Tifozët e FC Real Madridit...#7

[Davius]

Zv.presidenti i Realit: Duam vendin e dytë dhe 6 ndeshjet e mbetura janë si finale për ne 10-04-2006

Butragenjo: Na duhet të sakrifikojmë!

Emilio Butragenjo, zv.presidenti i Realit të Madridit, ka informuar në lidhje me atë që është vendosur në mbledhjen e jashtëzakonshme që stafi drejtues i Realit bëri dje, 24 orë pas barazimit 1-1 në "Bernabeu" ndaj Sociedadit. Butragenjo tha se Reali po kalon një periudhë krize dhe se duhen sakrificat maksimale të secilit prej pjesëtarëve të klubit për të arritur vendin e dytë në kampionat. "Presidenti ishte i shqetësuar dhe kërkoi një takim me futbollistët. Na kanë mbetur gjashtë ndeshje, të cilat duhet t'i konsiderojmë të gjitha si finale, pasi vendi i dytë është një objektiv thelbësor për ne.

Po kalojmë një situatë të vështirë dhe për këtë duhet të qëndrojmë të bashkuar dhe të sakrifikojmë gjithçka për të mbyllur sezonin ashtu si duhet." Presidenti Fernando Martin vendosi që futbollistët të grumbulloheshin për tri ditë pas barazimit ndaj Sociadadit dhe të liheshin pushim vetëm ditën e mërkurë. Por Butragenjo nuk e sheh këtë veprim të numrit 1 "merenges" si një "dënim" për skuadrën pas rezultatit të arritur.

"Nuk ishte mirë që presidenti të fliste me futbollistët menjëherë pas ndeshjes, - vazhdon zv.presidenti i Realit. - Pasi kaluan disa orë, ai i komunikoi trajnerit se skuadra duhej të grumbullohej për tri ditë. Ai është përgjegjësi kryesor në klub dhe mendoi këtë zgjidhje për të dalë nga situata e vështirë. Nuk dua të flitet për krizë." Në fund Butragenjo shprehu optimizmin e mbetur te drejtuesit "merenges". "Futbollistët dhanë gjithçka për të fituar ndeshjen. Eshtë hera e dytë që e mbyllim takimin me dhjetë futbollistë dhe kjo nuk është pozitive, por të paktën në fushë pashë impenjim maksimal. Nëse Ronaldo do të kishte shënuar golin e dytë, gjithçka do të ishte mbyllur. Kështu e ka futbolli. Ne duhet të vazhdojmë luftën për vendin e dytë," - përfundoi drejtuesi madrilen.

Kasiljas kritikon skuadrën

Pas barazimit 1-1 të shtunën në "Bernabeu" ndaj Sociedadit, portieri i Realit, Iker Kasiljas, kritikoi shokët e skuadrës: "Duhet të dalim në vend të dytë. Pjesëmarrja në fazën me grupe të Championsit është një domosdoshmëri për këtë skuadër. Jam i mërzitur me skuadrën. Nuk është mirë kur luhet me 80% të mundësive, pasi kështu po rrezikojmë edhe vendin e dytë. Me gabimet tona mund të kompromentojmë edhe sezonin e ardhshëm. Kjo do të ishte e patolerueshme."

[Davius]

Ronaldo do te pauzon 3 jave, si pasoje e lendimit qe morri kete fundjave ne takimin mes Realit dhe Real Socieadit.

Ai do te mungon ne takimet me: Getafe (java33), Málaga (java 34) dhe Osasuna (java 35).

[Davius]

Shtypi spanjoll kritikon sulmuesin italian që tanimë ka humbur edhe shpresën për të luajtur në botëror 11-04-2006

"AS" sulmon Kasanon: Para të shkuara dëm!

"Kasano, 5,5 milionë euro të hedhura në plehra." Kështu titullohej e përditshmja spanjolle "AS", e cila ka filluar prej disa javësh të analizojë krizën që ka përfshirë Realin e Madridit. Në këtë artikull bëhej një analizë e tre muajve të Antonio Kasanos në "Barnabeu". Tre muaj në hije të plotë...
Ish-sulmuesi i Romës mbërriti në Spanjë më 4 janar dhe u konsiderua si një zëvendësues luksi për kapitenin e Realit, Raul Gonzales, i cili do të rikthehej në mars pas dëmtimit në gju. Por që në ditët e para në Madrid u kuptua se diçka nuk po shkonte mirë tek italiani. Kasano ishte 11 kilogram mbi peshë dhe kjo e detyroi trajnerin Lopez Karo dhe stafin drejtues që të përgatisnin një plan të veçantë stërvitor. Debutimi me gola, në ndeshjen e Kupës së Mbretit ndaj Betisit, ngjalli shpresat e tifozëve "merenges". Por që atëherë Kasano ka zbritur në fushën e lojës vetëm për 479 minuta.

Gjithsej, 14 ndeshje, duke përfshirë të gjitha veprimtaritë, nga të cilat vetëm tre si titullar. Ndërkohë, golat e shënuar nga talenti i lindur në Bari kanë qenë vetëm dy. Më pas, shtypi spanjoll u përball me një tjetër karakteristikë të Kasanos: heshtja me shtypin. Që pas konferencës për shtyp në ditën e mbërritjes në Spanjë, 24-vjeçari nuk ka pasur asnjë takim zyrtar me gazetarët. "AS" pohonte se Kasano dukej i penduar për zgjidhjen e tij: "Në vitin e botërorit do të kishte qenë më mirë të mos mendonte për portofolin, por të qëndronte te Roma. Kjo skuadër shpërtheu pikërisht pas largimit të tij." Kanë mbetur edhe gjashtë ndeshje nga fundi i kampionatit dhe koha në dispozicion të Kasanos për të bindur Lipin, ka mbaruar. Antonio i jep kështu lamtumirë ëndrrës së tij për të luajtur në botërorin e parë të karrierës."

[Davius]

Ronaldo, një dëmtim në çdo dy gola

Pikërisht në momentin ku filloi të zbavitej duke gjetur golat dhe formën më të mirë, Ronaldo mund të ndalet nga një tjetër dëmtim. Në fund të ndeshjes ndaj Sociedadit, "Fenomeni" është ankuar për një dëmtim në kofshë dhe sipas "mjekëve" të Realit, do t'i duhet të qëndrojë dy apo tri javë pushim. Kjo është hera e dytë në këtë sezon që braziliani dëmtohet pasi ka shënuar në dy ndeshje radhazi.

[Davius]

Mesfushori i Realit pohon se mund ta mbyllë karrierën në SHBA: Eshtë një popull i apasionuar pas sportit 12-04-2006

Bekham: Lamtumirën nga Amerika!

Kapiteni i Anglisë, Devid Bekham, ka deklaruar për herë të parë se ka dëshirë ta mbyllë karrierën në Amerikë. Mesfushori i Realit të Madridit, i cili do të mbushë 31 vjeç muajin e ardhshëm, u shpreh se ndihej i intriguar nga mundësia e të luajturit në kampionatin amerikan. Në këtë mënyrë, anglezi përjashton një herë e përgjithmonë mundësinë e rikthimit në Premier Ligë, pas dy vitesh, atëherë kur i mbaron kontrata me Realin. Bekhami ka shprehur haptazi admirimin e tij për Shtetet e Bashkuara të Amerikës. Ai ka një nga akademitë e futbollit në Los Anxhelos dhe pranon se e ka shqyrtuar edhe më parë mundësinë e kalimit nga ana tjetër e Atlantikut.

"Pas disa vitesh mund të kem mundësinë të luaj në Amerikë. Unë kam bashkëpunuar me akademitë e futbollit të moshave në këtë vend. Për momentin ndihem mirë te Reali i Madridit, por ku i dihet!? Ndoshta më pas do të tërhiqem nga futbolli, pasi të kem luajtur në kampionati amerikan. Dëshiroj të bëhem pjesë e një populli mjaft të apasionuar pas sportit. Kam një akademi në Los Anxhelos dhe kjo është jeta ime pas futbollit. Kur të përfundoj së luajturi futboll, do të kem mundësinë të bëj jetën time të vërtetë." Mesfushori i Realit vazhdon "malin" me elozhe për Shtetet e Bashkuara të Amerikës, duke lënë të kuptohet qartë se si ka vendosur ta vazhdojë jetën pas përfundimit të karrierës. "Në Amerikë mund të jesh i qetë në çdo moment dhe të ecësh në mes të rrugës, në mes të ditës, - tha ai. - Njerëzit atje janë mësuar të hasin aq shpesh njerëz të famshëm, sa nuk u bën më përshtypje se cili është ai që kanë përballë. Të qenurit pjesë e kësaj, më intrigon shumë." Gjithsesi, për momentin Amerika duhet të presë, pasi futbollisti më i famshëm anglez i dekadës së fundit ka ende ëndrra për të realizuar në futbollin "e rëndësishëm".

Atje ku mundësitë nuk i mungojnë! Bekhami bën të ditur se Anglia mund të fitojë Kupën e Botës dhe se çdo rezultat tjetër në "Gjermani 2006" do të ishte i pajustifikueshëm. Ndërsa në lidhje me trajnerin Erikson, ish-mesfushori i Mançesterit tha: "Unë mendoj se Sveni është një trajner i madh. Mendoj se e madhe është edhe puna që ka bërë me kombëtaren angleze. Na ka përmirësuar në lojën me grup dhe ka futur te skuadra besimin për të fituar veprimtari të rëndësishme." Në fund një koment i shkurtër për Realin: "Gjërat nuk po shkojnë ashtu si duhet dhe jam shumë i mërzitur. Tri vite pa asnjë trofe janë me të vërtetë shumë. Gjithsesi, shpresa për revansh nuk ka humbur."

Devidi, si "yjet" e së kaluarës...
Këta janë disa nga futbollistët "legjendarë" që kanë magjepsur me talentin e tyre në Shtetet e Bashkuara të Amerikës...
Pele: Futbollisti më i madh i të gjitha kohëve kaloi te Nju Jorku në vitin 1974, për shifrën e 7 milionë dollarëve. Një rekord për kohën.
Franc Bekenbauer: "Kaizeri" i futbollit gjerman luajti katër vjet me Nju Jorkun. Atje mbylli karrierën më 1983-shin.
Johan Krujf: Mjeshtri holandez në moshën 32-vjeçare kaloi te Los Anxhelosi. Në 1979-n u shpall futbollisti më i mirë në Amerikë.
Xhorxh Best: Ish-futbollisti i Mançesterit luajti me tri skuadra në kampionatin e vjetër amerikan. (Los Anxhelos, Fort, San Hoze).
Bobi Mur: Kapiteni i Anglisë, që fitoi Kupën e Botës në '66-n, e mbylli karrierën në SHBA në vitin 1976, duke luajtur me Siatëllin.
Xhef Hërst: Ai që shënoi tre gola në finalen e Botërorit 1966, u aktivizua dhjetë vjet më vonë me Siatëllin dhe shënoi shtatë gola.
Lotar Mateus: Gjermani që luajti në pesë botërorë, u aktivizua për tre vjet me Metrostarsin.

[Davius]

Sulmuesi brazilian i Realit ka deklaruar se rivalët e tyre janë për t'u marrë shembull 13-04-2006

Baptista: Të ndjekim rrugën e Barçës

Sulmuesi i Realit të Madridit, Hulio Baptista, ka pranuar se ekipi i tij duhet të ndjekë shembullin e Barcelonës. Këta të fundit kanë arritur të bëjnë diferencën në kampionat, ku janë një hap larg fitimit të kampionatit të dytë radhazi, ndërkohë që janë kualifikuar edhe në gjysmëfinalet e Ligës së Kampioneve.

Nga ana tjetër, skuadra e Realit të Madridit vazhdon të zhgënjejë dhe ka treguar një kaos, ku janë ndryshuar shumë herë trajnerët dhe jo shumë kohë më parë, edhe presidenti Florentino Perez dha dorëheqjen nga detyra e tij. "Unë nuk i kam aspak zili ata. Ajo që dua të them, është se duhet të ndjekim të njëjtën mënyrë, pasi katalanasit kanë arritur shumë suksese. Në kohën kur Frenk Rajkard u bë trajneri i Barcelonës, skuadra nuk luante një futboll të mirë dhe kampionatin e dominonte Valencia. Ne kemi shumë të kundërta me atë skuadër dhe një nga më të rëndësishmet është fakti që kemi ndryshuar shumë trajnerë. Shpresoj që në një kohë të shkurtër, të bëjmë disa ndryshime të vlefshme dhe më pas të mos jemi shumë të shpërqendruar. Të gjithë jemi shumë të mërzitur, pasi veshim fanellën e klubit më të madh në botë.

Edhe pse po luftojmë shumë, nuk po arrijmë të fitojmë trofe," - tha Baptista. Ky i fundit mund të ishte transferuar tek Arsenali në merkaton e verës, por vendosi të qëndronte në Spanjë, duke u larguar nga Sevilja dhe duke u transferuar te Reali. Nëse do të ishte transferuar në skuadrën angleze, do të kishte pasur shansin për të luajtur në gjysmëfinalet e Ligës së Kampioneve. "Unë mendova për të mirën time dhe nuk më vjen aspak keq që u transferova te Reali. Njerëzit këtu janë shumë të kuptueshëm dhe nuk ke probleme. Ndryshimi i vetëm është se futbollistët që ka ky ekip, kanë fituar shumë dhe janë emra të mëdhenj të futbollit botëror," - tha ai.

Kasano i qëndron besnik Realit
Menaxheri i sulmuesit italian, Antonio Kasano, ka deklaruar se klienti i tij nuk ka ndër mend të rikthehet në Itali në merkaton e kësaj vere. Futbollisti 23-vjeçar nuk e ka justifikuar veten që kur u transferua në Madrid, duke shënuar vetëm një gol në dhjetë ndeshje të luajtura. Zërat kanë përmendur se ai mund të largohet nga klubi, duke qenë se dhe rivaliteti është më i madh, gjithsesi ka ardhur menjëherë përgënjeshtrimi

[Davius]

Trajneri i Liverpulit synon të formojë një skuadër "ëndrrash", duke filluar me blerjen e spanjollit 13-04-2006

Benitez, gjithçka nis nga Rauli!


Trajneri i Liverpulit, Rafael Benitez, kërkon të ketë në skuadrën e tij për sezonin e ardhshëm, kapitenin e Realit, Raul Gonzales. Por ai bëri të ditur se deri tani nuk u kishte bërë asnjë ofertë madrilenëve për shërbimet e sulmuesit spanjoll dhe se arritja e marrëveshjes do të ishte shumë e vështirë, pasi Reali nuk e lejon lehtë largimin e "galaktikëve". Gjatë merkatos së verës, trajneri i Liverpulit përgatitet të largojë tre nga katër sulmuesit që ka aktualisht në skuadër, i konfirmuari i vetëm do të jetë Piter Krouç. Morientesi është pranë Espanjolit, Folueri pritet krahëhapur nga Boltoni, ndërsa Sise mund të rikthehet në Francë. Kësisoj, nga Rauli do të nisë reforma e sulmit liverpulas.

Ky repart ka qenë më i kritikuari dhe relativisht më i dobti i Liverpulit të sivjetëm, që u eliminua në 1/8 e Ligës së Kampioneve dhe duket se do ta mbyllë Premier Ligën në vendin e tretë. Benitezi e njeh mirë Raulin, pasi kanë qenë së bashku në fillimin e viteve 1990 në skuadrën B të Realit të Madridit. Ka gjasa që kapiteni i kombëtares spanjolle të jetë njeriu i duhur për ta shndërruar përfundimisht Liverpulin në një skuadër të madhe. Rauli, i cili ka shënuar 51 gola me fanellën e Realit në Ligën e Kampioneve, është prej 12 vitesh idhulli i tifozëve në "Santiago Bernabeu". Gjithsesi, presidenti i ri i "merengesve", Fernando Martin, mund ta lejojë largimin e tij për në "Anfild Road", pasi ka ideuar një projekt që ka si bazë rifreskimin e skuadrës. Futbollisti që do të mbushë 29 vjeç këtë verë, është riaftësuar së fundi nga një dëmtim në gju që e mbajti për katër muaj larg fushave të lojës. Problemi më i madh për arritjen e marrëveshjes ndërmjet tij dhe Liverpulit ka të bëjë me pagën e sulmuesit.

Rauli merr 112 mijë stërlina në javë, shifër që jo çdo klub do të ishte në gjendje ta paguante. Burime pranë Benitezit bëjnë të ditur: "Rafa nuk ka në duar paratë që do të bënin të mundur kalimin e Raulit te Liverpuli dhe kësisoj për momentin çdo lëvizje do të ishte pa vlerë. Duket se Benitezi do të shohë nëse presidenti i ri i Realit ka ndër mend ta largojë Raulin. Përndryshe, do të ishte shumë e vështirë t'i bindje madrilenët që të linin të lirë kapitenin e tyre. Nëse Reali do ta lërë të lirë të largohet, atëherë është e sigurt se Benitezi do të përpiqet ta bindë futbollistin të vazhdojë karrierën në "Anfild"." Nga ana tjetër, nuk mund të thuhet se Rauli ka një të ardhme të sigurt në Madrid. Këtë e tregon edhe "politika" e drejtuesve të Realit, që në harkun e një viti kanë blerë tre sulmues: Antonio Kasanon, Robinjon dhe Hulio Baptistën.

[Davius]

Reali barazoi sot me ekipin e Getafes. Avancuan me golin e Bapitestes ne minuten e 61-te, por ishte M. Tena qe barazoi me minutat e 80-ta te takimit.

[Davius]

Vendi i dytë, Valencia "parakalon" Realin


Reali i Madridit ka barazuar 1-1 në ndeshjen e luajtur dje ndaj Getafes, duke humbur vendin e dytë në renditje. Pas një pjese të parë të barabartë, Baptista shënoi për Realin në minutën e 61-të dhe u duk sikur të besuarit e Lopez Karos do të merrnin një tripikësh të rëndësishëm. Braziliani përfitoi nga një aksion i Raulit në hyrje të zonës kundërshtare. Pa Ronaldon, të dëmtuar, miqtë ishin të paqartë në veprimet sulmuese dhe i dha mundësinë Getafes të qëndronte në ndeshje. Dhe në minutën e 83-të, skuadra e Shutserit e ndëshkoi duke barazuar me anë të qendërmbrojtësit Tena.

Antonio Kasano është aktivizuar në minutën e 85-të, por vetëm një kombinimim i tij me Zidanin është shumë pak për t'u përmendur në lojën e italianit. Në sekondat e fundit, Reali i Madridit ishte edhe i pafat, pasi topi i goditur nga Baptista u ndal në shtyllë. Me këtë episod përfundoi gjithçka. Nuk pati fitues në "derbin e vogël" të Madridit dhe Reali duhet të pranojë vendin e tretë dhe barazimin e dytë radhazi 1-1. Tani "merengesit" ndodhen dy pikë larg objektivit të vetëm që i ka mbetur.

[Davius]

Braziliani i Realit të Madridit ka shprehur se duhet të japin maksimumin për vendin e dytë 18-04-2006

Sisinjo: Fati është kundër nesh!

Futbollisti brazilian i Realit të Madridit, Sisinjo, ka folur për gjendjen aktuale të klubit. Ai ka deklaruar se të gjithë janë të mërzitur për faktin se nuk synojnë asnjë trofe, gjë që është një dështim i vërtetë për një klub të tillë. Synimi i vetëm i madrilenëve është vendi i dytë në kampionat dhe Sisinjo e ka pranuar se gjithashtu është diçka e vështirë. "Ne duam të sigurojmë vendin e dytë, por duhet të pranojmë se kemi mundur rivalitetin e fortë dhe që nuk është objektiv shumë i lehtë. Jemi shumë të mërzitur për faktin se nuk synojmë asnjë treofe, ndaj dhe do të japim maksimumin për të qëndruar pas Barcelonës në kampionat. Për sa i përket ndeshjes me Getafen dhe në ndeshjet e fundit, dua të theksoj se fati nuk ka qenë me ne. Kemi arritur të bëjmë lojën tonë dhe të dhurojmë spektakël, gjithsesi edhe fati është një faktor tjetër. Gjatë gjithë kësaj jave do të japim maksimumin në stërvitje, në mënyrë që të arrijmë tri pikët ndaj Malagës," - tha Sisinjo.

Ky i fundit luajti si mesfushor i djathtë në ndeshjen ndaj Getafes, ndërkohë që në shumicën e rasteve ka qenë mbrojtës. "Me thënë të drejtën, ndihem më mirë kur luaj si mesfushor, pasi aftësitë e mia janë të tilla. Gjithsesi, e ka trajneri në dorë një gjë të tillë dhe unë jam gati të luaj në çfarëdo lloj pozicioni," - shtoi ai. Futbollisti brazilian ka folur gjithashtu edhe për forcën që ka skuadra. "Ne të gjithë e dimë që mund të bëjmë diferencën dhe në ndeshjet e fundit do të marrim maksimumin. Jemi të ndërgjegjshëm se në skuadër kemi futbollistët më të mirë në botë dhe një gjë e tillë nënkupton shumë. Duhet të punojmë dhe të jemi sa më të përqendruar në fushën e lojës.

Nëse arrijmë të japim të gjithë së bashku maksimumin, atëherë nuk do të ketë rivalë për ne. Për sa i përket renditjes në vendin e dytë, do të jemi ne ata që do të bëjmë diferencën. Është diçka e vështirë, por jo e pamundur. Jemi gati për të treguar se nuk i meritojmë gjithë ato kritika. Mbase duhet të pranojmë se ky sezon nuk ishte ashtu siç e prisnim, por duhet të fillojmë që tani punën për të ardhmen," - tha ai. Dhe si përfundim foli për gjysmëfinalet e Ligës së Kampioneve. "Përballjet do të jenë vërtet interesante dhe nuk mund të parashikoj se kush do të fitojë, gjithsesi do të jem fans i Vilarealit," - përfundoi Sisinjo.

Shuster mirëpret interesimin e Realit

Trajneri i Getafes, Bernard Shuster, është shprehur i kënaqur që emri i tij është lidhur me një të ardhme te Reali i Madridit. Ka qenë pikërisht drejtori sportiv, Benito Floro, që ka hedhur idenë e Shusterit. "Unë po paraqitem mirë me ekipin tim dhe më bëhet qejfi që vlerësohem nga njerëz që e njohin shumë mirë futbollin, siç është Benito Floro. Jam shumë i lumtur me Getafen, por edhe Madridi më pëlqen shumë," - ka thënë Shusteri.

L.Karo: Asnjë problem me Bekhamin

Trajneri i Realit të Madridit, Huan Ramon Lopez Karo, ka deklaruar se nuk ka asnjë mosmarrëveshje midis tij dhe Devid Bekhamit. Ai është shprehur shumë i befasuar nga mediat, të cilat kanë bërë të ditur një gjë të tillë. Të gjithë mendojnë se unë nuk shkoj mirë me të, pasi Bekhami nuk ishte në formacion gjatë ndeshjes me Getafen. Një gjë e tillë nuk ka të bëjë aspak. Skadrën e vendos unë dhe dua të fus në fushën e lojës 11 futbollistët që janë në formën më të mirë. Mesfushori anglez nuk ishte i dëmtuar, gjithsesi kishte futbollistë të tjerë që ishin në një formë më të mirë," - tha Lopez Karo. Ishte braziliani Sisinjo ai që luajti në vendin e Bekhamit, në krahun e djathtë të mesfushës.