Kryeparlamentarja Topalli viziton Kosovën

[Arb]

Presidenti Rugova tha se Kosova dhe Shqipëria kanë të njëjtat objektiva - integrimet euroatlantike

Prishtinë, 14 dhjetor 2005 /TN QIK - Presidenti i Kosovës Ibrahim Rugova priti sot në rezidencën e tij në Velani në një takim kryetaren e Kuvendit të Shqipërisë znj.Jozefina Topalli. Presidenti Rugova takimin e vlerësoi të frytshëm, ndërsa theksoi se marrëdhëniet dypalëshe po thellohen gjithnjë e më shumë.



Ndërkaq zonja Topalli u shpreh se e gjithë Shqipëria, institucionet dhe populli i saj, përkrahin njohjen e pavarësisë së Kosovë.

Presidenti Rugova tha se zonjën Topalli e kishte njoftuar me përgatitjet për bisedimet e mundshme që mund të zhvillohen për Kosovën, rezultati i të cilave, siç tha, do të jetë pavarësia, megjithëse insiston për njohje direkte.

"Në të njëjtën kohë unë insistoj për një njohje direkte të pavarësisë së Kosovës: një Kosovë të pavarur demokratike, paqësore, në Unionin Evropian, në NATO dhe në miqësi të përhershme me SHBA-të", tha Presidenti Rugova, duke rikujtuar se kjo zgjidhje do të ishte çelësi i "hapjes së rrugëve të reja, perspektivave të reja dhe do të qetësonte këtë pjesë të Evropës e të botës".

Presidenti Rugova premtoi se institucionet do të punojnë në të gjitha fushat për një bashkëpunim më të madh ndërmjet Kosovës dhe Shqipërisë, për të cilat tha se kanë të njëjtat objektiva - integrimin në Bashkimin Evropian dhe në ato euroatlantike.

Presidenti Rugova vuri në dukje se institucionet e Kosovës kanë pasur përkrahjen e Shqipërisë e të parlamentit të saj, por edhe më tej presin një përkrahje të tillë, duke i uruar mirëseardhjen kryeparlamentares shqiptare.

Znj.Topalli tha se takimi me Presidentin ishte një rast i mirë i realizimit të qëllimit të saj të veçantë e nderues, që t'ia shprehte personalisht, si dhe në emër të Parlamentit, përgëzimet më të mira, por edhe nga Kryeministri i Shqipërisë si dhe nga të gjithë shqiptarët, për kontributin e jashtëzakonshëm që Presidenti Rugova ka dhënë gjatë gjithë kësaj periudhe, siç u shpreh ajo, në misionin e shqiptarëve për të arritur pavarësinë.



Zonja Topalli tha se nën udhëheqjen e procesit të negociimit nga Presidenti Rugova është arritur progres.

"Njëkohësisht i bëj urimet më të mira për udhëheqjen e negociatave, të cilat kanë shënuar një progres të vërtetë, duke konsideruar me optimizëm që shumë shpejt do të kemi një finalizim të pavarësisë evropiane në Kosovë", tha znj.Topalli, duke ofruar edhe njëherë mbështetjen e gjithë Shqipërisë për realizimin e pavarësisë.

"Zoti President keni përkrahjen e gjithë mbështetjen e Parlamentit shqiptar, të Qeverisë së Shqipërisë, të shqiptarëve të Shqipërisë", tha ajo duke e vlerësuar si e drejtë që buron nga vullneti i shqiptarëve, dhe që sipas saj, kjo e drejtë po gjen mbështetjen gjithnjë e në rritje të ndërkombëtarëve, "por duke e konsideruar si një zgjidhje që absolutisht ndihmon paqen në rajon dhe stabilitetin në rajon", tha zonja Topalli pas takimit.

Në interesimin e gazetarëve se cili do të jetë roli i Shqipërisë në zgjidhjen e statusit, zonja Topalli tha se Shqipëria është aktive, "por Kosova ka Presidentin, ka qeverinë, ka trupin negociator".

"Ne sigurisht me vullnetin e mirë dhe dëshirën e madhe që procesi të përshpejtohet jemi aktivë për të mbështetur të gjitha përpjekjet e Presidentit Rugova, të qeverisë, të parlamentit dhe të ekipit negociator, që po punon me një zë të vetëm, duke pasur një vizion perëndimor dhe duke synuar një pavarësi evropiane, dhe një sovranitet integrimi", tha znj.Topalli.

Ajo njëkohësisht theksoi se një vullnet i tillë politik ekziston edhe në Shqipëri, ndërsa për të me pavarësinë e Kosovës do të fillonte një histori e re në marrëdhëniet dypalëshe.

"Kjo është ajo që e dëshirojmë edhe ne shqiptarët në Shqipëri, sepse me një Kosovë të pavarur natyrisht që fillon pastaj të hapet një kapitull i mirëqenies, i bashkëpunimit ekonomik dhe i progresit", tha kryeparlamentarja Topalli, ndërsa iu drejtua edhe njëherë Presidentit Rugova me shpjegimin: "Jemi realisht të interesuar për të forcuar bashkëpunimin tonë ekonomik dhe në fushat e tjera".

[Arb]

Deputetet e Kuvendit të Kosovës u takuan me kryeparlamentaren Jozefina Topalli

Prishtinë, 14 dhjetor 2005 /TN QIK - Kryeparlamentarja e Shqipërisë znj.Jozefina Topalli, u prit sot edhe nga deputetet e Kuvendit të Kosovës.

Në takim është biseduar për bashkëpunimin ndërmjet dy parlamenteve, rrjedhat aktuale shoqërore e politike në Kosovë dhe Shqipëri, e në këtë kontekst edhe kontributi i gruas si deputete në zhvillimet e gjithmbarshme.

Melihate Tërmkolli, Flora Brovina e deputete të tjera kanë theksuar se thellimi i mëtejmë i bashkëpunimit ndërmjet dy parlamenteve, e edhe i deputeteve nga dy vendet, ka një rëndësi të veçantë, njofton zyra për infomim e Kuvendit. Shembulli i personalitetit të Jozefina Topallit, shihet si një inkurajim për angazhime edhe më të mëdha të femrave.

Në këtë takim u shpreh mirënjohje për kontributin e madh që po jep Shqipëria për sensibilizimin e opinionit evropian e botëror drejt zgjidhjes së statusit final të Kosovës, njohjes së pavarësisë së Kosovës.
Kryeparlamentarja Topalli tha se në të gjitha kontaktet me bashkësinë ndërkombëtare, në krye të listës është çështja e zgjidhjes së statusit final në pajtim me vullnetin e popullit të Kosovës. Në këtë frymë viti 2006 do të jetë vit historik për Kosovën, theksoi Jozefina Topalli.

Ajo tha se kundruall sfidave që dalin para Shqipërisë, në dëshirat për integrime sa më të shpejta në organizmat e Unionit Evropian, Parlamenti i Shqipërisë është shndërruar në një arenë të jashtëzakonshme, për të realizuar këto synime.

“Mirëpo, për të arritur këtë, Shqipërisë i duhet të zhvillojë një luftë të pa kompromis kundër korrupsionit dhe krimit të organizuar. Në vazhdë të kësaj beteje dhe të reformës që po bëhet në Shqipëri, tashmë vijnë edhe mesazhe shpresëdhënëse nga Brukseli”, tha znj.Topalli.

Në shenjë kujtimi kryeparlamentares Jozefina Topalli iu dhuruan edhe disa dhurata modeste, bëri të ditur zyra për informim e Kuvendit të Kosovës.

[Arb]

Jozefina Topalli përcjell mesazhin e mbështetjes së Shqipërisë për statusin final të Kosovës

Prishtinë, 14 dhjetor 2005 /TN QIK - Kryetarja e Parlamentit të Shqipërisë, Jozefina Topalli, në ditën e dytë të vizitës në Kosovë, sot takohet me Presidentin Ibrahim Rugova, Kryeministrin Bajram Kosumi dhe me përfaqësuesit e partive politike dhe me deputetë.



Ndërkaq gjatë dje pasdite u takua me zëvendësshefin e UNMIK ut Lari Rosin dhe me Kryeparlamentarin, Nexhat Daci. Pas takimit me homologun e saj, zonja Topalli ka thënë se Shqipëria do t'i përkrahë proceset që po i kalon Kosova drejt arritjes së statusit përfundimtar të saj. Ajo shtoi se Shqipëria do të jetë aktive drejt finalizimit të çështjes së statusit të Kosovës që është pavarësia.

"Mesazhi ynë është mesazhi i mbështetjes i një Shqipërie aktive në statusin final të Kosovës që është pavarësia. Parlamenti i Shqipërisë ndjek me interes të veçantë zhvillimet në Kosovë dhe Kuvendi i Shqipërisë ka miratuar tashmë një rezolutë përmes së cilës shprehet përkrahja institucionale e Shqipërisë për pavarësinë e Kosovës", ka tha zonja Topalli.

Pavarësia evropiane e Kosovës është shumë afër realizimit. Kosova dhe Shqipëria janë dy vende evropiane që nga qenja e tyre e kanë ndier veten përherë evropianë, tha zonja Topalli.

Ndërkaq, Kryeparlametari Nexhat Daci u shpre se pret mbështetjen e Shqipërisë për proceset që po i kalon Kosova. Në sukseset e arritura, shtoi ai, shqiptarët do të jenë ngjarja më e rëndësishme për botën.

"Kemi një optimizëm që e ndajmë bashkarisht që shqiptarët do të jenë një hapening i mrekullueshëm i shekullit 21 për Evropën dhe botën" ka thënë Daci, duke shtuar se shqiptarët do të shpërndajnë lajme të paqes në rajon, të zhvillimit ekonomik, por edhe të krenarisë kombëtare.

Kryeparlamentarja shqiptare Jozefina Topalli ka lavdëruar shqiptarët në dy anët, siç ka thënë unitetin e tyre në kohët vendimtare.

[Llapi]

Topalli:Angazhimi i opozitës në negociata, mision më përtej sesa misioni i saj




Prishtinë, 14 dhjetor 2005 (Kosovapress) Time: 14 : 48

Kryetari i PDK-së, Hashim Thaçi, është shprehur të mërkurën për një bashkëpunim më intensiv ndërmjet Kosovës dhe Shqipërisë në angazhimin për zgjidhjen e statusit të Kosovës, shtet i pavarur dhe sovran, si dhe në përshpejtimin e procesit të Shqipërisë për integrim të strukturave të BE-së dhe NATO
---
“Opozita është pjesa komplementare e parlamentit që ndoshta në momentin që është në këtë pozicion nuk e kupton se sa i rëndësishëm është roli i saj. Unë e kam pasur fatin të jem në opozitë 8 vjet dhe e di shumë mirë se çfarë do të thotë, por opozita ka një rol të jashtëzakonshëm. Kështu që çdo parti, në çdo parlament të botës, sidomos në parlamentet tona që nuk kemi një traditë shumë të madhe në pluralizëm, ato janë më të rëndësishme se në vende tjera që kanë më shumë traditë”, ka theksuar zonja Topalli.

Edhe kryetari i PDK-së Hashim Thaçi theksoi nevojën për thellimin e bashkëpunimit midis Kosovës dhe Shqipërisë, sidomos gjatë procesit të definimit të statusit të Kosovës. Ai shfaqi besimin se zonja Topalli, në cilësinë e kryetares së Kuvendit të Shqipërisë do të angazhohet më shumë në këtë drejtim.

“Ky rol do të reflektojë edhe në thellimin e bashkëpunimit mes Qeverisë së Shqipërisë dhe Qeverisë së Kosovës. Besoj se do të këmbehen edhe përvojat e Parlamentit të Shqipërisë me Parlamentin e Kosovës. Natyrisht që Parlamenti i Kosovës të jetë më aktiv dhe natyrisht që diçka edhe Parlamenti i Shqipërisë, atë frymën më disponuese më relaksuese ta marrë nga Parlamenti i Kosovës”, tha Hashim Thaçi.