Fushata e zgjedhjeve lokale ne Kosove

[Ari-Intimidator]

SHTIME, 14 tetor - Drejtuesit e degës së Lidhjes Demokratike të Kosovës në Shtime i premtuan sot elektoratit se do të angazhohen për krijimin e një pushteti komunal të mirëfilltë, mbështetur në vlerat më të larta profesionale e njerëzore. Kështu thanë sot përsaqësuesit e kësaj partie në tubimin e sotëm elektoral. Programi i degës së Lidhjes Demokratike në Shtime për periudhën katëvjeçare, sipas drejtuesve të saj, është hartuar në bazë të interesave të qytetarëve të kësaj komune. Kryetari i Degës së kësaj partie, Jetullah Rexha tha se ky program do të jetë projekt vizioni për punën, detyrat dhe përgjegjësitë e pushtetit lokal në këtë komunë. Zhvillimi ekonomik, infrastruktura, kujdesi për invalidët e luftës dhe familjet e dëshmorëve do të jenë objektiva të tjera të kësaj partie në komunën e Shtimes. Ndërkohë kreu i Lidhjes Demokratike të Kosovës, Ibrahim Rugova tha se krijimi i një pushteti të mirë lokal do të shpejtojë pavarësimin e Kosovës. Drejtuesit e Lidhjes Demokratike i bënë thirrje elektoratit të komunës së Shtimes që të dalë masivisht në zgjedhje.

[Ari-Intimidator]

VUSHTRRI, 14 tetor - “Partia Socialdemokrate e Kosovës konsideron se forcat politike shqiptare kanë një mision. Zgjedhjet e 26 tetorit, ndërkaq, janë rast për konsolidim të gjithmbarshëm”, thanë drejtuesit e kësaj partie në Vushtrri. Kryetarja e këtij subjekti politik Kaqusha Jashari në tubimin parazgjedhor në Vushtrri, u shpreh se Partia Socialdemokrate e Kosovës angazhohet për një pushtet sa më efikas në bashkëpunim me subjektet e tjera politike. Mosefikasitetin e administratave komunale në dy vjetët e fundit, Jashari e sheh në mungesën e kompromisit ndërpartiak. Sipas drejtuesve të këtij subjekti politik, zgjedhjet e sivjetshme vendore, janë një hap përpara drejt një pushteti lokal të suksesshëm. Nga zgjedhësit është kërkuar që të votojnë për program e jo për individë. “Socialdemokratët merren me problemet e pazgjidhura të qytetarëve: rrugët, rryma, uji, telekomunikacioni, papastërtia, papunësia enorme, varfëria e skajshme e të tjera çështje që preokupojnë qytetarin”, theksuan drejtuesit e kësaj partie në Vushtrri. Fadil Hagjaj, bartës i listës zgjedhore të PSDK-së për Vushtrrinë, theksoi se socialdemokratët do të angazhohen që liderët e subjekteve politike shqiptare t’i lënë anash interesat personale. Partia Socialdemokrate e Kosovës, për zgjedhjet e 26 tetorit, konkuron me 13 kandidatë për këshilltarë në Asamblenë Komunale të Vushtrrisë.

[erzeni]

Suharekë, 15 tetor 2002.

- Që nga orët e paradites rrugët që shpienin për në Suharekë ishin mbushur me simpatizantë të LDK-së, të cilët kishin shkonin të merrnin pjesë në tubimin promovues të LDK-së, duke mbajtur lart pankartat me parullat:

"LDK -ja parti e ardhmënisë",
"LDK-ja parti e vlerave tradicionale",
"LDK-ja parti e vlerave moderne",
"Duke votuar për LDK-në, votoni për ardhmëninë e Kosovës, etj.

Ndërkaq mbërritjen e Presidentit Rugova, masa e gjerë e tubuar e përshendeti me brohoritje të gjata dhe me duartroktije frenetike.

Kryetari i Degës së LDK-së në Suharekë dhe njëherit kryetar aktual i komunës, Ukë Bytyçi, foli për objektivat programore të LDK-së për peridhën e ardhshme katërvjeçare.

Zoti Bytyçi tha: "Ju vazhdoni t'i besoni LDK-së që ju ka prirë për dymbëdhjetë vjet me radhë dhe me punën e saj nuk iu ka zhgënjyer kurrë", duke kërkuar nga zgjedhësit dhe përkrahësit edhe një herë besimin e tyre, sepse, siç u shpreh, "jemi të bindur thellësisht se këtë e kemi merituar me angazhimin, sinqeritetin, transparencën dhe me sakrificën tonë. E meritojmë besimin tuaj, sepse jemi më të mirët", nënvizoi z.Bytyçi.

Paraqitjen në foltore të Predidentit të Kosovës Dr. Ibrahim Rugova, masa e madhe e simpatizantëve dhe qyetarëve e priti me entuziazëm dhe me duartrokitjet të gjata, duke brohoritur parulla të shumta.

Presidenti Rugova theksoi se Suhareka gjatë këtyre dy viteve të pushtetit lokal të LDK-së ka shënuar rezultate të shkëlqyeshme dhe ka me çka të krenohet.

Dr. Rugova tha se, falë edhe ndihmës së miqve tanë, janë realizuar mbi 1500 projekte të rëndësishme në rindërtimin e infrastrukturës së Kosovës, kurse një pjesë e mirë e këtyre investimeve janë realizuar nga buxhetet komunale.

Në të ardhmen prioritet do t`u jepen komunave të mesme, siç është Suhareka, për një zhvillim më të madh ekonomik, sepse komuna e Suharekës është e njohur për prodhimin e industrisë së gomës dhe verërave, prodhime këto të njohura mirë edhe në tregjet evropiane, vlerësoi Dr. Rugova.

Në vazhdim Presidenti Rugova falenderoi dhe përshëndeti përfaqësuesit e KFOR-it, të SHPK-së, të cilët me korrektësi po e bëjnë sigurinë e qytetarëve gjatë mbajtjes së fushatës zgjedhore në Kosovë. Poashtu përshëndeti dhe falenderoi edhe UNMIK-un e OSBE-në për organizimin e këtyre zgjedhjeve.

...........

[Ari-Intimidator]

PODUJEVE, 16 tetor - “Me Lidhjen Demokratike të Kosovës, Podujeva dhe treva e Llapit do të jenë më të bukura ndërsa qytetarët do të kenë standard më të mirë jetësor”. Kështu premtuan drejtuesit e degës së kësaj partie në tubimin parazgjedhor në Podujevë. Presidenti Ibrahim Rugova tha se Lidhja Demokratike e Kosovës do të angazhohet për aktivizimin e potencialit ekonomik në këtë komunë. Rugova premtoi angazhim për për krijimin e një ekonomie të qëndrueshme në këtë komunë. Ndërsa kryetari i degës së LDK-së në Podujevë, Agim Veliu u shpreh se “programi i Degës së Lidhjes Demokratike për komunën e Podujevës është vazhdimësi e angazhimeve dhe e platformës për ndërtimin e shtetit si dhe te mirëqënies ekonomike e sociale”. Veliu tha se në dy vjetët e kaluara të qeverisjes së kësaj partie në Podujevë janë realizuar apo janë në realizim e sipër mbi 80 projekte. Në tubimin zgjedhor u prezentuan edhe kandidatet e Lidhjes Demokratike për këshilltarë në kuvendin komunal të Podujevës.

PDK në Skënderaj: Eshtë koha për ndryshime, këtë do ta bëjmë ne


SKENDERAJ, 16 tetor - “Eshtë koha për ndryshime dhe këtë do ta bëjë Partia Demokratike e Kosovës, duke punuar për të mirën e qytetarëve të saj”. Kështu tha kryetari i kësaj partie, Hashim Thaçi në tubimin zgjedhor në Skënderaj. Sipas Thaçit, Skënderaj ka nevojë për ngritjen e industrisë, ndërmarrjeve të vogla dhe të mesme dhe për uljen e papunësisë së kësaj ane. Zyrtarët e Degës së Partisë Demokratike në Skënderaj u premtuan banorëve të kësaj ane se do të angazhohen për zhvillim ekonomik. Në tubim u tha se në komunën e Skenderajt 90 për qind të projekteve janë realizuar për dy vjet. Zyrtarët e PDK-së theksuan se ende duhet të punojnë për ndërtimin e infrastrukturës dhe ngritjen e ekonomisë lokale. Bartësi i listës zgjedhore të Partisë Demokratike në Skënderaj, Ramadan Gashi, theksoi se prioritetet e kësaj partie për të ardhmen janë që qytetarët të kenë jetë stabile, të sigurt dhe zhvillim të përgjithshëm të komunës.
AAK në Gjilan: Të ndryshojmë qeverisjen lokale që qytetari të na besojë


GJILAN, 16 tetor - “Zgjedhjet komunale të 26 tetorit, Aleanca për Ardhmërinë e Kosovës i konsideron shumë të rëndësishme dhe me mundësi reale për të ndryshuar mënyrën e qeverisjes në komunë dhe për të kthyer besimin e qytetarëve se jeta mund të zhvillohet normalisht”. Kështu u shpreh kreu i Aleancës për Ardhmërinë e Kosovës, Ramush Haradinaj para elektoratit në Gjilan. Bartësi i listës së AAK-së në Komunën e Gjilanit, Fadil Gashi, tha se nëse Aleancës i jepet rasti të qeverisë këtë komunë, atëherë qytetarët e saj do të vërejnë vetëm ndryshime pozitive në të gjitha sferat. Dega e Aleancës për Ardhmërinë e Kosovës në Gjilan, para simpatizuesëve të saj prezantoi 45 kandidatët e propozuar për këshilltar komunal të kësaj komune.

[Brari]

Mitrovicë, 18 tetor 2002 (QIK)

- Mbi tremijë anëtarë, simpatizantë dhe qytetarë të Mitrovicës kishin krijua një atmosfëre vërtetë festive në palestrën e sporteve "Minatori", e cila nuk mnd t'i zinte të gjithë ata që kishin për ta përshëndetur dhe dëgjuar Presidentin e Kosovës Dr. Ibrahim Rugovën, në tubimin përmbyllës parazgjedhor të Degës së LDK-së në Mitrovicë.

Presidenti Rugova është pritur me duartrokitje të gjata nga pjesëmarrësit e tubimit, të cilin e hapi kryetari i Degës së LDK-së në Mitrovicë, Ramadan Kelmendi.

Duke folur në këtë tubim, kryetari aktual i Kuvendit të Komunës e bartës i listës së LDK-së për zgjedhjet e 26 tetorit, Faruk Spahija, veçoi të arriturat e pushtetit lokal nën udhëheqëjen e LDK-së në periudhën e kaluar dyvjeçare.

Z. Spahija u premtoi qytetarëve të Mitrovicës se LDK-ja në periudhën e ardhshme katërvjeçare do të realizojë nga një projket zhvillimor ne çdo lagje të qytetit dhe lokalitet të komunës.

Presidenti Rugova të pranishmëve iu drejtua me fjalët: "Ju falemnderit për këtë tubim madhështor. Dua të them se për dy vjet LDK-ja ka udhëhequr në mënyrë të shkëlqyeshme shumicën e komunave të Kosovës me votën tuaj që ia keni dhënë", i cili për disa momente u ndërpre nga duartrokitjet dhe ovacionet 'Rugova Rugova'. Presidenti Rugova tha në vazhdim se për dy vjet LDK-ja ka realizuar mbi 2.500 projekte së bashku me miqtë dhe investitorët e ndryshëm.

Ndërkaq për katër vjetët e ardhshme LDK-ja do të realizojë më shumë projekte, do të punojë më shumë sepse ka një mandat katërvjeçar, një mandat që e cilëson Kosovën se po hyn në një fazë stabiliteti, në një fazë të zhvillimit dhe përparimit ekonomik që na duhet ne të gjithëve, u shpreh zoti Rugova.

Dr. Rugova i premtoi elektoratit dhe shprehu bindjen se do të punohet që përmes privatizimit të ekonomisë shtetërore që ka mbetur në Kosovë, të krijohen më humë vende të reja të punës.

Poashtu Presidenti Rugova spikati se "pushteti i mirë lokal do ta shpejtojë njohjen formale të pavarësisë së Kosovës, prandaj një Kosovë e pavarur, demokratike, e integruar në NATO dhe në Bashkimin Evropian e në miqësi të përhershme me SHBA-të, kjo është Kosova që ne e dëshirojmë".

"Kosova është de fakto e pavarur me miqtë tanë këtu dhe presim njohjen formale të saj", tha Dr. Rugova. Ndërkaq për vetë qytetin e Mitrovicës Presidenti tha: "Ne do të punojmë, edhe pushteti lokal këtu sëbashku me KFOR-in , UNMIK-un që të kemi një integrim të qytetit të Mitrovicës, pra një integrim administrativ, ekonomik e njerëzor të këtij qyteti të rëndësishëm të Kosovës".

Dr. Rugova premtoi se LDK-ja për Mitrovicën do të ketë një kujdes të shtuar e të vazhdueshëm për përparimin e saj. Në fund kryetari Rugova, foli edhe pëer një zbulim për herë të parë se shqiponja dykrerëshe së pari është përdor në Mitrovicë nga Isa Boletini.

"Në bazë të disa shënimeve më të reja që i kemi gjetur, shqiponja dykrenare së pari është përdorur këtu në Mitrovicë nga Isa Boletini më 1908-1910. Pra është një shiponjë tradicionale, tha z. Rugova.


..........................

Suksese LDK ne zgjedhje !!!

[erzeni]

Llapi !!!!


Disa here ke sjell ktu shkrime te cilat nuk i ke shkruar vete dhe nuk prezanton as autorin e as burimin ku i ke marre.

Pra rregulli e don qe cdo here te cilesosh..

Psh..x shkrim..eshte marre nga y gazete dhe shkruar nga hasani ose hyseni.

Kush e ka shkruar artikullin me lart?

Ku e marre ti ate artikull?

Keshtu bac ,zbato korrektesen e debatit.

[Ari-Intimidator]

Radio 21

Analisti beogradas Janjiq: Shtajner të bisedonte me serbët e Kosovës për pjesëmarrjen në zgjedhje.


BEOGRAD, 18 tetor - Analisti nga Beogradi, Dushan Janjiq, mendon se kryeadministratori i Kosovës, Mihael Shtajner, duhet të bisedonte vetëm me serbët e Kosovës lidhur me pjesëmarrjen e tyre në zgjedhjet lokale. Ai vlerëson se pas zgjedhjeve të përgjithshme në Kosovë, të cilat mundësuan integrimin e serbëve në jetën politike, Shtajneri nuk do të duhej të bisedonte me Beogradin për çështje të serbëve të Kosovës. “Shkuarja e Shtajnerit në Beograd është një gabim i madh i tij, sepse ka shkuar atje ku nuk mund të gjejë përgjigje”, thotë Janjiq. Ky analist vlerëson se instrumentalizimi i serbëve të Kosovës nga ana e Beogradit është një nga arsyet kryesore për marrëdhënie jo të mira ndëretnike në Kosovë. Ai mendon se integrimi i shoqërisë kosovare duhet të kalojë nëpërmjet procesit të bartjes së përgjegjësive nga UNMIK-u tek vendorët dhe shton se deri në realizimin e kësaj, përgjegjësia për të arriturat dhe dështimet në Kosovë bie kryesisht mbi administratën e UNMIK-ut.

[Ari-Intimidator]

LDK në Mitrovicë, Rugova: Angazhohemi për integrimin e plotë të këtij qyteti


Sipas radio 21MITROVICE, 18 tetor - Drejtuesit e Lidhjes Demokratike të Kosovës i premtuan sot elektoratit të Mitrovicës se do të angazhohen për integrimin e plotë të qytetit. Presidenti i Kosovës, Ibrahim Rugova, tha se komuna e Mitrovicës do të ketë përparësi në investime dhe në orientimin e donacioneve. Rugova i premtoi elektoratit të Mitrovicës se do të ketë kujdes te shtuar dhe të vazhdueshëm për zhvillimin e kësaj komune. “Lidhja Demokratike do të angazhohet që përmes privatizimit të krijojë vende të reja te punës, sidomos për të rinjtë”, u zotua Rugova. Ndërsa bartësi i listës së kësaj partie në Mitrovice, Faruk Spahija, u shpreh se Lidhja Demokratike për katër vjetët e ardhshme ka paraparë projekt zhvillimore për çdo lagje dhe fshat të komunës së Mitrovicës. Spahija tha se Lidhja Demokratike gjatë fushatës zgjedhore në Mitrovicë ka rënë në pajtueshmëri me qytetarët për të kërkuar të mundshmen dhe atë që është reale. Aktivizimi i “Trepcës”, sipas drejtuesve të Lidhjes Demokratike, do të jetë angazhim tjetër i kësaj partie në periudhën vijuese. Në tubimin zgjedhor u prezantuan 45 kandidatët e Lidhjes Demokratike për këshilltarë në Kuvendin Komunal të Mitrovicës.
Presidenti i Kosovës, Ibrahim Rugova, vizitoi sot pasdite lagjen "Kodra e Minatorëve", në pjesën e veriore të qytetit të Mitrovicës, ku u prit me lule dhe duartrokitje të ngrohta. Me këtë rast, Presidenti Rugova përuroi ambulancën shëndetësore në këtë lagje, banorët e të cilës tani do të kenë shërbime më të mira e më të shpejta mjekësore. Pasi bëri përurimin e ambulancës, bashkë me kryetarin e Kuvendit të Komunës, Faruk Spahija, Presidenti i Kosovës, tha se hapja e kësaj ambulance në këtë pjesë të Mitrovicës është një ditë gëzimi për këtë qytet. "Ne do të punojmë për integrimin e Mitrovicës dhe për krijimin e kushteve të sigurisë për të gjtihë qytetarët, duke përfshirë edhe grupet etnike, dhe që Mitrovica të jetë një qytet i integruar në planin ekonomik, social, njerëzor dhe administrativ", tha Presidenti Rugova. Ai shprehu bindjen se do ta ketë përkrahjen e të gjithë qytetarëve të Mitrovicës për realizimin e këtij qëllimi. "Unë besoj se së shpejti do ta rregullojmë çështjen e Mitrovicës. Do ta bëjmë këtë një qytet të qetë e të prosperuar", theksoi Presidenti Rugova. Ai u bëri thirrje serbëve që të bashkohen me shumicën dhe të integrohen, sepse institucionet e Kosovës do t'u garantojnë atyre të drejta të plota.

PDK në Klinë: Do të bëjmë ndryshime rrënjësore në qeverisjen e ardhshme


KLINE, 18 tetor - Partia Demokratike e Kosovës shpalosi sot programin e saj zgjedhor në Klinë. Kryetari Hashim Thaçi i premtoi elektoratit se kjo parti do të bëjë ndyshime rrënjësore në qeverisjen e ardhshme, në të mirë të qytetarëve. “Vota për Partinë Demokratike është votë për perspektivën të sigurtë, për institucione stabile dhe për qeverisje në shërbim të qytetarëve” tha ndër të tjera Thaçi, në tubim me qytetarë të Klinës. Ai u shpreh se kandidatët e kësaj partie do të angazhohen për ndërtimin e një qendre për të rinjtë e kësaj qyteze. Sipas bartësit të listës së kandidatëve të Partisë Demokratike për komunën e Klinës, Gani Veselit, prioritet i kësaj partie do të jetë aktivizi i ndërmarrjeve ekonomike, pjesëmarrja aktive në procesin e privatizimit të ndërmarrjeve shoqërore dhe zhvillimi i infrastrukturës. Në tubim u bë edhe prezentimi i kandidatëve të Partisë Demokratike për këshilltarë të Kuvendit Komunal të Klinës.

AAK në Prishtinë: Kemi program të qartë për ta zhvilluar kryeqytetin


PRISHTINE, 18 tetor - Aleanca për Ardhmërinë e Kosovës ka një program të qartë për qeverisjen e Prishtinës gjatë katër vjetëve. Kështu theksoi bartësi i listës zgjedhore të AAK-së për Prishtinën Jonuz Salihaj. Sipas AAK-së, qeverisja e mirë e Prishtinës, është pasqyrë e të gjithëve. “Aleanca për Ardhmërinë e Kosovës ka një program të qartë ekomonik, arsimor, kulturor e social”, tha Salihaj. Sipas tij, zhvillimi i Prishtinës me rrethinë dhe përkrahja për biznesin privat janë çështje që Aleanca i ka vënë në rend të prioriteteve të saj. Ndërsa kryetari i AAK-së u shpreh se Prishtina nuk është preukupim i Aleancës vetëm në fushatën zgjedhore por gjithëherë. Haradinaj shtoi se qeverisja e mirë e Prishtinës do të jetë një shembull dhe pasqyrë e gjithë kosovarëve. Prishtina, sipas Haradinajt, është vendi i parë ku ndërkombëtarët njihen me Kosovën dhe këtë duhet ta kemi parasysh. Ndërkohë qytetarët u shtruan shumë pyetje përfaqësuesve të Aleancës, lidhur për preokupimet e tyre. Po ashtu në këtë tubim zgjedhor u bë edhe prezantimi i kandidatëve për anëtarë të Asamblesë Komunale të Prishtinës.

[Ari-Intimidator]

18.10.2002 18:51 (CET)
Serbët paralajmërojnë bojkotimin e zgjedhjeve.


Kjo intervist tregon edhe njehere dinakerine e politikes Serbe te influencuar nga Beogradi. Mendojn ata se ne jemi injorant dhe nuk jemi te vetedijeshem me qellimet e tyre politike per ndarjen e Kosoves dhe krijimin e enklavave.----INtervisat eshte marre nga BBC.


Përfaqësuesit e serbëve të Kosovës do të marrin sot një vendim për dalje në zgjedhjet vendore në Kosovë, pas një varg bisedimesh me kreun e administratës ndërkombëtare Mihael Shtajner dhe me zyrtarët e lartë në Beograd.

Anëtari i Kryesisë së Kuvendit të Kosovës nga rradhët e serbëve, Gojko Saviq i tha BBC-së se serbët kanë kërkuar decentralizimin e pushtetit dhe ka shtuar se për momentin nuk ka kushte elementare për serbët që të marrin pjesë në zgjedhje. Ai madje nuk ka përjashtuar mundësinë që në takimin e nesërm në veri të Mitrovicës të merret vendimi për bojkotimin e zgjedhjeve.

Zoti Saviq fillimisht përgjigjet në pyetjen se cilat janë rezultatet e bisedimeve të deritashme të delegacionit serb me zyrtarët në Beograd:

Saviq: Ne kishim këto ditë biseda intensive edhe me Përfaqësuesin e Posaçëm të Sekretarit të Përgjithshëm të KB-ve, zotin Stenier por edhe me institucionet tona dhe me përfaqësuesit e Republikës dhe të Federatës me qëllim të marrjes së vendimit për daljen ose jo në zgjedhjet vendore të serbëve në Kosovë. Rezultati i bisedimeve akoma nuk është i njohur, meqë do të kemi edhe një takim tjetër i cili do të mbahet në Mitrovicë dhe pastaj do të publikojmë vendimin tonë. Në këtë çast unë nuk mund t'ju them por ne nuk kemi kushte elementare për pjesëmarrje në zgjedhje meqë disa herë kemi kërkuar nga zoti Stenier që së pari të kryhet decentralizimi dhe pastaj mund të hyjmë në zgjedhje dhe të kemi mëpastaj edhe përfaqësuesit tanë në vendet ku jetojmë. Kështu si qëndrojnë gjërat sot ne po vijmë në një situatë që të jemi në pakicë në ato Komuna të cilat nuk garantojnë asgjë. Edhe në Kuvendin e Kosovës ne jemi mbivotuar deri sot dhe nuk ka kaluar asnjë propozim yni.

Por UNMIK-u thotë se gjendja për serbët nuk është e rëndë dhe ajo është përmirësuar jashtëzakonisht shumë tashti.

Saviq: Është e vërtetë se është arritur një qëndrueshmëri. Por këto ditë sa më shumë po flitet për zgjedhjet shumëçka po ndodh. Para dy vjetësh serbët janë vrarë nga kënaqësia kurse tashti kjo po bëhet në mënyrë të organizuar meqë kjo është situata aktuale. Prandaj në asnjë mënyrë nuk mund të themi se gjendja ka ndryshuar për të mirë meqë populli tashti është mësuar dhepo ruhet që të mos dalë jashtë enklavave.

Zoti Saviq në bazë të kërkesave tuaja që keni parashtruar a do të thotë se po angazhoheni për një ndarje apo kantonizim të Kosovës? Kjo për faktin se po kërkoni p.sh dy komuna në Mitrovicë...

Saviq: Jo, asnjë lloj ndarjeje apo kantonizim por ky është vetëm një mekanizëm mbrojtës në këtë çast. Kjo do të thotë se e kemi përjetuar se si duket kjo në Kuvend sepse atje nuk kemi të drejtë në fjalën tonë përveç të votojmë kundër diçkaje që nuk do të donim të kalojë. KJo e njëjta do të ndodhte edhe në Mitrovicë nëse do të lejonim që të paraqitej Mitrovica si e bashkuar, meqë do të kishim rreth 17 përqind të votave të përgjithshme. Kjo nuk do të përmirësonte gjendjen tonë dhe edhe në veri do të përkeqësohej ajo.

Në këtë rrafsh a do të thotë kjo se serbët kanë vendosur të mos marrin pjesë në zgjedhje?

Saviq: Është një mundësi e madhe që të merret një vendim i tillë, por ka edhe mendime të tjera. Të shtunën do të merret vendimi.

Kush do t'i bartë pasojat?

Saviq: Pasojat i bartë dhe do të duhej t'i bartë bashkësia ndërkombëtare. Tre vjet ajo është e pranishme në Kosovë dhe para syve të saj dhe pranisë së saj ka ardhur deri te ekzodusi i serbëve. Mbi 250 mijë njerëz kanë ikur dhe ata vetëm kanë shikuar. Kthim nuk ka dhe ekziston një trend negativ, të drejtat elemenentare njerëzore mungojnë. Krejt është në duart e bashkësisë ndërkombëtare dhe ajo ushtron pushtet në këtë teritor.

Pra ju përjashtoni çdo mundësi të bisedimeve për daljen në zgjedhje?

Saviq: Bisedimet janë zhvilluar por me palën e gabueshme. Shqiptarët rrijnë anash dhe me vrasje ose me varsje të mundshme po përpiqen që ta përshkallëzojnë situatën me qëllim t'i bëjnë serbët të mos dalin në zgjedhje. Shqiptarët dhjetë vjet i kanë bojkotuar zgjedhjet dhe në fund arritën atë që deshën. Ne nuk duam të veprojmë në këtë mënyrë me dhunë të arrijmë diçka por duam thjeshtë të kemi lirinë e lëvizjes dhe të votojnë shlirshëm në vendin e tij e jo që në Beograd të votojë për Prizrenin.

Dhe kjo së fundi do të thotë se keni vendosur të jetoni jetën paralele?

Saviq: Jetë paralele deri në atë moment kur të zgjidhet diçka. Ne jemi për jetë të përbashkët por pala shqiptare nuk e do këtë. Nëse do të donin ata deri tashti do t'i mundësonin bashkësisë pakicë të kthehej dhe të jetonte normalisht. Por në vend që bashkësia ndërkombëtare të merrej me shumicën ajo edhe më tutje me metodat e presionit sikundër bën zoti Stenier, dhe me kërcënime po na sjell në një pikë të caktuar sikur është Mitrovica e veriut. Ajo është problemi më i vogël. Probleme më të mëdha janë Prishtina, Ferizaj, Prizreni dhe qytetet tjera ku ka patur serbë dhe sot mund të numërohen në gishta.

[Ari-Intimidator]

Sipas radio 21:

Sondazhi i Index Kosova: 40.4 % votojnë për LDK, 18.5 % për PDK dhe 6.2 % për AAK.




- Index Kosova, partner i Institutit Ndërkombëtar Gallup (BBSS Gallup International), publikoi sot rezultatet e hulumtimit të opinionit shqiptar të Kosovës rreth zgjedhjeve të 26 tetorit. Sipas këtij hulumtimi, 40.4 përqind të të anketuarve preferojnë të votojnë për Lidhjen Demokratike të Kosovës, 18.5 përqind për Partinë Demokratike të Kosovës dhe 6.2 përqind për Aleancën për Ardhmërinë e Kosovës. Ndërsa 26.7 përqind të të anketuarve nuk janë të sigurtë se do të votojnë ose nuk e kanë vendosur se kujt do t'ia japin votën.



Ndërkaq, hulumtimet e bëra vetëm për Prishtinë kanë treguar se LDK-ja është e preferuar e 45.6 të anketuarve, PDK-ja e 11.8 përqind të tyre, kurse AAK-ja është e preferuar e 4.2 për qind të të anketuarve. Visar Berisha, drejtor menaxhimi i kësaj Index Kosova, thotë se ky hulumtim ka treguar se shumica e shqiptarëve kanë deklaruar se do të marrin pjesë në zgjedhje. Berisha thekson se shkalla e besueshmërisë së këtij hulumtimi është shumë e lartë.



Drejtori i Indeks Kosovës thotë se rezultatet e hulumtimit mund të ndryshojnë për shkak të pjesëmarrjes së grupeve të tjera etnike në zgjedhje, mirëpo raporti midis partive më të mëdha pritet të mbetet i njëjtë. Hulumtimi në terren u zhvillua prej 4-10 tetor 2002 dhe në hulumtim u përfshinë 1100 respondentë shqiptarë të Kosovës. Mostra e zgjedhur është reprezentative për popullatën shqiptare të Kosovës më të vjetër se 15 vjet, ndërsa rezultatet rreth preferencave votuese janë nxjerrë prej përgjigjeve të respondentëve që janë më të vjetër se 18 vjet, numri i të cilëve në mostrën e hulumtimit ishte 996. Në bazë të hulumtimit del se 73.1% e qytetarëve të anketuar deklarojnë se është shumë e mundshme se do të votojnë, 16.1% thonë se është deri diku e mundshme, 2% deri diku e pamundshme dhe 4.5% deklarohen se është shumë e pamundshme se do të votojnë në këto zgjedhje. Në anën tjetër, rreth 4% të respondentëve ende nuk kanë vendosur se a do të dalin ta hedhin votën e tyre në zgjedhjet komunale apo jo. Dallimet gjinore në elektoratin e tre partive më të mëdha janë të vogla, por e vlen të theksohen. Elektorati i LDK-së përfshin më shumë femra sesa mashkuj (46% mashkuj dhe 54% femra), sikurse edhe ai i AAK-së (43.5% mashkuj dhe 56.5% femra). Ndërsa, sa përket votuesve të PDK-së është e kundërta – 55.1% prej tyre janë mashkuj dhe 44.9% janë femra.