Rrëfim tronditës i prishtinases F. K. për vizitën te “hoxha” Safet Zeqiri
“Mjeku popullor”, një dhunues brutal
Viktima F.K. ka shkuar për të shëruar kokëdhembjet… Kur është zgjuar nga gjumi veten e ka parë lakuriq, ndërsa pas kthimit në shtëpi në brendi të vaginës gjenitale ajo ka gjetur letra, penj dhe qime… Më pas, kanë filluar gjakderdhjet. Këtë e ka bërë Safet Zeqiri, i njohur si mjek popullor
LORIK PUSTINA
Prishtinë, Fushë-Kosovë, 13 prill - Një dhomë e errët me kukulla të drunjta, tavolina të përmbysura dhe tre qirinj, të mjaftueshëm për t’i parë fytyrat e njerëzve.
Safet Zeqiri apo siç e njohin në Fushë-Kosovë “hoxha”, priste e i përcillte pacientët e tij. Ai shitej për mjek popullor, që me anë të magjisë mëtonte të shëronte sëmundje të ndryshme. Së paku kështu është paraqitur deri të mërkurën, kur policia e ka vënë nën pranga, i dyshuar për dhunimin e shumë vajzave dhe grave, të cilat kanë shkuar tek ai për të gjetur shërim.
Ato kanë shpresuar në diskrecion, si dhe në sukses, pa terapi të lodhshme, me ilaçe dhe pa injeksione.
Njëra nga to, F.K., nga Prishtina.
“Unë kisha kokëdhembje të madhe, më binte të fikët dhe mjekët nuk ma gjenin çaren… Andaj, prej dikah dëgjova se “hoxha” në Fushë-Kosovë mund të më shërojë”.
Por, shpresa se do të mund të shërohet nga “bamirësi” asaj i është shndërruar në një ankth të vërtetë. E martuar, F.K. ka edhe fëmijë.
“Hyna te “hoxha” dhe ai më tha se do të më shërojë me anë të magjive… Filloi të lexojë Kur’anin. Më tha se jam shumë e sëmurë dhe do të vdisja shumë shpejt, por ai do të më shëronte. Më pas, më dha një gotë me një materie të lëngshme ta pi”.
Me ta pirë këtë materie, që policia dyshon të jetë chloform, materie e cila të vë në gjumë, F.K. është alivanosur dhe tutje nuk ka ditur dhe ndie asgjë.
Pasi asaj i është rikthyer vetëdija dhe e ka parë veten lakuriq, është tmerruar.
“E kam pyetur se pse dhe si ka ndodhur kjo. Ai më tha se kjo është pjesë e ritualit, tani jam shëruar dhe nëse i tregoj dikujt lidhur me këtë do t’i përdorë magjitë që të m’i paralizojë fëmijët”, thotë ajo.
E frikësuar, ajo kthehet në shtëpi. Familjes nuk i tregon asgjë.
Por, në mbrëmje ajo ndien dhembje të mëdha në fund të barkut.
Më të shkuar në ‘toilet’, ajo nxjerr nga vagina penj të najlonit, penj për qepje, copëza të letrave, qime të gjata, përcjellë me shumë gjakderdhje.
“Shkova në Emergjencë, por nuk mundën të më ndihmojnë, e më pas në Gjinekologji”, tregon ajo.
Në Gjinekologji, në raportin e datës 15 dhjetor 2005, është po e njëjta diagnozë. Ajo ishte dhunuar në gjendje të pavetëdijshme.
“Hoxha” kishte përdorur mjete të ndryshme dhe materiale të shumta, për ta trajtuar viktimën në mënyrën më mizore të mundshme.
Pas kësaj, F.K. paraqitet në polici me deklaratë, ndërsa njësiti i krimeve rajonale i fillon hetimet.
Bazuar në hetimet, del se shumë viktima të tilla kanë kaluar nëpër duart e “hoxhës” nga Fushë-Kosova. “Mjeku popullor” më pas mësohet të jetë një sadist, që në emër të mjekësisë popullore ka dhunuar më shumë se 7 vajza, e ka shfrytëzuar rastin dhe ka kryer akt seksual me viktimën F.K.
Burime brenda policisë kanë bërë të ditur se dyshohet se Zeqiri e ka dhunuar një femër nga Gjilani, si dhe tri vajza të tjera nga Fushë-Kosova.
Jo të gjitha viktimat kanë dhënë deklaratë para hetuesve, të frikësuara nga kërcënimet e të ashtuquajturit “mjek popullor”.
Burime të policisë kanë bërë të ditur se kohë më parë, “hoxha” është rrahur nga V.S. banor i Prishtinës, të cilit Zeqiri, në emër të bamirësisë, ia ka dhunuar motrën dhe kushërirën.
Sikurse edhe dy viktimat F.K. dhe F.S., ashtu edhe këto të tria janë trajtuar në mënyrë sadiste nga “mjeku popullor”.
“Policia e ka arrestuar Zeqirin në shtëpinë e tij, ku janë gjetur medikamente të shumta me shenjë të shoqatës farmaceutike të Kosovës, të cilat i dyshuari i ka shitur ilegalisht”, tha Sabrije Kamberi, zëdhënëse e SHPK-së.
Viktimat të cilat kanë dhënë deklaratë janë dërguar në qendrën patologjike në Prishtinë për ekzaminime mjekësore.
http://www.lajm.com.mk/DesktopDefaul...ArticleID=2511
Krijoni Kontakt