Tifozët e FC Real Madridit...#7

[Davius]

Tre madrilenë në stërvitje të veçantë

Ronaldo, Mishel Salgado dhe Pablo Garsia kanë filluar të stërviten në mënyrë të veçantë, për të kaluar sa më shpejt tërheqjet e tyre të vogla muskulare. Ata kanë vendosur të jenë në një formë shumë të mirë për ndeshjen e radhës dhe fakti se ajo është në fund të javës, i ndihmon ata.

Baptista, çelësi për të arritur te Kol?!

Sipas së përditshmes britanike "Sunday Mirror", Hulio Baptista nuk e ka shumë të gjatë aventurën e tij te Reali i Madridit. Gazeta britanike ka thënë se ai do të jetë çelësi që do t'i çojë drejtuesit madrilenë për të blerë mbrojtësin e majtë të Arsenalit, Eshli Kol, i cili është cilësuar si pasardhësi i Roberto Karlosit.

Raul, rikthimi shumë para parashikimit

Kapiteni i Realit të Madridit i është nënshtruar rezonancës magnetike dhe disa analizave të tjera, për të parë përmirësimin që ka pasur deri tani. Në fakt rezultatet që u morën, ishin pozitive dhe puna e sulmuesit madrilen ka rezultuar shumë e suksesshme. Ai pësoi një dëmtim të rëndë më 19 nëntor dhe në fakt shenjat e para nuk ishin të mira. Mjekët deklaruan se mund të qëndronte deri në fund të sezonit jashtë fushave të lojës, duke rrezikuar edhe Kupën e Botës. Por, edhe pse gjendja e tij nuk ishte e mirë, vetë futbollisti tha se do të përmirësohej para parashikimit të doktorëve. Ai bëri një punë të madhe individuale dhe në fakt ia arriti qëllimit të tij. Pas testeve të fundit, Rauli do të rikthehet shumë më shpejt se ç'pritej. Ai tani do t'i nënshtrohet fazës së fundit të rikuperimit dhe do të rikthehet të stërvitet jo për shumë kohë. Ky është një lajm i mirë si për Realin e Madridit, ashtu edhe për kombëtaren e Spanjës, duke qenë se Rauli ka një rol të rëndësishëm.

[Davius]

Trajneri i Realit u shpreh i pakënaqur nga loja e ekipit të tij, në ndeshjen ndaj Seltës 31-01-2006

Lopez Karo: Duhet të japim më shumë në fushë

Trajneri i Realit të Madridit, Lopez Karo, ka folur për situatën e ekipit të tij pas fitores në transfertë ndaj Kadizit, e vlefshme për kampionat. Që kur ai ka marrë detyrën e trajnerit, skuadra madrilene ka gjetur rrugën e duhur, gjithsesi janë edhe disa aspekte, të cilat nuk bindin.
- Si ju duk ndeshja? E merituat fitoren?

- Unë mendoj se e rëndësishmja është që të kuptojmë konceptin e lojës. Duhet të jemi të qartë në këtë aspekt. Në fakt, në fushën e lojës nuk kam parë një ritëm konstant të skuadrës sime. Ata nuk luajtën njësoj gjatë të gjitha minutave dhe nuk më vjen mirë për këtë gjë. Selta zhvilloi një lojë të shkëlqyer, ndërsa me ekipin tim nuk jam i kënaqur. Kjo shpjegon gjithçka. E di që ne jemi të aftë të japim më shumë. Gjithsesi nuk e mohoj që jemi një skuadër me futbollistë shumë profesionistë, të cilët dinë se si të fitojnë.

- Mendoni se ndikuan edhe vendimet e arbitrit në rezultatin e ndeshjes?

- Asnjë prej nesh nuk duhet t'i paragjykojë vendimet e arbitrave. Ka persona të veçantë që merren me këtë gjë. Mediat i kanë gjithmonë nën shënjestër arbitrat, por kjo nuk është gjë e mirë. Unë jam trajneri i Realit të Madridit dhe duhet të bëj thjesht detyrën që më takon.

- Pse vendosët ta zëvendësonit Sisinjon?

- Ishte një vendim i imi. Nuk kishte të bënte fare me lojën e tij, pasi luajti shumë mirë.

- Ju kishit praktikuar një taktikë, me një Sisinjo shumë sulmues dhe me një Bekham që mbulonte krahun e djathtë.

- Vendimet taktike i marr unë dhe në fakt, ato mund t'i ndryshoj edhe në momentin e fundit. Nuk duhet ta dinë të gjithë se si do të vendoset në fushën e lojës skuadra për ndeshjen tjetër. Ky është një sekret profesional.

- Kujt i referoheni kur thoni se nuk jeni i kënaqur me atë që bëri në fushën e lojës?

- Nuk jam i kënaqur si me repartin sulmues, ashtu edhe me repartin mbrojtës, pasi nuk ishin në nivelin e zakonshëm. Ata mund të jenë të shkëlqyer në detyrën e tyre, pasi janë futbollistët më të mirë në botë. Mjafton të them që Selta luajti më mirë dhe kjo tregon se si duhej të kishin luajtur ata.

- Si ju duk ekipi i Seltës?

- Me thënë të drejtën, nuk tregoi se është i shkëlqyer në aspektin individual dhe kolektiv. Por në fakt tregoi një shpirt gare që zgjati për të gjitha 90 minutat. Në asnjë moment nuk e pranoi humbjen dhe ky aspekt vërteton se Selta në këtë sezon do të japë shumë surpriza.

[Davius]

Ronaldo, titullar ndaj Espanjolit!?

Ronaldo, Hulio Baptista dhe Antonio Kasano janë në hapat e fundit të fazës riaftësuese dhe mendohet të jenë titullarë, në ndeshjen e ardhshme ndaj Espanjolit. Këta tre futbollistë, në dhjetë minutat e fundit të stërvitjes së djeshme, punuan me portierin Iker Kasiljas, me disa goditje të njëpasnjëshme në portë.


Bekenbauer: Rauli, jetik për Spanjën

Sulmuesi i Realit të Madridit, Raul, do të jetë vendimtar në ecurinë e Spanjës në finalet e Kupës së Botës, ka bërë të ditur organizatori i "Gjermani 2006", Franc Bekenbauer. "Rauli është futbollisti më i mirë spanjoll. Fatkeqësisht është i dëmtuar dhe forma e tij fizike do të jetë jetike, për ecurinë e Spanjës në botëror", - bëri të ditur gjermani, gjatë një vizite në Spanjë, ku u takua edhe me Luis Aragonesin, trajnerin e përfaqësueses iberike. Kapiteni i kombëtares spanjolle, po vuan ende dëmtimin e pësuar në ligamentet e gjurit të majtë, gjatë ndeshjes së luajtur në fund të nëntorit ndaj Barcelonës.

Mjekët e Realit kanë bërë të ditur se riaftësimi i 28-vjeçarit po shkon ashtu si duhet dhe se, do të jetë i gatshëm për t'u rikthyer në mesin e muajit maj. Spanja do të bëjë pjesë në grupin H të Botërorit, së bashku me Ukrainën, Tunizinë dhe Arabinë Saudite. Bekenbauer shtoi: "Të gjithë e njohin stilin e lojës së Spanjës. I duhet vetëm një fitore në ndonjë veprimtari të rëndësishme dhe kushedi, ndoshta do të jetë botërori i tyre". Në fund të deklaratës së tij, presidenti i komitetit organizativ të Kampionatit Botëror dha mendimin e tij në lidhje me pretendentët: "E konsideroj Spanjën pretendente po aq se Francën, Italinë, Gjermaninë, Argjentinën, Holandën dhe Anglinë. Një shkallë mbi ta është Brazili. Pa dyshim që "Selesao" është pretendenti kryesor".

[Davius]

Trajneri përgëzon ecurinë e Realit dhe i jep rëndësi për "jetë a vdekje", sfidës ndaj Arsenalit në Champions 03-02-2006

Lopez Karo, i etur për trofe...


Lopez Karo pranon që futbollistët e tij po punojnë: "në 120% të mundësive të tyre, për të fituar diçka të rëndësishme". Për momentin, trajneri i Realit dëshiron të përqëndrohet vetëm te ndeshja e radhës ndaj Espanjolit, ndeshje të cilën Lopez Karo, e cilëson si vendimtare për fatet e të dyja skuadrave. Ja cila ka qënë intervista e trajnerit spanjoll, ku flet edhe për eliminimin e Barcelonës nga Kupa e Mbretit:

- Ç'mendim keni për eliminimin e Barcelonës nga Kupa e Mbretit?

- Më duhet të vlerësoj punën e bërë nga Saragoza. Rendimenti i saj ka qenë i shkëlqyer, pasi ka eliminuar një nga skuadrat më të forta në Spanjë dhe Europë. Kjo tregon edhe vështirësitë që do të kemi ndaj tyre në gjysmëfinale.

- Do të kishit pëlqyer një sfidë me Barcelonën?

- Për mua është njësoj. Ajo që ka rëndësi, është që Reali të jetë një hap më lart se kundërshtari. Të dyja skuadrat janë të vështira, kur flitet për gjysmëfinalet e një veprimtarie.

- Mendoni se eliminimi i Barçës në Kupë, do të ndikojë negativisht për skuadrën katalanase në ndeshjet e rradhës?

- Merrem vetëm me punët e Realit dhe me ato që më takojnë. Dua të përqëndrohem te ndeshja e së shtunës ndaj Espanjolit, pasi ky takim është thelbësor për ecurinë e të dyja skuadrave.

- Për herë të fundit, Reali e ka fituar Kupën e Mbretit në vitin 1993?

- Kemi shpresë, pasi po punojmë mirë. Jam i sigurtë se do të vazhdojmë të përmirësohemi. Skuadra po arrin maksimumin dhe ky trofe, është një nga objektivat që i kemi vënë vetes në fillim të sezonit.

- Skuadra juaj ka shënuar një numër rekord golash, gjatë muajit të janarit...

- Pas kësaj fshihet puna e të gjithë skuadrës. Po arrijmë nivele të rëndësishme, pasi të gjithë po japin maksimumin. Skuadra po luan me personalitet dhe rritja e nivelit të lojës, ka sjellë golat. Tani që do të rikthehen të gjithë futbollistët si Ronaldo dhe Kasano, do të jemi edhe më rezultativë. Ekipi po punon me 120% të mundësive dhe kjo më bën optimist për të ardhmen.

- Ndeshja më e rëndësishme e muajit shkurt, do të jetë ajo ndaj Arsenalit. Si ju duken "topçinjtë"?

- Ndeshjet ndërmjet rivalëve të këtij niveli, janë sfida të vërteta "për jetë a vdekje". Të dyja skuadrat i kanë mundësitë, për të vazhduar më tej në Champions. Janë të përgatitura fizikisht dhe psikologjikisht, por, për momentin më shqetëson më shumë Espanjoli.

- Çfarë ëndërroni në këtë sezon?

- Dua të paktën një titull. Tifozët e meritojnë pas tri vitesh, ashtu si e meritojnë edhe futbollistët që po bëjnë një punë të shkëlqyer. Një trofe do të na ndihmonte të ngihemi në elitën e futbollit. Atje ku të gjithë mendojnë se meritojmë të jemi.

- Ju kanë habitur hapat e bëra kohët e fundit nga Rauli?

- Jo, sepse e njoh prej pesë vjetësh. Ai është një profesionist i vërtetë dhe riaftësimi i tij, ka shkuar shkëlqyeshëm. Falë punës së Raulit dhe ndihmës së mjekëve, do të kemi në rradhët tona një futbollist mjaft të rëndësishëm, për dy muajt e fundit të sezonit.

[Davius]

Presidenti i Realit është shprehur i gatshëm për t'ia rinovuar kontratën mesfushorit 04-02-2006

Perez: Bekham do të qëndrojë

Presidenti i Realit të Madridit, Florentino Perez, ka bërë të ditur se disa skuadra angleze kanë kërkuar shërbimet e Devid Bekhamit, por ai shpreson se mesfushori 30-vjeçar do ta rinovjë kontratën me "merengesit". "Të gjitha skuadrat angleze po bëjnë të pamundurën për ta bindur Devidin të rikthehet në Premier Ligë, por ne jemi shumë të kënaqur nga paraqitja e tij, - tha Perez në një intervistë për televizionin e Realit. - Kemi filluar të mendojmë për kontratën e tij të re. Kemi edhe një vit e gjysmë kohë, kur do të bisedojmë me qetësi. Gjithsesi, dua të merrem me rinovimin vetëm gjatë verës, për ta mbyllur sa më parë këtë çështje. Kështu mund të evitojmë telenovelat në lidhje me të ardhmen e Bekhamit. Tifozët e Realit janë bindur nga aftësitë e Devidit. Ai është një futbollist i përkyer, nuk e kemi marrë vetëm për "hatër" të marketingut."

Bekhami kaloi te Reali, nga Mançester Junaited në verën e vitit 2003, për 35 milionë euro, por anglezi nuk ka fituar asnjë trofe me fanelën "merenges". Në këtë sezon Reali është 13 pikë prapa Barcelonës në kampionat, por ka fituar të drejtën për të luajtur në gjysmëfinalen e Kupës së Mbretit, në 1/8 e Ligës së Kampioneve do të ndeshet me Arsenali. Perez tha: "Synojmë Kupën e Mbretit, pasi është i vetmi trofe që nuk kam fituar si president i Realit. Më pas, në Ligën e Kampioneve, Reali shihet gjithmonë me një sy tjetër. Kemi filluar ta studiojmë Arsenalin dhe e kaluara ka treguar se ia kemi dalë mbanë ndaj skuadrave angleze. Gjithsesi, do të jetë një sfidë e vështirë, pasi përballë nesh çdo kundështar jep maksimumin."

[Davius]

Trajneri i ri, duket se ka gjetur recetën, që mund të çojë "galaktikët" të sukseset 06-02-2006

Lopez Karo, ai që bashkoi yjet?!

Real Madridi ka gjetur recetën që do ta çojë të sukseset, nën drejtimin e trajnerit të ri Huan Ramon Lopez Karo, sipas zëvendës presidentit të klubit, Emilio Butragenjo. Skuadra duket se ka gjetur veten e vet dhe po i organizon në mënyrën më të mirë, aftësitë e veta. "Ekipi po luan me një entuziazëm të madh dhe janë duke arritur rezultate shumë të mira,"- tha Butragenjo, pas fitores së Realit 4-0 ndaj Espanjolit, ndeshje e vlefshme për kampionatin.

"Futbollistët janë shumë të kënaqur me lojën dhe me grupin e formuar. Në këtë mënyrë, ata janë me mendje të qetë dhe janë të aftë, që të tregojnë të gjitha aftësitë e tyre në fushë. Për më tepër, kjo bën që fansat të largohen nga Santiago Bernabeu të lumtur dhe duke festuar". Pas një fillimi zhgënjyes të sezonit, nën drejtimin e trajnerit Vanderlei Luksemburgo, Reali ka gjetur vetveten, nën drejtimin e pasardhësit të tij, Lopez Karos.

Ndaj Espanjollit, madrilenët arritën fitoren e shtatë radhazi në të gjitha kompeticionet dhe në fakt, trajneri i ri ka bërë që të dalin në pah disa futbollistë të jashtëzakonshëm, gjë që kishte disa kohë që nuk ndodhte. Devid Bekhami ishte një nga më të mirët në fushë ndaj Espanjolit, ndërsa Zinedine Zidane, shënoi dy gola. Trajneri ka treguar aftësi në përgatitjen individuale të çdo futbollisti. Ronaldo arriti të shënojë gol, pas një muaj mungese për shkak dëmtimi, ndërsa blerja e re Sisinjo, vazhdon të dhurojë spektakël në krahun e djathtë të mesfushës. Mesa duket, ka ardhur koha që shpenzimet e shumta dhe yjet e mbledhur së bashku, të dhurojnë atë që pritet...

[Davius]

Mesfushori anglez, është përkrahur shumë nga publiku, pasi ka dhuruar spektakël ndaj Espanjolit 06-02-2006

Bekham, rikthehet lider në fushë

Bekham, boks me "paparacin"

Një "paparac" po fotografonte familjen Bekham, por në fakt mesfushori i Realit të Madridit, e pa atë dhe e goditi. Kjo gjë ka ndodhur në Madrid më 19 janar dhe ky incident, është publikuar në të përditshmen britanike "News of The World". Në fakt, gjithçka është edhe e filmuar. Ndërkohë, kapiteni i Kombëtares së Anglisë tha se, ishte shumë i mërzitur nga "paparacët". "Ata janë kudo. Çfarë do gjëje që bëj unë, ata duhet t'i kem nga pas. Jam shumë i mërzitur",- tha ai.

Trajneri i Realit të Madridit, Lopez Karo është shprehur shumë i kënaqur nga loja e futbollistit anglez, Devid Bekham. Në ndeshjen ndaj Espanjolit, ai arriti të shkëqlejë dhe të fitojë duartrokitjet e publikut sa herë që kapte topin. Ish-futbollisti i Mançesterit, duke qenë se është riktheyr, në kohët e tij të arta. Gjithçka që bëri në ndeshjen e ditës së shtunë, e vlefshme për kampionat, tregoi se ai po kalon një formë të jashtëzakonshme dhe duke qenë se talenti nuk i ka munguar asnjëherë, ai po bëhet dirigjenti i lojës madrilene. Ditën e shtunë, ai e filloi ndeshjen me një asist ndaj Gutit, i cili shënoi golin e parë të takimit. Por në fakt, më shumë ranë në sy, pasat e sakta nga 50 metra largësi. Lopez Karo, duket se është shumë i mahnitur nga futbollisti i tij dhe në fakt, i ka besuar shumë përgjegjësi në fushën e lojës. Për ndeshjen ndaj Saragozës, e vlefshme për Kupën e Mbretit, trajneri i Realit shpreson që mesfushori anglez të jetë sërish në formë të mirë, pasi ajo sfidë është shumë e rëndësishme. Madrilenët synojnë triumfin në çdo kompeticion këtë vit, duke qënë se kanë dy sezone, që nuk shijojnë dot asnjë kupë.

- Fitore e lehtë dhe e shoqëruar nga një lojë e bukur, në ndeshjen ndaj Espanjolit.

- Ndeshja ishte e lehtë për ne. Luajtëm shumë mirë, e kontrolluam ndeshjen gjatë gjithë kohës, arritëm të kënaqeshim dhe njerëzit ja kaluan shumë mirë.

- Cili është suksesi i kësaj periudhe të mirë, që po kalon ekipi?

- Jemi të bashkuar dhe kemi punuar shumë. Ekipi luan shumë mirë, pasi të gjithë kanë qënë shumë të përkushtuar në stërvitje. Me thënë të drejtën, të gjithë futbollistët e ekipit, janë në një formë shumë të mirë dhe gjithashtu lufta është e madhe, për të zënë një vend në formacion.

- Jeni të kënaqur nga publiku, që ju mbështeti dhe ju përkrahu shumë, në Santiago Bernabeu?

- Ishte diçka e jashtëzakonshme. Si fillim, është mahnitëse të luash në Bernabeu. Mendojeni si ndihesh, kur të gjithë thërrasin emrin tënd.

- Jeni gati të bisedoni, për një rinovim të kontratës me Realin, e cila mund t'ju lidhë me skuadrën për shumë vite të tjera?

- Po. Jam shumë i kënaqur dhe do të flas me presidentin për një gjë të tillë. Jam i sigurt se do të bëj zgjedhjen e duhur për karrierën, jetën dhe familjen time.

- Keni mundësi, për të fituar kampionatin?

- E pamundur nuk është, por shumë e vështirë. Ne po mundohemi të arrijmë pak e nga pak, Barcelonën. Detyra jonë, është që të mos bëjmë asnjë hap fals.
- Po për Kupën e Mbretit, çfarë mund të thoni?

- Do të kemi një përballje të vështirë me Saragozën në gjysëmfinale. Gjithsesi duhet ta theksoj, se është një trofe shumë i rëndësishëm për ne.

[Davius]

Mesfushori anglez ka bërë të ditur se, do të zgjasë kontratën e tij, para verës 08-02-2006

Devid Bekham: Nuk lëviz nga Madridi

Edhe pse janë hapur shumë zëra për të ardhmen e Devid Bekhamit, ky i fundit, duket se kërkon t'u vërë kapak të gjithave. Ai ka deklaruar se do të firmosë një kontratë të re, e cila do ta lidhë atë me Realin e Madridit për një kohë të gjatë. Nëse kanë qenë të shumta arsyet që kanë nxjerrë mediat, të cilat do shkaktonin largimin e tij nga klubi madrilen, kapiteni i Anglisë, duket se është shumë i kënaqur.

"Do të flas me drejtuesit e klubit për zgjatjen e kontratës, para verës. Nuk ka dyshim që do të qëndroj këtu. Ajo që kam lënë deri tani me drejtuesit, ka qënë se në fillim duhet të mendojmë për synimet e këtij sezoni dhe më pas, të flasim për zgjatjen e kontratës. Ata e dinë që unë dua të qëndroj te Reali dhe unë e di, që ata duan që unë të qëndroj", - tha 30-vjeçari. Mesfushori anglez, ka treguar një formë të shkëlqyer kohët e fundit dhe në fakt, ishte një nga më të mirët në fushën e lojës, në fitoren e madrilenëve 4-0 ndaj Espanjolit. Ai firmosi një kontratë 4-vjeçare me Realin e Madridit, në verën e vitit 2003, kur u largua nga Mançester United, për shifrën e 35 milion eurove. Bekham, i cili nuk ka arritur akoma të fitojë një trofe me skuadrën spanjolle, tha:

"Jam duke shkuar në shtëpinë time të re kohët e fundit dhe klubi e di këtë gjë. Nuk do të kisha blerë një shtëpi të re në Madrid, nëse nuk do të kisha dëshirë të qëndroja. Unë jam në një nga skuadrat më të mira në botë. Për çfarë arsye unë duhet të largohem?". Pasi e nisi jo shumë mirë sezonin, kur trajner ishte braziliani Vanderlei Luksemburgo, Reali i Madridit duket se ka gjetur formën e duhur, nën drejtimin e Lopez Karo. Në kampionat, ata renditen në vendin e tretë, dhjetë pikë pas kryesuesve të Barcelonës, kanë siguruar kualifikimin për në gjysmëfinalet e Kupës së Mbretit dhe do të përballen me Arsenalin në Ligën e Kampioneve, ndeshje që do të luhen më 16 dhe 21 shkurt

[Davius]

Trajneri i Realit për Saragozën: Eshtë një ekip i motivuar, i kompletuar dhe me ide të qarta 08-02-2006

L.Karo: Gjithçka, për Kupën e Mbretit

Trajneri i Realit të Madridit, Huan Ramon Lopez Karo, duket se ka gjetur recetën që ka risjellë një skuadër të fortë dhe në fakt, po synon të fitojë Kupën e Mbretit. Sot, skuadra madrilene do të luajë në transfertë ndaj Saragozës, ndeshje e vlefshme, si përballja e parë e gjysëmfinales së Kupës së Mbretit. Në fakt, trajneri i Realit e shikon me një sy optimist gjëndjen e ekipit të tij dhe kërkon një shpirt të madh gare dhe një lojë kolektive. Gjithashtu, ai ka folur se nuk do, që me kalimin e kohës, të mos ketë më asnjë problem me dëmtimet.
- Me rikthimin e Raulit, infermieria juaj është pothuajse bosh...

- Rikthimi i sulmuesit, është një faktor shumë pozitiv. Jemi të kënaqur që ai i është bashkuar grupit dhe për një gjë të tillë, falenderoj shumë mjekët e ekipit. Shpresojmë që ai të arrijë sa më shpejt formën e tij maksimale dhe të ndihmojë sa më shumë skuadrën.

- Çfarë mund të thoni, për ndeshjen gjysmëfinale ndaj Saragozës?

- Një sfidë shumë e vështirë, me një ekip të një niveli të shkëlqyer. Ne duhet të jemi të përqëndruar në lojë dhe të ndërgjegjshëm, se çfarë duhet të bëjmë. Dimë se si të sillemi dhe mendoj se jemi në një formë të mirë. Do të japim gjithçka për të fituar Kupën e Mbretit.

- Kjo ndeshje, është më e rëndësishme se ndeshja e së shtunës ndaj Bilbaos, e vlefshme për kampionat?

- Mendoj se, secila ndeshje është shumë e rëndësishme. Detyra jonë është që të japim maksimumin në fushën e lojës dhe të fitojmë të gjitha ndeshjet e mundshme. Ne thjesht duhet të jemi në një formë të mirë fizike dhe të një rendimenti kolektiv.

- Cili është opinioni juaj për deklaratat e Dekos?

- Profesionistët nuk kanë asnjë qëllim të keq, në deklaratat e tyre. Duhet ta pranoj që Barça është një ekip shumë i mirë, me futbollistë profesionistë dhe që po tregon një formë të shkëlqyer në kampionat. Gjithsesi, ne jemi duke punuar dita ditës dhe jemi duke rritur ndjeshëm formën e skuadrës. Ne duhet të jemi të qetë dhe të vazhdojmë arritjet e rezultateve të mira. Nëse Barcelona i fiton të gjitha ndeshjet që kanë mbetur, atëherë ne nuk mund t'i arrijmë dot.

- Çfarë i trembeni më shumë te Saragoza?

- Ata janë shumë të motivuar në fushën e lojës. Janë një ekip i ekuilibruar dhe i kompletuar, me ide shumë të qarta. Në aspektin e repartit sulmues, janë shumë të shpejtë dhe kanë futbollistë me shumë aftësi.

- U kënaqët nga humbja e Barcelonës ndaj Atletikos?

- Me thënë të drejtën, m'u bë qejfi. Kjo pasi, katalanasit kishin treguar se ishin shumë të vështirë për tu mundur. Për më tepër, ne jemi në një situatë të tillë, që duhet vetëm të përfitojmë nga gabimet e tyre.

- Flisni shumë me presidentin Florentino Perez?

- Po. Ai udhëton me ekipin dhe kam folur me të, për të gjitha gjërat. Mendoj se klubi i ka idetë e qarta.

- Ju përdorni skemën 4-1-4-1. Mendoni se është e duhura?

- Aftësia e një trajneri, është që të zgjedhë skemën e duhur për një ekip. Mendoj se kjo skemë i përshtatet Realit të Madridit, gjithsesi, nuk është e thënë se nuk mund ta ndryshoj.

[Davius]

Trajneri vlerëson me nota pozitive paraqitjen e "merengesëve" në Bilbao 13-02-2006

L.Karo: Mbrojtja, çelësi i fitores

Trajneri i Realit, Lopez Karo, ndihet i lumtur pas fitores që skuadra e tij arriti në Bilbao, në ndeshjen e luajtur të shtunën për Primera Divizionin. Ja cila ka qenë intervista e tij dhënë menjëherë pas suksesit në "San Mames":
Reali kishte gjashtë vite që nuk fitonte në Bilbao. Në dy ndeshjet e fundit nën drejtimin tuaj ka arritur po aq fitore.

Jam shumë i kënaqur nga puna kolektive e skuadrës. Futbollistët e mi u treguan profesionistë të vërtetë në arritjen e kësaj fitoreje. 45 minutat e para ishin një shembull i futbollit që mund të dhurojë kjo skuadër. Më vjen keq vetëm për rastet e humbura.

Përse u vonuat aq shumë me zëvendësimet?

Eshtë një pyetje së cilës nuk dua t'i përgjigjem. Janë vendime personale që i konsideroj si më oportune për të mirën e skuadrës. Asnjëherë nuk flas për ato që konsiderohen vendime të trajnerit.

Cili ka qenë çelësi i ndryshimeve në harkun e tri ditëve, nga humbja 6 1 në Saragozë, te fitorja 2 0 në Bilbao?

Duket qartë, i gjithë ndryshimi qëndron në mbrojtje. Mendoj se kjo ishte forca e skuadrës. Mbrojtja ishte çelësi i fitores në "San Mames". Kam besim tek e ardhmja e kësaj skuadre, pasi tani jemi një grup i bashkuar.

Taktika e zgjedhur nga Bilbao i dha mundësinë ndeshjes të arrinte nivele spektakolare.

Çdo ekip dhe çdo trajner synon të fitojë. Klemente nuk u mbyll në mbrojtje. Mendoj se Reali e meritoi fitoren dhe mund të kishte fituar me një rezultat edhe më të thellë.

Pablo Garsia, dëmtim i rëndë në ligamente

Pablo Garsia, mesfushori i Realit të Madridit, ka thyer ligamentin anësor të gjurit të majtë, sipas asaj që thanë mjekët "merenges" pas vizitës së kryer të hënën në mëngjes. Uruguajani u dëmtua pas një kontakti me sulmuesin e Bilbaos, Ismael Urzaiz, gjatë ndeshjes së luajtur të dielën në "San Mames". Kësisoj, ekzistojnë të gjitha gjasat që ish mesfushori i Osasunës t'i ketë dhënë lamtumirën sezonit. Zëvendësuesi i tij në formacionin e Lopez Karos do të jetë ai që u aktivizua në sfidën ndaj Bilbaos, danezi Tomas Gravesen.