Shtajner me nje plan per bashkimin e Mitrovices

[Ari-Intimidator]

MITROVICE, 2 tetor - Kryeadministratori i Kosovës, Mihajl Shtajner, po qëndron sot në Mitrovicë, pasi mbrëmë në Zveçan ka bërë publik një plan prej shtatë pikash për bashkimin e qytetit të Mitrovicës. Shtajner ka paraqitur mbrëmë në Zveçan planin e tij prej shtatë pikash, me qëllim të bërjes së Mitrovicës një qytet normal dhe evropian, siç tha ai në prononcimin drejtuar qytetarëve të Mitrovicës veriore, që e kanë transmetuar një televizion dhe radio lokale serbe dhe televizioni public i Kosovës. Vendosja e rendit dhe ligjit, inkuadrimi i serbëve të veriut të Mitrovicës në Shërbimin Policor të Kosovës, bashkëqeverisja komunale, decentralizimi i pushtetit, zhvillimi i shpejtë ekonomik, konferenca e donatorëve për Kosovën dhe pjesëmarrja e serbëve në zgjedhjet lokale, përbëjnë shtatë pikat e strategjisë së shefit të UNMIK-ut në Kosovë, Mihajl Shtajner, për bashkimin e qytetit të ndarë të Mitrovicës. Këtë strategji Shtajner e bëri publike mbrëmë përmes televizionit lokal serb në Zveçan “Most”, ku ai ftoi serbët e veriut të Mitrovicës të mendojnë dhe punojnë për një të ardhme më të mirë të Mitrovicës. “Është koha të bëjmë diçka, nëse lëmë gjërat kështu si janë atëherë situata vetëm sa do të përkeqësohet, prandaj ne duhet ta ndalojmë këtë. Unë kam plan ta bëj Mitrovicën një qytet normal evropian, të sigurt, qytet ku funkisonon administrata, ku do të ketë zhvillim ekonomik. Plani im është ta zëvendësoj frikën me besueshmërinë”, iu drejtua kryeadministratori Shtajner publikut serb në veri të Mitrovicës. Ai u premtoi qytetarëve serbë se nuk do të ketë dhe as nuk do të lejohet kurrfarë ndërhyrje me dhunë e shqiptarëve në jug të Mitrovicës ndaj serbëve në veri të qytetit. Shtajner u bëri po ashtu thirrje serbëve në Mitrovicën veriore që ta pranojnë Shërbimin Policor të Kosovës, si forcë të veten policore. Për bashkëqeverisjen komunale si pikë e tretë e strategjisë për bashkimin e Mitrovicës, Shtajner tha se pas zgjedhjeve, me ndërmjetësimin e tij, duhet të formohej një koalicion i partive shqiptare dhe serbëve në kuvendin e komunës, i cili do të merrte vendime të barabarta për të gjitha bashkësitë etnike. “Pjesëmarrja e serbëve në zgjedhje do të çonte në decentralizimin e pushtetit”, tha Shtajner, duke veçuar atë si pikë të katërt të strategjisë së tij. “Ju nuk mund të decentralizoni pa u njohur komuna. Kështu nuk funksionon demokracia. Nëse merrni pjesë në zgjedhje unë marr përsipër fillimin e decentralizimit të pushtetit menjëherë pas zgjedhjeve”, tha Shatjner. Sipas tij, situata e rëndë politike ka privuar edhe zhvillimin ekonomik të qytetit, që vlerësohet çështje shumë e rëndësishme për integrimin e Mitrovicës. Lidhur me këtë, Shtajner tha se ka planifikuar të zhvendos një pjesë të rëndësishme të administrimit të UNMIK-ut në veri të Mitrovicës, që përbën pikën e pestë në strategjinë e tij për Mitrovicën. “Jam i gatshëm që Agjencinë Kosovare të Mirëbesimit të zhvendos këtu. Duke zhvendosur Agjencinë Kosovare të Mirëbesimit këtu do të kishim zhvillim më të shpejtë ekonomik. Kjo do t’ua përmirësonte kushtet e jetës së njerëzve. Agjencia Kosovare e Mirëbesimit është një ndër institucionet më të rëndësishme për të ardhmen ekonomike të Kosovës. Zhvendosja e Agjencisë në Mitrovicë do të bind investitorët e huaj se është koha të investohet në Mitrovicë”, theksoi Shtajner. Sipas tij, pikë e gjashtë për bashkimin e Mitrovicës është organizimi i një konference të donatorëve për Mitrovicës, përmes së cilës do të bindeshin donatorët të investojnë në zhvillimin ekonomik të këtij qyteti. Ndërkaq, pika e shtatë dhe e fundit është pjesëmarrja e serbëve në zgjedhjet komunale të 26 tetorit, nga e cila, sipas Shtajner, varet e ardhmja e Mitrovicës. “Është koha kur vendoset për fatin e Mitrovicës. Mitrovica është në udhëkryq dhe ju që jetoni në veri ballafaqoheni me një zgjidhje: stagnim i situatës apo ndryshim i saj. Nëse gjërat mbesin kështu si janë, kjo do të thotë vazhdim i parregullsive, pasigurisë, frikës, mbetjes në errësirë. Pra zgjidhja është te ju”, porositi shefi i UNMIK-ut në Kosovë, serbët në veri të Mitrovicës.
Ndërkohë Shtajner sot takohet me udhëheqjen komunale, ndërkaq më vonë së bashku me komandantin e KFOR-it, Marsel Valenten, përmes urës kryesore do të kalojë në pjesën veriore të Mitrovicës, ku do të vëzhgojë ngjyrosjen e një ndërtese. Zyrtarë të UNMIK-ut në Mitrovicë thanë se megjithatë kjo vizitë e sotme nuk lidhet me ndonjë fushatë të kryeadministratorit, që ky plan të pranohet nga ana e serbëve.

[Ari-Intimidator]

Deputetët serbë në Parlamentin e Kosovës kundër planit të Shtajnerit për Mitrovicën
PRISHTINE, 5 tetor - Anëtari i Kryesisë së Parlamentit të Kosovës Oliver Ivanoviq kundërshtoi planin e Mihael Shtajnerit për zgjidhjen e çështjes së Mitrovicës. Sipas tij ky plan është tepër i vonuar dhe ai është shpallur vetëm tri javë para zgjedhjeve dhe se serbët janë vënë para aktit të kryer. Ndërkaq, Marko Jakshiq tha se serbët nuk i besojnë aspak kryeadministratorit Shtajner. Ai u shpreh se vendimin për pjesëmarrjen ose jo në zgjedhjet lokale duhet ta marrin së bashku të gjithë serbët.