Bota myslimane po dënon me forcë botimin në disa gazeta evropiane të disa karikaturave të profetit Muhamed.
Qeveri, udhëheqës fetarë, shkrimtarë dhe shumë njerëz të zakonshëm në të gjithë rajonin i kanë dënuar këto karikatura.
Presidenti egjiptian Hosni Mubarak dhe qeveria e Indonezisë thanë se lirija e shtypit nuk duhet të shërbejë si preteks për të ofenduar një fe.
Islami i konsideron karikaturat e profetit si blasfemi.
Megjithëse nuk ka ndonjë gjë të shprehur specifikisht në Kuran që ndalon vizatimet e profetit, kjo është diçka që konsiderohet shumë fyese në traditën myslimane.
Ka pasur kërcënime, demonstrata dhe bojkote të mallrave nga Danimarka. Janë djegur flamurë dhe janë thirrur ambasadorë.
Në Gaza persona të armatosur kanë pushtuar zyra të Bashkimit Evropian. Militantët në Rripin e Gazas kanë kërcënuar se do të kenë si objektiva qytetarë të Danimarkës, Norvegjisë dhe Francës pasi karikaturat u ribotuan në këto vende.
Gazetat në të gjithë botën arabe e kanë kundërshtuar argumentimin se karikaturat janë shprehje e lirisë së fjalës, duke thënë se kjo nuk justifikon ofendimin e ndjenjave dhe besimeve të njerëzve.
Në shkrime editoriale kjo histori është portretizuar si pjesë e një sulmi më të gjerë ndaj Islamit dhe ka shumë paralajmërime për reagime më të ashpra në të ardhmen, ndërsa janë planifikuar demonstrata për të koinçiduar me lutjet e së premtes.
Shumë konsumatorë myslimanë vazhdojnë një bojkot të disa prodhimeve evropiane, dhe komisioneri evropian i tregëtisë Peter Mendelson i ka akuzuar gazetat se po i hedhin benzinë zjarrit.
Karikaturat, që u botuan në një gazetë daneze vitin e shkuar, janë ribotuar në një numër vendesh evropiane.
BBC.co.uk/albanian
Postuar më parë nga Davius
Krijoni Kontakt