Ella Beavers (Bellovoda), korçarja që çuditi Mongolinë dhe kërkon një fanellë kuqezi 03-05-2006
Boks: Shqiptarja Bellovoda, nënkampione e Mongolisë
Quhet Ella Beavers (Bellovoda) dhe ka vetëm pak kohë që është kurorëzuar me titullin nënkampione e Mongolisë në sportin e boksit në peshën 64 kg. Një lajm vërtet i mirë për të gjithë sportin shqiptar, sepse po tregojmë se kemi talente në çdo fushë. Bellovoda është 32 vjeç dhe ka lindur në qytetin e Korçës. Ka qysh në vitin 1997 që është larguar nga Shqipëria dhe prej dy vjetësh merret me sportin burrëror të boksit në kryeqytetin mongol, Ulan Bator. Është e martuar me një amerikan dhe ka pasaportë amerikane. Ka përfunduar shkollën e mesme në qytetin e Korçës në "Raqi Qirinxhi" dhe ka zhvilluar studimet e larta në degën e agrobiznesit në universitetin "Fan Noli" po në Korçë.
Një nxënëse vërtet e shkëlqyer dhe pas përfundimit dhe deri sot punon konsulente e Bankës së Berzhit për vendet në zhvillim. Duket paksa e çuditshme kjo hyrje për të talentuarën shqiptare, por ja që sot ka arritur deri atje sa të stërvitet me një pasion të madh për boksin dhe të arrijë deri atje sa të shpallet në kampionatin kombëtar të boksit në Mongoli në vendin e dytë.
Bellovoda: Dua fanellën kuqezi
Ka vetëm pak ditë që ka mbërritur në vendlindjen e saj dhe, ashtu e çiltër, e qeshur dhe me shumë dëshirë, ka pranuar të flasë për gazetën, duke rrëfyer gjithçka nga jeta e saj: "Në radhë të parë, jam shqiptare dhe jam krenare. Ndodhem në Mongoli, në këtë shtet me 2 milionë e 200 mijë banorë, dhe ndihem vërtet mirë.
Punoj si konsulente në Bankën e Berzhit dhe sportin e boksit e kam pasion. Më parë nuk godisja dot as një mace, ndërkohë që ringu më ka bërë të ndihem ndryshe me këtë lloj sporti. Sidoqoftë, jam shumë e kënaqur si me punën që bëj, ashtu edhe me sportin që merrem. Jam nënkampione në boks në Mongoli në peshën 64 kg, pasi në finale më ka mundur boksierja Ariun Zhargall. Në Mongoli, në këtë kampionat morën pjesë 60 femra në katër kategori peshash. Për momentin në Mongoli stërvitem me trajnerin tim D.Enkhbat dhe kam shumë dëshirë që një ditë të vesh fanellën e kombëtares shqiptare. Në fakt, në lojërat olimpike sporti i boksit për femra nuk është, por pas kërkesës që është bërë mendohet që në vitin 2008, në Lojërat Olimpike që do të zhvillohen në Kinë, ky sport të futet si shumë të tjerë. Më vjen mirë që gjatë këtyre ditëve ndodhem në Korçë dhe u bëj thirrje të gjithë drejtuesve që e kanë në dorë të mendojnë që edhe unë të vesh fanellën kuqezi një ditë.
Jam e bindur që do ta përfaqësoj denjësisht Shqipërinë. Jam e gatshme që gjithçka ta sponsorizoj vetë, vetëm kërkoj të vesh fanellën kuqezi në çdo aktivitet ndërkombëtar qoftë. Më parë, askush prej familjes sime nuk ka qenë sportist, por unë jam dashuruar shumë me këtë sport dhe tani është pasioni im më i madh. Kam qenë më parë në shumë shtete, si në Uzbekistan, Azerbajxhan, Gjeorgji, Armeni, Lituani, Angli, ndërsa shtëpia ime ndodhet në Karolinën e Veriut, por unë për momentin jetoj në Mongoli. Mongolia është shteti më i ftohtë në botë dhe në dimër stërvitem për orë të tëra. Më kujtohet dita e parë e largimit, pra '97-ta, ndërsa tani, që jemi më 2006 ën, jam e bindur që Shqipëria do të më lejojë të vesh fanellën që shumë e kam ëndërruar. Shpresoj dhe i bëj thirrje edhe Federatës së Boksit dhe KOKSH it që të më ndihmojë ta bëj një gjë të tillë. E dua vërtet Shqipërinë."
Jo vetëm boksiere
Por shqiptarja Ella Beavers nuk është vetëm nënkampione në sportin e boksit në Mongoli. Ajo më tej, në intervistën për gazetën, ka treguar se në vitin 2005 është shpallur edhe nënkampione në maratonën e 10 kilometrave. Madje duke u kthyer shumë më prapa, ajo kujton ditët para se të largohej nga Shqipëria kur ishte edhe anëtare e klubit "Skënderbeu" në sportin e basketbollit. Pra, janë tri lloje sportesh që merret Bellovoda dhe krejt rastësi tani ndodhet në Korçë për të takuar familjen e saj, babanë, Kristaqin, dhe mamanë, Rozetën.
Madje pas një bisede që ka zhvilluar gjatë këtyre ditëve me ekzekutivin e klubit "Skënderbeu", Romeo Xinxifi, ajo kërkon që për momentin sa ndodhet në Shqipëri të gjejë një trajner për t'u stërvitur, ndërkohë që ka shumë dëshirë ta vazhdojë me pasion këtë sport. E gjithë kjo është me pak fjalë historia e shqiptares Ella Beavers (Bellovoda), që pasi është shpallur nënkampione e Mongolisë, tani ndodhet në Korçë dhe kërkon fanellën kuqezi.
Përgjigju Duke Cituar
Postuar më parë nga Julius
me nai knock out natyral. 
Krijoni Kontakt