FSHF, asambleja rizgjedh Dukën

[Brari]

kreu i fshf

zgjedhja

Zhvillohen mes polemikave e debateve zgjedhjet për presidentin e ri të futbollit


FSHF, asambleja rizgjedh Dukën

Ministri Leskaj dhe dy kandidatët: S'e njohim. UEFA: Në rregull



Futbolli shqiptar ishte "veshur" me kollare dje, ndërsa 51 ndër 68 delegatët e asamblesë zgjedhore votuan që Armand Duka të qëndronte edhe katër vjet të tjera në krye të FSHF-së. Në një atmosferë dyshimesh të ushqyera prej më shumë se një muaji, kreu aktual i institucionit triumfoi që në raundin e parë të votimeve.

Rivali i tij kryesor, Edmond Haxhia, mori 16 vota, ndërsa Salvador Kaçaj vetëm një të tillë. Dy kandidatët që humbën deklaruan se nuk i njihnin zgjedhjet, duke pretenduar për manipulime në shkallë të gjerë, të cilat i kanë denoncuar prej disa kohësh. E deklaruar në orën 10:00, Asambleja e Përgjithshme e zakonshme e FSHF-së startoi dje rreth gjysmë ore me vonesë. Pak minuta përpara, një filmim me punën e institucionit gjatë katër viteve të fundit u prezantua përpara të pranishmëve. Punimet u çelën me himnin kombëtar, ndërsa presidenti Duka uroi fair-play në zgjedhjet e FSHF-së. Por ky element i futbollit nuk u respektua menjëherë më pas, ndërsa presidenti në detyrë i FSHF-së dhe kandidati Kaçaj replikuan me njëri-tjetrin fillimisht për marrjen e fjalës dhe më pas për përbërjen e komisionit të Verifikimit të Mandateve. Ky komision u ngrit menjëherë më pas, ndërsa u verifikua se ndër 69 delegatë të FSHF-së, në sallë ishin të pranishëm 68 prej tyre. Mungonte vetëm delegati i Sarandës. Një tjetër komision, ai i numërimit të votave, u ngrit menjëherë më pas, i përbërë nga 7 anëtarët që u propozuan nga asambleja. Punimet i përshëndetën ndërkohë presidenti i nderit i FSHF-së, Miço Papadhopulli, përfaqësuesi i Federatës së Kosovës, Agim Batalli, zv.presidenti i parë i UEFA-s, Shenesh Erzik, si dhe drejtori i AEFS-së, Sejfulla Shtëpani. Më pas asambleja kaloi në diskutime me kandidatët, apo delegatët që kanë debatuar, duke mbrojtur dukshëm njërën, ose tjetrën palë në konfliktin e fundit mes FSHF-së dhe MTKRS-së. Kandidati Kaçaj ka pretenduar sërish se këto zgjedhje nuk ishin të ligjshme. Në këto momente, një pjesë e mirë e sallës ka mësuar se ishte dhënë një alarm për bombë. Policia në fakt ka qenë e kujdesshme për të mos përhapur panik, ndërkohë që punimet kanë vazhduar normalisht. Përpara votimit, të tre kandidatët kanë marrë fjalën, duke u shpjeguar delegatëve pse ata duhet të votonin për ta. sAsambleja ka vazhduar deri në votim pa asnjë minutë pushim. Të tre kandidatët e kanë pritur votimin dhe më pas numërimin e votave jashtë sallës së asamblesë. Në fund, komisioni ka shpallur Armand Dukën si president të FSHF-së me 51 vota pro kundrejt 16 të rivalit më të afërt Haxhia.
Asambleja ka vazhduar me zgjedhjen e anëtarëve të Komitetit, ndërkohë që dy kandidatët për president, Haxhia dhe Kaçaj, deklaruan se nuk do t'i njihnin zgjedhjet e FSHF-së, për parregullsitë e pretenduara. Edhe ministri i Turizmit, Kulturës, Rinisë dhe Sporteve, Bujar Leskaj, pas takimit me delegacionin e UEFA-s dhe FIFA-s përsëriti qëndrimin e tij në lidhje me rezultatin e zgjedhjeve të FSHF-së. "Unë nuk e njoh asamblenë zgjedhore të FSHF-së, për sa kohë ka një vendim të gjykatës që pezullon për momentin çdo lloj aktiviteti statutor të federatës", u shpreh Leskaj. Përfaqësuesit e UEFA-s dhe FIFA-s deklaruan se i cilësojnë këto zgjedhje të drejta dhe demokratike dhe se është shprehur lirshëm dhe pa problem vullneti i delegatëve në këtë asamble. Ai u bëri thirrje të dyja palëve, federatë-shtet, që të zbuteshin tonet e debatit dhe të mos u drejtoheshin institucioneve gjyqësore për të zgjidhur konfliktin.



Alarm i rremë
Alo në polici! Bombë te 15-katëshi

Katër telefonata në adresë të recepsionit të hotel "Tirana International dhe sallës operative të policisë së kryeqytetit, kanë lajmëruar për shpërthim bombe në ambientet e godinës ku zhvillohej Asambleja e Përgjithshme e Federatës Shqiptare të Futbollit për zgjedhjen e presidentit të saj. Sipas policisë "në recepsionin e hotel "Tirana Internacional", janë bërë dy telefonata anonime, në orën 10:10 dhe 10:20. Në sallën operative të Drejtorisë së Policisë së Qarkut Tiranë, telefonatat kanë mbërritur në orën 10:40 dhe 11:52. Forcat e antiterrorist dhe qeni antiminë kanë mbërritur me urgjencë tek 15-katëshi. Uniformat blu kanë kontrolluar fillimisht ambientet e brendshme të hotelit dhe më pas makinat e parkuara përreth, ndërkohë janë evakuuar jashtë godinës të gjithë personat e pranishëm. Anëtarët e Asamblesë së Përgjithshme të Federatës Shqiptare të Futbollit nuk kanë pranuar të ndërpresin procesin e zgjedhjes se presidentit, pasi, sipas tyre, telefonuesit po realizonin një provokim. Për tri orë, kontrollet e policisë kanë vijuar në objekt, ndërsa më pas brenda 15-katëshit është rikthyer aktiviteti normal. Policia tha se ka nisur hetimin për "njoftim të rremë të organeve të rendit".



Rezultatet
Armand Duka 51 vota
Edmond Haxhiu 16 vota
Salvador Kaçaj 1 votë


Ja anëtarët e rinj të Komitetit

Komiteti Ekzekutiv i FSHF-së mori formë dje, pas dy seancash votimi në asamblenë e përgjithshme zgjedhore. Nëntë kandidatë u përzgjodhën nga votimi i kryer, ndër 23 gjithsej që kishin kandiduar. Gjashtë prej tyre rifituan postin që kishin pasur deri dje. Kështu nga votimi i parë arritën të fitonin më shumë se 50% të votave gjashtë anëtarë. Më të votuarit ishin Skënder Hyka dhe Bujar Kasmi, që fituan nga 49 vota, Lutfi Nuri mori 46, ndërkohë që Muhedin Targaj arriti të merrte 41 vota. Gjergj Thaka ishte kandidati tjetër me 40 vota, ndërkohë që Medin Zhega mori 33 vota. Më pas u krye një rivotim, ku u futën sërish të gjithë kandidatët. Në fund rezultuan fitues: Kreshnik Çipi, Medi Bushati dhe Arben Dervishi.


gazeta panorama

[Duke_Of_Arberia]

4+4=8
8 vjete mbrapa me Duken ne krye

[Davius]

Shumë keq kur edhe sportit i japin njgyrime politike disa njerëz, për interesa personale e partiake!

Kryeministri për këtë çështje dje deklaroi se si do të vëndos këshilli zgjedhor, ashtu do të mbetet dhe se duhet të respektohet Ligji e Maliqi.