Rendesia e Sunnetit

[realitetiweb]

bazuar në veprat e HARUN YAHYA
Muhammedi s.av.s. është i dërguari i fundit i All-llahut. Atij All-llahu ia shpalli librin e Tij, Kur’anin që është udhëzues i njerëzimit deri në Ditën e Gjykimit. Në Kur’an All-llahu na mëson për ekzistencën dhe njëshmërinë e Tij, qëllimin e ekzistencës sonë, mënyrën me të cilën ne duhet ta adhurojmë Atë dhe t’i shërbejmë Atij. Ne duhet t’i zbatojmë të gjitha urdhërat që na jepen në Kur’an në mënyrë që të fitojmë kënaqësinë e All-llahut dhe të fitojmë mëshirën e Tij. Pra, Kur’ani përmban çdo informatë që i nevojitet një njeriu gjatë jetës së tij.

Sunneti (mënyra e jetës së Muhammedit s.a.v.s.) është vënia e Kur’anit në praktikë. Në shumë ajete Kur’anore urdhërohemi që t’i besojmë të dërguarit të All-llahut. Pra, Kur’ani mund të kuptohet në mënyrë komplete vetëm duke e ndjekur shembullin (Sunnetin) e të dërguarit.

Është me rëndësi të theksohet se Sunneti nuk është një koncept i ndarë nga Kur’ani. Në Kur’an Zoti thotë se i dërguari i Tij largon barrët e rënda, bën rregulla, ia mëson shoqërisë kuptimet e hapura dhe të fshehta të Kur’anit.

All-llahu na informon në Kur’an se Muhammedi kishte karakteristikën e mësimit të Kur’anit dhe pastrimit të njerëzimit:

Është e vërtetë se All-llahu u dha dhuratë të madhe besimtarëve, kur ndër ta nga mesi i tyre dërgoi të dërguar që atyre t’u lexojë shpalljen e Tij, t’i pastrojë ata, t’ua mësojë Kur’anin dhe sheriatin, edhepse, më parë ata ishin krejtësisht të humbur. (3:164)

Pra, feja jonë është e plotë vetëm me Kur’an dhe me Sunnet. Ne mund të marrim namazin si shembullin më të mirë të Sunnetit. Siç dihet, në Islam, kryerja e namazit pesë herë në ditë është obligim dhe në disa ajete Kur’anore jepen informata të përgjithshme se si të bëhet ai, se si të marrim abdest. Mirëpo, ne mund të kuptojmë saktësisht se si duhet ta bëjmë namazin vetëm duke e shikuar sunnetin. Pasi nuk kemi informacione të hollësishme rreth mënyrës së namazit, çka të themi në të, rreth mënyrës së bërjes së tij nga mashkulli dhe femra, rreth shkallës së rëndësisë së namazeve, detajeve të abdestit, gjërave që e prishin abdestin, ne mund t’i mësojmë ato gjëra duke e shikuar Sunnetin (shembullin) e Muhammedit s.a.v.s.

Poashtu, në Kur’an nuk jepet ndonjë informatë e hollësishme rreth agjërimit apo haxhit, që të dyja këto obligime që ne duhet t’i kryejmë. Ne mësojmë se si t’i kryejmë këto mënyra të adhurimit të All-llahut nga interpretimet e fjalëve dhe veprave të të dërguarit të Tij, që i kanë bërë dijetarët islamë.

Sunneti është zbatuar në jetërat e muslimanëve që nga koha e Muhammedit s.a.v.s. e deri në ditët e sotme. Për këtë arsye, është plotësisht e panevojshme që të diskutohet rreth çështjeve si koha e namazeve, numri i rekateve (njësive) të namazit. Të gjitha janë mënyra obligative të adhurimeve të All-llahut.

All-llahu në Kur’an na ndalon që të kundërshtojmë gjykimet e Muhammedit s.a.v.s.:

Kur All-llahu ka vendosur për një çështje, ose i dërguari i Tij, nuk i takon (nuk i lejohet) asnjë besimtari dhe asnjë besimtareje që në atë çështje të bëjnë ndonjë zgjidhje tjetër. E kush e kundërshton All-llahun dhe të dërguarin e Tij, ai është larguar shumë larg të vërtetës. (33:36)

Pra, All-llahu na urdhëron që t’i besojmë urdhërave të Muhammedit s.a.v.s. Ajetet sa i përket çështjes së Sunnetit janë shumë të qarta. Pretendimi i atyre që e konsiderojnë të panevojshëm Sunnetin e Muhammedit s.a.v.s. është në kundërshtim me esencën e Kur’anit.