Berisha: Gati dhe boshti i jugut, Tiranë-Elbasan, Berat-Tepelenë-Gjirokastër
N.P
Tiranë- Kryeministri Sali Berisha deklaroi gjithashtu dje gjatë mbledhjes se qeverisë se për rrugën Durrës-Morinë, ndër tre variantet e paraqitura, Këshilli i Ministrave do të pranonte atë me të shkurtrin që, sipas Berishës, do të ishte edhe më i kushtueshëm. “Në 3 variante ekzistuese të studiuara të rrugës Durrës-Morinë, njëri prej të cilëve është 247 km, tjetri 223 km, tjetri 174 km. Ne kemi zgjedhur 174 km, kemi zgjedhur gjurmën më të shkurtër, natyrisht është e kushtueshme”, - tha Berisha në fillim të mbledhjes se qeverisë. Ndërkohë, kreu i ekzekutivit ka shtuar se Ministria e Punëve Publike po studion parafizibilitetin e boshtit qendror të jugut (Tiranë-Elbasan-Berat-Tepelenë-Gjirokastër). “Ndaj, i faktuar si fizibël, ky është dhe segmenti i parë i rëndësishëm, përveç lidhjes që u bën dy qyteteve, është dhe segmenti i parë shumë i rëndësishëm i boshtit qendror të jugut, i cili ka shumë të dhëna se do të jetë fizibël, sikundër ka edhe mendime kundërshtuese, edhe këto nga ekspertë, të cilët pretendojnë se trajektorja e këtij boshti bën një shkurtim jo domethënës të distancës. Teknikat lazer sot lejojnë përcaktim, nuk po them milimetrik, por të paktën centimetrik të distancës, kështu që do të caktohet gjurma e rrugës, do të studiohet gjurma. Në rast se boshti qendror i lugut, del fizibël, ne do ta ndërtojmë atë”, tha Berisha duke shtuar se i tillë do të jetë edhe korridori qendror i jugut. “Sepse nuk është njësoj si të ndërtosh autostradë në Myzeqe dhe të ndërtosh autostradë në Buzë apo nga do t’i kalojë gjurma. Rrugët janë dhe duhet të mbeten një trashëgimi e madhe e shoqërisë shqiptare. Ndaj edhe ne, duke e përgëzuar këtë kompani për nismën i kërkojmë Ministrisë së Punëve Publike t’i japë të gjitha lehtësirat e mundshme. “BOT” është një formë që tashmë duhet ta inkurajojmë. Kjo praktikë duhet të inkurajohet edhe në segmente të tjera. Për ndërtimin e rrugëve ne duhet të përdorim të gjitha format e mundshme, rrugët, deri në përfundimin e ndërtimit të tyre, duhet të mbeten një emergjencë kombëtare”, - tha ai.
06/05/2006
KATEGORIA: Politike
Krijoni Kontakt