Shkrihet dega e shkencave politike

[Davius]

Ende nuk është krijuar një departament përkatës, dega vazhdon të ekzistojë si seksion i veçantë

Shkrihet dega e shkencave politike, studentët në protestë

Studentët: Nuk pranojmë titull në diplomë për filozofi-sociologji. Kemi konkurruar e studiuar për shkenca politike

Valmora Gogo

Shkrirja e degës së shkencave politike në Fakultetin e Shkencave Sociale dhe bashkimi i saj me departamentin e Filozofi-Sociologjisë ka irrituar studentët, të cilët i tremben diplomimit për filozofi-sociologji e jo për degën ku kanë konkurruar e studiuar. Dje më shumë se 30 studentë të degës së shkencave politike, kanë protestuar para Rektoratit të Universitetit të Tiranës, me qëllim diplomimin me emërtimin “Për Shkenca Politike”. Të frikësuar se dega që vazhdojnë do të barazohet me degën filozofi-sociologji, studentët kanë kërkuar të drejtën e tyre.

“Është një padrejtësi që na bëhet dhe nuk është normale që të diplomohemi për filozofi-sociologji me shtesën specialist i shkencave politike”, - thotë Ervis Xhako, student i vitit të dytë, duke shtuar se protesta e tyre do të zgjasë deri në zgjidhjen e kërkesës që kanë. Studentët kërcënojnë se do të bojkotojnë edhe provimet që janë të detyruar t’u nënshtrohen. ”Ne kemi konkurruar për këtë degë, kemi fituar duke kapur pikët maksimale krahasuar me studentët e degëve të tjera të fakultetit dhe, për më tepër, ne kemi dhënë me shumë provime se filozofi-sociologjia”, - theksoi studenti Xhako.

Njëzëri studentët kërkuan zgjidhje të menjëhershme të problemit të tyre. Nga ana tjetër për të mënjanuar problemet në fjalë, studentët kërkojnë krijimin e një departamenti me të njëjtin emër: Shkencat politike. “Shkencat politike duhen të ekzistojnë si një departament më vete”, - theksoi një nga protestueset, Ermelinda Shehu. Kjo, sipas studentëve, do të mënjanojë njëherë e mirë rrezikun e situatave të tilla në të ardhmen. Ndërkaq, ata kanë lajmëruar vazhdimin e protestës së tyre, sot përpara shkollës dhe përpara Ministrisë së Arsimit.

Reagimi

Pajtohet me studentët protestues edhe rektori i Universitetit të Tiranës, Shezai Rrokaj. Kjo, në pikëpamjen e krijimit të një departamenti të tillë. Sa i përket protestës, Rrokaj e vlerëson si jo me vend. Arsyetimit se krijimi i departamentit nuk varet nga Rektorati, Rrokaj i ngjit edhe atë të keqinformimit dhe mashtrimit të studentëve nga individë të caktuar. “Studentët do të diplomohen për shkencat politike”, - theksoi dje Rrokaj. Sipas tij, edhe të rinj të tjerë që dëshirojnë të vazhdojnë studimet në këtë degë, duhet të mos ngurrojnë për të aplikuar. “Sipas informacioneve që kam, edhe shefi i seksionit Hysamedin Feraj, ka dhënë dorëheqjen nga detyra e tij”, -vazhdoi më tej Rrokaj. Edhe zgjedhja e Ferajt në këtë detyrë, sipas Rrokajt, nuk ishte normale. “Shefi i seksionit zgjidhet nga shefi i departamentit, ndërkohë që kjo degë nuk ishte ende departament dhe nuk kishte ende shef”, -përfundoi rektori i Universitetit të Tiranës, Shezai Rrokaj.

Problemi i vjetër

Kjo nuk është hera e parë që studentë të shkencave politike ngrenë zërin për të njëjtin problem. Shpeshherë studentët janë vënë në alarm për mosdiplomim në profilin e vazhduar. Por nga ana tjetër, ky seksion nuk mund të kthehet menjëherë në departament, pasi nuk plotëson disa kritere si numrin e caktuar të pedagogëve. Dega e shkencave politike ka pak kohë që është bashkëngjitur si profil i departamentit filozofi-sociologji. Në këtë kuptim, kjo degë do të shihet si prejardhje e degës filozofi-sociologji.

Ndërkohë, që vlerësuar nga specialistët, shkencat politike kanë në kurrikulën e tyre lëndë që nuk kanë lidhje me degën e filozofi-sociologjisë. Sipas rektorit të Universitetit të Tiranës, kusht i parë për bërjen departament është kompletimi i trupës akademike. Sipas ligjit, një departament duhet të ketë së paku 13 pedagogë, gjysma e të cilëve me tituj e grada.