E diela e nderimit të Kryqit

[Albo]

Në Kishën e Shenjtë Orthodhokse, e diela e tretë e Kreshmës së Madhe njihet si "E Diela e Nderimit të Kryqit". Duke shënuar gjysmën e Kreshmës, kjo ditë ka si qëllim që të na rifreskojë dhe të na kurajojë që të vazhdojmë udhëtimin tonë drejt Pashkës. Dikush mund të pyesi me të drejtë: "Si është e mundur që Kryqi, një instrument i vuajtjes dhe vdekjes, mund të na ofrojë rifreskim dhe kurajim?" Në mënyrë që kryqi të na ofrojë këto të dyja, duhet që të mund ta shohim si një mjet për të arritur një qëllim të lavdishëm: Ringjalljen e Krishtit dhe Shpëtimin tonë.

Kisha na kujton sot se tek kalojmë Kreshmën e Madhe, jemi si ata që lodhen teksa udhëtojnë dhe ulen e çlodhen poshtë degëve të një peme të bukur. Ulen në hijen e degëve dhe çlodhen pak, dhe pastaj vazhdojnë përsëri udhëtimin me një fuqi të rifreskuar. Po ashtu, Pema Jetëdhënëse -- Kryqi -- vendoset para nesh në këtë kohë që të na ofrojë pushim dhe çlodhje. Udhëtimi ynë ështe ende i gjatë, por fuqia e Kryqit na ofron një fortifikim shpirtëror për javët e agjërimit që na presin.

Këtë të dielë, është zakon që të zbukurojmë Kryqin me lule dhe ta vendosim atë në një vend qëndror në Kishë që të nderohet nga besimtarët. Teksa përulemi përpara Kryqit sot, le të sjellin ndër mend mendimin e thellë të shprehur nga Shën Efraim Siriani: "Le të bëjmë shenjën e Kryqit Jetëdhënës mbi vete sot. Le të mos i largohemi Kryqit për asnjë moment, dhe as të mos bëjmë gjë pa të, por pavarësish nëse jemi duke rënë për të fjetur apo duke u ngritur nga gjumi, duke ngrënë apo duke pirë, duke udhëtuar në tokë, lundruar në det apo duke kapërcyer lumenj, duhet që gjithmonë ta zbukurojmë veten me shenjën e Kryqit Jetëdhënës."