Bota Sot në bankën e të akuzuarve
Korrespodenti i Gazetës Shqiptare dhe Express në Londër, ka paditur gazetën Bota Sot në gjykatën e lartë angleze “The Royal Court of Justice”. Kjo gazetë ka trilluar një shkrim, sipas së cilës Muhamed Veliu është i lidhur me sulmet terroriste në Londër.
Express/Prishtinë
13/12/2005
Shpifjet e rënda të bëra në llogari të korrespondntit të Gazetës Shqiptare në Tiranë dhe Express ne Prishtine do të detyrojnë pronarin dhe kryeredaktorin e gazetës Bota Sot që të përballen me drejtësinë e gjykatës së lartë angleze “The Royal Court of Justice”.
Në faqet e Bota Sot, disa muaj më parë, është botuar një shkrim tërësisht i rremë, sipas të cilit korrespodenti i Express dhe Gazetës Shqiptare në Londër, Muhamed Veliu, aku zohet se ka lidhje të ngushta me sulmet terroriste që kanë ndodhur gjatë verës në kryeqytetin e Britanisë së Madhe.
Për më tepër, shkrimi i botuar i është servirur opinionit shqiptar si gjoja një shkrim i gazetës prestigjioze Daily Mail, dhe i përkthyer nga Bota Sot.
Sarah Bray, redaktore përgjegjëse në Daily Ma il, është shprehur e habitur me faktin se si një gazetë ka mundur aq qëllimshëm ta falsifikojë një shkrim të tërë duke përdorur emrin e Dalily Mail si burim të informacionit.
“Mund të konfirmoj se ne kemi kontrolluar gjithë arkivin tonë dhe nuk kemi gjetur asnjë shkrim që ka lidhje me Muhamed Veliun apo për ndonjë rrëfim të kësaj natyre”, thotë Sarah Bray.
Shkrimi i “përkthyer” nga Bota Sot përveç gazetarit Veliu, për sulmet në Londër akuzon edhe përfaqësuesit e ambasadës shqiptare në këtë shtet.
Tashmë aktpadia prej 8 faqesh, përpiluar nga një ndër kompanitë avokatore më të mira të Britanisë së Madhe e specializuar për shpifje dhe çështje që kanë të bëjnë me mediat, i është dorëzuar Gjykatës së Lartë në Londër, e cila është e vetmja gjykatë që shqyrton padi për shpifje publikuar në media.
Ky hap është ndërmarrë nga avokatët e Muhamed Veliut, një gazetar i njohur shqiptar për shkrimet e tij nga Londra, pasi Bota Sot më 20 korrik 2005 nën titullin “Një skandal i ambasadës shqiptare në Londër”, shkruan se Veliu është një ndër protagonistët e ngjarjeve të 7 korrikut 2005, ku pas sulmeve terroriste, mbetën të vrarë mbi 70 persona dhe se ai ka pasur lidhje direkte me Mohammed Sadique Khan, udhëheqës i grupit të 4 kamikazëve që përgjakën Londrën.
“Një shqiptar që thotë se është një ndër gazetarët më të njohur të vendit të tij, me emrin Muhamed Veliu, me banim në Londër, i njohur për lidhjet e ngushta me komunitetin islamik të Pakistanit, bëhet një nga personazhet më të fundit të aktit terrorist të shpërthimit në metrotë e kryeqytetit britanik”, shkruan Bota Sot, e cila ka pretenduar se po përkthen një shkrim të paqenë të Daily Mail.
“Miqësia e dy islamikëve nga dy vende të ndryshme nuk do të përbënte ndonjë kuriozitet frymë ndaluese, nëse në historinë e shqiptarit nuk përfshihet edhe ambasada e vendit të vet e kësisoj në këtë tri ller nuk do të gjenim disa personalitete të politikës shqiptare. Muhamed Veliu mësohet të ketë pasur lidhje të ngushta me qeverinë e shtetit të vet, falë simpative të thella për qeverinë socialiste të Fatos Nanos e për disa arsye të lidhjeve të vjetra me policinë shqiptare. Kësisoj ai që në fillim ka qenë i gjithëgjindshëm në ambientet e ambasadës shqiptare të Londrës. Besohet se shqiptari mysliman e ka futur terroristin e ardhshëm pakistanez në ambasadën shqiptare, duke i siguruar një takim intim me ambasadorin e këtij vendi, Kastriot Roshi”, vazhdon trillimi.
Kryeredaktori i Bota Sot, i kontaktuar nga gazeta Express në Prishtinë, ka refuzuar të thotë ndonjë gjë lidhur me padinë që është ngritur ndaj tij dhe botuesit Xhevdet Mazrrekaj.
“Çka po ju intereson juve”, ka thënë shkurt Bucpapaj.
Gjithmonë sipas Bota Sot, terroristi Mohamed Siqikue Khan mund të jetë takuar me ambasadorin shqiptar andej nga shkurti i këtij viti. Gazetari shqiptar, sipas kësaj gazete, i ka premtuar pakistanezit terrorist një takim me ministrin e jashtëm shqiptar, Kastriot Islamin.
Bota Sot thotë se artikulli është botuar në të përditshmen e Londrës Daily Mail dhe është shkruar nga gazetari Janifer Partosh.
Sipas Muh amed Veliut, shpifja shkon më tej kur në artikull thuhet se “vetë gazetari Mohamed Veliu nuk e përgënjeshtron miqësinë e ngushtë me pakistanezin vetëvrasës”, por, sipas tij, “shoqëria e tyre thjesht ka qenë e mbështetur në bindjet e forta islamike për të cilat ai ndihet krenar, e nuk ka të bëjë asgjë me politikën”.
“Kurrë nuk jam kontaktuar nga ndonjë gazetar i Bota Sot në lidhje me këtë çështje.
Çfarë kanë shkruar është një shpifje e ulët, për të cilën Bota Sot do të ketë rastin të japë shpjegime në gjykatën e Londrës”, sqaron Veliu i cili studion në një nga universitet e Londrës për televizion dhe produksion.
“Akuzat ndaj meje janë shumë serioze, dashakeqëse me një qëllim të përcaktuar për të hedhur baltë mbi figurën time si gazetar. Ata të cilët kanë hartuar shkrimin dhe ata të cilët e kanë lejuar publikimin e tij, mendoj se kanë pasur në mendje një skenar të parapërgatitur shumë djallëzor”, është shprehur Muhamed Veliu, gazetari i vetëm shqiptar që ka mundur të punojë si reporter për gjigandët mediatikë televizivë si BBC, ITV, Channel 5, përfshirë edhe një sërë gazetash britanike.
Duke vijuar më tej, ai është shprehur se “të akuzosh dikë për terrorizëm siç jam akuzuar unë, është një akuzë shumë e rëndë, fyese, poshtëruese, shumë shqetësuese që më ka krijuar stres dhe është denigruese për vetë kohën që jetojmë. Pleksja që kanë dashur të më bëjnë me subjekt të tillë si terrorizmi që është një çështje shumë delikate, problematike dhe me pasoja, që tregon shumë qartë se gatuesit e këtij lajmi e kanë zgjedhur atë për të më krijuar probleme dhe telashe sa më të mëdha”.
Për Muhamed Veliun ky proces gjyqësor do të jetë një sfidë përballje me një organ mediatik kosovar, me precedentë shpifj eje në të shkuarën. Ai është i vendosur t’i shkojë deri në fund asaj që ka nisur.
“Më duhet të falënderoj drejtësinë e Britanisë së Madhe, e cila do të gjykojë rastin tim. Padyshim që për mua ky proces ka rëndësi të dyfishtë. Së pari dua t’i tregoj opinionit publik, në veçanti atyre që lexojnë Bota Sot se ajo që është shkruar për mua nuk është e vërtetë dhe së dyti le të shërbejë ky proces si një leksion për drejtuesit e kësaj gazete se në gazetari fjalët janë të shenjta, askush nuk mund të abuzojë me to dhe se duhet të botosh fakte. E nëse shpif, ndëshkohesh”.
Anglia dhe Zvicra kanë nënshkruar një marrëveshje në vitin 1963 për njohjen e ndërsjellë të vendimeve gjyqësore. Çdo aktgjykim i marrë në Zvicër apo Angli detyrimisht përmbarohet në këto vende.
Duke studiuar shkrimin dhe përgjigjen e Daily Mail, avokatët e z. Veliu kanë arritur në përfundimin se kanë të bëjnë me një shpifje të pastër, për të cilën mban përgjegjësi direkte kryeredaktori i saj që ka dhënë OK e botimit dhe si rrjedhim botuesi Mazrrekaj. Sipas ligjit anglez, për të tilla raste pala paditëse i dërgon një letër organit të medias që ka botuar shpifjen për ta zgjidhur problemin mes veti pa e çuar rastin në gjykatë. Pas një sërë letrash dërguar nga avokatët londinezë në adresë të Bota Sot, gjatë gjashtë javëve të fundit ata nuk kanë pranuar të publikojnë në faqet e gazetës një falje publike, ku të pranojnë se artikulli për gazetarin Veliu është një shpifje, njëkohësisht ta dëmshpërblejnë materialisht atë sipas ligjeve angleze.
Kështu avokatëve s’u ka mbetur gjë tjetër veçse t’i drejtohen të hënën gjykatës me aktpadinë e formuluar nga një baristere angleze, e cila do t’i parashtrojë trupit gjykues të gjithë dokumentacionin për shpifje të mirëfilltë ndërmarrë nga Bota Sot.
Gazeta në fjalë mund të paditet në Gjykatën e Lartë angleze pasi, sipas ligjit, nëse një shpifje konsumohet në një gazetë e cila shitet në Britaninë e Madhe siç është edhe Bota Sot, atëherë ajo është përgjegjëse për artikujt e publikuar njësoj sikur ata të jenë botuar në mediat vendase. Kjo klauzolë është përdorur nga avokatët londinezë të kësaj kompanie, e cila ka përfaqësuar në shumë raste VIP-a të ndryshëm botërorë për të cilët është shpifur në mediat angleze.
Procesi i Londrës është më i riu në një katalog të gjatë procesesh gjyqësor të humbura nga Bota Sot për shpifje në gjykatën e Prishtinës këto vitet e fundit, sikurse është gjobitur nga Komisioni i Përkohshëm i Mediave për shkelje të etikës dhe kodit të medias në disa raste. Nëse gjykata londineze do të gjejë fajtore për shpifje gazetën Bota Sot, ajo rrezikon të paguajë një dëmshpërblim dhjetëra mijëra paund.
Postuar më parë nga Brari
Krijoni Kontakt