Kush e fiton titullin në Formula 1 - (2006)

**Davius** · 08-03-2006, 14:50

Sezoni 2006 i Formulës 1 do të jetë një nga më të hapurit dhe një nga më të paparashikueshmit në këtë dekadë të fundit. Në testimet dimërore kanë qenë shumë skuderi, të cilat kanë treguar se janë të shpejta, gjithashtu do të kemi një rregullore të ndryshuar dhe pilotë të rinj.

Në të vërtetë, arsyeja kryesore që ky sezon cilësohet i tillë, është sepse asnjë skuadër nuk e di se çfarë problemesh mund të ndodhin gjatë garave apo çfarë mangësish kanë me të vërtetë rivalët e tyre. Menjëherë pas përfundimit të sezonit 2005, FIA mori sërish vendimin për të lejuar ndryshimin e gomave gjatë garave.

Ka qenë pikërisht një nga faktorët kryesorë që ka ndikuar në rrëzimin e Ferrarit dhe të Majkëll Shumakerit nga kreu i renditjeve në sezonin e kaluar. Megjithatë, ndryshimet që janë bërë sërish këtë vit, kanë pasur si synim kryesor reduktimin e shpenzimeve për vazhdimësinë e këtij sporti.

Votoni per favoritin tuaj!

**Davius** · 08-03-2006, 14:55

Gomat

Ndryshimi i gomave gjatë garave është rikthyer. Pasi ka përfunduar një sezon, ku gomat nuk mund të ndryshoheshin gjatë gjithë garës, pilotët tashmë në sezonin 2006 do ta kenë këtë mundësi. Kjo do të thotë se shumë gjëra të tjera tashmë kanë ndryshuar. Në të vërtetë ka qenë firma e gomave Bridgestone ajo që pati më shumë probleme në sezonin e kaluar, ndërkohë që për këtë sezon pritet një ngritje të emrit të saj. Për këtë arsye, në 2006 n japonezët do të furnizojnë me gomat e tyre edhe Toyotën apo Williams in. Krejt e kundërta ka ndodhur me firmën franceze të gomave Michelin. Ata kanë dominuar në sezonin 2005 pothuajse në të gjitha garat, ndërkohë që pritet të kenë probleme me këtë ndryshim të rregullores. Ndoshta është kjo një nga arsyet që drejtuesit e kësaj firme kanë bërë të ditur se do të largohen në fund të këtij sezoni nga Formula 1.

Motorët

Në sezonin 2006, motorët do të jenë V8. Një vit më parë, FIA kishte vendosur një rregullore, sipas së cilës skuderitë duhet të përdornin një motor për dy gara. Me sa duket, nuk ishte një rregull pozitiv dhe për këtë arsye është vendosur që në sezonin 2006, të përdoren motorë V8. Të gjitha skuderitë do të përdorin këtë lloj motori përveç skuderisë Toro Roso, që në sezonin 2005 ka qenë skuderia Minardi. Kjo e fundit është lejuar të përdorë një moto V10, për shkak të problemeve të mëdha financiare.

Provat

Formula 1 ka disa vite që është duke u përpjekur për të futur një sistem të ri provash zyrtare, por që deri tani këto sisteme nuk kanë rezultuar shumë pozitive. Edhe në sezonin 2006 do të ketë një ndryshim të ri të këtij sistemi, me qëllim që ky sport të thithë sa më shumë sponsorë dhe interes të publikut. Në të vërtetë, tifozët që shkonin në pistë, ishin të interesuar të shihnin pilotët të garonin gjatë gjithë orës së provave dhe jo vetëm në një xhiro të shpejtë, siç u bë në sezonin 2004 dhe 2005. Si përfundim, ky sistem rezultoi i mërzitshëm. Sistemi i ri i këtyre provave ka disa gjëra që janë të pakuptueshme. Tashmë do të kemi tri particione të ndara brenda një ore. Në dy 15 minutat e para do të zhvillojnë provat 6 skuderitë më të ngadalta, nga ku do të eliminohen disa skuadra. Në pjesën tjetër të mbetur do të garojnë 10 skuderi për "pole position" in. Nuk është dhe aq e thjeshtë për ta kuptuar, apo jo? Për sa i përket karburantit, 12 makinat më të ngadalta do të nisen me të njëjtën sasi karburanti që kanë zhvilluar provat, ndërkohë që 10 skuderitë që kanë luftuar për "polin", do t'u lejohet të furnizohen sërish.

**Davius** · 08-03-2006, 14:56

6 më të mirat

Renault (Michelin)

Skuderia franceze ka qenë njëra nga ato që kanë befasuar në testimet e dimrit. Kjo skuderi do të ketë të njëjtën dyshe pilotësh, por do të ketë një motor të ri dhe një konfigurim aerodinamik të ri. A ka ndonjë skuadër që mund t'i ndalë ata? Ndoshta jo, por do të jetë shumë interesante të shohim se si do të reagojë Fernando Alonso, i cili që në këtë sezon ka firmosur një kontratë me skuderinë McLaren Mercedes, për sezonin 2007. Pas këtij vendimi duket se në brendësi të kësaj skuderie ka filluar një mbështetje më e madhe për Xhankarlo Fizikelën.

McLaren (Michelin)

Jo çdo gjë është duke shkuar mirë në skuderinë McLaren. Drejtuesit e saj janë tashmë në pritje të Fernando Alonsos dhe të Vodafonit, në përfundim të këtij sezoni. Kalimi i spanjollit te kjo skuderi ka sjellë që tani probleme me pilotët. Kimi Raikonen dhe Huan Pablo Montoja nuk janë aspak të sigurt pas këtij sezoni. Vetëm njëri prej të dyve do të jetë shoku i skuadrës së Alonsos në 2007 n. Përveç këtyre problemeve duhet theksuar se Ron Denisit i janë larguar dhe një pjesë e mirë e stafit teknik, ndër ta mund të përmendim largimin e Adrian Njuejit (shefit të aerodinamikës që ka kaluar te Red Bull i), Nikolas Tombazis (ka kaluar te departamenti i aerodinamikës te Ferrari) dhe Piter Prodromon (ka kaluar si shef i testimit të aerodinamikës te Red Bull i).

Ferrari (Bridgestone)

Në këtë fillim sezoni, Majkëll Shumaker është ndryshe nga herët e tjera. Ai nuk e fillon më këtë vit si kampion bote, së bashku me skuderinë Ferrari. Në 2005 n, ata arritën vetëm një fitore, diçka krejtësisht e pazakontë për gjermanin dhe për skuderinë nga Maranelo. Për sa i përket këtij sezoni të ri, Shumakeri duket shumë i karikuar dhe optimist. Testimet e tyre dimërore kanë dhënë rezultate pozitive. Edhe shoku i tij i ri i skuadrës, Felipe Masa, ka rezultuar i shpejtë në testimet e dimrit. Këtë herë Majkëll Shumaker kërkon të fitojë medoemos titullin kampion dhe me ndihmën e Masës të pretendojnë edhe për titullin për konstruktorë.

Toyota (Bridgestone)

Toyota ka treguar në testimet e dimrit, se është e gatshme të fitojë garën e parë të historisë së saj në Formulën 1, në sezonin 2006. Edhe për këtë vit, ajo do të ketë si dyshe pilotësh Ralf Shumakerin dhe Jarno Trulin. Duhet theksuar se skuderia japoneze ka qenë nga të parat që ka zbritur në pistë makinën e saj të re. Në këtë sezon, ata kanë zgjedhur gomat Bridgestone, duke parë edhe ndryshimin e rregullores.

Williams (Bridgestone)

Skuderia Williams e fillon këtë sezon me disa probleme. Si fillim atyre u është larguar partneri kryesor BMW dhe më pas nuk kanë mundur të marrin pilotin britanik Xhenson Baton nga Honda. Megjithatë, Frenk Uilliams dhe Patrik Hed kanë punuar shumë gjatë sezonit të testimeve dimërore. Për vitin 2006, ata do të përdorin motorët V8 Cosworth. Edhe për sa i përket dyshes së pilotëve, ata kanë bërë një ndryshim; është larguar Nik Haidfeld dhe ka ardhur Niko Rozberg. Kështu pra, dyshja e tyre e re do të jetë Mark Veber Niko Rozberg.

Honda (Michelin)

Ndër të gjitha dyshet e pilotëve, ajo e Hondës duket se është më interesantja, Xhenson Baton Rubens Barrikelo. Në të vërtetë, skuderia japoneze në këtë vit është shkëputur edhe nga partneri i saj BAR. Në sezonin 2006 pritet që Xhenson Baton të arrijë fitoren e tij të parë në karrierë dhe bashkë me ndihmën e Rubens Barrikelos shpresojnë të rikuperojnë edhe në klasifikimin për konstruktorë. Edhe në sezonin e kaluar, kjo skuderi u paraqit mirë në fillim deri përpara skualifikimit për dy gara. Gjithsesi, testimet e tyre dimërore kanë treguar se kanë përparuar ndjeshëm.