Fabio Capello: Kam përdorur doping!

[Davius]

Trajneri i Juves, 360 gradë: Kam frikë të shkoj në Romë. Pas 3 vitesh dua të drejtoj Anglinë dhe do të votoj për Berluskonin 24-03-2006

Fabio Capello: Kam përdorur doping!

Deklaratë e papritur nga ana e Fabio Kapelos për problemin e dopingut. Trajneri bardhezi ka pohuar në një intervistë të dhënë për "Espresso"-n, përdorimin e substancave dopuese kur ishte futbollist:

"Edhe unë përdorja Mycoren, madje edhe në kombëtare, por në atë kohë nuk klasifikohej si doping, ka thënë ai. Në karrierën time si lojtar dhe trajner kam parë gjëra të ndryshme që janë bërë, por nuk më duket me vend t'i denoncoj tani."

Ai s'kishte thënë kurrë asnjë fjalë për dopingun, as gjatë gjyqit ku ishte i akuzuar Juventusi, pasi kishte mbajtur një qëndrim neutral, por tani Fabio Kapelo ka vendosur të rrëfejë përvojat e tij të përjetuara si lojtar dhe trajner, që në njëfarë mënyre kanë pasur të bëjnë me një nga plagët më të thella që përfshijnë futbollin dhe sportin në përgjithësi: dopingun.

"Gjatë karrierës sime si lojtar dhe trajner kam parë disa gjëra që bëheshin, por nuk më duket me vend t'i denoncoj tani, - ka deklaruar "Don Fabio". - Kishte ilaçe që dikur nuk konsideroheshin doping dhe që u ndaluan vetëm më vonë. Mycoren-in, për shembull, e përdornin të gjithë, e përdorja edhe unë, madje edhe në kombëtare. Por asokohe nuk klasifikohej si substancë dopuese."

Në krahasim me të kaluarën, Kapelo ndihet mjaft optimist për luftën ndaj dopingut, por në të njëjtën kohë ka disa shqetësime të tjera:

"Sot është më e vështirë të bësh doping, sepse ka kontrolle më të rrepta, edhe në gjak, por me siguri dopingu ndodhet një hap përpara antidopingut."

Trajneri bardhezi duket se në mënyrë indirekte i jep të drejtë Zemanit, i cili ishte i pari që e hapi këtë çështje, por më pas saktësoi:

"Zemani? Kur flitet për disa gjëra të caktuara, është e nevojshme të kesh qenë dëshmitar direkt ose të kesh prova, nuk mund të flitet me ato që ke dëgjuar."

Kapelo kësaj here shprehet 360 gradë dhe i kthehet edhe aventurës së tij te Roma, me një keqardhje:

"E kam dashur shumë Romën, perëndimet e saj dhe historinë që përjetohet në çdo qoshe. Për fat të keq tani mund të shkoj shumë rrallë atje dhe me masa të forta mbrojtëse. Atje kam dentistin tim të besuar, por për të shkuar, duhet të lajmëroj më parë policinë. Eshtë e pamundur të eci vetëm nëpër rrugë apo të shkoj për të pirë ndonjë kafe në bar."

Ai përfundon, duke treguar se cilat janë planet e tij për të ardhmen:

"Pas tri vitesh, shpjegoi trajneri i Juves, do të heq dorë nga skuadrat e klubeve dhe më pas do të doja të realizoja ëndrrën që e kam brenda prej një jete, të drejtoj Anglinë. Pas kësaj mund të tërhiqem nga gjithçka, ndoshta për të kaluar një pleqëri të qetë në Panteleria, ku kam blerë një tokë pikërisht për këtë arsye."

Kapelo në jetën e tij private është një katolik praktikues.

"Jam kundër abortit dhe më pëlqen Papa Ratzinger. Kishte nevojë kisha për një anim tradicionalist."

Dhe për të mos lënë asgjë mangut, trajneri theksoi më pas qëllimin e tij për të votuar për Silvio Berluskonin, presidentin e Milanit në vitet e tij të arta në stolin e kuqezinjve.

"Për mua, kryeministri ka qenë para së gjithash një sipërmarrës i madh. Ndodhej në një pozicion, ku mund të vendoste gjithçka ose thuajse gjithçka. Ndërsa në politikë është një njeri me duart e lidhura, i është dashur të kënaqë shumë njerëz dhe ka mundur të bëjë atë që do të kishte dashur të bënte vetë. Megjithatë do ta votoj sërish." Dhe nëse e thotë ai, të jeni të sigurt.

[bavarezi5]

Shume interesant ky lajm,gjithe ato vite i ka kaluar tash e kalon sekretin.
lol lol

[ylber1998]

Flmd per info...Interesont valla shum bile