Etjet e Kosoves ne Palm Beach Festival

[dodoni]

Mbrëmjen e së enjtes u hap në Palm Beach, Festivali Ndërkombëtar i Filmit. Për herë të parë konkurron një film kosovar

“Etjet e Kosovës”, flet shqip në Florida

Kosova, prezantohet si shteti i origjinës së filmit, i cili rrëfen tragjedinë gjatë dhe pas luftës

Pandi Gjata,Palm Beach, Florida

Ndërsa në Vjenë vijojnë bisedimet për statusin final, Kosova prezantohet si shtet në një nga festivalet më të rëndësishëm të filmit në Shtetet e Bashkuara të Amerikës. Vetëm një klikim në faqen e internetit të “Palm Beach International Film Festival” (ëëë.pbifilmfest.org) dhe shikon që artistët ia dolën mbanë të prezantojnë ndërkombëtarisht Kosovën si shtet.
“Etjet e Kosovës” (Kosova Desperate Search) i regjisorit Sunaj Raça, një film që rrëfen tragjedinë e vitit 1999 është i pari prodhim kinematografik që flet shqip në Palm Beach. Festivali u hap të enjten në mbrëmje me prezencën e artistëve, regjisorëve dhe producentëve të filmave konkurrues nga Shtetet e Bashkuara të Amerikës, si dhe nga shumë vende të tjera të botës. Për këtë festival konkurrojnë rreth 2500 filma dhe në kategorinë “International Cinema” janë përzgjedhur vetëm 30, ndër të cilët edhe “Etjet e Kosovës”. Në ceremoninë e hapjes së Festivalit, mori pjesë aktori kryesor Blerim Destani, producenti Sali Limani dhe skenaristi dhe regjisor i filmit Sunaj Raça. Premiera e filmit “Etjet e Kosovës” është sot në mbrëmje e ndërkohë ndihet interesi i madh i pjesëmarrësve, por edhe i medias për prodhimin që vjen nga Ballkani dhe që flet shqip për herë të parë në Florida.
Filmi, një produksion i kompanisë gjermane “LARA Entertainment” rrëfen dramën e Kosovës. Por jo vetëm kaq. Personazhet tregojnë se tmerret vijojnë edhe pas luftës. “Personazhet janë të etur për jetë, janë të etur për shpresë, janë të etur për të ardhmen. Filmi duke ndjekur vijën jetësore të katër protagonistëve, përcjell emocione të fuqishme të njerëzve që mundohen të ndërtojnë jetën e tyre nga rrënojat, të gjejnë forcë brenda vetes për të ecur përpara, për të shuar etjen e tyre për jetë. Për të gjetur më të dashurit e tyre”,- thonë producentët. “Etjet e Kosovës” gërsheton lojën e një trupe të përzgjedhur aktorësh nga Kosova, Maqedonia e Shqipëria, si Sheqerie Buçaj, Blerim Destani, Rajmonda Bulku, Faruk Begolli, Ermela Teli, Tinka Kurti, Bislim Muçaj dhe Meto Jovanovski. Producentë të filmit janë Sali Limani, Blerim Destani dhe Sunaj Raça.

Etjet e Kosovës (Kosova Desperate Search)
Vendi i origjinës: Kosova
Gjuha: Shqip
Zhanri: Dramatik
Koha: 82 min
Regjisor: Sunaj Raca
Producentë: Sali Limani, Blerim Destani, Sunaj Raca
Skenarist: Sunaj Raça
Muzika: Marijan Neçak
Aktorët: Sheqerie Buçaj, Rajmonda Bulku, Blerim Destani, Faruk Begolli, Tinka Kurti, Ermela Teli, Bislim Muqa, Meto Jovanovski
Me pak fjalë, filmi flet për pasluftën. Vendi është i shkatërruar. Jeta e fermeres së re (Sheqerie Buçaj) dominohet nga dëshpërimi dhe zija. Gjatë luftës u detyrua të arratisej me fëmijët e nga shtëpia, ndërsa burri i saj (Blerim Destani) doli vullnetarisht luftëtar. Ushtarët serbë kanë rrëmbyer fëmijët dhe keqtrajtuar gruan. Tani e vetmja detyrë e saj në jetë është të rigjejë dy fëmijët. I shoqi kthehet invalid nga lufta, i detyruar të rrijë në karrigen me rrota dhe i torturuar nga kujtimet e luftës. Të dy jetojnë tani pranë njëri-tjetrit në distancë dhe në heshtje. Shumë gra dhe nëna të dëshpëruara janë ende duke kërkuar bashkëshortët dhe fëmijët e tyre të zhdukur.

Festivali i “Palm Beach”-it
I themeluar në vitin 1996, Festivali Ndërkombëtar i Filmit në Palm Beach ishte ide e bizneseve lokale dhe përfaqësuesve të shoqërisë civile. Ata menduan se ky festival do t’i ofronte komunitetit një aktivitet kulturor më shumë dhe në të njëjtën kohë do mund të bëhej burim i madh të ardhurash nga industria kinematografike. Por në vitin 2003 Festivali u bë një konkurrues i denjë, duke qenë në krah të festivaleve të suksesshëm si ai Torontos. Sot Festivali Ndërkombëtar i filmit “The Palm Beach” renditet në 25 festivalet më të mirë në botë. Ndryshe nga shumë festivale të ngjashme, ky i Palm Beach ka një tjetër dimension. Sipas organizatorëve, qëllimi i festivalit është të arrijë të ndryshojë jetët e të rinjve duke i ndihmuar ata të realizojnë ëndrrat e tyre nëpërmjet botës së filmit. Në edicionet e mëparshme, por edhe këtë vit, pjesëmarës janë emra të njohur të kinematografisë botërore. Madje edhe supermiliarderi Donald Trump, jo vetëm që i kushton një vemendje këtij festivali, por pas ceremonisë së hapjes së aktivitetit, në një nga vilat e tij përrallore u organizua një mbrëmje festive për gjithë të pranishmit.




22/04/2006

marre nga Shekulli

[Davius]

Blerim Destani, nuk më pëlqenë ky djalë, më duket shume artificial në filmat që ka luajtur.

[dodoni]

Festivali i Filmit Ndërkombëtar në Palm Beach në Florida. Shfaqet filmi i regjisorit kosovar Sunaj Raça

Drama e luftës dhe pas saj

Pas Floridas, premiera e filmit do të jetë se shpejti ne Tiranë e në Shkup

Pandi Gjata, Palm Beach, Florida

Gjithçka fillon në një fushë të thjeshtë sporti. Fëmijë që rendin pas një topi. Lojën e tyre e ndjek një nga burrat e fshatit. Papritur gjuajtjen e topit e zevendësojnë krismat e armëve në malet aty afër. Pas kësaj burri vendos t’i bashkohet radhëve të Ushtrisë Çlirimtare të Kosovës. Në shtëpi lë gruan dhe dy fëmijët, djalë e vajzë. Rrok armën dhe del në mal.
Këtu është fillimi i dramës së filmit “Etjet e Kosovës”, pjesëmarrës në Festivalin Ndërkombëtar të Filmit në Palm Beach në Florida. Në 82 minuta drama zhvendoset në prapaskenën e luftës, në jetën dhe problemet sociale të qytetit kosovar. Një familje si shumë të tjera e ka një traumë. Gruas (Sheqerie Buçaj) serbët i rrëmbejnë djalin, ndërsa për fatin e vajzës nuk di gjë. Lufta mbaron pas hyrjes së trupave të NATO-s.
Ish-ushtari i UÇK-së kthehet në shtëpi mbi karrige me rrota. Burrë e grua përpiqen nëpërmjet strukturave të UNMIK-ut për të gjetur fëmijët. Indiferencë nga ndërkombëtarët. Nëna nuk e humb shpresen deri në fund. “Shpresa sjell gëzim, nuk kanë faj ëngjëjt e kësaj toke”, janë fjalët që përcjell gruaja si mesazh i gjithë filmit “Etjet e Kosovës” i regjisorit Sunaj Raça. Aktorët flasin pak dhe heshtin shumë. Skenat e luftës, efektet dhe muzika janë rrëqethëse.
Përveçse një film artistik, “Etjet e Kosovës” është një dokument historik i asaj çka ka ndodhur gjatë dhe pas luftës. Qindra të zhdukur. Të afërm në kërkim të të dashurve. Publiku e ka pritur me emocion filmin në premierën e të dielës. Mes tyre i pranishëm ishte dhe një aktor nga Shqipëria që prej 15 vjetësh jeton në SHBA. Ai është Zef Mosi. Ndoshta pakkush e kujton me emrin e tij të vertetë. Por nëse permend prefektin Maliq tek filmi “Përrallë nga e kaluara”, i regjisorit Dhimitër Anagnosti apo thënien e tij proverbiale “ka ligj, por ka edhe Maliq”, e kujtojmë të gjithë.
Prej më shumë se një dekade e gjysmë Mosi është larguar nga skena dhe ekrani deri në ftesën e para një viti kur Dhimitër Anagnosti e solli në Shqipëri për një rol modest në filmin “Gjoleka, djalë i Abazit”. Nuk e fsheh emocionin për këtë pjesëmarrje pas heshtjes së gjatë. Dhe vlerëson lojën e aktorëve shqiptarë, kosovarë e maqedonas në film, veçanërisht aktori kryesor Blerim Destani. Në role të tjera interpretojne Sheqerie Buçaj, Rajmonda Bulku, Faruk Begolli, Ermela Teli, Tinka Kurti, Bislim Muçaj dhe Meto Jovanovski. Producentët pohuan pas premierës se “Etjet e Kosovës” pritet të udhëtojë në një sërë aktivitetesh ndërkombëtare. Ndërkohë që shfaqja për herë të parë Tiranë dhe Shkup do të jetë shumë shpejt.




25/04/2006