Hidhet në erë kryqi, kapet marokeni
I huaji u dyshua për lidhje me atentatin
--------------------------------------------------------------------------------
Brikena Shllaku
MALESI E MADHE
Një sasi eksplozivi e prodhuar në mënyrë artizanale ka rrëzuar dje në të gdhirë një kryq prej guri të ngritur mbi një varr mbi 100-vjeçar në fshatin Kokpapaj të Malësisë së Madhe. Disa orë më pas, patrullat e policisë rrugore kanë ndaluar në fshatin Çezmë në afërsi të Koplikut, shtetasin me origjinë arabe, Muhamed Betuf. Marokeni nuk ka patur asnjë dokument identifikimi me vete dhe oficerët e policisë kanë dyshuar se mund të bëhet fjalë për një lidhje mes atentatit ndaj kryqit dhe pranisë së marokenit të dyshimtë në këtë zonë. Në drejtim të Shkodrës, janë nisur dje ekspertë të forcave të antiterrorit nga Ministria e Brendshme, për të ndjekur më afër këtë ngjarje. Sipas burimeve, deri në orët e vona të mbrëmjes, ekspertët nuk kanë mundur të japin një përgjigje të saktë pyetjes nëse Muhamed Betuf kishte lidhje me eksplozivin.
Dëmtimi me lëndë eksplozive i kryqit të gurtë mbi varrin shekullor të Kol Palushit, në fshatin Kokpapaj ka qenë një shqetësim serioz për komisariatin e Koplikut, pasi një akt i tillë mund të provokonte një konflikt mes besimtarëve katolikë dhe muslimanë në këtë fshat. Ndërhyrja në kohë e policisë dhe fillimi i menjëherëshëm i hetimeve për të zbuluar autorët e kësaj ngjarjeje ka ndikuar që banorët e zonës të mos nxitohen për të drejtuar gishtin mbi “fajtorët e supozuar”. Ky është incidenti i radhës në qarkun e Shkodrës që ka si synim dëmtimin e simboleve fetare dhe provokimin e besimtarëve.
Shpërthimi
Jehona e një shpërthimi eksplozivi rreth orës 05.30 të mëngjesit të djeshëm, ka zgjuar nga gjumi banorët e fshatit Kokpapaj (Rrjoll) në komunën e Shkrelit. Pavarësisht zhurmës së krijuar banorët e fshatit e kanë patur të vështirë të identifikojnë objektin që kishte qenë shënjestër i shpërthimit me eksploziv. Por afro një orë më pas njëri nga banorët që ka kaluar pranë varrezave të fshatit, ka vënë re se kryqi i gurtë, afro 1.5 metra i lartë që qëndronte mbi qivurin shekullor të Kol Palushit, ishte rrafshuar. Ai ka njoftuar të afërmit e Kol Palushit, njërit nga emrat më të njohur të këtij fshati në të kaluarën. Më pas është njoftuar komisariati i Koplikut dhe Drejtoria e Policisë Shkodër, të cilat kanë ngritur një grup hetimor që ka shkuar në vendngjarje. Nga kqyrja e vendngjarjes ka rezultuar se shpërthimi është realizuar me një sasi eksplozivi të prodhuar në mënyrë artizanale. Fuqia e shpërthimit ka qenë e vogël, pasi nuk është bërë izolimi i eksplozivit, por objektivi i autorëve është arritur, pasi kryqi i gurtë mbi varrin e Palushit është shëmbur në tokë. Burime të policisë së Koplikut thanë për “Gazetën” se kjo varrezë ka qenë e përbashkët për afro një shekull si për besimtarët katolikë ashtu dhe për ata muslimanë. Por varri më dominues dhe më i dukshëm i kësaj varreze ishte qivuri mbi 100 vjeçar i katolikut të njohur të zonës, Kol Palushi. Policia ka marrë deklarimet e personave të afërm të Palushit si dhe të disa fshatarëve të tjerë që mund të hedhin dritë mbi motivet e ngjarjes. Ekspertët kriminalistikë kanë fiksuar disa gjurmë gishtash në vendngjarje të cilët mund të ndihmojnë në identifikimin e autorëve të këtij akti.
Arabi
Dje pasdite patrulla e shërbimit të policisë rrugore e komisariatit të Malësisë së Madhe ka konstatuar një person të dyshimtë që ecte më këmbë në afërsi të fshatit Çezmë, që ndodhet vetëm pak kilometra larg nga qyteti i vogël i Koplikut. Policia e ka ndaluar shtetasin e dyshimtë dhe gjatë kontrollit rezultoi se ai nuk kishte asnjë dokument identifikimi me vete. Komunikimi me të ishte i pamundur pasi nuk kishte një përkthyes që mund ta kuptonte gjuhën e tij. Personi i dyshimtë u shoqërua në qelitë e Drejtorisë së Policisë Shkodër dhe pas komunikimit nëpërmjet përkthyesit rezultoi se quhej Muhamed Betuf, i vitlindjes 1978 me shtetësi marokene. Policia e Shkodrës dyshon se ai ka qenë duke shkuar në drejtim të kufirit me Malin e Zi. Gjithçka pritet të sqarohet sot paradite pasi drejt Shkodrës do të udhëtojë një ekip i komisariatit për refugjatët i OKB-së me seli në Tiranë, i cili do t’i ofrojë asistencën e nevojshme marokenit 28 vjeçar.
Shkodër
Më 10 janar të këtij viti dhe pikërisht në ditën e festimit të Kurban-Bajramit, persona të paidentifikuar sharruan kryqin e vendosur në majë të malit të Zef Janës në fshatin Bushat të Shkodrës. Ky incident ndodhi vetëm pak orë pas vizitës që bëri presidenti Alfred Moisiu në Myftininë e Shkodrës.
Elbasan
Një vit më parë në fshatin Fikas të Elbasanitt u vendos një kryq gjigant buzë rrugës nacionale Elbasan-Qafë Krrabë. Myftinia e Elbasanit dhe komuniteti musliman i zonës kërkuan heqjen e këtij kryqit. Në këtë konflikt u fut dhe komuna e Bradasheshit, e cila kishte dhënë lejen. Disa persona tentuan rrëzimin e kryqit, duke e dëmtuar atë.
GAZETA SHQIPTARE
Përgjigju Duke Cituar
. Shume shqetesuese incidente te tilla dhe reagime te tilla (nga te dyja palet.)
Postuar më parë nga Lioness
Krijoni Kontakt