Shkolla e Baletit :Rikthim në identitet

[Xhuxhumaku]

Shkolla e Baletit :Rikthim në identitet

Mashtrimi me termin Akademi Danci dhe e vërteta e shkresave zyrtare.....historia e një emri- fantazmë, që u përdor gjerësisht nga ish- drejtori Arjan Sukniqi dhe shtypi në vitet 2002-2005...shkolla e baletit në një mbrëmje baleti në TOB....rikthimi tek baleti klasik dhe Mouline Rouge në një version të ri....

Milena Selimi


Nga përqasjet me filmat dhe librat, mendoja se fantazmat janë vetëm shpirtra të vdekur, që përpiqen të qëndrojnë rreth nesh, tokësorëve, dhe të na falin me qenien e pazëshme ndonjë shenjë për të na orientuar me piketat që ne, shtegtarët e kësaj bote, e kemi të vështirë t’i ndiejmë me shqisat tona të prekshme. Fantazma më e afërt ose “The ghost” moderne quhet “Akademia e Dancit”, apo shkolla e baletit, (?!), një shkollë e nderuar përgjatë viteve të saj, me përgatitjen e balerinëve të shkëlqyer, që falë një keqmenaxhimi disavjeçar ua kemi falur me shumë bujari kompanive dhe teatrove prestigjiozë të botës. Ngrehina është në një ndërtim shtesë të katit të tretë, i cili ka filluar prej disa muajsh dhe është strehuar tek ish-shkolla “Migjeni”. Skelat metalike qëndrojnë në heshtje, asnjë gjurmë punëtorësh, asnjë lëvizje betoniere. Përpiqem të kaloj nga hyrjet anësore, pyes kalimtarë të cilët më orientojnë se “Shkolla e Baletit” (kështu e identifikojnë kalimtarët e rastit) është larguar...diku….pastaj ndeshem me thasët e stërmëdhenj të rrobave të vjetra, me zërat e ngjirur që thërrasin pantallona, njëmijë lekë copa…janë bërë njësh me muret rrethues të ngrehinës së pagojë. Balerinët , sonte do të jenë në një koncert në TOB, duke iu rikthyer baletit klasik, pa anashkaluar kërcimin kontemporan, por në baza profesionale. Po lënë pas një histori të shëmtuar, një emër që s’ka ekzistuar kurrë...Sa lekë kushton dinjiteti i humbur i një shkolle?


Akademia e Dancit dhe emri “fantazmë” i një shkolle.

Në katin e dytë të ish-shkollës “Migjeni”, sekretare Fatimja ka ndërruar tre drejtorë. Me një periudhë 40-vjeçare në administrim dokumentesh, përgjigjet plotësisht e bindur se “në shkresat e mia, Akademia e Dancit nuk ka ekzistuar kurrë”. E rreptë, e drejtuar vetëm nga ligji, me një shkodrançe të ëmbël, mirëpret kërkesën e “ABC” për të parë arkivin e dokumenteve, gjithmonë edhe me një miratim nga drejtoresha e sapoemëruar. Që nga viti 1993, kur ajo merret me dokumentacionin, nuk është shkruar, nuk është vulosur dhe nuk ekziston asnjë shkresë drejtuar Akademisë së Dancit. Gjithçka, në rrugë zyrtare me Ministrinë dhe Drejtorinë Rajonale të Arsimit është komunikuar nëpërmjet emërtesës “Shkolla Kombëtare e Koreografisë”. Bona, financierja e shëndetshme, tregon të njëjtën histori në shkresat dhe dosjet e saj. E zbut paksa situatën duke u shprehur se “ishte një dëshirë e madhe që shkolla jonë të quhej Akademi. Por në shkresat financiare unë kam komunikuar gjithmonë me vulën dhe kokën aktuale, si kjo që shihni këtu”. Thashethemnaja duket se ka nisur që me ministrin Ruka, është ndërprerë nga mosinteresimi i Blushit dhe është ‘vulosur’ gojarisht me ministrin Memushi, me rastin e një mbrëmjeje gala të kësaj shkollë, diku nga vitet 2002. Fjalët, “ju jeni tashmë një Akademi e Dancit”, kanë marrë shumë duartrokitje nga të pranishmit, dhe mësuesit e gjorë kanë fërkuar duart për pagesat që do t’u shtoheshin. Por, duket se shiriti i përurimit ka qenë vetëm një gjest mediatik, përpara kamerave dhe gazetarëve që s’kanë kuptuar kurrë se flitej për një gënjeshtër. Akademia e Dancit ka përfaqësuar veten me këtë emër jashtë Shqipërisë, madje ka marrë edhe disa trofe, që sot rrinë mbi tavolinën e drejtores së re për të treguar mashtrimin, apo një dëshirë të pamundur dhe donkishoteske të një drejtori që drejtoi si deshi, punoi si deshi, ndërroi programet e shkollës pa u konsultuar me askënd dhe rrahu gjoksin për sukseset e veta përpara kamerave, pa u ndalur nga askush.



Akademia e Dancit, thjesht emër mediatik

Blerina Arbana është drejtoresha e sapoemëruar. Ka kryer shkollën e baletit dhe studimet e larta në AAB. Lëviz në të gjitha ambientet e sallës së TOB-it për të drejtuar balerinët në koncertin e së shtunës. Sqaron se Akademia e Dancit është vetëm një gënjeshtër. Flet për ABC, ekskluzivisht në këtë intervistë:


Po thoni se Akademia e Dancit nuk ka ekzistuar kurrë?
Në të gjitha dokumentet zyrtarë jemi identifikuar me emërtimin “Shkolla Kombëtare e Koreografisë”. Akademia e Dancit ka qenë vetëm një emër mediatik dhe erë publiciteti.


A mësohet këtu baleti kontemporan?
Mendoj se është vetëm fillimi i sqarimit të katrahurës që ka ndodhur me këtë shkollë. Nga drejtori Sukniqi janë eliminuar mësimet profesionale si “karakteri i huaj”, “karakteri shqiptar”, mësimi i folklorit dhe piano sekondare, e cila kryhet vetëm në dy vitet e para të shkollës. Kjo shkollë nuk ka një metodologji të mësimit të kërcimit kontemporan. Ne na mungojnë termat dhe shprehjet e mësimit të këtij zhanri të kërcimit.


A mund të sqaroni tendencën e kësaj shkolle?
Kjo është një shkollë kombëtare e mësimit të baletit klasik dhe elementëve të kërcimit popullor. Akademia e Arteve nuk mund të mbushë boshllëkun e dancit kontemporan. Aq më shumë stafi i mësuesve, të cilët, janë ende në nivele të shkollës së mesme. Prurjet dhe kualifikimet e stafit pedagogjik, janë nga detyrat e para që duhen realizuar që të mundim ti kthejmë dinjitetin e humbur kësaj shkolle.


A do të jetë shfaqja e sotme një nga treguesit?
Një mbrëmje baleti, me rreth 30 nxënësit më të mirë të kësaj shkolle. Rikthimi në drejtimin e dikurshëm të saj, që mbetet baleti klasik. Me zhvillimet dhe mundësitë tona, të paktën ky është drejtimi që ka treguar se nxjerr balerinë me nivele të shkëlqyera. Do të ketë pjesë nga Liqeni i Mjelmave, Don Kishot, Manon, Arrëthyesi dhe një pjesë koreografike nga Mouline Rouge, konceptuar mbi puante.


Ku do të shkojë kjo shkollë e baletit?
Kemi filluar afrimin e studentëve të shkolluar jashtë Shqipërisë, në Moskë, apo gjetkë, për të ringritur stafin. Njëherësh po mundohemi të vendosim marrëdhënie me shkolla të tjera të baletit, gjithmonë në baza profesionale dhe jo amatoreske. E adhuroj kohën kur isha një nxënëse në shkollën e baletit me drejtor, mësuesin tim të mrekullueshëm, Petrit Vorpsi. Mendojeni vetë, sa shumë kohë të humbur kemi kaluar...


Pagesat qesharake në TOB

Sistemi i shkollimit për një balerin fillon me studimin në Shkollën Kombëtare të Koreografisë që në klasën e pestë dhe vazhdon deri në përfundimin e shkollës së mesme, ku merr diplomën me drejtimin -balerinë klasike dhe vendi i përshtatshëm për të punuar është i vetmi institucion artistik i baletit TOB. Aty falë një seleksionimi paraprak bëhet plotësimi i trupës në kategoritë: Solist i parë 20 mijë lekë, solist i dytë 16 mijë lekë dhe trupa e baletit 14 mijë lekë. Në të tilla kushte shumica e balerinëve shqiptarë kërkojnë të jenë pjesë e formacioneve të baletit të programeve televizive dhe shumica preferojnë të emigrojnë jashtë vendit, duke kërkuar aftësimin profesional dhe më tej akoma mundësinë për të arritur një mirëqenie të konsiderueshme. Kujtojmë se jeta skenike e një balerini shkon deri në 20 vjet.


Rrjedhjet e balerinëve shqiptarë pas viteve ‘90

Ilir Kerni
Ish-solist i parë në TOB. Larguar nga Shqipëria në vitin 1991. Sot është solist i parë në Teatrin Nacional të Zagrebit. Dy herë i nderuar me çmime të para (Zagreb) si balerini më i mirë i vitit. Çmimi i fundit për rolin Mefisto në vitin 2002.


Ludmill Çakalli & Tania Sulejmani
Ish-solistë të parë në TOB. Larguar nga Shqipëria pas viteve ‘90. Sot janë mësues të baletit klasik në Itali, në Akademinë “Professione Mas” e në Akademinë “Tv Shoë”.



Astrit Zejnati
Balerin i parë në “Ballet Arizona” USA .


Altin Kaftira
Ish-solist në TOB. Sot balerin i parë në “Dutch National Ballet” Hollandë.


Kledi Kadiu, Ambeta Toromani
Ish-solistë të parë në TOB. Sot balerinë në programet italiane “Amici”etj.


Ilir Shaqiri, Leon Çino
Ish-solistë në TOB. Sot balerinë në programet italiane “Buonna Domenica”, etj.


Marlon Dino
Ka kryer shkollën e baletit në Tiranë. Balerin në Austri në “Vienna State Opera”.


Aris Golemi
Ka emigruar në USA dhe filloi të japë mësim në “Performing Arts Academy”Atlanta.


Leonard Ajkun
Drejtor artistik i kompanisë “The Ajkun Ballet Theatre” NewYork. Veprimtari e sukseshme artistike në të gjithë Evropën, USA dhe vendet aziatike. Një filial i kësaj kompanie gjendet edhe në Palermo, Itali, ku gjenden dhe selektohen balerinë.


bLargohet nga Shqipëria në vitin 1998 . Balerin në Austri në “Vienna State Opera”.


Gentian Doda
Ish-solist në TOB. Largohet nga Shqipëria në vitin 1997. Solist i parë në Madrid në “Compañía Nacional de Danza”.


Orjola Islami
Nga “Royal Opera House” Londër fiton të drejtën të jetë soliste e parë në shfaqjen “Movin Out” në Brodway 2004.


Vjola Hajati
Nga Tirana e më pas Belgjika, sot është balerinë e parë në “Mouline Rouge” Paris.


ABC nr.31-Milena Selimi
10.04.2006

[pirro gumenica]

seshte emri i shkolles se si quhet
problemi eshte se cdo drejtor qe ka ardhur mbas viteve 90 thote "Rikthim në identitet"
POR ASJ SHKOLLE I KA HUMBUR INDENTITETI ME KOHE
PA PROGRAME TE QARTA PA MESUES ME EXPERINCE
ME DUKET SE ASNJE PREJ TYRE SKA KERCYER NJE HERE TE VETME
MENDOJNI VET SE SI KA VAJTUR PUNA