Moisiu: Nuk nënshkruaj shkarkimin e kryeprokurorit Sollaku

[TOKE GEGA]

Konsensus, një prokuror që rri sus!


Kohët e fundit është hedhur sërish në qarkullim ideja e një prokurori që do të zgjidhet me konsensus. Shumë vite më parë heroi i drejtësisë italiane, Giovanni Falcone, i cili këputi shumë fije politike të mafias italiane, shprehej: “Nëse do të më pyesni se cili do të ishte prokurori më i rrezikshëm dhe më i keq ndër të gjithë, do të përgjigjesha se do të ishte ai prokuror që mbështetet nga të gjitha palët”. E kjo është e kuptueshme, pasi nuk mund të ketë një kryeprokuror që do të arrestojë politikanët e korruptuar dhe për këtë gjë ai do ketë konsensusin e këtyre politikanëve.

Disa ekspertë po debatonin për problemin e energjisë elektrike dhe dikush tha se “zgjidhja për krizën energjitike në vend ishte heqja e Prokurorit të Përgjithshëm”. Natyrisht që këtë shprehje e shoqëruam në ilaritet për mungesën e lidhjes që kishte me problemin në fjalë. Pak ditë më vonë, KLSH kishte paditur në prokurori ish-drejtorin e KESH për abuzime dhe korrupsion. Panorama është e qartë sesa energji më tepër mund të ishte blerë, nëse drejtuesit e KESH do të ishin më pak “dorëshpuar”. Ndërkohë, citimi se heqja Sollakut do të na sjellë më shumë energji elektrike, disi në dukje i çuditshëm, nuk do të na duket më pa lidhje. Pyetja që na shqetëson të gjithëve është se çdo të bëhet më tej. A do ketë edhe kjo padi të njëjtin fat që ka patur çdo kallëzim penal kundrejt të paditurve të veshur me pushtet? A do të “flejë kryeprokurori” edhe mbi këtë dosje? Ne shpesh qeverisemi keq apo abuzohemi nga qeveritarët, për shkak se ata kanë zgjedhur një prokuror.

Ka kohë që flitet për politikanë të korruptuar dhe të papërgjegjshëm, ndërkohë që ka kohë që nuk flitet për politikanë të ndëshkuar për korrupsion. Ku është sistemi i drejtësisë? Ku është prokuroria, e cila ka për detyrë që gjithë këto prova e fakte që konkurrojnë në pasarelën televizive t`i paraqesë në gjyq dhe të pastrojë klasën politike nga korrupsioni dhe abuzivizmi. Por, nuk ka sesi të ndodhë ndryshe, pasi janë pikërisht këta “politikanë të korruptuar” që kanë në dorë zgjedhjen e funksionarëve të drejtësisë, të cilët presupozohet të ishin pikërisht xhelatët e tyre.

Matematika e thjeshtë të bën të besosh se konsen-SUS-in të gjitha palët do ta japin për një kryeprokuror që do të rrijë sus me të gjitha palët. Një kryeprokuror që mbi të gjitha të jetë i pavarur nga ligji, i cili e detyron të mos qëndrojë i heshtur ndërkohë që sistemi rrënohet, të paaftët blejnë virtyte, korrupsioni shitet për guxim dhe kopukët hiqen për të zgjuar. Pra, një kryeprokuror konsen-SUS-al, do të thotë një prokuror që zgjidhet me pëlqimin e shumicës së të dyja kampeve politike, një kryeprokuror që do të kontrollohet nga të dyja kampet politike, një kryeprokuror që do t`i ketë duart e lidhura përballë secilës palë politike.

Faktikisht, kryeprokurori aktual është pikërisht produkt i konsensusit pozitë-opozitë, por, nëse do të besojmë në fjalët e mazhorancës, “ka instaluar krimin e organizuar” dhe, nëse do të besojmë dhe opozitën socialiste, “ai po heziton të hetojë korrupsionin e qeverisë “Berisha” dhe me sa dimë, nuk njohim ndonjë zyrtar të lartë që të jetë ndjekur penalisht e të jetë dënuar për korrupsion apo shpërdorim detyre, megjithëse shumë fakte të rënda korrupsioni janë bërë publike në media.

Besoj se rasti i zgjedhjes së presidentit ka krijuar një precedent tepër pozitiv, ku një politikan karriere hodhi në treg gjithë investimin e tij politik dhe konkurroi për atë post, ku ai ishte i bindur se mund të kontribuonte shumë më tepër se ndonjë ushtarak anonim që do të vinte si produkt i konsensusit. Shqipëria ka nevojë për një kryeprokuror me profil të lartë, i cili të jetë i shkëputur nga politika, dikush që ka “këllqe” për t`i rezistuar presioneve politike, dikush që mund të pastrojë klasën politike nga ky batak dhjetëravjeçar. Kryeprokuror duhet të jetë një jurist i sprovuar, i cili ka investuar për këtë fushë dhe që jep premisa se nuk do të përfundojë si paraardhësit e tij. Ka edhe nga ato shtete që Prokurorin e Përgjithshëm e kanë të varur nga Këshilli i Ministrave dhe në këtë rast, faturën në rast dështimi të këtij institucioni e mban partia qeverisëse, e cila dorëzon mandatin në zgjedhjet e ardhshme. Ndërsa në Shqipëri flitet për kryeprokuror konsensual, i cili kurrsesi nuk është mbi palët, por mes tyre. Në këtë rast, presidenti duhet të bëjë zgjedhjen e duhur, duke injoruar zërat për konsen-SUS dhe duke përqasur eksperiencën e tij, ai duhet të flakë tej çdo kandidaturë anonime, e cila mund të zgjohet dhe ta shohë veten kryeprokuror që rri SUS. Presidenti dhe Kuvendi duhet të zgjedhë mes kandidaturave më publike të deklaruara në luftën ndaj korrupsionit dhe krimit dhe që kanë një profil dhe një investim në publik.

E nëse në publikimin e ardhshëm të “Transparency International” vendi do të jetë në të njëjtin nivel korrupsioni në “hitparadën botërore të korrupsionit”, nuk do të ketë asnjë burrë që do të marrë mbi supe fajin; opozita do t’ia gjuaj topin qeverisë dhe qeveria do ta pasojë te kryeprokurori konsesual, duke luajtur paturpësisht kungulleshkash. Ndërsa ne do të qëndrojmë në të njëjtën karrige (ndoshta në ndonjë karrige më parë ose më pas) dhe do të paguajmë biletën/taksën për një xhiro tjetër 4-vjeçare, plot adrenalinë, çudira dhe të papritura në karuselin e madh të shtetit/teatër, ku të gjithë luajnë një shfaqje të vjetër e të shëmtuar.

[TOKE GEGA]

Presidenti: Sollaku ta kuptojë vetë që duhet të japë dorëheqjen


Presidenti i Republikës, Bamir Topi, shprehet se është në pritje të dorëheqjes së prokurorit të përgjithshëm. Gjithsesi, në rast se ky i fundit bën të paditurin në lidhje me këtë çështje, Topi u shpreh se Kuvendi dhe Presidenca i kanë të gjitha mjetet ligjore për shkarkimin e tij





“Sollaku duhet ta kishte kuptuar vetë që kur Presidenti i Republikës nuk të jep pëlqimin dhe besimin për pozicionin që, ke atëherë bën mirë që të shikosh mos adapotohesh në një pozicion tjetër”. Ka qenë kjo deklarata e presidentit, Bamir Topi, në emisionin “Ballë për ballë”, të drejtuar nga gazetari Lutfi Dervishi. Gjatë interistës së tij, Topi u shpreh se, ka mbajtur një qëndrim të ftohtë me prokurorin e përgjithshëm, ndërkohë që nuk harroi t’i bënte thirrje Kuvendit që të ndërmarrë një nismë tjetër për shkarkimin e tij, pasi, sipas tij, Presidenti i Republikës nuk i ka kompetencat ekskluzive për të shkarkuar Prokurorin e Përgjithshëm. “Unë kam qenë një ndër negocitorët për emrin e Sollakut në krye të prokurorisë së përgjithshme, në atë kohë me presidentin Mejdani. Pra, Sollaku u dekretua nga Mejdani, vazhdoi përgjatë presidencës së Moisiut dhe tashmë ka kapur edhe mandatin tim. Pra, jam i mendimit se pozicioni i tij ka nevojë të rifreskohet, dhe kjo është praktikë që ndiqet në të gjithë botën dhe kur janë shtete të konsoliduara. Unë e kam ftuar Sollakun të bëhet pjesë e reformës në drejtësi, kam pritur një sinjal pozitiv në lidhje me pozicionin e tij që është i palimituar. Pra, dua të them se kur Presidenti i Republikës s’të jep besimin, s’të jep pëlqimin për pozicionin që ke, atëherë bën mirë që të shikosh të adaptohesh në një detyrë apo pozicion tjetër”, - tha Topi. Duke folur për natyrën e tij, Topi u shpreh se është për zgjidhje të buta të problemit, pra që rruga më e mirë do ishte që Sollaku të ikte vetë, por nuk përjashtoi mundësinë që të shikohen edhe hapësirat ligjore për shkarkimin e tij. “Dua të them që Presidenti i Republikës nuk i ka kompetencat ekskluzive për shkarkimin e Sollakut. Pra, në rast se për nismën e parë të Kuvendit ka një vendim të Gjykatës Kushtetuese që e rrëzon, Kuvendi mund të ndërmarrë një nismë tjetër për shkarkimin e tij”, - tha Topi, duke lënë të kuptohet se është në pritje të nismës së Kuvendit për këtë çështje. Nga ana tjetër, Topi foli dhe për reformën në drejtësi, e cila sipas tij, është një nga çështjet më jetike për vendin. Sipas tij, kriza e drejtësisë është një nga plagët më të mëdha që ka vendi dhe për këtë siguroi se në postin e kreut të Këshillit të Lartë të Drjetësisë do të bëjë ç’është e mundur për reformimin e saj. “Gjithsesi, unë besoj se prokuroria është fytyra e shtetit dhe ka nevojë për një reformë të thellë dhe kjo nuk është e lidhur vetëm me një individ”, - u shpreh Topi.

[TOKE GEGA]

Don.Sollaku zgjon instinktin e vetëmbrojtjes tek ylberistët e Ramës!!!

Sollaku e Rama duken se e kanë të pamundur të shkëpusin lidhjet që mbajnë të mbyllura dosjet e krimit të organizuar. Kërkesa e presidentit Topi për dorëheqjen e kryeprokurorit ka sjellë reagimin e socialistëve, sipas sindromit të qenit të Pavllovit, të cilët ndjejnë se po u ndërpritet kordoni i mbijetesës. Lidhja kulte paralajmëron kohë të vështira për forcat që kërkojnë reformë të thellë, pasi qarqet konservatore në PS s’kanë ndërmend të heqin dorë nga avokatia ndaj krimit të organizuar


Partia Socialiste i është trembur deklaratës së fundit të Kreut të Shtetit, ku ka theksuar se kryeprokurori Dhori Sollaku duhet të lërë postin e tij, pasi më ikjen e tij vihen në pikëpyetje e ardhmja e shumë ish-zyrtarëve apo dhe drejtuesve të sotëm të opozitës e kryesisht Partisë Socialiste. Vetëm një ditë më pas, Partia Socialiste reagoi gjatë një komunikimi për shtyp, duke e konsideruar këtë si një kërcënim që i bëhet Sollakut. Ndërkohë, çështja e kryeprokurorit është përdorur nga PS-ja dhe eksponentë të saj si një mburojë për veprat antiligjore të tyre, duke dalë në mbrojtje të tij edhe atëherë kur akuzat e faktuara rëndonin mbi të. Dhe pikërisht kjo parti me Edvinin në krye, nuk u distancua nga Sollaku dhe aq më tepër tani, kur ditët e tij në krye të organit të akuzës janë të numëruara. Tashmë Theodhori Sollaku është shndërruar në ushqimin që shkakton harkun reflektor sekretoro-motorik të qenit me të cilin Pavllovi eksperimentonte matjen dhe klasifikimin e reflekseve biologjike për të ilustruar teorinë e tij të lidhjes biunivoke të kafshëve dhe zinxhirit ushqimor të tyre. Parë në këtë këndvështrim, PS është “qeni” ndërsa Sollaku është ushqimi i zinxhirit ushqimor që mban gjallë kafshën e domestikuar me vështirësi nga shoqëria njerëzore. Kjo lidhje biunivoke garanton mbijetesën e këtij “qeni” vetëm nëpërmjet këtij ushqimi. Dhe sa herë që “qenit” i rrezikohet ushqimi, ai tërbohet dhe shfaq rrezikshmëri për të zonë në këtë rast për shoqërinë shqiptare. Gjatë një interviste dhënë për Televizionin Publik Shqiptar, Presidenti Bamir Topi shprehu se organi i akuzës ka nevojë për një reformim të thellë dhe se kryeprokurori Dhori Sollaku duhet të japë dorëheqje sa më parë. Ndërsa në kushte të tilla, PS-ja druhet, se me largimim e Sollakut, i cili deri më tani ka punuar për ta, duke mbuluar dosjet e krimit dhe të korrupsionit dhe jo për shtetin ligjor e për të respektuar kushtetutën, mund të zbulohet ndonjë aferë e rëndomtë ku mund të implikojë drejtpërsëdrejti kreun e saj, Edvin Rama. Kësisoj dje, Edvini nxori në një konferencë për shtyp njërin nga nënkryetarët e Grupit të PS-së, Arben Isaraj, i cili ka reaguar ndaj deklaratës së Presidentit të Republikës, Bamir Topi, lidhur me një dorëheqje të mundshme të kryeprokurorit Theodhori Sollaku. “Presidenti i Republikës i ka kërkuar Prokurorit të Përgjithshëm dorëheqjen, por arsyet mbeten të pashpjeguara prej tij. Nëse do të kërkonte arsyet duhet t’i jepte ato. Ne jemi në dijeni të një iniciative të shtyrë nga Kreu i Shtetit, i cili një muaj më parë ka kërkuar nga Kryeprokurori dhënien e dorëheqjes, por kjo është absurde, kur Presidenti thërret një tryezë të rrumbullakët të partive politike, e drejton atë, i shtyn drejt marrjes së një vendimi me konsensus për një reformë në organet e drejtësisë dhe pa e pritur këtë tryezë, kërkohet të ndryshohet njeriu”, tha ai. Pak ditë më parë, Presidenti i Republikës, Bamir Topi ftoi në një tryezë krerët e partive politike parlamentare, dhe kërkoi më tepër bashkëpunim ndërmjet forcave politike me nisjen e reformës në drejtësi dhe në mënyrë të veçantë duke theksuar se është një reformë gjithëpërfshirëse dhe që Sollaku nuk bën përjashtim, por mbetet në qendër të saj. Për këtë çështje, Isaraj kërkoi që Presidenti të bëjë publike edhe arsyet e këtij qëndrimi. “Presidenti del jashtë kësaj tryeze në zgjidhje të veta personale dhe të pabazuara, jemi të detyruar t’i themi se cilat janë arsyet që e kërkon këtë. Theodhori Sollaku është gjykuar njëherë në bazë të Kushtetutës, ka një komision hetimor dhe kjo histori është e mbyllur”. Në fakt, Isaraj nuk ka sjellë në kujtesë se komisioni hetimore gjatë asaj periudhe punoi intensivisht dhe se ishte Presidenti i asaj kohe që për interesa të tij, nuk dekretoi vendimin e marrë në Kuvend për shkarkimin e menjëhershëm të tij nga posti që e mban edhe aktualisht. Duke mos qenë në gjendje të vazhdojë më tej në këtë drejtim, Isaraj e anashkaloi çështjen dhe duke kaluar në rolin e pionierit të Edvini, Erion Braçe i është kthyer çështjes spekuluese të rrugës Durrës-Kukës, duke kërkuar marrjen e masave nga Presidenti për ish ministrin e Transporteve Lulzimm Basha, aktualisht ministër i Punëve të Jashtme. “Presidenti i Republikës ka dhe dekrete të tjera në dorë dhe ai të kërkojë dorëheqjen e Lulzim Bashës, se është e shkruar e bardha në të zezë veprimtaria e MPPTT-së në nxjerrjen e akteve antikushtetuese dhe antiligjore për ndërtimin e rrugës Durrës-Kukës, si dhe shpërdorimin e fondeve të buxhetit të shtetit”, tha ai.