I droguari kishte qenë emigrant në Belgjikë për katër vjet dhe ishte kthyer nga autoritetet belge. Policia në kërkim të Saimir Bajraktarit
Kukës
Një ngjarje shumë e rëndë ka tronditur njerëzit në rrethin e Kukësit. Një endacak, që sipas policisë e të njohurve, ka qenë për vite me radhë person i droguar, ka vrarë shtazërisht me gurë një fëmijë 9-vjeçar nga fshati Resk i komunës së Ujmishtit, në rrethin e Kukësit. Ngjarja e rëndë ndodhi pasditen e së premtes, ndërkohë që fëmija ka dhënë shpirt dje, të dielën, në orët e para të mëngjesit. Vajza e vogël qëndroi shumë orë në koma para se të jepte shpirt. Drejtoria e Policisë së Qarkut të Kukësit bëri të ditur se “Albana Bashkim Gjoka, 9 vjeçe, nxënëse e klasë së dytë nga fshati Resk i komunës së Ujmishtit në rrethin e Kukësit, vdiq pas plagëve të rënda që ka marrë në kokë, nga një sulm me gurë. Autori i këtij sulmi të paprincip dhe sadist ka qenë Saimir Ahmet Bajraktari, nga fshati Domaj i komunës Bicaj të rrethit të Kukësit”.
9-vjeçarja Albana Gjoka, e cila vdiq në spitalin e Kukësit, pa mundur të transportohet dot në Tiranë, kishte marrë goditje të panumërta me gurë në kokë. Autori i vrasjes makabre cilësohet nga policia e Kukësit, por edhe nga ata që e njohin, si një i sëmurë mendor, pas efekteve të përdorimit të drogës kur ai kishte qenë emigrant në Belgjikë.
Ndërkohë, policia është vënë në kërkim të autorit Bajraktari. Një krim i këtyre përmasave nuk kishte ndodhur në rajonin e Kukësit që prej 30 vjetësh, kur një burrë vrau një djalë 12-vjeçar për hasmëri, e masakroi atë dhe e hodhi në një pus.
Drejtues të policisë së qarkut të Kukësit thanë dje se ende nuk është bërë e mundur kapja e autorit të krimit, pavarësisht nga kërkimet e shumta.
Ngjarja
Fëmijët e klasës së parë dhe të dytë të fshatit Resk sapo kishin mbaruar mësimin dhe ishin nisur për në shtëpitë e tyre. Gjatë rrugës përpara tyre është shfaqur endacaku Saimir Bajraktari nga fshati Domaj i komunës së Bicajve të rrethit të Kukësit, i cili ka filluar t’i pyesë fëmijët për atësinë e tyre. Duke parë endacakun e shpërfytyruar fëmijët janë trembur dhe kanë filluar të ikin me vrap. Por vajza 9-vjeçare Albana Gjoka nuk ka mundur të largohet shpejt sepse ajo ishte operuar para disa kohësh nga apendesiti dhe nuk vraponte dot. Kështu që ajo është kapur dhe ka rënë pre e dhunës së pashembullt të sadistit 28-vjeçar. Fëmijët e tmerruar kanë parë skenën makabër dhe kanë shkuar më vrap të njoftojnë mësuesin e tyre, i cili ka shkuar menjëherë në vendngjarje. Albana ishte e mbytur me gjak dhe merrte ende frymë, ndërkohë që agresori ishte larguar nga vendi i ngjarjes. Me një furgon të rastit fëmija i plagosur rëndë është dërguar në spitalin e Kukësit ku i është nënshtruar ndërhyrjes kirurgjikale.Por megjithë mjekimet e shpejta ajo nuk ka mundur t’i shpëtojë vdekjes, pasi goditjet me gurë kanë qenë të shumta dhe i kanë dëmtuar trurin fëmijës 9- vjeçar.
Mjeku ligjor Nikolin Martini, i cili ka bërë kontrollin e fëmijës së vdekur thotë për “Shekullin” se dhuna ndaj fëmijës, pas kokës të së cilës ishin përplasur mjete të forta, kishte qenë shumë e madhe dhe se të miturës i ishte dëmtuar rëndë truri.
Policia
Dhjetëra forca policore të komisariatit të Kukësit janë vënë në ndjekje të agresorit endacak Saimir Bajraktari, por pa mundur që ta kapin atë.”Ky person duhet të izolohet patjetër, pasi është një i çmendur mjaft i rrezikshëm”,- deklaroi pas ngjarjes Drejtori i Policisë së Qarkut të Kukësit Hysni Burgaj. Sipas Burgajt, forcat policore dhe agjentët e policisë kriminale po ushtrojnë kontrolle në të gjithë zonën në kërkim të autorit të krimit të pashembullt. Por sipas kreut të bluve të Kukësit, vështirësitë në kapjen e tij qëndrojnë në faktin se ai është endacak dhe nuk qëndron në shtëpinë e tij, por e gdhin natën rrugëve, nëpër pyll dhe në shtëpi të braktisura.
Precedenti
30 vjet më parë, si u vra djali i vogël
Ajo që ndodhi në Kukës këtë fundjavë, u ka kujtuar të moshuarve një ngjarje po aq të rëndë, të ndodhur rreth 30 vjet më parë në këtë zonë. Në fshatin Vranisht të rrethit të Hasit, u gjet i hedhur në një pus një djalë 12-13 vjeç, me trup të ndarë në copa. Pas hetimesh të shumta u zbulua edhe autori i krimit. Ai ishte një burrë, banor i zonës, që e kishte vrarë të voglin për hasmëri. Para se ta masakronte e ta hidhte në push, ai e kishte mbytur atë.
Precedenti/ Emigrantët e droguar
7 janar 2005
Studenti i Akademisë Ushtarake vritet nga kushëriri
Kukës-Kishte shkuar në klubin e fshatit për t’u përshëndetur me miqtë e tij, pasi të nesërmen do të nisej në Tiranë, ku studionte në Akademinë Ushtarake, por është qëlluar për vdekje nga kushëriri i tij. Armir Qemal Basha, 21 vjeç, banues në fshatin Shtiqen, student në Akademinë Ushtarake “Skënderbej”, është qëlluar për vdekje me armë automatike nga Elez Mehmet Basha, 31 vjeç. Ngjarja ndodhi në lokalin e fshatit Shtiqen, në mbrëmjen e 7 janarit. “Ka qenë ndërhyrja e pronarit të lokalit ajo që ka çarmatosur 31-vjeçarin, pasi në të kundërt aty do të shkaktohej një tragjedi”,-tha atëherë policia. Kjo e fundit mundi të arrestojë menjëherë autorin e krimit, por ka shpërfillur vazhdimisht pyetjet e uniformave blu lidhur me motivet e vrasjes. Edhe gjatë seancave të shumta të gjyqit, Elez Basha ka përsëritur atë që i tha në fillim policisë: në Angli, gjatë një transfuzioni, më kanë futur gjak vdekjeprurës. Nuk di se ç’bëj”.
Kur Elez Basha u fut në lokalin ku pinte kafe kushëriri student, ai ka hapur menjëherë zjarr ndaj tij. Dëshmitarët treguan se 31-vjeçari shkrehu ndaj kushëririt 5 plumba, tre prej të cilëve e kanë goditur atë në pjesë të ndryshme të trupit. Përballë kësaj skene ka reaguar menjëherë pronari i lokalit, Izmir Muçmata, i cili ka mundur të çarmatosë autorin e krimit, duke parandaluar kështu një tragjedi të përmasave më të mëdha. Në vendngjarje, krahas klientëve, janë grumbulluar dhe shumë bashkëfshatarë. Sipas policisë studenti gëzonte respektin e gjithë fshatit, ndërsa Elez Basha njihej si një njeri problematik. Prej 5 vjetësh ai kishte qenë emigrant ilegal në Angli dhe ishte kthyer një muaj më parë.
Përgjigju Duke Cituar
Krijoni Kontakt