Liqeni i Ohrit në rrezik...!

[tani_26]

Liqeni i Ohrit në rrezik, pronarët e lokaleve betonojnë 3.5 km breg




Pogradec –Qindra metra betonime, male me mbeturina dhe shumë gropa ku merret rërë. Kjo është pamja e një pjese të mirë të bregut të liqenit të Pogradecit, i cili është lënë prej disa kohësh në mëshirën e fatit. I njohur si një nga më të bukurit në Europë, ai është shpallur që në vitin 1980 nga UNESKO monument kulture dhe ruhet prej saj.
Por abuzimet me liqenin janë rritur. Pronarët e lokaleve përgjatë bregut të tij, si ata që kanë leje të rregullt ndërtimi, si ata që nuk e kanë këtë leje, kanë betonuar bregun në anë të së cilit kanë ngritur bizneset, nga fshati Lin deri në Tushemisht, gjatësi që shkon në rreth 3,5 km. Betonimet kanë kthyer në gri bregun që nga shkëmbi i Linit, në Pojskë, në Piskupat, në Pogradec dhe në Tushemisht. Cili është dëmi për liqenin? “Kjo do të thotë që liqenit të mos i lësh asnjë mundësi për t’u vetëpastruar nga pisllëqet. Dallga në vend që t’i nxjerrë ato në breg dhe më pas të pastrohet në zall, gjen vetëm betonin. Kështu që valët kthehen përsëri në liqen me po ato mbeturina, duke shtuar rrezikun që Ohri të kthehet në kënetë”,-shpjegon një peshkatar i vjetër nga Lini, Gale Bice.

Pasi e betonuan bregun, njerëzit po e kthejnë liqenin në një kosh mbeturinash. Vetëm disa ditë më parë, në anën e rrugës që të çon në pikën turistike të Drilonit, qindra makina shkarkuan buzë liqenit një sasi të madhe dheu, që jo vetëm kanë krijuar një pamje tmerrësisht të shëmtuar, por ka ndotur liqenin. Sa herë që në këtë pjesë formohen dallgë për shkak të erës, ato marrin ngjyrën e batakut.
Po të ecësh pak më poshtë bregut, do të shohësh një tjetër masakër të tij.

Qindra gropa të hapura përgjatë Ohrit ku merret rëra për ndërtim. “Kemi kapur dhe gjobitur disa persona, por njerëzit vazhdojnë të hapin gropa”,-shfajësohet përgjegjësi i zyrës që merret me ruajtjen e tokës së bregdetit, Bashkim Xhaferllari. Me sa duket, gjobat nuk kanë qenë edhe aq të larta.

Edhe policia pohon se ka kapur disa persona në flagrancë duke hapur gropa në breg, por pasi u ka vënë ndonjë gjobë simbolike, i ka lëshuar ata.
Askush nuk i kërkon më llogari askujt as për mbrojtjen e ujëravë të Ohrit që njihen si ndër më të pastrat në Evropë. Kryetari i ri i komunës, Dulellari, që është zgjedhur para pak kohësh, thotë se e njeh gjendjen. “Por u takon rojeve të projektit që ta mbrojnë, jo ne si komunë”,-shton ai. Projekti në fjalë është mbyllur vitin e kaluar dhe ata që e financuan nuk mbajnë më roje të bregut të liqenit. Komuna nuk e merr përsipër mbrojtjen, projekti ka mbaruar, kurse Ohri ndotet gjithnjë e më shumë.