Shërbesa e Mëngjesit

[Albo]

Botohet me bekimin e Fortlumturisë së Tij
Kryepiskopit të Tiranës, Durrësit dhe gjithë Shqipërisë
Prof. Dr. Anastasit



Ribotim i librit "Mëngjesorja" shtypur në Shtypshkronjën "Ngjallja" në vitin 1977


Ky libër vjen për të mbushur një boshllëk të rëndësishëm të adhurimit të përditshëm të besimtarit. Ndërsa prej kohësh ka dalë në qarkullim të gjerë dhe është bërë një lutje e domosdoshme e besimtarëve «Pasdarka», me të cilën mbyllet dita, ka munguar deri tani lutja e mëngjesit, «Mëngjesorja», me të cilën nis dhe bekohet dita.
Ky libër nuk e përmban të tërë «Mëngjesoren», por një përmbledhje të saj, një përzgjedhje të lutjeve bazë, në mënyrë që shkurtimisht të bëhet i mundur përdorimi nga ana e të gjithë të Krishterëve Orthodhoksë shpresëtarë. Lutja është frymëmarrja e shpirtit. Të paktën në mëngjes dhe në mbrëmje le të kushtojmë një farë kohe për të komunikuar me Zotin e Perëndinë tonë, që të marrim hir dhe fuqi prej Tij. Dhe sigurisht gjatë gjithë ditës mund dhe duhet të jemi në kontakt me Të, nëpërmjet lutjes tepër të shkurtër, por dhe shumë të fortë të Jisuit: «0 Zot, Jisu Krisht, mëshiromë [mua mëkatarin]», ose «...mëshirona» etj.

[Albo]

SHËRBESA E MËNGJESIT

Në emrin e Atit e Birit edhe Shpirtit të Shenjtë. Amin.

Lavdi më Ty, o Perëndia ynë, lavdi më Ty.
O Mbret qiellor, Ngushëllimtar, Shpirti i së vërtetës, që ndodhesh kudo dhe i mbush të gjitha, thesari i të mirave dhe dhurues jete; eja dhe qëndro ndër ne dhe pastrona nga çdo njollë dhe shpëto, o i Mirë, shpirtrat tanë. Amin.

Shenjt Perëndi, Shenjt i fuqishëm, Shenjt i pavdekshëm, mëshirona (tri herë).

Lavdi Atit e Birit edhe Shpirtit të Shenjtë; tani e përherë e në jetë të jetëve. Amin.
Ati ynë që je në qiejt, u shenjtëroftë emri yt, ardhtë mbretëria jote, u bëftë dëshira jote, si në qiell, ashtu edhe mbi dhe. Bukën tonë të përditshme jepna neve sot; dhe falna fajet tona, sikurse edhe ne ua falim fajtorëve tanë; dhe mos na shtjer në ngasje, po shpëtona nga i ligu.

Pasi u ngritëm prej gjumit, Ty po të biem në gjunjë, o i Mirë, dhe himnin e Engjëjve po të thërresim, o i Fortë: Shenjt, Shenjt, Shenjt je, o Perëndi, me ndërmjetimet e Hyjlindëses, mëshirona.

Lavdi Atit e Birit edhe Shpirtit të Shenjtë.

O Zot, që më ngrite prej shtratit dhe prej gjumit, ndriçoma mendjen dhe zemrën dhe hapmi buzët që të të himnoj Ty, o Trini e Shenjtë: Shenjt, Shenjt je, o Perëndi, me ndërmjetimet e Hyjlindëses, mëshirona.
Tani e përherë e në jetë të jetëve. Amin.

Pa pritur Gjykatësi do të vijë dhe veprat e secilit do të zbulojë; por le të thërresim me frikë në mes të natës: Shenjt, Shenjt, Shenjt je, o Perëndi, me ndërmjetimet e Hyjlindëses mëshirona.

Mëshiro, o Zot. (12 herë)


Lutja e falënderimit

Duke u ngritur prej gjumit, të falënderoj Ty, o Trini e Shenjtë, se nga zemërgjerësia e shumtë dhe mirëdashja jote, nuk u zemërove me mua përtacin dhe mëkatarin, as nuk më shkatërrove bashkë me paudhësitë e mia, por të erdhi keq dhe u tregove njeridashës si zakonisht, për mua të dëshpëruarin e më ngrite për të psalur në mëngjes këndimin dhe të lavdëroj pushtetin tënd. Dhe tani, ndriçomi sytë e mendjes, hapma gojën, për të mësuar fjalët e tua, dhe për të kuptuar porositë e tua, dhe për të zbatuar vullnetin tënd, dhe për të të psalur duke të lavdëruar nga zemra, dhe për të himnuar emrin tënd të tërëshenjtë, të Atit e të Birit dhe të Shpirtit të Shenjtë, tani e përherë dhe në jetë të jetëve. Amin.


Lutja tjetër

Lavdi Ty, o Mbret, Perëndi i tërëfuqishëm, që me kujdesin tënd hyjnor dhe njeridashës, më bëre të denjë, mua mëkatarin e të padenjin, të ngrihem prej gjumit e të hyj në shtëpinë tënde të shenjtë. Prano, o Zot, edhe zërin e lutjes sime, si zërin e Fuqive të tua të shenjta dhe shpirtërore, dhe denjo që, me zemër të pastër dhe me shpirt përulësie, të të sjell lavdërimin me buzët e mia të ndyra; që të bëhem edhe unë, pjesëmarrës bashkë me virgjëreshat e urta, në shkëlqimin gazmor të shpirtit tim dhe të të lavdëroj Ty, Perëndinë-Fjalë, që lavdërohesh bashkë me Atin e me Shpirtin e Shenjtë. Amin.


Simboli i Besimit:

Besoj në një Perëndi, Atë të tërë fuqishëm, krijues të qiellit dhe të dheut dhe të gjithë të dukurave dhe të padukurave.
Dhe në një Zot, Jisu Krishtin, Birin e Perëndisë, të vetëmlindurin, që lindi prej Atit përpara gjithë shekujve. Dritë prej drite. Perëndi të vërtetë, prej Perëndie të vërtetë, të lindur, jo të bërë, që ka të qenët një me Atin, me anën e të cilit u bënë të gjitha.
Që për ne njerëzit edhe për shpëtimin tonë, zbriti prej qiejve, dhe u trupëzua prej Shpirtit të Shenjtë edhe Virgjëreshës Mari dhe u bë njeri.
Dhe u kryqëzua për ne në kohën e Pontit Pilat, dhe pësoi e u varros.
Dhe u ngjall të tretën ditë sipas Shkrimeve.
Dhe u ngjit në qiejt dhe rri në të djathtë të Atit.
Dhe do të vijë përsëri me lavdi të gjykojë të gjallët dhe të vdekurit, mbretëria e të cilit nuk do të ketë mbarim.
Dhe në Shpirtin e Shenjtë, Zot, jetëbërës, që buron prej Atit, që adhurohet e lavdërohet bashkë me Atin e me Birin, që foli me anën e profetëve.
Në një Kishë të shenjtë, të përgjithshme dhe apostolike.
Pohoj një pagëzim për ndjesën e mëkateve.
Pres ngjalljen e të vdekurve.
Dhe jetën e ardhshme të amshuar. Amin.


O Zot, shpëto popullin tënd dhe beko trashëgimin tënd. Dhuroju shpresëtarëve fitore mbi barbarët dhe ruaje shtetin tënd me anën e Kryqit tënd.
Lavdi Atit e Birit edhe Shpirtit të Shenjtë.
Ti që mbi Kryqin u lartësove me dashje, shtetit të ri që ka emrin tënd dhuroi dhembshuritë e tua, o Krisht Perëndi. Ngazëlloi me fuqinë tënde krerët tanë besnikë, duke u falur fitore kundër armiqve, paçin përkrahjen tënde, armë paqeje, trope të pamposhtur.
Tani e përherë e në jetë të jetëve. Amin.

O Hyjlindëse e mirë, e tërëhimnuar, mbrojtje e frikshme dhe e paturpëruar, mos i përbuz lutjet tona; mbështete shtetin e orthodhoksëve, shpëtoi ata që i urdhërove të mbretërojnë dhe dhuroju nga qiejt fitoren; se ti linde Perëndinë, o e vetmja e bekuar.

[Albo]

Gjashtë Psalmësi


Psalmi 3

O Zot, sa u shtuan ata që më shtrëngojnë? Shumë janë ata që ngrihen kundër meje;
Shumë i thonë shpirtit tim; nuk ka shpëtim për të tek Perëndia i tij.
Por ti, o Zot, për mua je ndihmësi im, lavdia ime dhe ai që kokën lart ma ngre.
Me zërin tim i thirra Zotit, dhe më dëgjoi nga mali i tij i shenjtë.
Dhe unë u shtriva e fjeta; u zgjova, se Zoti do të më ndihmojë.
Nuk do të kem frikë nga dhjetëra mijë njerëz, që më kanë rrethuar e më sulmojnë së bashku.
Ngrihu, o Zot, shpëtomë, o Perëndia im, se ti i godite gjithë ata që janë më kot armiqtë e mi, mëkatarëve ua theve dhëmbët.
Nga Zoti është shpëtimi; dhe mbi popullin tënd bekimi yt.

Dhe përsëri:

Dhe unë u shtriva e fjeta; u zgjova, se Zoti do të më ndihmojë.


Psalmi 37

O Zot, mos më qorto në zemërimin tënd, as mos më mundo në mërinë tënde.
Se shigjetat e tua m'u ngulën, dhe shtrëngove dorën tënde mbi mua.
Nuk ka shërim në trupin tim prej zemërimit tënd, nuk ka paqe në eshtrat e mia prej mëkateve të mia.
Se paudhësitë e mia e kapërcyen kokën time, porsi barrë e rëndë mbi mua u rënduan.
Plagët e mia u qelbën e u kalbën prej marrëzisë sime;
U mundova dhe u sfilita fare, gjithë ditën ecja i ngrysur.
Se veshkat e mia u mbushën me përqeshje, dhe s'ka shërim në trupin tim.
U bëra keq dhe u poshtërova krejt, ulërija nga psherëtima e zemrës sime;
Zot, gjithë dëshira ime është para teje, dhe psherëtima ime nga ti nuk u fsheh.
Zemra ime u trondit, fuqia ime më la, dhe drita e syve të mi, edhe kjo nuk është me mua.
Miqtë e mi dhe të afërmit e mi nga përballë m'u afruan dhe qëndruan; edhe farefisi im më qëndruan larg.
Dhe ata që shpirtin tim kërkonin, më shtrëngonin, dhe ata që të keqen time kërkonin shpifje thoshin, dhe gjithë ditën dinakëri mendonin.
Por unë, si i shurdhër nuk dëgjoja dhe si memec gojën s'e hapja.
Dhe u bëra si njeri që nuk dëgjon, dhe goja e të cilit nuk përgjigjet.
Sepse në ty shpresova, o Zot; ti do të dëgjosh, o Zot, Perëndia im.
Se thashë: Mos u gëzofshin kurrë për mua armiqtë e mi; dhe kur këmbët më lëkunden, mburren ndaj meje.
Se unë gati jam për frushkullim, dhe dhimbja ime është gjithmonë përpara meje.
Se paudhësinë time unë do të rrëfej dhe do të kujdesem për mëkatin tim.
Dhe armiqtë e mi rrojnë e janë më të fortë se unë. dhe ata që padrejtësisht më urrejnë u shumuan;
Ata, që me të këqija më shpërblejnë për të mirat, shpifin kundër meje, sepse unë ndiqja të mirën.
Mos më braktis, o Zot; Perëndia im, mos u largo nga unë;
Nxito të më ndihmosh, o Zot i shpëtimit tim.

Dhe përsëri:

Mos më braktis, o Zot; Perëndia im, mos u largo nga unë. Nxito të më ndihmosh, o Zot i shpëtimit tim.


Psalmi 62

O Perëndi, o Perëndia im. Ty të lutem në agim; shpirti im është i etur për ty, shumë më tepër trupi im në tokën e shkretë dhe djerr e të pa ujë.
Kështu t'u paraqita në shenjtërore për të parë fuqinë tënde dhe lavdinë tënde.
Se përdëllimi yt vlen më shumë se jeta; buzët e mia do ë të lavdërojnë.
Kështu do të të bekoj në jetën time dhe duart e mia do të ngre në emrin tënd.
Shpirti im u ngoptë porsi me dhjamë e me palcë, dhe goja ime do të të lavlërojë me buzë ngazëlluese.
Se të kujtoja Ty në shtratin tim, për ty mendoja në agime;
Se ndihmësi im u bëre, dhe do të ngazëllohem në mbrojtjen e krahëve të tu.
Shpirti im u ngjit pas teje; dhe e djathta jote më mbajti.
Dhe ata më kot kërkuan shpirtin tim; do të futen në më të poshtmet e tokës.
Në duar shpatash do të dorëzohen dhe pre dhelprash do të jenë.
Dhe mbreti do të ngazëllohet në Perëndinë, cilido që betohet për të do të lavdërohet, se goja e atyre që thonë padrejtësi u mbyll.

Dhe përsëri:

Për ty mendoja në agime, se ndihmësi im u bëre, dhe do të ngazëllohem në mbrojtjen e krahëve të tu. Shpirti im u ngjit pas teje; dhe e djathta jote më mbajti.


Lavdi Atit e Birit edhe Shpirtit të Shenjtë; tani e përherë e në jetë të jetëve. Amin. Aliluia, Aliluia, Aliluia, lavdi më Ty, o Perëndi (3 herë). Mëshiro, o Zot (3 herë). Lavdi Atit e Birit edhe Shpirtit të Shenjtë; tani e përherë e në jetë të jetëve. Amin.


Psalmi 87

O Zot, Perëndia i shpëtimit tim, përpara teje thirra ditë e natë;
Para teje ardhtë falja ime, përkule veshin tënd në lutjen time.
Se shpirti im u mbush me të këqija, dhe jeta ime iu afrua ferrit;
U llogarita me ata që zbresin në gropë, u bëra si njeri pa ndihmë, i lirë ndër të vdekur,
Si të vrarët që dergjen në varr, të cilët nuk i kujtove më, dhe që u sprapsën nga dora jote.
Më vunë në gropë më të thellë, në errësirë dhe në hije të vdekjes.
Zemërimi yt ra mbi mua, dhe hodhe mbi mua gjithë dallgët e tua.
Të njohurit e mi i largove nga unë, më bënë neveri për ta, u dorëzova dhe nuk dilja,
Sytë e mi u sëmurën nga mundimi. Të thirra, o Zot, tërë ditën, duart e mia i shtriva drejt teje;
Mos do të bësh mrekulli ndër të vdekurit? Apo mjekët do t'i ngjallin që të të lavdërojnë?
Mos do t'u tregohet përdëllimi yt në varr dhe e vërteta jote në humbje?
Mos do t'u tregohen mrekullitë e tua në errësirë dhe drejtësia jote në vend harrimi?
Dhe unë, o Zot, të thirra ty, dhe në mëngjes lutja ime tek ti do të arrijë.
Pse, o Zot, e shtyn tej shpirtin tim, fytyrën tënde pse e kthen prej meje?
Unë jam i varfër dhe me mundime që në rininë time, dhe kur u ngrita lart, u përula dhe u bëra nevojtar.
Zemërimet e tua kaluan mbi mua, frikësimet e tua më tronditën.
Më rrethuan si ujë tërë ditën, të gjitha bashkë më qarkuan.
Prej meje largove mik dhe të afërm dhe të njohurit e mi për shkak të vuajtjes.

Dhe përsëri:

O Zot, Perëndia i shpëtimit tim, përpara teje thirra ditë e natë. Para teje ardhtë falja ime, përkule veshin tënd në lutjen time.


Psalmi 102

Beko Zotin, shpirti im, dhe gjithë të brendshmet e mia emrin e tij të shenjtë;
Beko Zotin, shpirti im, dhe mos harro gjithë bamirësitë e tij;
Atë që fal gjithë paudhësitë e tua, atë që shëron gjithë sëmundjet e tua;
Atë që jetën tënde e çliron nga prishja, atë që të kurorëzon me përdëllim e dhembshuri;
Atë që dëshirën tënde me lë mirë e mbush, si shqiponjës do të përtërihet rinia jote.
Zoti është ai që bën përdëllim dhe u jep gjykim të gjithë atyre që u bëhet padrejtësi.
I bëri Moisiut të njohura udhët e tij, bijve të Izraelit dëshirat e tij.
Zoti është i dhembshur dhe përdëllimtar, zemër-gjerë dhe mëshirëplotë:
Nuk zemërohet përgjithmonë, as mëria e tij nuk do të mbajë përjetë;
Sipas paudhësive tona nuk na bën, as nuk na shpërbleu sipas mëkateve tona.
Se sa është lartësia e qiellit nga toka, aq forcoi Zoti përdëllimin e tij për ata që ia kanë frikën;
Sa larg është lindja nga perëndimi, aq i largoi nga ne paudhësitë tona.
Sikurse përdëllen ati bijtë, mëshiron Zoti ata që ia kanë frikën.
Se ai e njeh krijesën tonë, u kujtua se jemi baltë.
Ditët e njeriut janë si bari; si lule fushe, kështu lulëzon;
Se era kaloi mbi të, dhe nuk do të jetë më dhe vendi i tij më nuk dihet.
Por përdëllimi i Zotit mbetet jetë pas jete mbi ata që ia kanë frikën, dhe drejtësia e tij mbi bijtë e bijve që dhiatën e tij e ruajnë dhe porositë e tij i mbajnë mend që t'i zbatojnë.
Zoti e vendosi fronin e tij në qiell, dhe mbretëria e tij mbi të gjithë zotëron.
Bekoni Zotin, gjithë engjëjt e tij, të fortë në fuqi që fjalën e tij zbatoni duke dëgjuar zërin e fjalëve të tij.
Bekoni Zotin, gjithë fuqitë e tij, shërbyes të tij që bëni vullnetin e tij;
Bekoni Zotin, gjithë veprat e tij, në çdo vend të zotërimit të tij; beko Zotin, shpirti im.

Dhe përsëri:

Në çdo vend të zotërimit të tij; beko Zotin, shpirti im.


Psalmi 142

O Zot, dëgjoje faljen time, vëri veshin lutjes sime, sipas të vërtetës tënde, dëgjomë sipas drejtësisë tënde.
Dhe mos hyr në gjyq me shërbëtorin tënd, se asnjë i gjallë s'do të dalë i drejtë përpara teje.
Se shpirtin tim armiku e përndoqi, dhe jetën time përtokë e nëpërkëmbi, në vende të errëta më vuri të rri, si ata që prej kohësh kanë vdekur;
Dhe shpirti im m'u ligështua, zemra ime u trondit.
Ditët e lashta solla ndër mend; gjithë veprat e tua mendova, për krijesat e duarve të tua mendoja.
Shtriva duart drejt teje; shpirti im është për ty si tokë pa ujë.
Dëgjomë shpejt, o Zot; fryma m'u zu; fytyrën tënde mos e hiq nga unë, që të mos u ngjaj atyre që zbritën në gropë.
Bëmë të dëgjoj në mëngjes përdëllimin tënd, se tek ti shpresova; bëmë të njohur, o Zot, rrugën ku duhet të eci, se shpirtin tim tek ti e ngrita.
Shpëtomë nga armiqtë e mi, o Zot; tek ti kërkova strehë.
Mësomë të bëj vullnetin tënd, se ti je Perëndia im; shpirti yt i mirë do të më udhëheqë në vend të drejtë;
O Zot, për emrin tënd gjallëromë, sipas drejtësisë tënde nga shtrëngesa do të nxjerrësh shpirtin tim;
Dhe sipas përdëllimit tënd do të shfarosësh armiqtë e mi dhe do të humbasësh të gjithë ata që shpirtin tim mundojnë, se shërbëtori yt unë jam.

Dhe përsëri:

Dëgjomë sipas drejtësisë tënde dhe mos hyr në gjyq me shërbëtorin tënd. Shpirti yt i mirë do të më udhëheqë në vend të drejtë.

Lavdi Atit e Birit edhe Shpirtit të Shenjtë. Tani e përherë e në jetë të jetëve. Amin. Aliluia, Aliluia, Aliluia, lavdi më Ty, o Perëndi (tri herë). O Zot, shpresa jonë, lavdi më Ty.

[Albo]

Perëndia është Zoti dhe u shfaq ndër ne, i bekuar është ai që vjen në emrin e Zotit.
Vargu: Rrëfehuni te Zoti dhe thirrni emrin e tij të shenjtë.
Perëndia është Zoti dhe u shfaq ndër ne, i bekuar është ai që vjen në emrin e Zotit.
Vargu: Të gjithë kombet më rrethuan dhe me emrin e tij i mposhta.
Perëndia është Zoti dhe u shfaq ndër ne, i bekuar është ai që vjen në emrin e Zotit.
Vargu: Prej Zotit u bë kjo dhe është e çuditshme në sytë tanë.
Perëndia është Zoti dhe u shfaq ndër ne, i bekuar është ai që vjen në emrin e Zotit.


Ode 9-të

Vargu: Shpirti im madhëron Zotin dhe mendja ime u ngazëllua për Perëndinë, Shpëtimtarin tim.
Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde Fjalën-Perëndi, me të vërtetë Hyjlindësen, ty të madhërojmë.
Vargu: Se hodhi sytë mbi përulësinë e shërbëtores së tij, se ja që tani e tutje gjithë brezat do të më lumturojnë.
Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde Fjalën-Perëndi, me të vërtetë Hyjlindësen, ty të madhërojmë.
Vargu: Se tek unë bëri vepra madhështore i Fuqishmi dhe i shenjtë është emri i tij; dhe përdëllimi i tij do të jetë brez pas brezi për ata që ia kanë frikën.
Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde Fja-lën-Perëndi, me të vërtetë Hyjlindësen, ty të madhërojmë.
Vargu: Rrëfeu fuqi me krahun e tij; i shpërndau ata që krenohen me mendimin e zemrës së tyre.
Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde Fjalën Perëndi, me të vërtetë Hyjlindësen, ty të madhërojmë.
Vargu: Përmbysi të fuqishmit prej froneve, dhe i lartësoi të përulurit, të uriturit i mbushi me të mira, dhe të pasurit i dëboi të zbrazët.
Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde Fjalën-Perëndi, me të vërtetë Hyjlindësen, ty të madhërojmë.
Vargu: Përkrahu të birin e tij Izrael, duke sjellë ndërmend mëshirën që u premtoi etërve tanë, Avraamit dhe farës së tij përjetë.
Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde Fjalën-Perëndi, me të vërtetë Hyjlindësen, ty të madhërojmë.

[Albo]

Psalmi 50

Mëshiromë, o Perëndi, sipas mëshirës tënde të madhe dhe sipas dhembshurive të tua të shumta, shlyeje paudhësinë time.
Më laj krejt nga paudhësia ime dhe pastromë nga mëkati im.
Se unë e njoh paudhësinë time, dhe mëkati im është gjithmonë përpara meje.
Ndaj teje vetëm mëkatova dhe të keqen para teje e bëra, që ti të dalësh i drejtë në fjalët e tua. dhe të jesh fitimtar në gjykimin tënd.
Se ja, tek u ngjiza në paudhësi, dhe në mëkat më lindi nëna ime.
Se ja tek deshe të vërtetën; të patreguarat dhe të fshehtat e urtësisë tënde m'i tregove.
Spërkatmë me hisop, dhe do të pastrohem; më laj, dhe do të jem më i bardhë se bora.
Do më bësh të ndjej ngazëllim dhe dëfrim; do të ngazëllohen eshtrat e dobësuara. Hiqe fytyrën tënde prej mëkateve të mia, dhe shlyeji të gjitha paudhësitë e mia.
O Perëndi, krijo tek unë zemër të pastër dhe përtëri shpirt të drejtë në thellësi të zemrës sime.
Mos më hidh tej fytyrës tënde dhe mos largo prej meje Shpirtin tënd të Shenjtë.
Jepma përsëri ngazëllimin e shpëtimit tënd dhe forcomë me shpirt sundues.
Do t'ua mësoj rrugët e tua të paudhëve, dhe të pabesët do të kthehen tek ti.
Shpëtomë nga gjakrat, o Perëndi, Perëndi i shpëtimit tim, gjuha ime do të lavdërojë me gëzim drejtësinë tënde.
O Zot, do t'i hapësh buzët e mia, dhe goja ime do të shpallë lavdërimin tënd.
Se po të kishe dashur therore, do të t'i kisha sjellë; por ty nuk të pëlqejnë therore me djegie të plotë.
Theror për Perëndinë është shpirti i thyer; Perëndia nuk do ta përbuzë zemrën e thyer e të përulur.
0 Zot, bëji mirë Sionit, me mirëdashjen tënde; dhe muret e Jerusalemit u ndërtofshin.
Atëherë do të të pëlqejnë therore drejtësie, dhurata dhe therore me djegie të plotë. Atëherë do të të sjellin viça mbi altarin tënd.


Lavdërimet

Psalmi 148

Lavdërojeni Zotin nga qiejt, lavdërojeni atë në më të lartat.
Lavdërojeni atë, gjithë engjëjt e tij; lavdërojeni atë, gjithë fuqitë e tij.
Lavdërojeni atë, o diell edhe hënë, lavdërojeni atë gjithë yjet dhe drita.
Lavdërojeni atë, o qiejt e qiejve, dhe uji përmbi qiejt.
Le të lavdërojnë emrin e Zotit, se ai tha, dhe u bënë, ai porositi dhe u ndërtuan.
I forcoi ata në jetë dhe në jetë të jetëve; dha urdhër, dhe nuk do të kalojë.
Lavdërojeni Zotin nga toka, dragonj dhe gjithë humnera;
Zjarr, breshër, borë, akull, frymë stuhie, që zbatoni fjalën e tij;
Malet dhe kodrat të gjitha, drurë frutdhënës dhe kedra të gjithë;
Egërsirat dhe gjithë kafshët, zvarranikë dhe zogj me flatra;
Mbretër të tokës dhe popuj të gjithë, prijës dhe gjykatës të tokës të gjithë;
Djem edhe virgjëresha, pleq bashkë me më të rinj;
Le të lavdërojnë emrin e Zotit, se u lartësua emri i të vetmit; lavdërimi i tij është mbi tokë e qiell.
Dhe do të lartësojë ballin e popullit të vet; himn për gjithë oshënarët e tij, bijtë e Izraelit, popullin që i afrohet atij.


Psalmi 149

Këndoini Zotit këngë të re, lavdërimi i tij qoftë në mbledhjen e oshënarëve.
U dëfreftë Izraeli për atë që e bëri, dhe u ngazëllofshin bijtë e Sionit për mbretin e tyre.
Le ta lavdërojnë bijtë e Sionit emrin e tij me valle, le t'i psalin atij me timpan e me psaltir,
Se Zoti e pëlqen popullin e vet dhe do të lartësojë të butët në shpëtim.
Do të mburren oshënarët me lavdi dhe do të ngazëllohen mbi shtretërit e vet.
Në fytin e tyre lartësimet e Perëndisë, dhe në duart e tyre shpata me dy presa.
Për të bërë shpagim në kombet, ndëshkime në popujt.
Për t'i lidhur mbretërit e tyre në vargonj dhe të lavdishmit e tyre me pranga hekuri.
Për të bërë mbi ta gjykim të shkruar; kjo do të jetë lavdi për të gjithë oshënarët e tij.


Psalmi 150

Lavdërojeni Perëndinë në të shenjtat e tij, lavdërojeni atë në qiellin e fuqisë së tij;
Lavdërojeni atë për fuqitë e tij, lavdërojeni atë sipas madhërisë së tij të shumtë.
Lavdërojeni atë me zë trumbete, lavdërojeni atë me psaltir e me kitarë;
Lavdërojeni atë me timpan dhe me valle, lavdërojeni atë me korda e me instrumente;
Lavdërojeni atë me çembale tingëllues, lavdërojeni atë me çembale brohorie.
Çdo frymë le të lavdërojë Zotin.

[Albo]

Dhoksologjia

Lavdi Ty, Perëndisë që je në më të lartat dhe mbi dhenë paqe, dhe mbi njerëzit mirëdashje.
Të himnojmë, të bekojmë, të falemi, të lavdërojmë, Ty të falënderojmë për lavdinë tënde të madhe.
Zot Mbret, Perëndi qiellor, Atë i tërëfuqishëm; Zot Bir i vetëmlindur Jisu Krisht, edhe Shpirt i Shenjtë.
Zot Perëndi, qengj i Perëndisë, Bir i Atit që ngre mëkatin e botës, mëshirona, Ti që ngre mëkatet e botës.
Prano lutjen tonë, Ti që rri në të djathtë të Atit, edhe mëshirona.
Se Ti je Shenjt i vetëm, Ti je Zot i vetëm, Jisu Krishti, për lavdi të Perëndisë Atit. Amin.
Për çdo ditë do të të bekoj, dhe do të lavdëroj emrin tënd përjetë, e në jetë të jetës.
O Zot, u bëre streha jonë brez pas brezi. Unë thashë: O Zot, mëshiromë, shëro shpirtin tim se fajtova tek Ti.
0 Zot, tek Ti gjeta strehë, mësomë të bëj dëshirën tënde se Ti je Perëndia im.
Se pranë teje është burim jete; me dritën tënde do të shohim dritë.
Zgjate përdëllimin tënd mbi ata që të njohin. Bëna të denjë, o Zot, që të ruhemi këtë ditë pa ndonjë mëkat.
I bekuar je, o Zot, Perëndi i Etërve tanë, dhe emri yt është i himnuar dhe i lavdëruar në jetët. Amin
Le të jetë, o Zot, përdëllimi yt mbi ne, sikurse kemi shpresuar tek Ti.
I bekuar je, o Zot, mësomë porositë e tua. I bekuar je, o Zot, bëmë të mençëm në porositë e tua.
I bekuar je, o i Shenjtë, ndriçomë me porositë e tua.
O Zot, mëshira jote është përjetë, mos i hiq sytë nga veprat e duarve të tua.
Ty të ka hije lëvdata, Ty të ka hije himni, Ty të ka hije lavdia, Atit e Birit edhe Shpirtit të Shenjtë, tani e përherë e në jetë të jetëve. Amin.

U mbushëm në mëngjes me përdëllimin tënd, o Zot, dhe ngazëlluam e dëfruam gjithë ditët tona.
Dhe shkëlqimi i Zotit, Perëndisë tonë, qoftë mbi ne, dhe veprat e duarve tona drejtoi tek ne, dhe veprën e duarve tona drejtoje.
Eshtë mirë të lavdëroj Zotin, dhe t'i psal emrit tënd, o i Shumëlartë, të shpall përdëllimin tënd në mëngjes, dhe të vërtetën tënde çdo natë.
O Krisht, drita e vërtetë, që ndriçon dhe shenjtëron çdo njeri që vjen në botë, u shënoftë mbi ne drita e fytyrës tënde, që të shikojmë në të, dritën e paafrueshme; dhe drejta përçapjet tona në veprimet e porosive të tua; me ndërmjetimet e Nënës tënde të pacënuar dhe të gjithë Shenjtoreve të tu. Amin.

Këndimet e ditës nga Dhiata e Re - sipas Kalendarit Kishtar.

Me uratat e etërve tanë të shenjtë, o Zot Jisu Krisht Perëndi, mëshirona dhe shpëtona.