Imzot Zef Gashi: URIMI per PASHKE

[NoName]

Urimi për Pashkët


Klithja njerëzore bashkë me gjithësinë thërret për jetë, për pafundësi. Mirëpo, afshi njerëzor për të jetuar gjithmonë, është i kapluar nga bota e vdekjes dhe fuqia shkatërruese. Së këndejmi, njeriu shpesh i ndarë në vetvete, është pjesëmarrës në të keqen dhe me mëkat e shkakton vdekjen. Në këtë mënyrë, shkon kundër pavdekshmërisë dhe e rrënon në vete ikonën e Zotit. Njeriu ka shkuar aq larg, sa e ka dënuar dhe e ka kryqëzuar Birin e Zotit. Kjo ka ndodhur të Premten e madhe. Në gjykimin e Jezusit ishin të bashkuar, edhe hebrenjtë, edhe romakët. Të gjithë kundër Zotit, të gjithë kundër të Vërtetës! I bashkuan forcat që ta heqin qafet Zotin! Për këtë e zgjodhën mënyrën më të tmerrshme që ta vrasin: kryqëzimin!
Kjo ndodh edhe sot. Mirëpo, Zoti në Birin e tij të dashur, Jezu Krishtin, mbetet besnik. Jezusi e vendosi vlerën e dashurisë mbi vlerën e jetës, për shkak të dashurisë ndaj njeriut. Jetën e dha për të tjerët. Vdiq për dashuri ndaj të tjerëve. Me vdekjen e vet u mundësoi të tjerëve të jetojnë. Për këtë vdekja u shkatërrua në kryq. Pra, dashuria u bë më e fortë se vdekja. Ajo e tejkalon kufirin e vdekjes, sepse është e amshuar. Jezusi këtë e tregoi me Ngjalljen e vet. Ai, ngase i deshi të gjithë, të gjithëve u siguroi pavdekshmërinë.
Thirrja jonë e krishterë është që t’i dhurohemi Atij, sepse vetëm në Të mund të mbesim gjallë. Duhet të lejojmë që i Ngjalluri të na kaplojë me Ngjalljen e Tij, që të kemi jetë në vetvete. Shën Pali thotë: “Nëse Krishti është në ju, trupi vërtet është i vdekur për shkak të mëkatit, por Shpirti bëhet jetë për arsye të drejtësisë. Nëse Shpirti i Atij që e ngjalli Jezusin nga vdekja është në ju, Ai që e ngjalli Krishtin nga vdekja, përmes Shpirtit të vet që qëndron në ju, do t’i ngjallë edhe trupat tuaj.” (Rom 8, 10-11)
T’i lutemi Zotit që me ndihmën e Tij ta njohim dashurinë e Tij të kryqëzuar dhe për hirin e njohjes së të Ngjallurit. T’i lutemi që drita e agimit të Pashkëve të na i çelë sytë dhe të na i përgatisë zemrat që ta kërkojmë Atë në mesin e të gjallëve në këto ditë festash dhe në përditshmërinë tonë. Thirrja jonë është ta takojmë të Ngjallurin, të jemi me Të dhe të jemi dëshmitarë të Tij. Ky është përcaktimi ynë, ky është përcaktimi i Kishës: ta kërkojmë dhe ta dëshmojmë Jezusin në mesin e të gjallëve; ta kërkojmë dhe ta dëshmojmë të Ngjallurin në dashurinë e së vërtetës, në paqen e drejtësisë, në lirinë e zemrës.
Koha e Pashkëve është koha e Shpirtit të Shenjtë. Me fuqinë e Shpirtit krijohet bashkësia, dashuria dhe jeta, që është më e fortë se vdekja. Me fuqinë e Shpirtit, Kisha e shpall Zotin e gjallë, e predikon Atë që nga kryqi i dhuroi njeriut dashurinë dhe e liroi me Ngjallje.
Në ambientin e gëzueshëm të kremtimit të Pashkëve dëshiroj që të përtëritet në ne Shpirti që e ka ngjallur Jezusin nga vdekja dhe ashtu të jemi dëshmitarë të denjë dhe lajmëtarë të Jezusit të Ngjallur.
Me këto dëshira ju uroj Pashkët dhe ju përcjell bekimin tim baritor.
Për shumë mot!


Arqipeshkvi i Juaj,
+ Imzot Zef Gashi