Shpërthimet tronditin kryeqytetin algjerian. Në shënjestër Kryeministria
Dy bomba i morën jetën 30 personave në kryeqytetin e Algjerisë, të mërkurën, në sulme që u morën përsipër nga Al Kaeda dhe që rrisin frikën se eksportuesi veri-afrikan i naftës do të bjerë sërish në kthetrat e dhunës së dikurshme. Organizata e Al Kaedës në Maghrebin Islamik, ka marrë përsipër përgjegjësinë për sulmet, nëpërmjet një deklarate të publikuar në internet, ku, veç të tjerash, merrej përsipër përgjegjësia edhe për sulmet e kryera në Marokun fqinj dhe shiheshin edhe fotografitë e tre martirëve, që hodhën veten në erë. Pretendimi nuk u verifikua menjëherë, por grupi, që më parë është njohur si Grupi Salafist për Predikim dhe Luftë, ka marrë përgjegjësinë për një numër sulmesh vdekjeprurëse mbi forcat e sigurisë dhe shtetas të huaj në Algjeri, që nga janari. Zyrtarët ofruan fillimisht një bilanc prej 23 të vrarësh dhe mbi 160 të plagosur, por shifra ka ardhur në rritje. Një nga shpërthimet ka ndodhur pranë zyrës së Kryeministrit. Të paktën nëntë persona vdiqën dhe 32 të tjerë u plagosën, pasi një makinë bombë shpërtheu jashtë godinës së qeverisë në Algjer. Një tjetër shpërthim në një stacion policie, në lindje, vrau të paktën tetë persona dhe la po ashtu mbi 50 të plagosur. I padëmtuar nga shpërthimi, Kryeministri Abdelaziz Belkhadem, e quajti sulmin "një akt të poshtër dhe kriminal". Sulmet e dhunshme kanë ardhur në rritje në Algjeri që pasi grupi më i madh rebel, islamik, Grupi Salafist për predikim dhe luftë, ndryshoi emrin e tij në janar dhe vendosi lidhje më të ngushta me Al Kaedën.
Shpërthimi i ndodhur në qendër të qytetit, ishte aq i fuqishëm saqë është dëgjuar në një rreze prej 10 kilometrash. Një numër punonjësish të qeverisë kanë pësuar
ndërkohë dëmtime si pasojë e xhamave të thyer dhe copëzave të ndryshme që u shpërndanë në një zonë prej më shumë se 300 metrash. Ambulancat mbërritën menjëherë në skenë dhe policia bllokoi hyrjen për në zyrat e Kryeministrit, ku është e vendosur edhe Ministria e Brendshme. Ndërsa sulmi mbi stacionin e policisë ndodhi në lagjen lindore të Bab Ezzouar-it. Duke folur në radion algjeriane, Kryeministri Belkhadem denoncoi shpërthimet që vijnë në një kohë kur qeveria ka intensifikuar përpjekjet për pajtim kombëtar. "Ky është një krim, një akt te turpshëm. Nuk mund të përshkruhet ndryshe, përveçse si një tradhti dhe turp", tha ai. Në muajin shkurt, Grupi Salafist për predikim dhe luftë, ndërmori një seri sulmesh me bomba mbi stacionet e policisë, por korrespondentët thonë se sulmet me autobomba në kryeqytet, kanë qenë shumë të rralla. Ata shtojnë se qeveria algjeriane, kohët e fundit, kish filluar të mburrej me faktin se vrasjet vicioze të mesviteve ‘90-të, produkt i një lufte brutale mes forcave të sigurisë dhe një serie grupesh islamike të armatosura, tani i përkasin së shkuarës. Ajo valë dhune filloi pasi ushtria mori fuqi dhe u anuluan zgjedhjet, që supozohet se ishin fituar nga një grup opozitar islamik. Kulmi i luftimeve në Algjeri u arrit në vitet 1992- 1998, periudhë kjo gjatë së cilës si pasojë e terrorizmit humbën jetën më shumë se 100 mijë persona, shumica në masakra të ekstremistëve mbi fshatra të tërë. Por, u duk se rebelimi kish përfunduar në 2004-ën, kur Presidenti Abdelaziz Bouteflika, u rizgjodh në këtë post në zgjedhje paqësore dhe relativisht të lira, ndërsa ushtria qëndronte në prapaskena. Por, edhe pse lëvizjet e mbetura islamike pësuan edhe goditje të tjera në 2004-ën, ato rezervuan fuqi për të goditur qeverinë. Tensione ka pasur edhe në rajonin Berber të Kabilias e më gjerë,
ku nuk kanë munguar as kryengritjet lokale.
© Gazeta Shqip - 2006-2007
Përgjigju Duke Cituar
Postuar më parë nga Toro
omg eshte skandaloze..
Krijoni Kontakt