Statusi i ardhshem i Kosovës!

[vudi]

Të presim edhe pak? Jo, falemnderit!

Shkruar nga Albin Kurti

Gënjeshtra në Kosovë është e vërtetë. Ajo përsëritet me përpikëri. Gënjeshtra në Kosovë nuk është vetëm politike. Ajo është politika. Politikanët aktual janë veçse kontigjencë përbrenda këtij konteksti. Ata janë simptom i kësaj gënjeshtre që ka pllakosur vendin; ata janë shprehje e pavarësisë si sugjestion që i mban të trullosur qytetarët; ata janë fetishizuesit e pavarësisë aq të largët meqë gjithmonë aq të afërt. Nuk copëtohet dot Kosova nëse vazhdimisht nuk përmendet pavarësia. Në pauzat e pavarësisë: misat dhe vipat, futbolli anglez e spanjoll, telenovelat latinoamerikane.

Mirëpo, nuk iu mjafton mashtrimi ynë. Ju duhet vetëmashtrimi ynë. Së pari na konsideruan të gjymtë, të paaftë për të qeverisur e sunduar me veten. Më pas na konsideruan të rrezikshëm edhe për veten tonë – njerëz me prirje për vetëshkatërrim kolektiv. Dhe, së fundi, duan që ne ta përbrendësojmë tërë këtë diskurs racist dhe të përfundojmë duke fajësuar e përçmuar veten tonë, duke e kërkuar vetë ne sundimin e huaj. Nuk iu mjafton mashtrimi ynë. Ju duhet vetëmashtrimi ynë. Politikanët vendas janë veçse mënyra për këtë.

Aq shumë nga ne i kanë bindur që jemi të lirë. Dhe, e kanë futur konkurrencën ndërmjet nesh si mënyrë drejt përparimit. Tash, duke mos qenë të lirë, vetëm sa është përçarë populli e është atomizuar shoqëria. E kanë mbjellur besimin se tashmë jemi çliruar. Dhe, që shteti na qenka suplement, se shteti është luks. Nuk iu mjafton joliria jonë. Ju duhet pajtimi ynë me robërinë. Duan që të mos mendojmë se shteti është nevojë për popullin tonë. Se mu shtetet dhe vetëm shtetet janë sovrane. Se sovraniteti është dëshmi e lirisë dhe garancion për të.

Mbase edhe mund ta festojnë ‘pavarësinë’. Ashtu siç festuan çarmatosjen e UÇK-së. A duhet t’i presim pasojat që të vetëdijësohemi? A duhet të shpresojmë edhe pasi që na kanë zhgënjyer? A duhet t’iu besojmë para se të na gënjejnë sërish?

Serbia i mobilizoi tre milionë e gjysmë serbë. Aprovoi në referendum kushtetutën e saj (formalisht) të re. Legjitimoi planin e saj hegjemonist për Kosovën. Në Kosovë, e njëjta çështje është bllokuar tek pesë a gjashtë veta. Në Kosovë, për të njëjtën çështje, janë bllokuar pesë a gjashtë veta.

Në kushtet kur të është mohuar liria, kur të janë shkelur të drejtat e të është përdhosur dinjiteti, ka vetëm një rrugëdalje. Të ballafaqohesh për këto. Të ballafaqohesh për liri, të drejta e dinjitet. Të ballafaqohesh me dhunuesit e këtyre. Ballafaqimi të kompenson. Ballafaqimi është e vetmja gjë që ta siguron plotninë e qenies. A nuk bëhemi qesharakë atëherë kur aq pak kemi dhe aq shumë brengosemi se çfarë do të humbasim? A nuk bëhemi të neveritshëm atëherë kur i gjithë gëzimi ynë është vetëm ai pas përshtatjes së suksesshme? A nuk bëhemi tragjikë atëherë kur ngushëllohemi duke imagjinuar se si ka mundur të jetë edhe më keq? A nuk bëhemi absurdë atëherë kur pranojmë që pambarimisht të presim vetëm edhe pak?

Padrejtësitë e mëdha dikur ishin më të vogla. Heshtja jonë i ushqeu ato. Politikanët ‘tonë’ hëngrën prej tyre. Ata jo vetëm që kishin qenë lakmiqar të uritur por edhe të pangopshëm. Ata do të kujtohen eventualisht për atë që ishin (ministra, deputetë, negociator vjenez) dhe jo për atë që bënë. Mbi të gjitha, do të kujtohen për atë që nuk e bënë. Shpresa në këta politikanë të bën të pashpresë. Kur hynë në negociata me Serbinë për të ardhmen tonë, dëshmuan se nuk përfaqësojnë vullnetin tonë. Kur lejuan koncesione marramendëse për çështjen e decentralizimit dhe ‘eksterritorialitetit’, dëshmuan se nuk i mbrojnë interesat tona. Kur politikani është batakçi, qytetari duhet të jetë politik. Kur institucionet s’janë demokratike, demonstrata është demokraci. Kosova nuk është e tyre. Kosova është e jona. Ka mbetur edhe ta marrim atë! Festo duke demonstruar. Demonstro për të festuar. 28 nëntori është dita.

[Llapi]

E hënë, 18. Dhjetor, 2006

KUÇI: OBJEKTIV PARËSOR ËSHTË RUAJTJA E UNITETI POLITIK NË KOSOVË



Hajredin Kuçi, nënkryetar i PDK-së


RADIO EVROPA E LIRË
Zoti Kuçi, jemi pothuajse në fund të vitit, i cili është karakterizuar me procesin për përcaktimin e statusit përfundimtar. Si e vlerësoni rrjedhën e deritashme të këtij procesi?

HAJREDIN KUÇI
Fillimi i vitit ndoshta ka qenë një fillim, por duhet ta quajmë në kuptimin e statusit përfundimtar të Kosovës, pozitiv. Gjërat kanë shkuar sipas një dinamike të paraparë, në kuptimin e asaj që evolimi përveç negociatave me faktorin ndërkombëtar, e në këtë kuadër edhe me vetë Serbinë, ka shkuar sipas dinamikës, duke u bartur gjërat në kuptimin e asaj që faktori ndërkombëtar ta shfrytëzojë këtë hapësirë për marrëveshje apo për negociata dhe më tej të jetë në përfundim të një rezolute në Këshillin e Sigurimit. Por duket që muajt e fundit ndoshta ka qenë një pritje më e madhe e qytetarëve të Kosovës, por njëkohësisht ka qenë një premtim edhe i vendorëve edhe i ndërkombëtarëve, për dinamikë më të shpejtë. Nga ana tjetër, tani nga fundi i vitit, duket sikur kemi një status quo- do ta quaja, në kuptimin e statusit përfundimtar të Kosovës, edhe pse ndërkohë duket se po negociohet në nivel më të lartë, pra në vetë Grupin e Kontaktit. Pra mund të them që ky vit është karakterizuar me dinamizëm, por jo edhe me suksesin e pritur.

RADIO EVROPA E LIRË
Zoti Kuçi, ditë më parë opozita ka kërkuar që skena politike të mbetet e bashkuar deri në fund të këtij procesi. A besoni ju në një unitet të mëtejmë?

HAJREDIN KUÇI
Ne kemi bërë të gjitha orvajtjet e mundura po e them, edhe duke qenë nga roli i opozitës dhe dua të përcaktoj këtu se opozita ka qenë opozitë sa i përket shpërndarjes së buxhetit në Kosovë, por jo opozitë sa i përket statusit përfundimtar të Kosovës.
Në kuptimin e kësaj, ne kemi patur dhe kemi tre objektiva kryesore momentale. Objektiva e parë është të ruhet uniteti politik në Kosovë, që Kosova të përcaktohet në një zë. Objektiva e dytë është që ruhet stabiliteti do ta quaja, në kuptimin e situatës së sigurisë dhe objektiva e tretë është një dinamizëm më i shtuar i përfaqësimit politik të Kosovës në arenën ndërkombëtare. Në të tre këto objektiva ne kemi tentuar dhe kemi dhënë maksimumin e duhur. Po u premtojmë përsëri qytetarëve të Kosovës që Partia Demokratike e Kosovës do të jetë unike në kuptimin e qëllimeve politike me gjithë spektrin tjetër politik, do të japë maksimumin e duhur duke dhënë diçka nga vetë partia, nga vetë personalitetet dhe me një fjalë do të pranojmë me vetëdije të zvetënojmë rolin e partisë, me qëllim të ruajtjes së forcës kohezive të unitetit.

RADIO EVROPA E LIRË
Zoti Kuçi, i dërguari i Kombeve të Bashkuara për statusin ,Marti Ahtisari në fund të janarit pritet që të paraqesë propozimin për statusin përfundimtar të Kosovës. Çfarë prisni ju nga pakoja e zotit Ahtisari?

HAJREDIN KUÇI
Ne jemi të orientuar në dy gjëra momentale në kuptimin me faktorin ndërkombëtar: e para është që dinamizmi i procesit të jetë me një kahje të përshpejtuar dhe e dyta që përmbajtja e rezolutës së re, respektivisht i propozimit të zotit Ahtisari, të jetë propozim, i cili nuk do të lejojë dilema për qytetarët e Kosovës, as të tjerët dhe mundësi të interpretimeve të dyanshme në drejtim të saj. Presim që pakoja e zotit Ahtisari të respektojë vullnetin e qytetarëve të Kosovës për shtet sovran dhe të pavarur, të mundësojë realizimin e këtij vullneti dhe të respektojë, apo të krijojë mundësi për respektimin e të drejtave të pakicave në Kosovë. Nëse do t'i arrinte këto dy qëllime propozimi i zotit Ahtisari, mendoj se do ta krijonte një objektiv të mirë, të qartë, dhe objektiv për të cilin qytetarët e Kosovës kanë dhënë shumë.

RADIO EVROPA E LIRË
Flisni për objektivat. Si ekspert i të drejtës ndërkombëtare, bazuar në këtë të drejtë a ekziston ndonjë bazë ligjore, me të cilën pavarësia e Kosovës do të mund të përkrahej nga vendet anëtare të Kombeve të Bashkuara?

HAJREDIN KUÇI
Unë mendoj se Kosova me aktivitetin e vet deri tani, me të drejtën e vet qoftë ligjore qoftë politike, historike, demokratike etj, plotëson të gjitha prerogativat që të jetë një shtet i pavarur dhe sovran. Por momentalisht është rezoluta 1244, e cila duhet të zhbllokohet, po e quaj kështu, në Këshillin e Sigurimit dhe të hapë mundësi që Kosova të ndërtohet si shtet i pavarur dhe sovran. Në kuptimin e saj, me rezolutën e re në OKB Kosovës duhet t'i hapet kjo mundësi, Kosova duhet të realizojë, ndërsa njohja duhet të vijë veç e veç nga secili shtet anëtar i OKB-së. Sa më e avancuar që do të jetë rezoluta, aq më i lehtë do të jetë procesi, apo mund të ndodhë e kundërta. Në kuptimin e asaj që problemi i Kosovës nuk është tash e tutje apo edhe deri më tani, sidomos pas vitit 1999, mbi bazën e të drejtës ndërkombëtare, por është më shumë mbi bazën e forcës dhe vendimeve politike të forcave të mëdha, apo me ndikim në botë. Pra në këtë këndvështrim, asnjë vendim i Këshillit të Sigurimit, i cili nuk e respekton të drejtën e qytetarëve të Kosovës, nuk është në përputhje me të drejtën ndërkombëtare. Çdo vendim i cili respekton të drejtën e qytetarëve, është njëkohësisht demokratik, është në përputhje të plotë me të drejtën ndërkombëtare. Por njëkohësisht ai kërkon vetëm një mbështetje politike do ta quaja, dhe vullnet politik të fuqive të mëdha momentalisht.

RADIO EVROPA E LIRË
Kur mendoni se do të zgjidhet statusi përfundimtar?

HAJREDIN KUÇI
Unë nuk jam idhtar i përcaktimit të datave konkrete, unë jam idhtar i zgjidhjeve të çështjeve që i qëndrojnë kohës, zgjidhjeve të çështjeve që do ta respektojnë vullnetin e qytetarëve të Kosovës. Por besoj se dinamika e gjërave do të jetë më e përshpejtuar nga fundi i janarit, gjatë muajit shkurt, në veçanti gjatë muajit mars. Por këtë dinamikë qytetarët e Kosovës në veçanti, elita politike do ta quaja, duhet ta përcjellë me vëmendje të caktuar, duhet t'i ndërmarrë hapat që kërkohen nga ajo dhe duhet t'i koordinojë këto hapa me faktorët relevantë ndërkombëtarë. E gjithë kjo duhet të përfundojë do ta quaja para qershorit të vitit 2007.

RADIO EVROPA E LIRË
Zoti Kuçi, një ekip i Bashkimit Evropian po përgatit terrenin në Kosovë për praninë e ardhshme ndërkombëtare. Sa ka nevojë Kosova për një prani të tillë pas statusit?

HAJREDIN KUÇI
Duhet ta themi se mandati i të ardhmes së pranisë së Bashkimit Evropian në Kosovë buron nga vetë zoluta e re që do ta nxjerrë në Këshillin e Sigurimit. Është pozitive që Bashkimi Evropian ka shprehur gatishmërinë që në fushën e sigurisë, në fushën e mbrojtjes, të rendit dhe ligjit, por ndoshta edhe në disa fusha të tjera, të marrë anën e vet pozitive. Në anën tjetër mendoj që mosefikasiteti i plotë i institucioneve të Kosovës ka lejuar hapësirë për një ndikim më të madh të faktorëve ndërkombëtarë. Por njëkohësisht prezenca e faktorit ndërkombëtar në të ardhmen, do të jetë si rezultat i dhënies së një garancie për dy gjëra kryesore: respektimin e të drejtave të pakicave dhe njëkohësisht respektimin e implementimit të rezolutës apo të marrëveshjes që do të propozojë zoti Ahtisari. Por logjika e gjërave thotë se elita politike në Kosovë pastaj do të ketë një lloj përgjegjësie, do ta quaja përballë vullnetit të qytarëve të Kosovës, por njëkohësisht, edhe përballë kërkesave që do të vijnë nga bashkësia ndërkombëtare.

RADIO EVROPA E LIRË
Zoti Kuçi, si i vlerësoni zhvillimet e Kuvendit të gjashtë zgjedhor të Lidhjes Demokratike të Kosovës. Si reflektojnë këto zhvillime në skenën politike dhe në institucionet e Kosovës?

HAJREDIN KUÇI
Partia Demokratike e Kosovës ka qenë jashtëzakonisht e kujdesshme në lidhje me zhvillimet e brendshme që kanë ndodhur në Lidhjen Demokratike të Kosovës. Ne kemi qenë vrojtues pasiv, do të thoja të këtyre zhvillimeve, por kjo nuk do të thotë se nuk e kemi analizuar gjendjen dhe nuk e analizojmë tani e më tutje, sidomos sa i përket asaj që ka ndikim në skenën politike në tërësi në Kosovë. Në kuptimin e saj mendoj se në LDK ka ende procese që duhet të zbërthehen. Zbërthimi i këtyre proceseve është në vetë duart e njerëzve të Lidhjes Demokratike të Kosovës. PDK-ja e sheh suksesin e vet në potencialin platformë dhe projektet e veta politike dhe jo mbi bazën e fatkeqësive të të tjerëve. Çdo aktivitet i PDK-së në drejtim të institucioneve të Kosovës nuk është nga rendja për të marrë pushtetin në Kosovë, por mund të jetë nga rendja që të pengojë disa dukuri negative që janë në Kosovë. Dhe kryesisht Partia Demokratike e Kosovës nuk pranon që të luajë lojëra të cilat do t'i ndihmonin njërit apo krahut tjetër në Lidhjen Demokratike të Kosovës. Ne do të bashkëpunojmë me secilën parti politike përfshi dhe LDK-në në mënyrë legale dhe për interesa të përbashkëta por momentalisht duke i trajtuar njëkohësisht këto si oponentë politikë.

Intervistoi Albana Isufi

[AVuniqi]

Mjegulla ishte "mesele", "Marshall plani" edhe zyrtarisht në menynë kosovare

Nuk është për t'u befasuar nëse kryeministri Çeku në prononcimin e ri, Grupin politik e quan Grupi i Kontaktit, ndërsa Grupin e Unitetit-Këshilli i Sigurimit të OKB-së, është patent autokton dhe ashtu do e kemi më lehtë, vetëm duhet angazhuar edhe Behxhet Pacollin që do të pëfaqësonte Rusinë, atëherë do të kompletohej përfundimisht përbërja dhe statusi i Kosovës, do të zgjidhej edhe pa Ahtisarin

Agim Vuniqi, Farmington Hills

KFOR-i hyri në Kosovë, atëherë kur edhe UNMIK-u filloi punën, shumica e kosovarëve nuk kanë menduar që edhe pas shtatë vjetësh nuk do të ketë rrymë, nuk do të ketë punë dhe që gjendja e sigurisë në Kosovë të jetë kështu siç është sot. Zyrtarët ndërkombëtarë mburren se në Kosovë krijuan karrierë diplomatësh duke i paqesuar shqiptarët me dhurata të paçelura, shtatë vjet të shpresës dhe agonisë pavarësiane, duke pritur hapjen e paketës kubike me shumë të panjohura, dhe prap shiqime vjedhurazi se çka përmban ajo. Kosovarët të hipnotizuar nga fjala shumë domethënëse për ta "Pavarësi" i mban qe shtatë vite të vetkënaqur, edhe pse pa punë, në terr, pa ujë, pa pronësi mbi Kosovën. Ende pa u hapur pakoja e Ahtisarit qeveria e Kosovës lëshoj në qarkullim invencionin e ri të ashtuquajturin "plani e Marshallit", është plagjiatur e mirë, Çeku po kopjon kryeministrin shqiptar Berisha, që dikur vallzonte me çekun blanko të amerikanëve, ju votën mua, e unë juve thasët e fryerë me premtime, që janë paketuar në Amerikë, që u vjen era parfumë dollari. Nuk është për t'u befasuar nëse në prononcimin e ri, Grupin politik e quan Grupi i Kontaktit, ndërsa Grupin e Unitetit-Këshilli i Sigurimit të OKB-së, është patent autokton dhe ashtu do e kemi më lehtë, vetëm duhet angazhuar edhe Behxhet Pacollin që do të pëfaqësonte Rusinë, atëherë do të kompletohej përfundimisht përbërja, dhe statusi i Kosovës do të zgjidhej edhe pa Ahtisarin. Kur mundet me pasë Qendra e Pionerëve ekipin e ambasadorëve të vegjël pse nuk mundet edhe qeveria me formuar Këshillin e Sigurimit, bile është detyrë me prioritet.
Drejtuesit e UNMIK-ut, kanë kuptuar mirë se ku është problemi. Fakti se deri më tani, nuk kanë përgjigjje adekuate për statusin, ata vazhdojnë me shtyrje, dhe asnjëherë përgjigja nuk është e prerë, është me domethënje. Natyrisht, kërkesat e tilla duhet të zgjidhen në korridoret e kancelarive të ministrive perëndimore, nga qatipët e diplomatët e rendit të dytë e të tretë, pastaj çështja të kalohet në burokracinë e famshme të Kombeve të Bashkuara, ku shqyrtohet edhe njëherë plotësimi i standardeve para statusit, e pastaj të kthehet në instancat e larta të Këshillit të Sigurimit, ku një çështje relativisht e vogël vehet në listën e gjatë të pikave të pazarllëkut politik të shteteve të fuqishme. Pra niset edhe një proces i ri për të zgjidhur këto probleme. Ndërkohë në Kosovë dhe jasht kryhen edhe një varg takimesh, takohet Haraqia me Kojadinoviqin dhe Çeku me Tadiqin dhe zyrtarët kosovarë thjeshtë deklarohen: nuk ka negociata. Kisha pasë dëshirë ta di se si do të mendonin zyrtarët e UNMIK-ut, po të qeverisej kështu në vendet e tyre, në këtë mënyrë, ata sigurisht që nuk do të ishin më në adresarin e diplomatëve. Çka do të mendonin, si do të silleshin qytetarët e tyre që për të ardhmen e tyre të të debatonte tërë bota, vetëm qytetarët e tyre jo? Por barra e fajit nuk duhet të vëhet krejt mbi qafën e tyre. Nuk ka dyshim se ata janë sinqerisht të shqetësuar për problemet në Kosovë, se ata vërtetë dëshirojnë që ato të zgjidhen në të mirë të të gjithë qytetarëve të Kosovës, por nuk dijnë se si. Për më tepër, dështimi i UNMIK-ut në Kosovë nuk do të ishte edhe dështim i Kombeve të Bashkuara, tash bile e kanë kuptuar se kështu nuk qeveriset Kosova, duhet ndërruar menaxhmenti nga ai i OKB-së, në atë të BE-së, nga pavarësia e OKB-së do të kalohet në pavarësinë evropiane.
Mjegulla mbi Prishtinën dhe Beogradin në prag te ndërrimit të këshëndellave, festës së Bajramit dhe ndërrimit të motmoteve, "pahiri" në sallën e VIP personave "detyrojë" të takohen kryetarin serb Tadiqin dhe kryeministrin shqiptaro-kosovar Çekun. Nuk u kuptua qartë domethënja e shtërngimit të duarëve, por sidoqoftë biseda e tyre ishte jo formale, ata bisedonin per reçetat e ndryshme të menysë serbe dhe të asaj shqiptaro-kosovare me "salt" që i skadon përdorimi (duhet ndërruar kodin 1244), vitin e ardhshëm. Çeku me shumë përzemërsi ia shterngoi dorën kryetarit serb, duke shprehur habi se si serbët nuk e kanë ndërruar akoma reçeten e "pasulit të Leskocit", që dikur ishte pjesë e territorit të banuar me shqiptarë, ndërsa tash është zemra e serbizmit-shumë "zemra" territoriale kishte paur Serbia, bre. Nga Tadiqi fatkeqesisht nuk u pyet Çeku për tavën e Elbasanit, por për per muzikën "tallava", që nuk ka identitet shqiptar, nuk bëri pyetje as per tavën gjakovare të gatitur me shumë egersi nga gjahtarët gjenocidal të Serbisë, që edhe tash kur serbët hynë nën ombrellen e partneritetit për paqe me ndihmën e grupit të unitetit, i cili ua mundësojë Serbisë heqjen e tiketit "kujdes- e ndaluar", e cila le qe nuk kërkojë asnjëherë falje për gjenocidin e ushtrisë serbe, por pa kryer reformat e domosodoshme dhe pa dorëzuer kriminelin Mlladiq, u shpërblya per kooperim që traguan gjetë bisedimeve me palën shqiptare, duke bërë copë-copë territorin e Kosovës, të cilin e kishin ruajtur me kokëfortësi komunistët shqiptarë. Grupi gjithëpërfshirës i unitetit u tregua zemërgjërë me decentralizimin, ngase kishin kokëdhimbje, me qeverisje në tërë territorin. Për t’i mos mbetur hatri ushtarakut-kryeministër u kujdes guximshëm moderatori i “hot line”, ministri Haraqia që u takua me bukëpjekësin serb Dragan Kojadinoviq (ai ka në pronësi një furrë në Beograd), temë e bisedimeve ishte bureku me hitha, duke u pajtuar përfundimisht që të gatitet brumi i përbashkët shqiptaro-serb, me miell të Vojvodinës. Kuvendaret e Kuvendit të VI të LDK-së, që zgjodhën këshillin e përgjithshëm, definitivisht realizuan premtimin e zgjedhjes së anëtarëve të kryesisë. Dy kandidatët që u përqafuan në raundin e parë të meçit shumë interesant tash kanë filluar të komunikojnë në mes veti përmes mediumeve të informimit. Daci ishte shumë skofiar duke ia përgatiur Sejdiut edhe dhuratën për vit të ri, mjegullën autoktone. Ndërsa, Sejdiu u tregua i kujdesshëm me dhurata, ai ua ndau tiketat "VIP", duke zgjedhur kryesinë e re të LDK-së, dhe siç pritej ai shpërbleu si më meritorin për reçetë lojale kulinarin e zellshëm Kryeziun, nënkryetar të parë, duke i larguar kështu "të rebeluarit". Mjegulla ishte “mesele”, ishte “sebep” që garuesit e LDK-së po angazhohen denjësisht të përfshihen në sofrën e kryesisë, ata nuk diskutuan fare për fenomenin e ndarjes se territorit te Kosovës në ate serb dhe në atë shqiptaro-kosovar, ata kishin detyra më të rëndësishme atë të përfshirjes në këshill të përgjithshëm, dhe në ndarjen e kusureve që u kanë mbetur nga komunat shqiptaro-kosovare. Nuk debatuan, por as që u interesuan te informohen per pakon e Ahtisarit, ngase ishin plotësisht të bindur se dëshirat mund t'i realizojnë shumë më lehtë me anë të "full-kontaktit", edhe pse aty ishin prezent kryetari i Kosovës së kornizuar por edhe kori ministror. Le që nuk ishin të kujdesshëm për institucionalistët e zgjedhur nga vetë partia ne kohën e të ndjerit Dr. Rugova, por ata mësyenin ne emër të tij.

[Llapi]

KA MENDOJNË POLITIKANËT KOSOVARË SE PËRMBAN PAKOJA E AHTISAARIT
Nga Vedat Vllasaliu
Dec 21, 2006, 15:22



Duke parë se si politika kosovare vetëm u shkon proceseve nga prapa, në bisht, pa pasur ndonjë analizë që u paraprinë dhe pa përgatitur politika e mekanizma që do u shërbejnë në rastin e duhur, konstruktuam një pyetje të përgjithshme për disa nga personalitetet politike kosovare, për të kuptuar qëndrimin e tyre por edhe parapërgatitjet e tyre ndaj momentit të hapjes së Pakos së Ahtisaarit Babadimër.

Çka nëse propozimi i zotit Ahtisaari nuk përmbush parashikimet e palës kosovare? – ishte pyetja që konstruktuam.

A ekziston ndonjë plan?

A e di politika kosovare se si duhet proçeduar apo, do mbetet e habitur si me rastin e shtyerjes së adresimit të statusit?

Optimizmi që u shfaq në përgjegje më shumë dukej si ikje, dekor për boshllëkun dhe zëvendësim për qëndrimin dhe planin që mungon. – Politikanët kosovarë nuk dinë se çka duhet bërë e si duhet vepruar nëse propozimi nuk përmbush parashikimet. Nuk kanë plan. Por, ata janë optimistë!









Ahmet Isufi:

“Dokumenti do të jetë pozitiv”



Dokumenti i Ahtisaarit do të përmbajë të gjitha zhvillimet që janë në Kosovë dhe do të jetë si dokument përmbledhës i pushtetit të Kosovës, të institucioneve të Kosovës dhe po ashtu edhe i bashkësisë ndërkombëtare. Është një dokument i cili paraqet figurën e plotë për Kosovën dhe në bazë të këtij dokumenti, Këshilli i Sigurimit do të vendosë me një rezolutë për Kosovën...

Unë besoj që më shumë do të jetë vlerësim pozitiv për të gjitha zhvillimet në Kosovë gjatë këtyre viteve. Një përmbledhje e tërë zhvillimeve ekonomike, politike dhe të gjitha angazhimeve që kanë qenë gjatë këtyre viteve në Kosovë. Ndërsa, në bazë të këtij dokumenti dhe vlerësimeve të tij do të dalë propozimi për vendosjen e statusit të Kosovës dhe ky status ne besojmë se do të jetë pavarësia e Kosovës.



Java: A mendoni se qeveria aktuale mund ta implementojë statusin e Kosovës?



Të gjitha institucionet e Kosovës janë institucione të cilat janë ngritur në bazë të votës së qytetarëve dhe validitetit që ekziston në Kosovë. Të përkrahur nga bashkësia ndërkombëtare ne konsiderojmë se do të jetë një vlerësim real i pozitës së Kosovës dhe në bazë të këtij vlerësimi do të jetë edhe pozicioni i Kosovës që ne mendojmë se do të jetë shtet i pavarur dhe sovran.



Java: Nëse vlerësimi i Ahtissarit nuk do të përkojë me afritë e delegacionit kosovar, çka do të bëni atëherë, pasi pala kosovare ka deklaruar se nuk do të ketë më negociata? A ekziston farë plani për këtë?



Vlerësimi do të jetë pozitiv, por me elemente të cilat normalisht bazohen edhe në të drejtat e minoriteteve dhe mund të ketë edhe vërejtje në disa elemente, të cilat ndikojnë në pozicionin e Kosovës. Megjithatë, konsiderojmë se nuk do të merren parasysh ato që janë interesa të jashtme, por do të merren parasysh më shumë interesat, të cilat janë investim i bashkësisë ndërkombëtare në Kosovë dhe i vendorëve. Duke marrë parasysh gjithë këtë pozitë të Kosovës, atëherë kemi të bëjmë me një rezultat pozitiv, i cili do të jetë si pasqyrë në Këshillin e Sigurimit - për një fazë që të vendoset për statusin e Kosovës. Statusi i Kosovës do të bëhet në bazë të pozitës së Kosovës, ekonomisë së saj dhe në përgjithësi duke u bazuar edhe në interesat e bashkësisë ndërkombëtare - që mendojmë se do të jenë në rrugën e vlerësimit të deritashëm pozitiv për Kosovën.



Java: Ju besoni se vlerësimi, në tërësi, do të jetë pozitiv dhe nuk do të përmbajë kundërshti ndaj atyre pikave, të cilat edhe janë pranuar nga pala kosovare?



Unë thashë, mund të jetë ndonjë element, i cili nuk do të jetë shumë i favorshëm për ne. Por, si tërësi, ne besojmë se është një dokument i punuar në bazë të vlerësimeve edhe të vendorëve edhe të ndërkombëtarëve dhe do të dalë pozitiv.









Eqrem Kryeziu:

“Nuk ma merr mendja se do ketë largim nga pikat e pajtuara”



Unë ende nuk e kam parë paketën e Ahtisaarit. Mirëpo, parimet kryesore mbi të cilat mbështetet ai propozim tashmë janë publike.



Java: Ju besoni se në paketën e Ahtisaarit nuk do të këtë largim nga pikat, me të cilat është pajtuar pala kosovare, por jo edhe ajo serbe?



Jo, nuk ma merr mendja se do të ketë ndonjë largim nga ato pika, sepse vizioni i kryenegociatorit Ahtisaari bazohet mbi disa parime, qofshin ato edhe ma demokratiket në botë. Nëse do të futet ndonjë propozim i huaj, më ajo nuk do të jetë paketë.



Java: Mendoni se as Rusia nuk mund të ndikojë në paketën e Ahtisaarit?



Jo s’ma merr mendja. Unë ia di për nder edhe si qytetar Çekut se si ka gjetur gatishmërinë për të shkuar edhe në atë vend dhe për t’ua sqaruar pozicionin e Kosovës dhe besoj se këtë gatishmëri duhet ta gjejnë jo vetëm kosovarët por edhe të bashkësisë ndërkombëtare.



Java: Nëse mund të ketë ndikim presioni i Rusisë në paketën e Ahtisaarit dhe propozimi i tij lëviz nga pikat me të cilat është pajtuar pala kosovare, çfarë mund të ndodhë?



Si do të reagojë grupi negociues nuk e di, por reagimi më normal në këto raste do të ishte që edhe në të gjejmë ndonjë Rusi tjetër.









Lutfi Haziri:
”Dokumenti do të definojë pavarësinë e Kosovës”





Unë besoj që pakoja e Ahtisaarit do të përfshijë propozimin e tij për të ardhmen e Kosovës, e cila do të definojë absolutisht rrugën e vetme për pavarësinë e Kosovës dhe aneks dokumenti, i cili do të përfshijë pjesën e bisedave teknike, që janë zhvilluar në Vjenë e që lidhet me decentralizimin, trashëgiminë kulturore, të drejtat e komuniteteve etnike dhe për çështjet ekonomike dhe të sukcesionit. Në këtë pjesë, qëndrimi i Kosovës do të jetë i përfaqësuar në dokument ashtu siç është biseduar dhe ashtu siç jemi përafruar.



Java: Ju besoni se edhe përkundër lëvizjeve të fundit të Rusisë dhe deklarimit të saj kundër pavarësisë së Kosovës, megjithatë vlerësimi i Ahtisaarit do të jetë pozitiv dhe do të përfshijë ato pika me të cilat jeni pajtuar gjatë bisedimeve në Vjenë?



Vetëm ajo pjesë që ne jemi përafruar do të jetë e qëndrueshme dhe e pranueshme, sepse ne nuk besojmë se do të ketë farë ndryshimi edhe me gjithë ndërhyrjet e Rusisë.



Java: Hipotetikisht, nëse vlerësimi i Ahtisaarit do të jetë më i zbehtë në krahasim me atë që ju jeni përafruar në Vjenë, e pala kosovare është shprehur që nuk do të zhvillojë më negociata, si do të reagoni?



Nuk është çështje e palës kosovare, por Ahtisaari është ai që është shprehur se negociata më nuk do të ketë.



Java: Nëse përfundimi nuk do të jetë i përafërt apo ai për të cilin edhe jeni përafruar ju si palë negociuse kosovare, çka do të bëhet atëherë? A ekziston ndonjë plan? Si do të reagoni më tutje?



Unë besoj që kredibiliteti i tij dhe i bisedave nuk do të lejojë që të ketë lëshime të tilla. Dhe, atje nuk ka me hipotetizëm dhe paragjykime, aty vendoset në bazë të një procesi dhe rregullave që janë përcaktuar në fillim. Ato rregulla nuk ndryshohen brenda natës.



Java: Para disa dite, Ruecker (Ryker) ka thënë se komunat serbe do të kenë një autonomi më të lartë. Çka nënkupton kjo?



Jo, absolutisht. E keni lexuar gabimisht dhe po dëshironi t’i jipni prapë paragjykime kësaj çështjeje. Zoti Ryecker e ka thënë që komunat e Kosovës do të kenë përgjegjësi dhe kompetenca më të mëdha, më të qartësuara, të cilat do të ushtrohen nga autoritetet lokale.



Java: Ju besoni se vlerësimi, në tërësi, do të jetë pozitiv dhe nuk do të përmbajë kundërshti ndaj atyre pikave, të cilat edhe janë pranuar nga pala kosovare?



Absolutisht. Unë besoj se do të jetë shumë i përafërt me qëndrimet tona, sepse delegacioni i Serbisë ka qenë shumë larg, jokooperues dhe ata e shohin krejt zgjidhjen në bazë të kritereve dhe parimeve krejt të kundërta me atë që e kemi propozuar dhe atë që e ka propozuar Grupi i Kontaktit - parimeve mbi çështjen e statusit.



Java: Besoni se përfundimi do të jetë Pavarësia?



Pavarësi - me obligime ndërkombëtare ndaj grupeve etnike.



Java: A mund ta implementojë këtë status qeveria aktuale?



Absolutisht. Implementimi do të bëhet nga institucionet e shtetit të Kosovës, me ndihmën e Zyrës Ndërkombëtare në Prishtinë.











Hajredin Kuçi:

“Propozimi i zotëri Ahtisaari do të jetë në përputhje me vullnetin e qytetarëve të Kosovës”



Mendoj që propozimi i zotëri Ahtisaari do të jetë në përputhje me vullnetin e qytetarëve të Kosovës. Gjithsesi ai do ta pohojë të drejtën për realizimin e këtij vullneti dhe do të jetë një propozim që nuk doo të krijojë dilema tek qytetari i Kosovës dhe as mundësi për interpretime të ndryshme nga pala kosovare apo pala tjetër. Do të jetë e qartë se këtu nuk ka humbur askush, por qytetarët e Kosovës kanë fituar të drejtën e vet. Sa i përket implementimit, kjo do të jetë një obligim i qytetarit të Kosovës, institucioneve të saj dhe njëkohësiht edhe i bashkësisë ndërkombëtare. Problemi i implementimit është në interpretimin dhe nëse zgjidhja është pa dilema dhe njeh vullnetin e qytetarëve atëherë qytetarët do të jenë bashkarisht me politikën dhe do ta implementojnë pa problem.



Java: Ju besoni se vlerësimi në tërësi do të jetë pozitiv nga ana e Ahtisaarit edhe përkundër deklarimeve të fundit të Rusisë kundwr pavarwsisw?



Gjithsesi se duhet ta kemi parasysh dhe presionin e tyre - do ta zbehë pak, por unë besoj se nuk do ta prekë Sovranitetin e Kosovës dhe mbi bazën e saj unë mendoj që Rezoluta e re sa më shpejt që ngrihet dhe pa dilema në përputhje me vullnetin ajo krijon mundësi të respektohet nga qytetarët e Kosovës dhe bashkësia ndërkombëtare të bëjë zgjidhje të drejtë dhe procesi të ecë më shpejt. E kundërta e saj mund ta ngadalësojë procesin por jo ta ndalë procesin e pavarësimit të Kosovës



Java: Nëse vlerësimi i Ahtisaarit nuk do të përkojë me afritë e delegacionit tonë, çka do të bëhet atëherë? A ekziston far plani për këtë?



Në Kosovë as elita politike askush nga qytetarët nuk ka të drejtë të pranojë diçka nën Pavarësinë e Kosovës. Mund të ketë zgjidhje të imponuara, por ato zgjidhje do të krijojnë një veprim ta quajmë një status kuo të re dhe gjithsesi një angazhim permanent të faktorit politik të Kosovës dhe qytetarit të Kosovës për realizimin e pavarësisë së Kosovës.







© by Gazetajava.com

[AVuniqi]

Ali hoxha, hoxhë Alia

Pavarësi..., me kushte, pa kushte, me flamuj me hymn, me karrigë në OKB, me sovran tjetër të deleguar nga BE-ja, jo nga OKB..."Ali hoxha, hoxhë Alia", përpak të harroj edhe shumë ëmbëlsime tjera autoktone lesh me fije sheqeri, sheqer-lesh

Agim Vuniqi, Farmington Hills

Shumica i duan festat, shumë festa.., unë jo aq shumë, e di unë pse-hin.
Tension i njëjtë përvjet, një garë kolektive që kulminon me shumë premtime; pavarësia nuk do të shtyhet...Sivjet, jo se jo, por vitin tjetër gjithsesi...? Babadimrin finlandez e kishte kapur klimaksi sivjet, nuk kishte pasur rrymë të mjaftueshme me gatitë çajat me hitha, që ia kishin preferuar mjekët popullor-barishtarë. Nuk ka ndonjë arsye të përmendet..., fundi i këtij viti kalendarik, ashtu si ndërrimi i motit nga meterorologu, festohen rrenët me një stres të ethshëm, edhe një komplot i cirkut ndërkombëtarë "gripi i pavarësisë", shyqyr që s'po hamë pula. Edhe ky vit s'është gjë tjetër, ndonëse s’shënojmë veçse një vit më shumë, e unë që plakem për një vjet. Për atë them Gëzuar edhe juve, kalamaj!, Se unë për vete se kam njet të ngutem.

E pra, kush ngutet...., hangët sheqer-lesh, se e kisha në qejf sa herë që vinte ndonjë cirk ndërkombëtar. Por që vjen dita kështu, që të ushqehemi kaq shpesh me këto topa leshi-fije të holla të sheqerit nuk më ka shkuar mendja, sigurisht kjo ka ndodhur pasi që ndërkombëtarët i kemi këtu, sheqer-lesh lara-lara, dhe duam t'u hyjmë në hatër me shumë atrakcione autoktone.


Ajo që i duhet kësaj gare festash është..., jo vetëm fjalët e ëmbëla të "hyçmetlinjëve", që janë pelim si tabletat e përditshme që duhet t'i blej pensionisti me 40 euro, me ligjin që është në fuqi, ende. Tash pra kupto sa të ëmbla janë festat për ta, dhe them lirisht se këtyre, sa herë që mbahen garat zgjedhore u japin sheqer-lesh, me u ëmbëlsuar bile me diçka. Ai që do të zgjedh artin e gatitjes së leshit-sheqer, do të ndërton biznes rentabil në t'ardhmen, si vepritari do t'i shënohet në formularët e MSHPK, gjatë fazës eksperimentale të regjistrimit të popullatës në Kosovë: leshpunues i sheqerit-shumë fije të sheqerit në lëmsh... Art pour l’art, do të thoshte Apolineri.

Shumë e preferoj biznesin në vek, më duket më origjinal disi, dhe përkon me art artizanati, dhe kështu dua të kontriboj me këtë propozim, për të ngritë tatpjet treguesin në diagramin e punësimit, po-po, sheqer-lesh në vek. Por, është vështirë se "hyçmetlijtë" kanë ngreh frerin e dorës, nuk po kanë kuorum me i gatitë shpejt ligjet, besa është punë e vështirë, duhet me marrë pjesë në mbledhje me ngreh gishtërinjtë tatpjetë. I ngrehën apo jo ata paguhen për atë. U lodha, shumë mend "po shtjerri", do të ndalem pak nga mendimet patriotike, do ta pi një kapuçino, me shumë shkumë, por kur po fryhet shumë po merr formën e lëmshit, është e natyrshme, kah po sillem po më paraftyrohet sheqer-leshi. Sa rekorde idiotike do të thej këtë vjet, a do ta kem kështu përvjet? Kush bëhet më i/e lumtur pse merr një rrogë në vek prej meje, a pse jo, jap dhurata një herë në vit, jo këtë vit-vitin e ardhshëm, se sivjet s’kam gjetur kohë, mundësi e vullnet për të ndejtur, bër plane dhe prognozuar, 365 ditë me radhë?

Njësoj edhe politikanët tanë. Veç bëni seri, ju lutem, përmbushje premtimesh, tejkalim qindpërqind i planeve, shumë projekte të "realizuara", mesazhet e tyre për kremta, patjetër, si dezert pavarësia në bredh. Ato janë ”kartolinat” e tyre për tagërpaguesit, se për serbët që s'paguajnë gjë, atyre do t'u ndahet tokë shoqërore për kthim e ndërtim, për këmbim Serbia do të dërgon mdonjë kontigjent kufomash, mirë të paketuara. S’kanë filluar ende, por do të vijnë, ju premtoj. Jam qindpërqind i sigurtë, krejt një si vitin e kaluar. Rrymë, ujë, bukë dhe ndonjë cirk ndërkombëtarë për popullsinë: Kremta suksesesh…, shumë festa këtë vit kombi shqiptar… Le të shtyhen nga ndërkombëtarët për vitin e ardhshëm… Pavarësi..., me kushte pa kushte, me flamuj me hymn, me karrigë në OKB, me sovran tjetër të deleguar nga BE-ja, jo nga OKB.."Ali Hoxha, Hoxhë Alia", përpak të harroj edhe shumë ëmbëlsime tjera autoktone lesh me fije sheqeri, sheqer-lesh.

E ç’rol lozkan urimet e fundvitit të një politikani – shpesh më duken "ashik-dylberë" – s’e çajnë bythën për asgjë. Jo..! Nuk është ashtu, për ta flitet 365 ditë me radhë!?

[ARIANI_TB]

http://video.google.ca/videoplay?doc...84799&q=kosova

Shiqojeni kete video. Ne kete video ta da shihni ngjarjet gjate luftes ne Kosove.

[Llapi]

Strategjia amerikane për Kosovën dhe Ballkanin në Evropën e bashkuar
Megjithëse qëndrimi zyrtar amerikan c’prej fillimit të negociatave ka qenë që ‘të mos flitet hapur për pavarësinë’ më se njëherë nga zyrtarët më të lartë është qartësuar se ‘negociatat kanë për qëllim pavarësinë e Kosovës, e cila bashkë me shtetet e tjera sovrane të Ballkanit e kanë vendin dhe duhet të bëhen anëtare të Bashkimit Evropian dhe të NATO-së’.
New York, 31 dhjetor.- Cilidoqoftë statusi i Kosovës, në një afat të ri kalimtar në rrugën drejtë sovranitetit bashkësia ndërkombëtare do të vazhdojë të jetë e pranishme si në në sigurinë e territorit me ushtarët e Nato-s, ashtu edhe në sektorin civil si mbikëqyrëse, këshilldhënëse dhe korrigjuese në disa segmentë të ndjeshëm të pushtetit. Tashmë është një e vërtetë e pranuar se deklarimi për statusin e Kosovës do të dalë nga selia e Kombeve të Bashkuara, mirëpo do t'u lihet shteteve individualisht të vendosin për njohjen e subjektivitetit të saj. Ajo që tani pranohet botërisht është se populli i Kosovës e ka të drejtën ligjore për vetëvendosje dhe Kombet e Bashkuara duhet t’ia njohin këtë të drejtë në përputhje me parimet që tashmë janë mbarështruar nga Grupi i Kontaktit. Elementët që do të zënë vend si përbërës të statusit përfundimtar në raportin e kryemegociatorit Martti Ahtisaari pritet t’i dorëzohen nga fundi i janarit Prishtinës dhe Beogradit. Megjithatë, është thënë disa herë se Këshilli i Sigurimit i Kombeve të Bashkuara nuk mund të përcaktojë sovranitetin e shtetit, e këtë nuk do ta bëj as Ahtisaari, mirëpo atë mund dhe do ta përcaktojnë shtetet e tjera sovrane anëtare të Asamblesë 192 anëtarëshe të Kombeve të Bashkuara në kontaktet bilaterale me Kosovën. Dhe pikërisht këto konakte bilaterale përbëjnë edhe një nga sfidat më të mëdha që do të kenë qeveritarët e Kosovës në vitin e mbarë 2007. Ndonëse qëndrimi zyrtar amerikan c’prej fillimit të negociatave ka qenë që të mos flitet hapur për pavarësinë, më se njëherë nga zyrtarët më të lartë është qartësuar se ‘negociatat kanë për qëllim pavarësinë e Kosovës, e cila bashkë me shtetet e tjera sovrane të Ballkanit e kanë vendin dhe duhet të bëhen anëtare të Bashkimit Evropian dhe të NATO-së’. Definimi i statusit të Kosovës dhe të Malit të Zi nga zyrtarët amerikanë është quajtur si një pjesë rrumbullaksuese e projektit më të madh demokratik evropian që nga përfundimi i Luftës së ftohtë. Dhe ka qenë strategji amerikane prej 50 vjetësh që Evropa të jetë një dhe në paqe. /s.gashi/
mbrapa 31 dhjetor 2006 - 12:13:24

[Llapi]

Senatori amerikan, Biden: Duhet të ndalen kundërshtarët e Kosovës së re

Ora 13:35
Nga E.M


WASHINGTON (3 Janar) -Senatori demokrat amerikan, Jozef Biden shprehet permes nje shkrimi te botuar ne te perditshemen britanike, “The Financial Times" se duhet te ndalen kundershtaret e Kosoves se re. Biden, i cili në Kongresin e ri do të jetë kryetar i Komisionit të Senatit për Marrëdhënie me jashtë, thekson se po afrohet momenti për percaktimin e statusit. Senatori i cili parashikoet të jetë edhe njëri ndër kandidatët për president të ardhshëm të Amerikës, kritikon udhëheqjen serbe duke thënë se ajo po zhvillon një luftë kundër pavarësisë së Kosovës në mënyrë që të shmangë vëmendjen e publikut nga dështimet e veta. (rtk/Balkanweb)

[ELDORADO]

ku ka mo vend kjo pytje zgjidhja eshte vec nji pavaresi te plote dhe ia uroj gjithe shqiptareve kosovar me gjithe zemer

[ARIANI_TB]

Dy redaktorët e gazetës së njohur vjeneze “Die Presse” Viland Shnajder dhe Norbert Rif në numrin e sotëm të kësaj gazete botojnë artikullin “Kosova në rrugën e shtetit të mëvetësishëm”. Konstatimin e tyre ata e mbështesin në burime diplomatike që ka gazeta “Die Presse”.
Autorët, në artikullin ekskluziv që botohet sot, thonë se dje - nga burimet diplomatike ndërkombëtare kanë marrë vesh se presidenti Ahtisari në dokumentin vendimtar për Kosovën ka propozuar pavarësi të mbikëqyrur. Por, autorët thonë se Moska po përpiqet ta frenojë procesin. Momenti vendimtar po afrohet. Në fillim të muajit shkurt të dërguarit e posaçëm të OKB-së Martti Ahtisari dhe Albert Rohan do të udhëtojnë në Beograd dhe në Prishtinë për të hedhur mbi tavolinë dokumentin gjithpërfshirës pë të ardhmen e Kosovës. Ndonëse ende po diskutohen detajet, një gjë tashmë është e qartë: Ahtisari në dokumentin e tij ka propozuar pavarësi të mbikqyrur për Kosovën. Këtë fakt gazeta vjeneze “Die Presse” ia ka arritur ta mësojë të mërkurën - siç thonë autorët e artikullit, nga qarqe diplomatike plotësisht të besueshme në Vjenë. Dy autorët e artikullit të gazetës që mban titullin “Kosova në rrugën e shtetit të mvetësishëm”, VILAND SHNAJDER DHE NORBERT RIF janë të njohur për lidhje të forta me qarqet diplomtike, posaçërisht me zëvendës kryenegociatorin Albert Rohan. Sipas autorëve të artikullit Serbia me ndihmën e Moskës, po lufton me gjithë fuqinë që ka kundër pavarësisë së Kosovës. Vëzhguesit e paanshëm menojnë se Moska mund te ndikoje që e ardhmja e Kosovës të mos qartësohet plotësisht. Mirëpo, janë pikërisht shtetet e BE të cilat po kërkojnë me ngulm që statusi i Kosovës të sqarohet. “BE do ta drejtojë misionin e ri ndërkombëtar në Kosovë dhe këtë do ta bëjë vetëm nëse krijohen rrethana plotësisht të qartë për të ardhmen e Kosovës” i ka thënë diplomati perëndimor gazetës vjeneze “Die Presse”. Sipas të njëjtit, shtylla kryesore e dokumentit të Ahtisarit mbështetet në konditat për mbrojtjen e minoritetit serb në Kosovë. Kjo ka rezultuar edhe nga bisedimet e Vjenës mes serbëve dhe shqiptarëve. Në këtë kuadër përcaktohen edhe kompetencat e misionit vëzhgues ndërkombëtar të BE që do ta mbikqyrë realizimin në praktikë të planit Ahtisari. Misioni ndërkombëtar do të vëzhgojë parapa supeve institucionet e Kosovës se në çmasë po zbatojnë kushtete e përcaktuara me dokumentin e pavarësisë. Die Presse ka marrë vesh se me 26. Janar Ahtisari dhe Rohan do ta diskutojnë edhe një herë dokumentin e përpiluar prej tyre me vendet e Grupit të Konstaktit. Një ditë më vonë, me 27 janar dokumentin për statusin e Kosovës Ahtisari do t’ia dorëzojnë në tavolinë Sekretarit të Përgjithshëm të OKB-së në Nju Jork. Pas kësaj në fillim të shkurtit dokumenti do tu dorëzohet të dy palëve, asaj serbe dhe shqiptare, ndërkaq statusi i propozuar për Kosovën është planifikuar që ta marrë bekimin në Këshillin e Sigurimit në muajin mars. Në këtë rast e papritura mund të ndodhë nga Rusia. Rrreth qëndrimt rus gazeta vjeneze “Die Presse” ka pyetur sekretarin amerikan të shtetit për Evropë Dan Fried. Frid ka thënë se “Rusia çështjen e zgjidhjes së Kosovës e sheh në interes të stabilitetit balkanik”. “SHBA-të janë të përgatitura edhe për një version tjetër nëse zgjidhja nuk merrë rrugë në KS” i ka thënë gazetës vieneze një diplomat i lartë i Departamentit amerikan të shtetit. Sidoqoftë, ai nuk i ka treguar konkretisht gazetës se cili është plani tjetër, pasi sipas tij, çështja ende është e hapur.


04 2007 - 10:31:26