Rrjedhja e gazit shuan familjen, 4 të vdekur!

[Davius]

Nusja e shtëpisë me dy fëmijët e saj si dhe i vjehrri kanë gjetur vdekjen nga e gazit gjatë natës së hënë. Agonia ka vazhduar gjatë dhe është marrë vesh pasditen e ditës së djeshme kur një mysafir do të jepte lajmin e kobshëm në tërë fshatin.

Gazi shuan familjen, 4 të vdekur


Besim Dybeli

Elbasan

Një familje e tërë është shuar dje nga një bombul gazi në një fshat të rrethit të Elbasanit. Ngjarja, jo e para e këtij lloji, është zbuluar rreth orës 14.00 të ditës së djeshme, porse në të vërtetë, ajo është regjistruar përgjatë mbrëmjes të së hënës. Vetëm nata ka qenë “dëshmitare” e tmerrit që ka përjetuar një familje e tërë. Në fshatin Shelcan të komunës së Shushicës, pikërisht në lagjen “Panxhi”, të gjithë pjesëtarët e familjes Topuzi janë asfiksuar nga gazi. Katër prej tyre kanë vdekur dhe vetëm njëra, më e moshuara, gjyshja e shtëpisë, që ditët e vdekjes i numëronte me gishta, ka mundur të shpëtojë.

Nusja e shtëpisë me dy fëmijët e saj si dhe i vjehrri kanë gjetur vdekjen nga rrjedhja e gazit gjatë natës së hënë. Agonia ka vazhduar gjatë dhe është marrë vesh pasditen e ditës së djeshme kur një mysafir do të jepte lajmin e kobshëm në tërë fshatin.

Të parët kanë mbërritur gazetarët dhe forcat e policisë. Nuk kanë munguar as ekspertë të policisë e të prokurorisë së Elbasanit bashkë me shefin e emegjencave në prefekturë, Fatos Suvaria. Të gjithë në krye të detyrës, por në pamundësi të jepnin ndonjë ndihmë. Viktimat tashmë prisnin vetëm arkivolet, jeta e tyre kishte marrë fund. Ajo që shpëtoi, Dile Topuzi, është dërguar me urgjencë në spital dhe ka shpëtuar për pak nga vdekja.

Ngjarja

Për ekspertët e policisë nuk qe e vështirë për të ndërtuar skenat e ngjarjes së dhimbshme në atë çka shihej në atë shtëpi fshati, e cila për nga luksi mund të krahasohej me vilat në qytetin e Elbasanit. Dy vjet më parë, Josif Topuzi, kryefamiljar, babai i fëmijëve të vdekur, i cili tani ndodhet si emigrant ekonomik në Greqi, do të zhvendoste shtëpinë e tij nga qendra e fshatit Shelcan në lagjen “Panxhi” atje ku kishte dhe tokat e familjes së tij. Gjithçka që kishte fituar në kurbet, ai e harxhonte për të ndërtuar një shtëpi të re, shumë të rehatshme, rrëzë shpatit të një mali, të cilën mund t’ia kishin zili edhe qytetarët. Tre dhoma e një kuzhinë, të kompletuara me të gjitha pajisjet, më së shumti sipas modelit të jetesës greke, të jepnin përshtypjen se po hyje në një shtëpi tepër të kamur, pavarësisht se pamjet brenda saj ishin rrëqethëse.

Dukej qartë se familja sapo kishte ngrënë darkë dhe tavolina ishte lënë e pangritur. Ende mbi mbulesat e bardha shiheshin lugë, copa buke të prera me dorë, një tenxhere ende me gjellë, një kanë uji e gota qelqi.
Kurse në çdo cep të shtëpisë gjendej një viktimë. Poshtë një krevati, në korridor, në mes të dhomës, tek dera e banjës, të gjithë të shtrirë sikur kishin dashur t’i kërkonin njëri-tjetrit ndihmë. Por dhënia e saj nuk qe e mundur. Mbasditen e djeshme, katër pjesëtarët e familjes, tashmë kishin nga një mbulesë përsipër dhe rreth tyre policë e gazetarë. Ajo që kishte ndodhur kurrsesi s’mund të kthehej më mbrapa, nga askush. Gati i tërë fshati qe shkulur në oborrin e shtëpisë për të parë e për të marrë pjesë në mortin e katërfishtë.

Si ka ndodhur ngjarja

Kanë ngrënë darkë të gjithë bashkë. Gjyshi, Jorgji, gjyshja, Dilja, nusja e shtëpisë, Vanthia, vajza Ana dhe djali, Dionisi. Babai, Josif Topuzi, nuk ndodhej aty sepse prej kohësh ai emigron në Greqi. Ndoshta natën e së hënës ata kanë folur me të për herë të fundit në telefon. Për të mos ia dëgjuar më kurrë zërin njëri-tjetrit.

Jorgji Topuzi ishte shtrirë për të fjetur në një divan, por trupi i tij qe rrëzuar për tokë, anash divanit ku flinte, ndërsa mbulesat kanë mbetur gjysmë të hapura. Vanthia, në një divan tjetër dhe anash saj vajza dhe djali. Vetëm gjyshja e tyre, Dile Topuzi, kishte fjetur nga dhoma tjetër. Dhe qe me fat.
Familja Topuzi kishte edhe gjenerator në shtëpi, edhe një sobë me gaz, jo për t’u ngrohur, por për të gatuar. Në një cep të kuzhinës, për ngrohje kishin edhe sobë zjarri. Nuk dihet se kush e kish harruar bombulën e gazit të sobës hapur. Ndoshta nusja e shtëpisë që duhet të ketë bërë darkën. Askush nuk e ka ndier erën e gazit sepse të gjithë kanë rënë të flenë qetësisht. Shtëpia ishte tepër e izoluar dhe dritaret të mbyllura.

Gazi ka qenë i hapur gjatë gjithë natës dhe ata të gjithë në gjumë nuk e kanë marrë vesh fare çfarë po u ndodhte. Nga mënyra si janë gjetur trupat, dukej sikur në një moment ata e kanë ndier erën e gazit dhe janë përpjekur të shpëtojnë, të dalin jashtë. Por askush prej tyre nuk ka patur fuqi të hapë dyert e dritaret për ajrim apo aq më pak, të dilte jashtë. Secili ka dhënë jetë aty ku grahmat e fundit të oksigjenit kanë shteruar. Të katër i ka mbytur gazi Në dhomën tjetë gjyshja e paralizuar e që nuk fliste dot përpëlitej nga mungesa e frymëmarrjes.

Kësisoj vdekja është mbjellë në të gjitha qoshet e shtëpisë që në orën 22.00 mbrëmjen e së hënës për t’u zbuluar rreth orës 14.00 të ditës së djeshme. Një fqinj i largët kishtë shkuar për të pirë një kafe tek Topuzët, por në vend të fjalës “mirëseardhe” ka gjetur katër personat e kësaj familjeje të shtrirë për tokë. I tmerruar ai ka lajmëruar gjithë fshatin dhe të tërë janë gjendur aty. Të njëjtën gjë ka bërë edhe me policinë. Që nga drejtori i policisë së Elbasanit e shumë të tjerë kanë ardhur me urgjencë në Shelcan, por tek e fundit, kanë bërë vetëm procedurat. Gjithçka kishte mbaruar brenda një nate.

Viktimat

Jorgji Topuzi , 80 vjeç , gjyshi
Dile Topuzi , 75 vjeç , gjyshja ( ka shpëtuar )
Vanthi Topuzi , 42 vjeç , nusja e Josifit
Ana Topuzi , 11 vjeç , vajza
Dionis Topuzi , 8 vjeç , djali

[shkodrane82]

O Zot ca fatkeqesie, s'kam fjale ca te them.
Sapo i shifja dhe ne tv tek top channel pamjet nga shtepia, sinqerisht shume
e dhimbshme.

[ideus]

Vertete e dhimbshme kjo ngjarje, Zoti i meshiroft!