Labinoti - Elbasan

[miko]

Nr.1

Elbasani fiton miqësoren me Skënderbeun

Në stadiumin "Skënderbeu" të Korçës, ekipi vendës dhe Elbanasi, që po stërvitet në këtë qytet, zhvilluan një ndeshje miqësore me styre, e cila përfundoi me fitoren e thellë të elbasanllinjve, me rezultatin 6-0. Kujtojmë që Elbasani ka kohë që po përgatitet për ndeshjet e UEFA-s, ndërsa Skënderbeu ende nuk e ka filluar fazën e mirëfilltë përgatitore. Trajneri Bushati aktivizoi që nga minuta e parë Kotorin, Osmanin, Telin, Memetajn, Belishën, Asllanin, Osjen, Bejzaden, Kaçin dhe Klevis Dalipin, ndërkohë që pjesën e dytë u aktivizuan të gjithë lojtarët që ai kishte në dispozicion. Ndërkohë, në formacionin e korçarëve bënin pjesë vetëm pak titullarë, sepse pjesa tjetër e lojtarëve ishin të rinj. Kështu, që nga minuta e parë luajtën Aletlli, Çaushi, Lako, Drabaj, Çajku, Bajrami, Larti, Osmanllari, Zylyftari, Ngjela dhe Ballço. Golat për Elbasanin u shënuan nga Teli, Dalipi dhe Merxha në pjesën e parë, ndërsa Nuhiu dhe Memelli dy herë, shënuan në pjesën e dytë. Trajneri Bushati nuk pati mundësi të aktivizonte Norën dhe Vrapin, të cilët bënë vetëm vrap të lehtë ditën e djeshme.


Nr.2

Elbasani, nesër miqësore me Teutën

Pasi kanë zhvilluar dje ndeshjen miqësore me Skënderbeun, elbasanasit kanë planifikuar menjëherë ndeshjen tjetër miqësore. Jo më larg se dita e mërkurë, Elbasani do të ketë përballë përsëri ekipin e Teutës në miqësoren e tretë brenda 2 javësh. Ky takim nuk është vendosur ende se ku do të zhvillohet, pasi ka dy alternativa, në Elbasan, në stadiumin "Ruzhdi Bizhuta", ose në Korçë, në stadiumin "Skënderbeu". Këtë fakt e ka pohuar dje për gazetën "Sporti shqiptar" vetë trajneri i Elbasanit, i cili ka kërkuar që gjatë kësaj faze përgatitore miqësoret t'i ketë të shumta. "Mendoj se miqësoret në këtë periudhë na vlejnë shumë, për vetë faktin se ekipi duhet konsoliduar sa më parë dhe në këtë mënyrë kam mundësi që të shoh gjendjen aktuale të të gjithë futbollistëve, për të vendosur përfundimisht për formacionin bazë që do të zbresë në ndeshjen e parë me Vardarin. Të mërkurën do të zhvillojmë një ndeshje tjetër miqësore me Teutën, por ende nuk e kemi vendosur se ku, ndërkohë që edhe ditën e shtunë mendojmë të zhvillojmë një ndeshje tjetër të fundit miqësore me ekipin e Gramozit, por nuk e di ende se sa i gatshëm është të na përgjigjet pikërisht ky ekip," - thotë Bushati. Pra, Elbasani, vetëm në pak më shumë se një javë qëndrimi në qytetin e Korçës, ka menduar të zhvillojë tri miqësore, të cilat kanë filluar që dje me ekipin e Skënderbeut dhe do të përfundojnë ditën e shtunë me Gramozin. Me Teutën në dy miqësoret e para kujtojmë që elbasanasit kanë fituar të parën me rezultatin 2?0 dhe kanë barazuar ndeshjen e dytë me shifrat 1?1. Afërsia gjeografike ku janë duke u stërvitur të dy këto skuadra dhe përgatitjet për kupat e Europës ka bërë që ato të ndeshen me njëra?tjetrën plot 3 herë brenda 2 javësh.


Nr.3

Nora, dëmtimi i vetëm i verdhebluve

Problemi i vetëm gjatë këtyre ditëve të kësaj faze përgatitore në qytetin e Korçës për Elbasanin ka qenë futbollisti Arlind Nora. Gjirokastriti, që i është bashkuar Elbasanit në prag të ndeshjes së Kupës UEFA, ka pësuar një dëmtim në pulpë dhe është duke zhvilluar një stërvitje individuale larg grupit. Madje vetë drejtuesit e ekipit elbasanas, ata që janë duke u marrë me këtë problem dëmtimi të Norës, e kanë pohuar një gjë të tillë, por mendojnë se shumë shpejt sulmuesi i tyre do t'i bashkohet skuadrës në seancat stërvitore. Edhe në ndeshjen e djeshme miqësore me Skënderbeun, Nora nuk është aktivizuar, duke zhvilluar stërvitje veçmas grupit.


Nr.4

Nënkampionët, të shtunën kthimi nga Korça

"Do të qëndrojmë në Korçë deri ditën e shtunë dhe më pas do të largohemi drejt Elbasanit." Kështu ka pohuar dje për gazetën trajneri i Elbasanit, Artan Bushati. Ndryshe nga ç'ishte deklaruar, elbasanasit do të largohen nga qyteti juglindor i Korçës ditën e shtunë, më 9 korrik, për vetë faktin se duhet të ambientohen sa më mirë me klimën në Elbasan, për të qenë gati më datën 14 korrik në ndeshjen e parë përballë Vardarit. Sipas parashikimeve që kishin bërë elbasanasit, do të linin Korçën në këtë fazë më datën 12 korrik, por një kërkesë e trajnerit Bushati ka bërë që Elbasani të ndërrojë destinacion që të shtunën në mbrëmbje. Më tej, në fjalët e tij, trajneri i Elbasanit thotë: "Në qoftë se do të zhvillojmë edhe miqësoren e parashikuar ditën e shtunë me ekipin e Gramozit, atëherë do të largohemi ditën e diel, ndërkohë që, në qoftë se nuk ndodh kjo gjë, do të udhëtojmë drejt Elbasanit që ditën e shtunë. Futbollistët kanë shumë nevojë që të zhvillojnë disa seanca edhe në fushën e "Ruzhdi Bizhutës" dhe në këtë mënyrë na duhet ta lëmë qytetin e Korçës. Shpresoj që deri ditën e shtunë gjithçka të kalojë mirë."


Nr.5

Dallku: Mund të rri tek Elbasani

Armend Dallku i është bashkuar ekipit të Elbasanit. Ai ka qenë me pushime në Kosovë. Futbollisti kosovar i kombëtares shqiptare ka pasur oferta nga ekipe të ndryshme nga jashtë dhe nga brenda, por ai akoma nuk e ka zgjedhur të ardhmen e tij. Mbrojtësi i Elbasanit kishte shprehur dëshirën të luante në Bundesligë, pastaj një skuadër ukrainase i bëri një ofertë joshëse, por ai nuk nxiton. Së fundi, një deklaratë tjetër vjen nga Armend Dallku, që thotë se nuk është çudi që të mbetet tek Elbasani edhe në sezonin tjetër. "Nuk është se nuk kam pasur oferta, madje ata kanë ardhur nga ekipe të njohura, si jashtë vendit, ashtu edhe në kampionatin shqiptar. Jam 20 vjeç dhe nuk dua të nxitohem në përzgjedhjen e ekipit. Nëse gjatë kësaj kohe ndonjë ekip prestigjioz më bën një ofertë tunduese, do të iki nga Elbasani, ndryshe do të qëndroj këtu. Me thënë të drejtën, Elbasani më ka hyrë në zemër dhe më vjen keq të largohem. Pastaj edhe marrëdhëniet me tifozët janë të përkryera, pa harruar edhe presidencën korrekte. Pra, edhe nëse qëndroj tek Elbasani, nuk bëhem pishman, pasi ky ekip më ka dhënë gjithçka," - shprehet Armend Dallku, i cili u është bashkuar shokëve të ekipit në Korçë.


Nr.6

Elbasani federon futbollistët në UEFA

Ekipi i Elbasanit dje ka sjellë në FSHF listat e federimit për ndeshjen e parë të Kupës UEFA. Ka qenë drejtori teknik i Elbasanit, Artin Kovaçi, ai që ka paraqitur të gjithë emrat e futbollistëve që do të federoheshin në federatë. Në listën prej 26 futbollistësh janë të gjithë lojtarët e grumbulluar nga trajneri Bushati në përgatitoren që po zhvillon këto ditë para ndeshjes me Vardarin e Shkupit. Në listën prej 26 emrave figurojnë edhe dy të rinj elbasanas, që duhet të federohen medoemos nga një ekip që merr pjesë në Kupën UEFA.


Nr.7

Optimizëm në kampin verdheblu për ndeshjen e Kupës UEFA, ndërkohë që ka filluar konkurrenca në ekip

Merxha: Elbasani, sy e veshë nga Vardari

Dje, për herë të parë në këto ditë qëndrimi të Elbasanit në qytetin e Korçës, trajneri Bushati ka kërkuar që për 1 orë të zhvillojë edhe teorinë e parë. Në një prej sallave të hotelit "Kristal", njëshi i verdhebluve u ka vënë në dispozicion të gjitha kasetat me fragmente të ndryshme të ndeshjeve të kundërshtarit të drejtpërdrejtë në Kupën UEFA, Vardarit të Shkupit. Kjo ka ndodhur në orët e mesditës, para se futbollistët të drekonin dhe pasi kishin përfunduar stërvitjen e paradites në kodrat e qytetit. Të gjithë lojtarët e kanë parë kundërshtarin nëpërmjet videos dhe trajneri Bushati ka nxjerrë konkluzionin për atë çfarë është vënë re në lojën që zhvillon Vardari në ato kaseta që dispononte. Më pas, elbasanasit kanë zhvilluar pasdite edhe ndeshjen miqësore me Skënderbeun, ndërkohë që sot do të fillojnë programin stërvitor që në orët e para të mëngjesit. Konkurrenca duket se është tepër e madhe tashmë tek Elbasani, ku edhe lojtarët e stolit, që mund të cilësohen kështu, janë duke kërkuar një vend në formacionin bazë të ekipit. Por këtë do ta vulosë në fund vetëm trajneri Artan Bushati, që ka atributet kryesore për të zgjedhur edhe 11?shen anti?Vardar. Tepër optimistë duken të gjithë futbollistët elbasanas për ndeshjen e parë të Kupës UEFA në Elbasan, ku po t'i pyesësh të gjithë, të deklarojnë se do ta kalojnë turin e parë. I të njëjtit mendim është edhe mesfushori elbasanas Eriol Merxha, që ka qenë një ndër futbollistët vendimtarë të Elbasanit edhe në ndeshjet e fundit miqësore, por edhe në kampionatin e fundit: "Jemi tepër optimistë dhe shpresojmë që do ta kalojmë patjetër turin e parë," ? ka theksuar Merxha, ndërkohë që më tej do të vazhdonte: "Vardari është një skuadër që vërtet ka emër, por ne këtë herë kemi shansin për ta kaluar me sukses këtë provë të parë. Do ta luajmë ndeshjen e parë në shtëpinë tonë dhe ky është një shans, pasi do të luajmë përballë sportdashësve tanë të mrekullueshëm, që mendoj se do t'i mbushin si asnjëherë tjetër shkallët e stadiumit. Me lojtarët që janë afruar në skuadër dhe me futbollistët që ka në përbërje Elbasani, them se do të jemi ne që do ta kalojmë këtë tur të parë. Unë personalisht jam i mendimit që do të dimë të japim më të mirën në fushën e lojës. Të këtij mendimi janë edhe futbollistët e tjerë, që kanë një gjendje vërtet optimale deri në këto momente. Kemi ditë që e kemi mendjen te Vardari dhe shpresoj që do të dimë ta kalojmë me sukses këtë kundërshtar. Në Korçë, deri tani në këtë fazë përgatitore, çdo gjë po kalon si jo më mirë dhe kushtet janë vërtet optimale. Nuk na ngelet gjë tjetër, veçse ta tregojmë veten në fushën e lojës. Por edhe pse kanë ngelur edhe vetëm pak ditë nga kjo ndeshje, e them me bindje se të gjihë ne dhe e gjithë tifozëria e këtij qyteti e ka mendjen vetëm te ndeshja. Do të jetë trajneri ai që do të vendosë formacionin për këtë ndeshje, por pak rëndësi ka kjo, pasi çdokush nga ne që do të jetë në fushë duhet të dijë ta mbrojë sa më mirë bluzën e Elbasanit."


----------------------------------------------------------------------------------------------------



Marre nga www.sportishqiptar.com.al

[miko]

Mbrojtësi kryeqytetas, Nevil Dede, pasi ka kryer fazën përgatitore me bardheblutë, kthehet sërish te verdheblutë

Dede "braktis" Tiranën për Elbasanin

E pabesueshme, por ja që ka ndodhur. Të gjithë mendonin që ish-kapiteni i Tiranës po udhëtonte me ekipin bardheblu drejt Maqedonisë për të zhvilluar një takim miqësor, por në të vërtetë ai nuk është nisur, duke zgjedhur sërish skuadrën që luajti sezonin e fundit, Elbasanin. Këtë e ka konfirmuar vetë presidenti Arben Laze, i cili pohon: "Kam folur me Nevilin dhe ai më ka bërë me dije se kërkon të luajë sërish te ne. Kur jemi ndarë, e kemi bërë paqësisht, madje dhe kemi festuar më 15 qershor, kështu që unë i kisha thënë që ishte i mirëpritur në rast se gjërat nuk i ecnin. Duke qenë kështu, unë e mirëpres atë dhe mund t'u them se ai sërish është lojtar i Elbasanit dhe e presim në Korçë për të filluar stërvitjen me ne. Dede është një mbrojtës që i duhet ekipit tonë, aq më tepër tani kur jemi në prag të Kupës UEFA," - është shprehur numri një i klubit të Elbasanit, Arben Laze, që tani ka në skuadrën e tij edhe një "armë" më shumë, siç është Nevil Dede, i cili është një nga mbrojtësit më të mirë në kampionatin shqiptar.


Muça: Dede e kërkoi vetë largimin
Largimin e Nevil Dedes nga ekipi i Tiranës e konfirmon edhe shefi i klubit bardheblu, Shkëlqim Muça, teksa thotë: "Nevili më ka takuar personalisht dhe më ka thënë që kërkon të largohet. I kërkova arsyet dhe u mundova ta bind të qëndrojë. Ai më tha se janë disa arsye personale që e detyronin të largohej. E kuptova që ishte e vështirë ta ndaloja ikjen e tij. Me zor te Tirana ne nuk mbajmë asnjeri, kushdo qoftë ai. Nëse për Deden ka qenë më i mirë largimi, le të bëhet më e mira për të."




Marrë nga www.sportishqiptar.com.al




Më duket si e pabesueshme diçka e tillë.Nqs Dede kishte firmosur me Tiranën si u arrit në këtë "Divorc" kaq të shpejtë,në një kohë kur vetë Tirana kishte insistuar për të vajtur përsëri në Tiranë.Nuk po e kuptoj fare këtë "Merkato-on" tonë,shumë thashethem e shumë pislliqe më duket se po bëhen...
Nejse nqs konfirmohet diçka e tillë dhe nga vetë Nevili atëhere është një lajm shumë i këndshëm për ekipin tonë pasi lojtarë si Nevil Dede janë përherë të domosdoshëm në një ekip në ndërtim e sipër si Elbasani.

Welcome back Nevil

[miko]

Nr.1

Presidenti i Elbasanit po afron lojtarë cilësorë në skuadrën e tij

Laze: Besoj te kalimi në turin e dytë

Dje, rreth orës 18:30, ka mbërritur në qytetin e Korçës presidenti i Elbasanit, Arben Laze, ku menjëherë ka vajtur në stadiumin "Skënderbeu" për të vizituar të tijtë në këtë fazë përgatitore që do të zgjasë deri ditën e shtunë. "Kam shumë besim që do të kualifikohemi në turin e dytë dhe këtë e mbështes te besimi i madh që kam te djemtë e mi dhe te stafi i trajnerëve, me në krye Bushatin. Ndodhem sot (dje) këtu për të parë nga afër përgatitjet që po bën ekipi dhe jam tepër i kënaqur deri tani, kur duhen edhe pak ditë nga ndeshja e Kupës UEFA. Falënderoj në radhë të parë edhe presidentin e Skënderbeut, Spiro Bardhi, që na ka krijuar këto kushte vërtet të shkëlqyera në këto ditë qëndrimi të ekipit tonë në këtë qytet," ? ishin fjalët e presidentit të Elbasanit menjëherë sapo ka mbërritur në Korçë. Ndërkohë, pyetjes së cili do të jetë shpërblimi në rast kualifikimi, vetë Laze do t'i përgjigjej: "Do të ketë një shpërblim të madh në rast kualifikimi, por s'mund të flas me shifra që tani. Ka rëndësi që të kualifikohemi dhe, në qoftë se do të ndodhë dhe për këtë jam i bindur, patjetër që të gjithë këtë punë kaq të madhe do ta shpërblej. E theksova edhe pak më lart, që kam shumë besim te trajneri Bushati dhe te djemtë e ekipit." Por elbasanasit janë në pritje edhe të dy futbollistëve të tjerë, që sipas presidentit Laze, do të jenë dy forca më shumë në skuadër për Kupën UEFA. "Presim Nevil Deden dhe Fisnik Gashin, që ka luajtur sezonin e fundit me Besën e Pejës. Mendoj se ai do të jetë shumë shpejt pranë ekipit. Së fundi, jam i bindur që ky Elbasan do të dijë ta tregojë veten edhe në kupat e Europës, për të thënë se kemi ndërtuar vërtet një skuadër model," ? ka përfunduar presidenti i Elbasanit, Arben Laze. Pra, Elbasani, dje është vizituar nga presidenti Laze, që premtoi se gjatë këtyre ditëve do të qëndrojë më shumë pranë ekipit, për t'u dhënë më shumë zemër futbollistëve që do të luajnë më 14 korrik ndeshjen e parë të Kupës UEFA me Vardarin e Shkupit në stadiumin "Ruzhdi Bizhuta".


Nr.2

Elbasani, ja gjyqtarët e Kupës UEFA

Në Federatën Shqiptare të Futbollit, dje janë bërë publikë emrat e gjyqtarëve për dy takimet e Kupës UEFA. Kështu, në ndeshjen e parë, që do të zhvillohet në Elbasan, takimin do ta gjykojë një katërshe nga Sllovenia. Gjyqtar kryesor në takimin Elbasani-Vardar do të jetë Robert Krajnc. Ndihmës të tij Milan Kogej dhe Marko Stançin, ndërsa gjyqtar i katërt në takimin e parë do të jetë Robert Shegula. Në ndeshjen e dytë të Kupës UEFA, 4-shja e gjyqtarëve do të jetë nga Ukraina. Gjyqtar kryesor do të jetë Igor Ishenko, ndihmës Sergej Cumbal dhe Oleksandër Zhurba, ndërsa gjyqtar i katërt Jevgeni Abrosimov.

Nr.3

Edhe Vrapi në stërvitje individuale

Pas dëmtimit të sulmuesit gjirokastrit Arlind Nora, që duket se ia ka hedhur dje, pasi ka marrë pjesë në stërvitje rregullisht si të tjerët, duket se radhën e ka pasur mbrojtësi Endri Vrapi. Edhe ky ka pasur një dëmtim në këmbë prej dy ditësh, madje nuk është aktivizuar as në ndeshjen e fundit miqësore me ekipin e Skënderbeut. Në seancat e djeshme stërvitore, Vrapi ka qenë i detyruar të bëjë stërvitje veçmas grupit, ndërkohë që mendohet t'i bashkohet shumë shpejt grupit të futbollistëve të tjerë.



Marrë nga www.sportishqiptar.com.al

[miko]

Nr.1

Nënkampionët, stërvitje në orarin e ndeshjes

Ka disa ditë që Elbasani i zhvillon stërvitjet në orarin që do të luhet edhe ndeshja e parë e Kupës UEFA përballë Vardarit. Në seancën e dytë, atë të pasdites, elbasanasit zbresin në orën 17:00 në stadiumin "Skënderbeu" dhe më pas të gjithë janë të gatshëm nën urdhrat e trajnerit Bushati. Ky është orari që përkon me ndeshjen e së mërkurës së ardhshme, ku verdheblutë do të luajnë përballë Vardarit në "Ruzhdi Bizhuta". Gjithsesi, edhe dje, trajneri shkodran ka zhvilluar me të tijtë dy seanca stërvitore, çka do të thotë se vetëm pas largimit nga Korça stërvitja do ta ulë ritmin. Në këtë mënyrë, të gjithë futbollistët duket se janë përshtatur me orarin e ndeshjes, por ndërkohë me klimën duhet të përshtaten vetëm pas së shtunës, ditë kur do të largohen nga Korça. Nesër është dita e fundit të qëndrimit në qytetin e Korçës, ndërkohë që ditën e shtunë pasdite Elbasani do të luajë edhe miqësoren e fundit me ekipin e Skënderbeut dhe menjëherë pas këtij takimi do të largohet drejt qytetit të tij.


Fisnik Gashi u bashkohet verdhebluve
Një tjetër futbollist i bashkohet ekipit të Elbasanit në prag të ndeshjes së Kupës UEFA. Bëhet fjalë për Fisnik Gashin nga Kosova, për të cilin është folur gjatë këtyre ditëve. Ai ka ardhur me ndërhyrjen e Dallkut. Në fakt, sulmuesi kosovar ka eksperiencë, pasi, përveç aktivizimit në kampionatin kosovar me Besën e Pejës, ai është aktivizuar me skuadra të njohura në kampionatin suedez. Nuk dihet nëse kosovari do të federohet për ndeshjet e Kupës UEFA, apo do të bëjë një provë më parë dhe më pas do të vendoset.


Nr.2

Kur kanë ngelur 6 ditë nga përballja me maqedonasit, verdheblutë janë të bindur për fitore

Asllani: Zemrën në fushë ndaj Vardarit

Të gjithë futbollistët që marrin pjesë në stërvitjet e Elbasanit në këtë minifazë përgatitore në qytetin e Korçës janë të bindur që do ta kalojnë me sukses Vardarin në turin e parë të Kupës UEFA. Kjo është një bindje që e kanë të gjithë futbollistët, pa përjashtim, që nga futbollistët e formacionit dhe deri tek ata të stolit, në qoftë se mund të quhen kështu. Në të gjitha intervistat e tyre për mediat, të gjithë kanë dëshirë të flasin vetëm për kualifikimin, gjë që e deklarojnë edhe drejtuesit e klubit, që nga presidenti Arben Laze dhe njëkohësisht edhe trajneri i ekipit, Artan Bushati. Të gjithë shpresojnë që ta kalojnë pengesën Vardar, në mënyrë që të tregojnë veten pas gjithë kësaj faze përgatitore, ku "bosi" elbasanas Laze nuk ka kursyer aspak që të bëjë më të mirën për këtë Elbasan, duke i krijuar vërtet kushte mjaft të mira. Një atmosferë entuziaste ekziston në kampin elbasanas në këto përgatitje të fundit dhe duket se këtë entuziazëm elbasanasit duhet ta shprehin më shumë në fushën e lojës më 14 korrik, kur të luajnë përballë sportdashësve të tyre. "Do të jetë një ndeshje vërtet delikate kjo e së mërkurës së ardhshme përballë Vardarit, por gjithsesi unë shpresoj se do ta kalojmë me sukses. Jemi tepër të tendosur, por duhet të tregojmë një përqendrim mjaft të madh, duke e administruar lojën që nga minuta e parë dhe deri tek e fundit. Luajmë në shtëpinë tonë përballë një sportdashësi që kërkon vetëm fitore dhe jemi ne ata që do ta tregojmë veten në fushën e lojës. Jemi përgatitur ashtu si duhet për këtë ndeshje dhe them se të gjithë futbollistët, përveçse të tendosur, janë të gatshëm të japin më të mirën e tyre në këtë takim. Vardari është një ekip i mirë dhe do të mundohet edhe ai nga ana e tij që në ndeshjen e parë të marrë një rezultat sa më të mirë, por këtë nuk duhet ta lejojmë. Unë personalisht e them edhe një herë që do të jetë një ndeshje e bukur ajo e 14 korrikut, por në fund do të ketë vetëm një fitimtar, Elbasanin," ? është shprehur futbollisti Klodian Asllani. Në fakt, Asllani është një nga lojtarët që e ka treguar veten edhe në ndeshjet e fundit miqësore që ka zhvilluar Elbasani, madje ka qenë në një formë mjaft të mirë. Kur ka ngelur edhe një javë nga starti i kësaj ndeshjeje, Asllani flet edhe për atë që ka ndodhur me këtë Elbasan në këtë fazë përgatitore: "Ka qenë një fazë përgatitore model që është zhvilluar nga ana e ekipit tonë. Këtë e them për vetë faktin se të gjitha seancat kanë pasur një vlerësim nga të gjithë futbollistët dhe stafi drejtues. Jemi munduar të japim më të mirën dhe më të mirën kemi gjetur edhe këtu në Korçë, ku gjithçka po kalon në mënyrë perfekte. Edhe një javë na ka ngelur dhe tani jemi duke punuar me topin. Për sa u përket ndeshjeve miqësore, ato janë një provë e mirë, ku ne e kemi treguar vërtet veten tonë, paçka se nuk jemi paraqitur në 100% të formës. Edhe unë, ashtu si të gjithë shokët e skuadrës, u bëj thirrje të gjithë sportdashësve që të na mbështesin, sepse nuk do t'i zhgënjejmë."


Nr.3


Sot, "serenata" e fundit korçare

Sot do të jetë dita e fundit e qëndrimit të Elbasanit në qytetin e Korçës, pasi nesër djemtë e trajnerit Artan Bushati do të udhëtojnë drejt qytetit të tyre, për të filluar më pas me ethet e ndeshjes së parë me Vardarin. Një javë më parë, Elbasani do të mbërrinte në qytetin e Korçës për të filluar një fazë përgatitore dhe sot do të jetë dita e fundit e qëndrimit në këtë qytet. Deri tani, të gjithë elbasanasit, me në krye trajnerin e tyre dhe presidentin që vizitoi Korçën pak ditë më parë, kanë ngelur tepër të kënaqur nga gjithçka që u ka dhuruar ky qytet në këtë fazë përgatitore. Deri tani, trajneri Bushati dhe stafi i tij janë tepër optimistë për vetë faktin se gjithçka ka kaluar pa problemin më të vogël dhe se në këtë qytet është vërtet kënaqësi që të vish për të zhvilluar stërvitje. "Më vjen mirë që zgjodhëm Korçën për këtë minifazë përgatitore dhe mund të them fjalët më të mira për të gjitha seancat stërvitore dhe kushtet optimale që na krijoi ky qytet gjatë këtyre ditëve. Jam tepër i kënaqur dhe shpresoj që stërvitjet në këtë qytet të na sjellin fat, në mënyrë që Elbasani të bëjë një paraqitje sa më të mirë që në ndeshjen e parë," ? ka theksuar Bushati një ditë para largimit të ekipit të tij nga stërvitjet në qytetin e serenatave. Po kaq i kënaqur ka ngelur nga ditët korçare edhe presidenti i elbasanasve, Arben Laze, që e ka theksuar me gojën e tij se Elbasani ka gjetur më të mirën në këtë fazë përgatitore.

---------------------------------------------------------------------------------------------------


Marrë nga www.sportishqiptar.com.al

[miko]

Nr.1


Portieri i Elbasanit, Ervis Kotorri, thotë se në ndeshjen e kthimit do të jetë e kundërta e ndeshjes së parë

Kotorri: Nuk më tremb sulmi i Vardarit

Pavarësisht se Elbasani takimin e dytë do t'a luajë jashtë fushës së tij, për verdheblutë kjo nuk përbën ndonjë disfavor për të pretenduar kualifikimin. Barazimi 1-1 në ndeshjen e 14 korrikut në stadiumin "Ruzhdi Bizhuta", edhe pse nuk është ndonjë rezultat i pëlqyeshëm për Elbasanin, për ata gjithçka mbetet e hapur në sfidën e Shkupit. Paraqitja e mirë që kundërshtari i verdhebluve bëri në takimin e parë për kupën UEFA, është vlerësuar nga ana e Elbasanit. Gjatë javës që u mbyll ekipi i drejtuar nga trajneri Artan Bushati ka zhvilluar përgatitje intensive për ndeshjen e dytë të kupës UEFA, duke i treguar vëmendje të veçantë, si përgatitjes fizike, edhe asaj në aspektin tekniko?taktik. Në kampin elbasanas janë të vetëdijshëm që në ndeshjen e kthimit ata do të jenë nën trysninë e Vardarit, i cili do të përpiqet të sigurojë kualifikimin, duke qenë favorit për shumë arsye. Por dhe verdheblutë nga ana tjetër do të futen në këtë ndeshje me të njëjtin synim, sikurse ekipi nënkampion i Maqedonisë, pra për t'u kualifikuar. Në kushte të tilla, kuptohet që loja e të dyja ekipeve do të përqendrohet në sulm dhe fitorja do t'i buzëqeshë ekipit më të mirë. Por elbasanasit pretendojnë se kanë qenë në ditën e tyre më të errët dhe në Shkup do të paraqiten krejt ndryshe, duke shfaqur një formë të shkëlqyer. Këtë e kanë pohuar në prononcimet e tyre të gjithë verdheblutë. Portieri Ervis Kotorri, i cili tregoi nivel të lartë edhe në ndeshjen e parë, në një prononcim për gazetën "Sporti Shqiptar", thotë se nuk e tremb sulmi i Vardarit. "Jam i bindur se do të kemi sukses ndaj kundërshtarit, pasi mbrojtja jonë ka arritur nivelin që pretendojmë dhe gjendja e Elbasanit është shumë më e mirë, se sa ajo që u pa në ndeshjen me Vardarin më 14 korrik. Një formë e tillë shpresoj se do të ruhet dhe do të shfaqet edhe këtë të enjte në ndeshjen e kthimit në Shkup," - shprehet Kotorri, i cili vazhdon: "Këtë sfidë e kemi vlerësuar seriozisht dhe e kemi kapërcyer atë moment plogështie të ndeshjes së parë. Edhe pse ndeshja e parë është mbyllur në barazim, përpara kemi edhe 90 minuta lojë për të siguruar suksesin. Besimin për një rezultat pozitiv e kemi të madh, sepse në stadiumin e Shkupit do të kemi edhe mbështetjen e tifozërisë së mrekullueshme elbasanase dhe të mjaft shqiptarëve nga Kosova e Maqedonia. Kështu që në këtë ndeshje kemi një detyrim të shumëfishtë për të arritur maksimumin, pra kualifikimin. Do të luajmë sikur të ishim kombëtarja përpara një tifozërie, që thuhet se do të mblidhet edhe nga diaspora. Ajo që nevojitet është lojë e ndershme në fushë dhe qëndrim korrekt i tifozërisë në stadium. Fitoren le ta meritojë më i miri."

-------------------------------------------------------------------------------------------------------

Nr.2

UEFA i jep vlerësime pozitive Elbasanit


Në relacionin e dërguar nga UEFA, kushtuar kushteve të krijuara para, gjatë dhe pas ndeshjes Elbasani-Vardari në kuadrin e kupave europiane, janë bërë vlerësime pozitive për klubin e futbollit verdheblu. Edhe vërejtje janë bërë, por këto kanë qenë të parëndësishme, por të nevojshme për t'u korrigjuar për në takimet e ardhshme ndërkombëtare. Vëzhguesi i UEFA-s ka tërhequr vëmendjen për mungesën e stolave në të gjitha shkallët e stadiumit, për mungesën e orës elektronike dhe të mungesës së ndarjes me xhama plastikë të tribunës "VIP" nga ajo e tifozëve të ekipeve. Megjithatë, e rëndësishme është që prezantimi i klubit verdheblu në këtë përfaqësim europian ka marrë një vlerësim pozitiv.

Verdheblutë, 40 anëtarë delegacioni në Shkup
Klubi i futbollit "Elbasani" do të ketë një delegacion të "fryrë" në Shkup për ndeshjen e kupës UEFA që do të luajë ndaj Vardarit të enjten. Burime zyrtare të këtij klubi konfirmojnë se do të jenë afro 40 persona në përbërje të këtij delegacioni. Afro gjysma e anëtarëve të tij do të jenë nga stafi i klubit, presidenca dhe drejtues të tjerë të sportit nga bashkia e Elbasanit. Ndoshta në përbërje të këtij delegacioni mund të jenë edhe disa drejtues kryesorë të pushtetit vendor.


Marre nga www.sportishqiptar.com.al

[miko]

Nr.1

Sulmuesi gjirokastrit, Arlind Nora, thotë se Elbasani i ka kualitetet për t'u kualifikuar

Nora: Golin e parë verdheblu, ndaj Vardarit

Kur ka mbetur veçse një ditë që të luhet ndeshja e dytë midis Vardarit dhe Elbasanit, e vlefshme për turin paraeleminator të kupës UEFA, verdheblutë duken të sigurt në realizimin e objektivit që i kanë vënë vetes. Nga Elbasani në ndeshjen që do të luhet mbrëmjen e kësaj të enjte në stadiumin e Shkupit pritet kualifikimi për në turin tjetër. Edhe pse kjo detyrë për verdheblutë është mjaft e vështirë, në kampin elbasanas mbizotëron besimi në arritjen e suksesit. Gjatë dhjetë ditëve të fundit trajneri i Elbasanit, Artan Bushati, ka ndryshuar shumë gjëra, si në aspektin e stërvitjes, edhe në skemën e lojës që do të aplikojë në takimin që do të luhet në Shkup. Po kështu, edhe përbërja e formacionit bazë parashikohet të ketë ndryshime në funksion të arritjes së një rezultati sa më të mirë të mundshëm. Një nga futbollistët e rreshtuar te verdheblutë gjatë këtij sezoni, Arlind Nora, në një prononcim të tij për gazetën "Sporti shqiptar", thekson se ndeshja e kthimit midis Vardarit dhe Elbasanit do t'i ngjajë një sfide të vërtetë europiane. "Fakti që gjatë 90 minutave të kësaj ndeshje përcaktohet ekipi që do të shkojë në turin tjetër, do t'i japë bukurinë e munguar në "Ruzhdi Bizhuta" takimit Vardari?Elbasani. Për të arritur synimin tonë, jemi përgatitur mjaft mirë dhe shpresoj që golin tim të parë me uniformën verdheblu ta shënoj ndaj Vardarit në Shkup," - thotë sulmuesi gjirokastrit Nora, përpara udhëtimit të ekipit verdheblu drejt Maqedonisë të martën. "Kam besim jo vetëm tek aftësitë e mia, por të të gjithë grupit, që ka arritur një formë të shkëlqyer përpara kësaj sfide. Ne jemi të vetëdijshëm që përballë kemi një ekip jo vetëm me emër me futbollin maqedonas, por edhe në atë europian. Mirëpo kurrsesi nuk mund ta nënvlerësojmë as veten, pasi në ekipin tonë luajnë futbollistë nga më të mirët e kampionatit shqiptar në superligë. Kujdesin maksimal në ndeshjen në Shkup do ta bëjnë që të mos pësojmë gol, por do të përpiqemi për të shënuar. Detyra numër nje mbetet që të respektojmë detyrat e ngarkuara nga trajneri dhe të shfrytëzojmë gabimet e kundërshtarit. Grupi ynë ka kualitete dhe kualifikimin nuk duhet ta vëmë në diskutim. Një mbështetje të madhe do ta kemi edhe nga jashtë fushe, pasi shumë sportdashës nga Elbasani do të na inkurajojnë nga tribunat e stadiumit të Shkupit. Gjendja e ekipit për fat, si në aspektin psikologjik edhe në atë të përgatitjes fizio?teknike?taktike, është mjaft e mirë. Kështu që pretendimi për të arritur kualifikimin është mëse i përligjur. Ndoshta duke patur edhe fat, kualifikimin do ta kemi më të lehtë. Elbasani do të shkojë në turin tjetër, sepse jemi më të qetë sesa në takimin e parë dhe shumë më mirë në aspektin e formës që gëzon ekipi për ta mposhtur një kundërshtar serioz, sikurse është Vardari," - përfundon Arlind Nora, i cili ka firmosur vetëm pak ditë më parë për ekipin e Elbasanit.


Nr.2

Bushati, tjetër skemë loje në Shkup

Trajneri i ekipit të Elbasanit, Artan Bushati, i ka bërë mjaft mirë llogaritë për të mbërritur te suksesi në sfidën e dytë me Vardarin e Shkupit. Krahas përgatitjeve serioze të futbollistëve verdheblu, Bushati ka planifikuar të bëjë disa ndryshime në formacionin bazë, krahasuar me atë të 14 korrikut në skemën e lojës. Kështu, në ndeshjen e dytë mendohet që verdheblutë të luajnë me skemën 1?3?5?2. Me një skemë të tillë verdheblutë janë të bindur se do të arrijnë të marrin maksimumin e mundshëm në takimin e dytë me Vardarin.


Verdheblutë, që dje në Strugë të Maqedonisë
Mesditën e së martës verdheblutë janë sistemuar në qytetin e Strugës dhe paraditen e së enjtes do të udhëtojnë për në Shkup, ku do të ndeshen me Vardarin. Në dispozicion të trajnerëve Bushati?Gogunja?Filja për këtë ndeshje janë: Kotorri, Bërdufi, Dede, Vrapi, Teli, Belisha, Merxha, Osja, Nora, Bejzade, K.Dalipi, Memelli, E.Dalipi, Memetaj, Çapja, Asllani, Kacollja dhe O.Osmani. Sipas trajnerit Bushati, formacioni bazë do të përcaktohet mbrëmjen e sotme, por nuk do të bëhet i ditur për mediat. "Shpresoj që të jenë pa probleme të gjithë lojtarët dhe besoj se do të ndërtojmë formacionin më të mirë të mundshëm për një garë të tillë," - thotë Bushati.


Tifozë të shumtë përcjellin verdheblutë
Dhjetëra fansa të verdhebluve ishin grumbulluar përpara hyrjes së stadiumit "Ruzhdi Bizhuta" paraditen e së martës, kur ekipi i Elbasanit do të nisej drejt Strugës së Maqedonisë. Interesimi i pazakontë i tyre lidhej edhe me kuriozitetin për të mësuar se kush ishin futbollistët e përzgjedhur për të qenë në dispozicion në ndeshjen ndaj Vardarit. Me urimin "u kthefshi fitimitarë!", fansat e verdhebluve e kanë përcjellë ekipin nga qyteti i tyre drejt shtetit fqinj.


------------------------------------------------------------------------------------------------------


Marre nga www.sportishqiptar.com.al

[miko]

Skuadra e Bushatit nuk ka mundur të shënojë golin e fitores, që do ta kualifikonte për më tej

Elbasani, sa keq kur e pëson nga barazimi!

Varadari - Elbasani 0-0

Nga Shkupi, Fatmir Popja

Vardari: Zdravkoviç, Brankoviç, Markovski, Tanevski, Gligorov, Serafinovski, Gligorovski (Nexhipi 59'), Masev, Naumov, Tasevski, Triçkovski. Trajner: V.Stanojkoviç

Elbasani: Kotori, Dede, Teli, Belisha, Osja, Merxha (Memetaj 88'), Bejzade, E.Dalipi, K.Dalipi (Memelli 69'), Nora (Kaçi 69'), Vrapi. Trajner: A.Bushati
Gjyqtarë: I.Ishçenko, S.Symbol, A.Zurba (Ukrainë)
Kartonë të verdhë: Masev, Triçkovski, Dede


Elbasani është eliminuar në mënyrën më të dhimbshme nga Kupa UEFA, sepse në të dyja ndeshjet me Vardarin e Maqedonisë, nënkampionët e Shqipërisë nuk e kanë provuar shijen e humbjes. Takimi i djeshëm në Shkup ka përfunduar me rrjeta të paprekura, kështu që ka qenë goli i shënuar në fushë kundërshtare që u ka dhënë të drejtë maqedonasve të kalojnë në turin tjetër. Meritonte më shumë Elbasani, pasi ka luajtur më mirë në të dyja ndeshjet, gjë të cilën e pranoi edhe trajneri i Vardarit. Verdheblutë, edhe në 90-minutëshin e djeshëm kanë krijuar raste më të pastra shënimi, por që për fat të keq nuk arritën të finalizonin saktë asnjë prej tyre. Me përjashtim të pak rasteve në fillim të ndeshjes, vendësit nuk mundën të bënin asgjë përballë elbasanasve të kërikuar më tepër se asnjëherë tjetër. Gjysma e dytë e pjesës së parë shfaqi një Elbasanas mjaft kërcënues për portën e Zdravkoviçit, por në minutat 31', 35' dhe 38', Belisha dhe K.Dalipi, nuk arritën të zhbllokonin rezultatin. Edhe pjesa e dytë ishte shumë e vakët për skuadrën vendëse të Vardarit, aq sa shkaktoi edhe irritimin e tifozëve të pranishëm në stadium. Sulmuesit e Vardarit nuk mund ta vënë asnjëherë në provë serioze portierin Kotori, ndërsa nga ana tjetër, elbasanasit u përpoqën me të gjitha mundësitë e tyre për të shënuar golin e kualifikimit. Për këtë arsye, trajneri Bushati, në minutën e 69-të i zëvendësoi të dy sulmuesit për t'i dhënë më shumë freski repartit të avancuar. Mehjithatë, as Memelli dhe as Kaçi, nuk arritën të shënonin në portën e Vardarit. Kështu, gjithçka përfundoi në barazim 0-0. Ky rezultat e ndëshkoi Elbasanin, që duhet theksuar se ishte fare pranë kualifikimit, pasi maqedonasit luajtën mjaft dobët, edhe pse përpara tifozëve të tyre. Gjithsesi, gjithçka ka përfunduar që në turin e parë të Kupës UEFA për skuadrën e drejtuar nga trajneri Bushati në këtë eksperiencë të parë europiane.


Deklaruan
Artan Bushati, trajneri i Elbasanit: "I uroj suksese kolegut për kualifikimin. Ne kishim ardhur në Shkup për t'u kualifikuar, ndaj dhe nuk duhej të pësonim gol. Këtë gjë e realizuam, por harruam të shënonim. Ishte kjo arsyeja që unë hodha në fushë gjatë pjesës së dytë dy lojtarë sulmues si Mememlli dhe Kaçi. Patëm disa raste të pastra, por ndoshta dhe fati nuk na buzëqeshi. Ishte një eksperiencë e re, që duhet vlerësuar."
Vujadin Stanojkoviç, trajneri i Vardarit: "Kualifikimi na kënaq, por duhet ta pranoj se jam habitur nga Elbasani, pasi ky ekip luajti mjaft mirë në të dyja ndeshjet. E kuptoj presionin e tifozerisë, sepse ne duhet ta fitonim këtë ndeshje, por besoj se do të korrigjojmë gjithçka në ndeshjet e turit pasardhës."

Arben Laze, president i Elbasanit: "Më erdhi keq që në stadiumin e Vardarit nuk valëvitej flamuri shqiptar, ashtu siç u falëvit ai maqedonas në stadiumin e Elbasanit".


Marre nga www.sportishqiptar.com

[miko]

Pershendetje

Ti shkruaj dhe une tani nja dy fjale pasi sikur jetonim keto kohet e fundit ne nje realitet tjeter nga ai i futbollit shqiptar,sikur jetonim ne nje enderr te bukur europiane nga e cila nuk prisnim te zgjoheshim kaq shpejt

Meqenese rezultati zhgenjyes na zgjoi shume shpejt nga kjo enderr europiane qe po jetonim keto kohet e fundit,detyrohem te zbres dhe une nga ajo "shkalle" nga e cila shikoja gjerat e nga e cila enderroja dhe une dicka me shume (se 2 barazime) nga ekipi im i zemres,pra nga kjo aventure europiane.Per ne ka qene aventure pasi nuk jemi nga ata tipa qe fluturojne me pras ne sume (sic thote populli) por te pakten shpresoja te kalonim turin e pare.Fatkeqesisht u vertetua dhe nje here qe duhet me shume pune e me pak deklarata te bukura e shpresedhenese per marrjen e ruzultateve konkrete ne arenen nderkombetare.Sa per "gezimin" qe moren disa ketu nga ky skualifikim skam cte komentoj per keta "tifoze" pasi ishin disa nga kto kokrra qe binin dakort nje here e nje kohe me ate thenien e urte "Well spent" e na flisnin per "Krenari kombetare" ....

Edhe pse tashme zbritem me kembe ne toke shpresojme ne nje perfaqsim dinjitoz te ekipit ne superligen kete vit duke vertetuar qe po ndertojme nje ekip dinjitoz qe pretendon cdo vit te jete prezent ne ndeshjet nderkombetare e jo nje here ne 20 vjet.

Forca cuna...


Gjithe te mirat

[miko]

Verdheblutë, stërvitja shtyhet të mërkurën

Ndryshe nga çfarë ishte parashikuar, verdheblutë do ta rifillojnë stërvitjen të mërkurën dhe jo të martën. Drejtuesit e Elbasanit u kanë dhënë edhe një ditë pushim lojtarëve, sepse gjatë muajit korrik ata kanë marrë një ngarkesë të madhe. Fillimisht, ata do të grumbullohen në Elbasan, ku do të bëhet edhe prezantimi i trajnerit të ri, Agim Canaj, dhe më pas do të mendohet se ku do të kryhet periudha përgatitore në prag të sezonit të ri.


Elbasani, këtë javë kontratat e tjera
Gjatë kësaj jave është parashikuar që të firmosen edhe kontratat e prapambetura. Disa nga futbollistët tashmë kanë firmosur, kryesisht të ardhurit e fundit, por tashmë do të nënshkruajnë të gjithë ata që mendohet se gjatë sezonit të ri do të mbrojnë ngjyrat e Elbasanit. Në fakt nuk priten shumë largime nga radhët e verdhebluve, por më shumë përforcime. Një tjetër largim i mundshëm mund të jetë ai i Kaçit, i cili mund të luajë në kampionatin zviceran sezonin e ardhshëm.



Marre nga www.sportishqiptar.com.al

[miko]

Elbasani barazon me Karamanin në miqësore

Pasditen e së dielës, verdheblutë kanë zhvilluar miqësoren e parë në Strugë të Maqedonisë, ku po vazhdojnë fazën përgatitore. Kundërshtari i tyre ka qenë ekipi i Karamanit të qytetit të Strugës, pjesëmarrës në kategorinë e dytë të futbollit maqedonas. Kjo miqësore ka përfunduar në barazim 1-1, ndërkohë që në pjesën e parë trajneri i Elbasanit, Ilir Daja, ka aktivizuar 11 futbollistët kryesorë. Ndërsa në pjesën e dytë ai ka aktivizuar të gjithë lojtarët e afruar së fundi te Elbasani. Të parët që kanë shënuar kanë qenë verdheblutë. "Tani për tani jam shumë i kënaqur vetëm nga gjendja e kapitenit Nevil Dede, sepse të tjerët janë shumë larg asaj që pretendon stafi teknik. Jemi duke u përpjekur për të arritur aq sa mund të arrijmë deri në fillim të kampionatit. Po përpiqemi të punojmë me një ngarkesë stërvitore aq sa na lejohet dhe shpresojmë të arrijmë një nivel të pranueshëm për ta përballuar me sukses kampionatin. Mirëpo nuk ka pse ta fsheh që nuk ndihem rehat përderisa nuk kemi arritur të kapim parametrat që duhet. Java që fillon do të jetë e mbushur me ndeshje miqësore, në të cilat do të shihet më mirë gjendja e futbollistëve," - u shpreh trajneri Daja nëpërmjet linjës telefonike. Pritet që sot Elbasani të luajë një miqësore me Partizanin, që gjithashtu është Strugë. Me ekipin pritet të bashkohen edhe futbollistët afrikanë, të cilët nuk u lejuan në doganë të kalonin kufirin maqedonas, pasi nuk dispononin dokumentacionin e duhur.


Marre nga www.sportishqiptar.com.al