Lothar Matheus pritet me kritika në Brazil

[Davius]

Një pjesë e medias vendëse shprehet skeptike për aftësitë e gjermanit si trajner 16-01-2006

Lothar Matheus pritet me kritika në Brazil

Puna e tij në Brazil do të fillojë në shkurt, por që tani kanë ardhur kritikat e para në adresë të Lotar Mateusit, nga ana e mediave dhe gazetarëve vendës. Edhe pse ish trajneri i Hungarisë nuk e ka filluar ende punën, angazhimi i tij te klubi i Paranaenses është pritur me kritika.

"Si lojtar, ai ishte i shkëlqyer. Si trajner është një zero. Mua s'ma ka mbushur asnjëherë mendjen," - është shprehur gazetari i njohur sportiv, Paulo Klement, në televizionin "SportTV".

Kolegët e tij në tryezën e diskutimeve, gjatë emisionit në fjalë, kanë diskutuar se angazhimi i gjermanit ishte të paktën një gjë e favorshme në aspektin e marketingut.

Sipas tyre, skuadra e re e Mateusit, Atletiko Paraneanse, ka kërkuar të bëhet e famshme në arenën ndërkombëtare dhe për këtë ka bërë edhe një lëvizje të tillë. Nga ana e tij, Mateusi, pas pranimit të punës së re dhe nënshkrimit të një kontrate 1 vjeçare, ashtu siç ka konfirmuar edhe vetë gjermani, ishte shprehur se në fillim kishte pasur frikë për të pranuar një detyrë të tillë.

"Të shkosh në një tokë të panjohur, në një vend të panjohur, ku nuk ka shkelur më parë një gjerman, por besoj se as ndonjë europian, sigurisht që në fillim e merr me hezitim. Por kur pashë mikpritjen dhe entuziazmin e njerëzve atje, mendova se ishte vërtet një gjë që ia vlente," - kishte deklaruar Mateusi pas marrjes së detyrës së re.

Skuadra e re e Mateusit është ngjitur në kategorinë e parë në vitin 1995, ndërkohë që në vitin 2001 arriti madje të shpallej edhe kampione e Brazilit. Edhe një gazetë lokale është shprehur skeptike për aftësitë e 44 vjeçari, që edhe pse e mori në duar Hungarinë, me misionin për ta shndërruar dhe kualifikuar për në Botërorin e Gjermanisë, nuk arriti të bëjë dot asgjë. Duke iu referuar edhe luftës së pushtetit në Federatën Hungareze, të shpërthyer për shkak të Mateusit, kjo gazetë shkruan se tekniku gjerman nuk di gjë tjetër veçse të shkaktojë polemika në çdo vend ku shkon.

Por ndryshe nga një pjesë e medias apo gazetarëve vendës, tifozët e klubit të ri të Mateusit kanë qenë shumë të kënaqur dhe entuziastë për angazhimin e teknikut gjerman. Në faqen zyrtare të klubit në internet kanë vërshuar menjëherë shumë mesazhe vlerësuese, menjëherë sapo u bë publike marrja e Mateusit.

Gjermani zgjodhi të zbarkonte në Brazil, për shkak se me kombëtaren hungareze nuk kishte më asnjë kontratë të vlefshme që prej fillimit të këtij viti. Përpara zyrtarizimit të punës së Mateusit me klubin brazilian, disa zyrtarë të Federatës Hungareze pretendonin se gjermani "kishte një kontratë të nënshkruar deri në vitin 2007." Por sipas Mateusit, "një gjë e tillë nuk është aspak e vërtetë."