosova e vogël ka armiqë të mëdhenjë, sikur që ka edhe miqë të këndshëm…! Njihet një thënie e Katonit, të cilën e kishte shënuar Ciceroni, që e përdorte shpesh, ku thuhet:”Armiqt e mëdhenjë e keqëdashës të bëjnë më shumë shërbime sesa miqtë e këndshëm, sepse të parët shpesh thonë të vërtetën, të dytët nuk e thonë kurrë.”



Kush e thotë të “vërtetën” për Kosovën?



E vërteta për Kosovën mbahej “sekret”. Ky “sekret” është zbuluar nga John Sawers, drejtori politik i Ministrisë së Jashtme Britanike, i cili u ka thënë serbëve se Grupi i Kontaktit ka vendosur për pavarësinë e Kosovës dhe se serbët duhet t’i shfrytëzojnë të mirat që ofron një status i këtillë. Në Vjenë, në zyrën e kryenegociatorit ndërkombëtar, Martti Ahtisaari, ndihej një kënaqësi rreth mesazhit të qartë të diplomatit britanik, i cili e ka thënë të vërtetën që duhej thënë.

Në Kosovë, shqiptarët ndjen kënaqësi nga sinqeriteti i diplomatit britanik. Në Kosovë shqiptarët ndjen kënaqësi, ndërsa në Sërbi reagimet e serbëve kanë qenë me rrebesh, stuhi, histeri…

Kryesuesi i radhës i OSBE-së, Karel de Gucht, pas vizitës në Prishtinë, ka qëndruar në Beograd, ku me 17 shkurt 2006, ka deklaruar: “Beogradi dhe Prishtina duhet të gjejnë një zgjidhje nëpërmjet dialogut dhe marrëveshjes. De Gucht ka thënë:”Është mirë që së shpejti do të fillojnë bisedimet rreth decentralizimit, zbatimi i të cilit është me shumë rëndësi.”

Pra, qenka mirë që bisedimet rreth decentralizimit filluan në Vjenë dhe se zbatimi është me shumë rëndësi! Po, ka shumë rëndësi, por jo për Kosovë, por për Sërbi… Me decentralizim, Kosova e vogël do të zvoglohet, sepse do të coptohet…! Edhe sot Kosova është e coptuar, por me decentralizim coptimi do të zgjerohet, do të legalizohet, gati gjysma e Kosovë do të sërbizohet…

Grupi Ndërkombëtar i Krizave ka publikuar raportin lidhur me zgjidhjen e statusit të Kosovës, ku rekomandon imponimin e pavarësisë së Kosovës, por me kushte…! Sepse, s’duhet të humbet kohë me negociata të kota, vlerëson Grupi Ndërkombëtar i Krizave…

Të dy palët të përgatitën për kompromise, ka thënë kryetari i Komisionit Evropian, Hose Manuel Barroso.

Dhe më në fund, por që duhej thënë që në fillim, Sekretarja Amerikane e Shtetit, Kondoliza Rajs, në Washington, kështu vlerëson:

“Negociatat për Kosovën do të kenë ndikim edhe në rajon. Në bisedë me kolegët nga Bashkësia Evropiane jemi pajtuar se kjo çështje (e statusit të

Kosovës) duhet të zgjidhet gjithsesi në një formë, ka thënë sekretarja amerikane, K. Rajs. Po, ka thënë në një formë, por nuk ka thënë se në cilën formë…!

Lexues të nderuar! Ndaluni për një moment dhe mendoni mbi atë se çka në të vërtetë nënkuptohet me këto deklarata kundërthënëse për Kosovën e vogël nga përfaqësuesit e fuqive të mëdha…!

Nëse qenka vendosur që Kosova të fiton Pavarësinë, atëherë pse të bisedohet me Sërbinë?

Nëse bisedimet për decentralizim qenkan me shumë rëndësi, atëherë pse thuhet se s’duhet humbur kohë me negociata të kota, siç i quan bota?

Nëse të dy palët duhet të përgatiten për kompromise, atëherë, me kompromise, pavarësia s’na bie hise?!

Me kompromise mund të na bie hise, pa menduar, vetëm pavarësia e kushtëzuar! Pavarësia e kushtëzuar me Kosovën e coptuar apo të cunguar! Atëherë, Kosova e vogël do të bëhët sa një gogël!!!

Kosova e vogël, sa një gogël, rast unik, nën UNMIK, lodër e fuqive të mëdha, me njerëz të civilizuar, që i pengojnë shqiptarët të jenë të bashkuar…! Njerëzit, sa më shumë të civilizuar, thoshte Kanti-i, aq më tepër bëhën “aktorë”. “Aktorë” vendorë, “aktorë” ndërkombëtarë, që me Kosovën e shkretë bëjnë pazar…!

Liderët kosovar po bëjnë pazar me serbët për Kosovën, ende pa u bërë Kosova shtet, pa pasur Kosova sovranitet…Grupi i Kontaktit i cili qëndron prapa kryenegociatorit, Marti Ahtisaarit, është mbikqyrës i pazarit…

Në Pallatin e Paqes në Hagë shkruan: “Nëse e do paqën, kujdesu për drejtësi”. Shqiptarët e duan paqen, do të kujdesën për drejtësi, por do të ketë paqë, do të ketë drejtësi vetëm kur Kosova të bashkohet me Nënën Shqipëri…Sot kjo nuk është e lejuar! E lejuar është Kosova me pavarësi të kushtëzuar…Kosova me pavarësi të kushtëzuar bëhët një Kosovë e vogël shumëetnike, me një autonomi të zgjeruar, nga vendet mike, por me hapësirë të zvogëluar nga fuqitë e mëdha….!

[ideus]

Deklaratat e presidentit amerikan Xhorxh Bush për Kosovën gjatë samitit në Vjenë, sinjalizojnë qartë se pavarësia është zgjidhja për statusin e Kosovës. Kështu e komentojnë politikanë dhe analistë në Prishtinë, qëndrimin e presidentit Bush se statusi i Kosovës duhet t’i përmbushë nevojat e shumicës dhe të forcojë mbrojtjen e të drejtave të pakicave.

Qëndrimet e presidentit Bush lidhur me Kosovën, të shprehura së fundi gjatë samitit SHBA - Bashkim Evropian në Vjenë, i kanë lehtësuar edhe më tepër politikanët kosovarë sa i përket fatit të statusit. Ish-kryeministri Bajram Rexhepi thotë se deklarata e presidentit Bush e fuqizon opsionin e pavarësisë si zgjidhje për statusin. “Me gjuhën diplomatike kjo është pikërisht çka ne pretendojmë, t’i përmbushin kërkesat e popullatës shumicë, por edhe të jemi zemërgjerë sa i përket komuniteteve pakicë, veçanërisht serbëve. Kjo deklaratë është në përputhje edhe me parimet e Grupit të Kontaktit dhe vetëm sa i konfirmon dhe fuqizon ato, prandaj është shumë pozitive për Kosovën”. Në një tryezë të rrumbullakët në kuadër të samitit SHBA-BE, presidenti Bush ka theksuar rëndësinë e një zgjidhjeje për Kosovën që do të përmbushë nevojat e shumicës, por duke forcuar mbrojtjen e të drejtave të pakicave. Kjo e dyta, sipas Alush Gashit, shef i grupit parlamentar të Lidhjes Demokratike, njëherit anëtar i Komisionit për Bashkëpunim Ndërkombëtar dhe Integrim në BE, është një nga përcaktimet kryesore të politikës kosovare. “Për dy çështje në Kosovë, në mesin e partive politike dhe në Kuvend, ekziston konsensus i plotë; çështja e pavarësisë së pakushtëzuar dhe mbrojtja e minoriteteve”.

Deklarimet e presidentit amerikan për çështjen e Kosovës, Gashi i sheh si rikonfirmim të angazhimit të Uashingtonit për Kosovën, duke shfaqur besimin se procesi i statusit nuk do të zvarritet edhe më tej. “Besojmë se SHBA-të kanë mjaft argumente që Grupin e Kontaktit në veçanti dhe vendet që kanë rezerva sa i përket dinamikës, t’i bindin se kjo çështje duhet të zgjidhet deri në fund të vitit”. Udhëheqësi amerikan është shprehur gjithashtu në favor të forcimit të rolit të BE-së në Ballkan, duke konfirmuar se Shtetet e Bashkuara do ta mbështesin Bashkimin Evropian në integrimin e këtij rajoni. Nënkryetari i Partisë Demokratike, Bajram Rexhepi, e konsideron shumë të rëndësishme për Kosovën, riafirmimin e partneritetit amerikano-evropian. “SHBA-të dhe BE-ja i kanë përafruar qëndrimet edhe sa i përket Ballkanit Perëndimor dhe Kosovës në veçanti. Me sa jam unë i informuar, ata janë pajtuar që këto projekte t’i realizojnë bashkërisht”. Vlerësimet e politikanëve në këtë rast përputhen edhe me ato të analistëve. Milazim Krasniqi thotë se deklaratat e udhëheqësit amerikan sinjalizojnë pavarësinë, por tërheq vërejtjen që mesazhi për pakicat të merret seriozisht nga lidershipi kosovar. “Padyshim që është, por jo për çfarëdo pavarësie. D.m.th. theksi gjithmonë po bie te gatishmëria e shoqërisë kosovare, institucioneve, për të mbrojtur komunitetet, me theks të veçantë tek serbët. Kështu që mendoj se ky mesazh duhet të lexohet me seriozitet”. Sidoqoftë, mbrojtja e pakicave kohëve të fundit është kthyer në një lloj kushti për lidershipin e Kosovës, në procesin e statusit. Ditë më parë, edhe shefja e diplomacisë amerikane, Kondoliza Rajs, u kërkoi dy udhëheqësve kosovarë, Sejdiut dhe Çekut, më shumë fleksibilitet gjatë procesit, me qëllim të përfundimit të suksesshëm të çështjes së statusit.

[ideus]

I dërguari i posaçëm i OKB-së për statusin e Kosovës, Martti Ahtisaari, pritet që së shpejti të dërgojë ftesat zyrtare në Prishtinë dhe Beograd, për një takim të nivelit më të lartë politik shqiptaro-serb.

Zoti Ahtisaari do të paraqitet në Këshillin e Sigurimit të OKB-së, nga mesi i muajit korrik, për të raportuar mbi mbarëvajtjen e fazës së parë të bisedimeve ndërmjet Prishtinës dhe Beogradit.

Ftesat për takimin në nivelin më të lartë politik ndërmjet Prishtinës dhe Beogradit janë në përgatitje e sipër dhe zyra e zotit Ahtisaari thotë se me gjasë ato do t'u dorëzohen palëve në periudhën kur i dërguari i posaçëm për statusin do të raportojë në Këshillin e Sigurimit për gjashtë raundet e bisedimeve në Vjenë.

Zyrtarët ndërkombëtarë thonë se ftesat nuk do t'i adresohen vetëm kryeministrave ose presidentëve të Kosovës e Serbisë, por do të kërkohet një përfaqësim i lartë i Prishitnës dhe Beogradit për të diskutuar çështjen e statusit të Kosovës.

Burime pranë misionit të zotit Ahtisaari thonë se takimi shqiptaro-serb për statusin e Kosovës mund të ndodhë pas datës 20 korrik, për shkak të kryerjes së punëve logjistike dhe përgatitjeve më të mira të tij.

Kryendërmjetësi Martti Ahtisaari, me raportimin e tij në KS të OKB-së, nga mesi i korrikut, do të kërkojë hapjen e dritës së gjelbër për një takim të këtillë, me përfaqësim të nivelit më të lartë politik të Kosovës e Serbisë, në këtë rast kryeministrave ose presidentëve të tyre.

Zyra e zotit Martti Ahtisaari, thotë se me takimin do të kryesojë për herë të parë vetë ai, ndërkaq që do të kërkohet edhe një përafaqësim në nivel vëzhguesish, edhe të përfaqësuesve të Grupit të Kontaktit.

Në rast të përfaqësimit të lartë të Prishtinës dhe Beogradit në Vjenë, ku pritet të mbahet takimi, pjesëmarrës përkrah zotit Ahtisaari thuhet se do të mund jetë edhe i dërguari amerikan për statusin, Frank Wisner dhe nuk përjashtohet mundësia e pjesëmarrjes së të dërguarit të posaçëm rus dhe atij të BE-së.

Përfaqësuesit e të dyja palëve në bisedime do të paraqesin vizionin e tyre për zgjidhjen e statusit të Kosovës dhe të ardhmen e saj dhe në rast të suksesit me takimin e parë pritet që diskutimet të vazhdojnë edhe në disa ruande të tjera.

Në rast të përfaqësimit të Kosovës e Serbisë në nivelin më të lartë politik, ky do të jetë takimi i dytë me radhë i këtij niveli, që nga përfundimi i luftës në Kosovë, pas atij të para tre vjetëve pikërisht në kryeqytetin austriak, Vjenë./bbc