Libri “Ngjallja” - Kisha Orthodhokse Autoqefale e Shqipërisë, 1991-2003”

[Albo]

Promovohet libri “Ngjallja” - Kisha Orthodhokse Autoqefale e Shqipërisë, 1991-2003”

Me dashuri të thellë për Zotin dhe shqiptarët

Ditën e martë, më 11 tetor 2005, ora 18:00 në Galerinë Kombëtare të Arteve, u promovua libri në anglisht “Resurrection” (“Ngjallja” - Kisha Orthodhokse Autoqefale e Shqipërisë 1991- 2003), me autore misionaren amerikane Lynette Hoppe. Libri, ka formën e një albumi me rreth 440 fotografi dhe ka në fokus Ngjalljen e Kishës Orthodhokse në Shqipëri. Lynette Hoppe është diplomuar për Artet e Bukura në kolegjin e North Western në Minneapolis, SHBA. Ajo ka gjithashtu edhe dy master-a, një për arte dhe një për studime ndërkulturore. Autorja, nga viti 1998 shërben pranë Kishës sonë, si bashkëpunëtore në fushën e botimeve dhe të kujdesit për rininë dhe fëmijët. Për një periudhë 7-vjeçare ajo ka përjetuar nga afër shumë prej arritjeve të Kishës sonë. (Libri kushton 2 mijë lekë)

Në këtë aktivitet, që zhvillohej në seksionin e Artit Bizantin të Galerisë së Arteve kishin ardhur për të nderuar autoren Fortlumturia e Tij, Kryepiskopi Anastas, Mitropoliti i Korçës, Hirësia e Tij, Joani dhe Drejtori i Akademisë, Imzot Ilia.
Në fjalën e tij, Hirësia Ilia i bëri një përshkrim përmbledhës librit, duke u ndalur dhe komentuar pjesë të veçanta të tij. “Shihni me vëmendje fotot, - theksoi ai, - e përpiquni të kujtoni historinë e pashkruar, historinë trime, kurajoze dhe të guximshme që përshkruan njeriun e Kishës, i cili erdhi në Shqipëri me besimin në Krishtin dhe i armatosur vetëm me të vërtetën e Ungjillit të Tij. Lynette Hoppe na ka lënë një trashëgimi, një kronologji në fjalë dhe fotografi të ngjalljes së Kishës Orthodhokse të Shqipërisë dhe ne i jemi përjetësisht mirënjohës. Ky botim i shërben çdo shtëpie dhe çdo biblioteke si një burim real i historisë dhe i ikonës së Kishës së ringjallur plot jetë dhe që akoma lufton për lavdinë e Perëndisë”.
Në vazhdim e mori fjalën vetë autorja e librit, znj. Lynette Hoppe. Më pas Hirësia e Tij Joani tha ndër të tjera: “Gjatë përgatitjes së këtij libri është derdhur një energji e jashtëzakonshme. Protagonisti kryesor është Lineta, e cila ka punuar për të me shumë dashuri dhe do të doja ta falënderoja në veçanti. Jo më kot libri është quajtur “Ngjallja”, pikërisht sepse ai paraqet ngjalljen e Kishës Orthodhokse. Do të doja t’ju kujtoja që të vinit re se sa punë e madhe është bërë saqë ishte shumë e vështirë t’i paraqisje në këtë album të gjitha.
Në një farë mënyre autori i këtij libri është Kryepiskopi, sepse ai ishte ideatori, udhëzuesi, këshilluesi dhe protagonisti i bërjes së veprës si dhe personazhi kryesor i ringjalljes së Kishës në Shqipëri. Doja të falënderoja edhe qindra njerëz të tjerë, që në mënyrë direkte apo indirekte kanë ndihmuar për përgatitjen e librit, pasi ka qenë produkt i një pune grup, por koordinatori i këtij grupi ka qenë vetë Lineta. I urojmë asaj shëndet, fat e lumturi”.
Në fund, Kryepiskopi Anastas do ta cilësonte librin: “Një shenjë, një kandil bese, shprese e dashurie, i mbushur me bukuri, ndjeshmëri dhe saktësi për të vërtetën. Unë ndihem ngushtë, sepse këtu u fol për mua, por personi qendror është Lineta. Ajo mblodhi me shumë dashuri, njohje dhe delikatesë këtë material që paraqet. Prandaj i detyrohemi me falënderime me gjithë shpirt.
Këto faqe nuk janë për një ose dy persona, por i takojnë mbarë komunitetit orthodhoks që jetoi me shpresën dhe gëzimin e ngjalljes, duke mbajtur gjithmonë këtë qiri të Pashkës dhe duke thirrur “Krishti u Ngjall!”. Por e rëndësishme është se ky libër nuk është vetëm për ne, ai është një dritare që hapet për botën dhe tregon pikërisht se ajo që u bë këto vite këtu, u bë me pjesëmarrjen e mbarë orthodhoksëve, me dashurinë e mirëkuptimin e njerëzve që bëjnë pjesë në komunitetet e tjera fetare dhe ka një kuptim më të thellë jo vetëm për Shqipërinë e Ballkanin, por edhe për botën më gjerë. Libri është shumë i rëndësishëm edhe për brezin e ri, sepse duhet ta marrë ai pishtarin dhe të vazhdojë vrapimin. Rruga jonë po mbaron. Vrapuam në kilometrat e parë, por ju duhe të bëheni gati për të rendur më tej. E keni parë, se këtë pishtar e mbajtën shumë njerëz që nuk lindën në këtë vend, megjithatë ata e deshën me gjithë shpirt.
Një shembull i gjallë është pikërisht Lynette Hoppe. Është shumë e vështirë që të kuptohen dimensionet e këtij fakti, që këtu të vijnë njerëz që nuk kanë lidhje me këtë vend, por vetëm sepse i besojnë Zotit dhe e duan Atë. Ata vijnë për të dhënë gjënë më të çmuar që ata kanë: një pjesë të zemrës së tyre, të krijimtarisë së tyre dhe kohën e tyre të vyer, me shumë sakrifica e pa menduar për vetveten. Ky është një mesazh për Shqipërinë që nuk duhet të harrohet... I uroj Linetës dhe Natanit që Zoti t’iu falë shumë shëndet, fuqi, frymëzim e t’i shenjtërojë brenda këtij marshimi që ata kanë ndërmarrë”.
Në vazhim u organizua një koktejl. Nën atmosferën e tingujve të orkestrinës së Radios “Ngjallja”, autorja si kujtim dha nga një autograf për kopjet e librit. Për të gjithë ata që e njohin, Lineta është artistja në arsim dhe në shpirt që gjatë viteve të qëndrimit të saj në Shqipëri ka dhënë shembullin e një njeriu që krishterimin e jeton dhe e rrezaton çdo çast. Me bisedat e saj të ngrohta, me sjelljen delikate dhe buzëqeshjen e saj të ëmbël, që s’do t’i hiqet asnjëherë nga fytyra e ndritshme ajo dëshmon besimin e patundur, forcën, dashurinë e kurajën e saj për jetën.

Aleks Çuri

[Albo]

Nga fjala e autores znj. Linette Hoppe

“Këto vite unë jam rritur bashkë me librin”

Pasi shfaqi gëzimin e të qenit përsëri në Shqipëri, vendin që ajo e ka dashuruar për këto shtatë vjet , ku ajo ka shërbyer si bashkëpunëtore e Kishës, vijoi: “Kur Kryepiskopi më kërkoi që të përgatisja diçka për botim që të përdorej si dhuratë për vizitorët dhe mbështetësit që ishin të interesuar të dinin diçka për punën e madhe që është bërë këtu në Shqipëri, duhet të pranoj që u stepa pak. Atëherë dija pak për Shqipërinë dhe sa kisha nisur të mësoja për veprimtarinë e Kishës Orthodhokse.
Gjithë këto vite unë jam rritur me librin. Gjatë këtyre viteve energjia dhe vizioni i mrekullueshëm i Kryepiskopit e ka zgjeruar veprimtarinë e Kishës e së bashku u rrit edhe libri... Kryepiskopi është një njeri me dashuri të thellë për Zotin dhe për shqiptarët. Dua ta falënderoj Fortlumturinë e Tij, që ma besoi mua përfundimin e kësaj vepre, si edhe bashkëpunëtorët e mi që më ndihmuan. Dua të falënderoj edhe Zotin që më dha forcën edhe energjinë për ta mbaruar librin”.

[ndreu]

S'eshte liber, por album fotografik.