Bllokimi...ne kurriz te shqiptareve.

[shkodra13]

Edi Rama betohet për bllokimin total

Artur KOPANI

Edi Rama e ka shndërruar "bllokimin" në substancë dhe mision politik të angazhimit të tij personal. I palëkundur, por edhe i papërgjegjshëm, Rama që bllokoi prej afro një viti punimet në rrugët e kryeqytetit, që urdhëroi tre javë më parë deputetët e tij të bllokojnë pa sukses parlamentin, kërcënoi dje se vitin e ardhshëm do të bllokojë zgjedhjen e presidentit. As më pak dhe as më shumë, Edi Rama ka vendosur të bllokojë Shqipërinë. Dje, publikisht, ai bëri betimin e radhës.

Bllokimi është arti politik i Ramës dhe ai po shndërrohet për fat të keq në platformë të Partisë Socialiste. Ai e ka bërë këtë jo rrallë herë edhe brenda Partisë Socialiste, edhe me qeveritë socialiste, edhe me kryeministrat socialistë. Ai e bëri këtë edhe ndaj iniciativave të opozitës së parlamentit të kaluar, edhe ndaj komisioneve hetimore për të kontrolluar aktet e pafundme korruptive që kanë qelbur institucionin e pushtetit lokal të drejtuar abuzivisht prej tij.

Bllokimi është përgjigja e parë dhe e vetme e Ramës edhe sot. Rama është bllokues edhe si kryetar i Bashkisë së Tiranës, edhe si kryetar i Partisë Socialiste. Janë me dhjetra rrugë të kryeqytetit që gjatë këtyre ditëve dimri janë shndërruar në këneta, për arsyen e vetme se Edi Rama ka bllokuar punimet. Rama nuk shqyrton, nuk firmos me dhjetra projekte të zhvillimit të kryeqytetit, pasi ka vendosur të bllokojë. Rama nuk mbledh KRT-në e Tiranës, pasi ka vendosur të bllokojë. Rama ka vendosur të bllokojë gjithçka që nuk kalon nga xhepi i tij.

Rama ka vendosur të bllokojë gjithçka që nuk lejon apo shtyn në kohë ambiciet e tij politike për të kontrolluar këtë vend. Rama "sëmuret" ose humbet "ftesat" kur Shqipërisë i hapen dyert drejt Europës. Rama nuk është kur nënshkruhen dokumenta të rëndësishme për integrimin europian të vendit, pasi po punon ditë-natë të bllokojë këtë proces fondamental për të ardhmen e shqiptarëve. Ai nuk është në tryezat kur flitet për sfidat apo afrimin e ditës së anëtarësimit të Shqipërisë në NATO, pasi ka vendosur të bllokojë edhe këtu.

Rama ka alergji ndaj reformave të qeverisë së sotme, pasi që të gjitha i duken se janë kundër tij. Sa të lodhet të mendojë për to, për përmirësimin e tyre, ai zgjedh rrugën më të lehtë: Bllokimin. Bllokon ish-pronarët, legalizimet, nismat antikorrupsion, buxhetin e shtetit, shkurtimet administrative, largimin e hajdutëve, ndëshkimin e kriminelëve, bllokon dhe vetëm bllokon.

Rama nuk është se ka vendosur të bllokojë vetëm sot për sot. Por bllokimi është kryefjala e aksionit të tij politik edhe për nesër, edhe për pasnesër, edhe pas një viti. Kryetari i Bashkisë së Tiranës dhe i Partisë Socialiste tha se do të bllokojë vitin e ardhshëm zgjedhjen e Presidentit të Republikës, duke pohuar se nuk është në opsionet e tij kërkimi dhe gjetja e konsensusit me mazhorancën. Dhe kjo, sepse Rama ka vendosur të bllokojë krijimin e një tradite, që identifikon qytetari politike dhe përgjegjshmëri kombëtare të klasës politike në vend. Partia Demokratike, atëherë në opozitë, pranoi që të sakrifikojë interesa të pastra partiake, pranoi të zgjaste ditët e saj në opozitë dhe dha konsensusin në një moment që u vlerësua se kësisoj u shërbehej interesave kombëtare.

Por, Edi Rama ka zgjedhur të bllokojë këtë vend, sa kohë që nuk i shtrihet nën këmbët e tij dhe me mendjen e tij po shkon me sa duket e gjithë Partia Socialiste. Ai ka vendosur të bllokojë, pasi nuk e fsheh se ndjehet më i plotë, më i qetë me vetveten. Rama nuk do të lejojë këtë vend që të ngrejë të ardhmen e qytetarëve mbi Edi Ramën. Nuk është thjesht çështje egoizmi, pasi ka kohë që Rama na ka lënë të kuptohet se gjërat që janë nën këmbët e tij, janë atje ku duhet të jenë. Pasi ku shkel dhe ku është dora dhe mendja e Edi Ramës, ky vend bllokohet. Tashmë, të gjithë mendojmë si ngarësit e makinave në kryeqytet: kudo që na bllokohet rruga, e dimë se është Edi Rama. Së fundi, Rama ka shpallur se do të bllokojë ditë e natë, 24 orë, shtatë ditët e javës. Ky quhet bllokimi total. I cili si epilog të tij ka bllokimin e zgjedhjes së Presidentit vitin e ardhshëm.

RD