Ing. Jorgji Ziko

[erzeni]

"Në përkujtim të një punonjësi shkencor"

Grup kolegësh*
Tiranë

Nuk vdesin ato që kujtohen. Homazh, respekt e mirënjohje të thellë për njerëzit e mrekullueshëm, pedagogë e shkencëtarë, që formuan armatën e madhe të specialistëve të ndërtimit. I kësaj plejade ishte edhe doc.ing. i nderuar Jorgji Ziko, i cili para një viti, mbas një sëmundjeje të rëndë, më 12 tetor 2001, u nda nga jeta këtu në Tiranë. Ing. Jorgji Ziko është një ndër përfaqësuesit e arsimit të mesëm dhe të lartë të inxhinierisë hidroteknike në Shqipëri. Pedagogu modest dhe inxhinieri përherë i kujdesshëm u lind në Pogradec, në vitin 1925, në një familje qytetare me tradita patriotike. Me krijimin e Universitetit të Tiranës, ing.Jorgji u emërua pedagog në Fakultetin e Inxhinierisë, pranë katedrës së hidraulikës e konstruksioneve hidroteknike. Me pasionin, thjeshtësinë dhe kujdesin që e karakterizonte, duke kapërcyer vështirësitë e fillimit, zhvilloi me nivel të lartë tekniko-shkencor lëndën e konstruksioneve hidroteknike duke u aktivizuar në punën mësimore- shkencore dhe hartimin e teksteve të metodikave në këtë katedër. Disa breza të studentëve, që përfunduan studimet e inxhinierisë në Fakultetin e Ndërtimit e degën hidroteknike do të kujtojnë me respekt punën plot pasion të pedagogut të tyre të nderuar e të palodhur për t'iu mësuar teknikën dhe shkencën e hidroteknikës; ne, bashkëpunëtorët e tij të Fakultetit e të katedrës, do të kujtojmë me respekt punën e tij të palodhur e të përkushtuar për plotësimin e detyrave studimore e shkencore dhe metodiko- mësimore, që ishin gjithnjë në nivelin e kërkesave të kohës.

*Rahman Hanku, Niko Nikolla, prof.dr.Kiço Negovani, prof. Besim Daja, B.v.sh Marko Kamenica, prof. dr. Pandi Stratobërdha, prof. Dr. Koço Katundi, ing. Mevlan Balliu, ish- student

.........................

[Ari-Intimidator]

Paska qene nje punetor i palodhur. Kontributi i tij ne fushen e hidorteknikes qenka shume i madh. I lehte i qofte dheu.

Ari