Rrjeti Ballkanik i Universiteteve:

[Kryeplaku]

Iniciativa greke, vendet e Ballkanit rrjet unik për arsimin e lartë

Një urë për të arritur drejt arsimit të lartë evropian. Kështu e ka cilësuar ngritjen e rrjetit të universiteteve të Ballkanit, zëvendësrektorja e çështjeve akademike, Ekaterini Dhuka Kambitoglou. Ajo nënvizoi se, “kjo iniciativë do t’u japë një hapësirë tjetër të re marrëdhënieve dypalëshe, që tashmë ekzistojnë ndërmjet Universitetit “Aristoteli” të Selanikut me universitetet e tjera të Ballkanit, ndërkohë që do të forcojë takimet dhe shkëmbimet e përvojave ndërmjet studentëve”. Në këtë mënyrë do të zgjerohen bashkëpunimet e universiteteve për programe të përbashkëta studimi, të studimeve pasuniversitare, për shkëmbim studentësh, për programe kërkimore. Bazat për krijimin e këtij rrjeti unik u hodhën nga rektorët e 11 universiteteve të gadishullit Ballkanik, në një veprimtari që u organizua në Selanik me iniciativë të Universitetit “Aristoteli”. Rektorët e universiteteve nënshkruan protokollin e Rrjetit Ballkanik të Universiteteve, qëllimi i të cilit është që të marrë përsipër veprime për lehtësimin e bashkëpunimit arsimor si dhe për vlerësimin e dijeve dhe të përvojave të universiteteve. Në këtë kuadër parashikohen takime të palëve, kongrese vjetore, krijim të grupeve të punës, por edhe organizim të veprimtarive të ndryshme kulturore. Rektori i Universitetit “Aristoteli” të Selanikut, Jani Antonopoulos, foli për një strategji të përbashkët të politikës së arsimit në rajonin e Ballkanit. “Universiteti vendos një gur në kuptimin “Selaniku, metropol i Ballkanit”. Në fazën e parë ky rrjet unik i universiteteve do të përdoret për problemet tona të përbashkëta, për një bashkëpunim në fushën e shkencave humane, të historisë, fesë, arteve të bukura”, theksoi ai ndër të tjera.

Panorama /14 Shkurt 2006