Labinoti - Elbasan

[miko]

Elbasani mund 4-2 fqinjët peqinas. "Ruzhdi Bizhuta" ka qenë "i blinduar" nga forcat e policisë

Elbasani e ka mbyllur shumë bukur kampionatin, duke fituar bindshëm ndaj Shkumbinit. Një sezon me të vërtet i mirë për verdheblutë, që edhe në fund zhvilluan lojëra të bukura, pavarësisht se e kishin siguruar vendin e dytë disa javë para përfundimit të kampionatit. Megjithatë, jo gjithçka ka vajtur mirë në stadiumin "Ruzhdi Bizhuta", pasi sërish ka pasur tensione në derbin me Shkumbinin. Në stadium ka pasur rreth 7 mijë veta, nga të cilët 2 mijë kanë qenë peqinas. Për këtë arsye, policia ka mbajtur nën vëzhgim tifozët, duke mos lejuar parrulla fyese. Edhe loja me tension ka filluar. Që në minutën e dytë të lojës, Endri Dalipi debaton me Klodian Dervishin. Endri godet peqinasin dhe gjyqtari nxjerr direkt kartonin e kuq për të, ndërsa kundërshtari merr karton të verdhë. Elbasani që në minutën e dytë me 10 lojtarë. Megjithatë, në minutën e 10-të, vendasit kalojnë të parët në avantazh me anë të Dalipit tjetër, edhe pse ishin inferiorë nga ana numerike. Loja fillon e ndizet dhe më shumë, por Elbasani dëshiron ta mbyllë me fitore këtë kampionat, pasi tifozët kanë përgatitur festën. Dhe kështu ndodh, pasi në minutën e 30-të Asllani shënon golin e dytë, duke dominuar totalisht lojën, duke mos e ndier mungesën e një lojtari. Por sërish një episod në fushën e lojës, ku sërish protagonist është Klodian Dervishi, i cili kësaj radhe e ka me Tefik Osmanin. Për këtë veprim, ai merr kartonin e dytë të verdhë dhe skuadrat balancohen për sa i përket numrit të lojtarëve. Në fundin e pjesës së parë nuk mund të mungojë pa shënuar edhe mbrojtësi Dede, që shpeshherë ka shënuar këtë sezon për verdheblutë. Elbasani e mbyll me tre gola avantazh pjesën e parë, ndërsa për Shkumbinin duket çdo gjë e mbaruar. Peqinasit më shumë janë munduar të mbrohen, duke mos ditur të kundërsulmojnë. Megjithatë, në pjesën e dytë, trajneri Sejdini kishte dhënë porositë e veta dhe Shkumbini filloi nga minuta në minutë të bëhej i rrezikshëm, por nuk ka arritur të shënojë. Për të ardhur në minutën e 67-të, ku Begeja, duke pasur edhe një karton të verdhë, proteston ndaj gjyqtarit për një goditje dënimi. Gjyqtari nuk i jep të drejtë, ndërsa sulmuesi i Shkumbinit e pështyn në fytyrë. Me të drejtë, gjyqtari e largon me karton të kuq nga loja. Elbasani është tani në epërsi numerike dhe përfiton menjëherë, pasi Memelli nuk e ka të vështirë të shënojë golin e katërt. Vendësit fillojnë të lëshojnë në lojën e tyre, pasi e shohin se takimi po mbyllet. Pikërisht në këto momente përfiton Shkumbini. Në fillim është Magani që shënon me 11-metërsh, pastaj 7 minuta më vonë Ivanaj me kokë shkurton në dy gola diferencën. Minutat e fundit nuk sjellin ndonjë gjë dhe ndeshja mbyllet me fitoren e merituar të Elbasanit. Pas ndeshjes, futbollistët, stafi drejtues dhe tifozët kanë festuar suksesin e sivjetëm të Elbasanit.
Deklarojnë:
Artan Bushati, trajner i Elbasanit: "E merituam plotësisht fitoren, edhe pse që në fillim mbetëm me një lojtar mangët në fushë. Si në çdo takim të këtij kampionati, edhe ndaj Shkumbinit treguam se ishim më superiorë në fushë. Jam i kënaqur që Elbasani arriti të ngjitej në majat e futbollit shqiptar dhe për këtë kanë meritë të gjithë. Do të vazhdoj ta drejtoj këtë ekip edhe gjatë pjesëmarrjes në UEFA, për ta mbyllur këtu karrierën tek Elbasani. Më vjen mirë që arritëm një sukses të tillë, që u kishte munguar verdhebluve prej shumë vitesh."
Faruk Sejdini, trajner i Shkumbinit, u largua pas ndeshjes.

Të veçanta:
- Forca të shumta policore nga komisariatet e qarkut të Elbasanit, por edhe të tjera nga kryeqyteti, kanë garantuar rendin dhe qetësinë.
- Tensioni në fillimin e ndeshjes dhe në minutat e para të saj është shuar, pasi policia ka nxjerrë jashtë stadiumit disa tifozë problematikë.
- Midis parullave të shumta të zakonshme, një tepër e madhe shkruhej: "Mirë se vini në Elbasan!"
- Kur Salliu po bënte nxehjen është parë të polemizojë me tifozerinë vendëse dhe trajneri Sejdini e ka ulur në stol, duke e zëvendësuar me Muçën.
- Në fillim të pjesës së dytë, trajneri i Shkumbinit ka dalë disa minuta vonesë në fushë.


Marrë nga www.sportishqiptar.com.al


Faleminderit çuna për emocionet që na keni dhuruar sivjet...

Një faleminderit e veçantë i takon dhe Presidencisë së ekipit e cila i ka qenë një nga motivuesit kryesorë për arritjen e këtij rezultati të mrekullueshëm nga çunat tanë..Ju faleminderit

Do jemi gjithmonë pranë jush...


Ps.Një bravo e madhe i takon dhe tifozerisë së vërtetë elbasanase për kulturën e tolerancën e shpirtin sportdashës e treguar prej saj.


Gjithë të mirat

[miko]

Nr.1

Drejtori teknik i Elbasanit u tërheq vëmendjen lojtarëve që para se të largohen kanë një detyrim për të përmbushur

Kovaçi: Verdheblu, keni edhe Kupën UEFA!

Për drejtorin teknik të Elbasanit, deklaratat për dorëheqje nga stoli verdheblu, apo të disa futbollistëve të ndryshëm për kalimin tek ekipe të tjera pa e mbyllur kontratën me klubin, janë të nxituara. "Normalisht, më duket mosmirënjohje ndaj vlerësimit që i ka bërë punës së tyre në veçanti presidenca dhe opinioni sportiv elbasanas. Si trajneri, edhe futbollistët e Elbasanit, për edicionin 2004?2005 janë të respektuar për atë që dhanë, por kurrsesi nuk mund të kërkojnë të ikin me vrap për në ekipe të tjera pa e mbyllur kontratën me klubin verdheblu. Do të jetë në nderin e tyre t'i lënë në heshtje ofertat dhe të jenë të vendosur për të luajtur si në ditët e tyre më të mira të kampionatit për Elbasanin dhe në ndeshjet e Kupës UEFA. Rendja e disa futbollistëve për në ekipet e tjera mendoj se nuk i shërben për mirë të ardhmes së tyre. Para së gjithash, ata kanë rastin të tregojnë se kush janë në ndeshjet ndërkombëtare, ku mund të shihen nga menaxherët e huaj për të bërë karrierë. Të deklarosh se do të nënshkruash me këtë apo atë ekip që tani është veçse një spekulim në shumicën e rasteve. Pjesa dërrmuese e ekipeve shqiptare, përjashto ato që do të luajnë në kupat europiane, nuk janë as në qiell, as në tokë, sepse të tilla janë problemet e tyre. Megjithatë, askush nuk e priste që vetëm pas përfundimit të ndeshjes së fundit të Elbasanit të vërshonin deklaratat për dorëheqje dhe largime të disa futbollistëve verdheblu. Për mua, por edhe për shumë të tjerë, këto ishin të papritura dhe të pakuptueshme për kohën dhe vendin kur u bënë të ditura. Nuk është për t'u çuditur dhe aq shumë, pasi në futbollin shqiptar ndodh edhe ajo që nuk e mendon. E rëndësishme është që presidenca verdheblu garanton një mbështetje të fuqishme financiare jo vetëm për tani, por edhe për kampionatin tjetër. Presidenti Arben Laze e ka deklaruar qartë se cilat do të jenë zhvillimet e ditëve të ardhshme. Ai është i aftë ta menaxhojë situatën. Presidenca aktuale arriti të rindërtojë nga e para një vit më parë ekipin, i cili u shpall nënkampion dhe tani që përvoja nuk mungon ajo mund të bëjë surpriza që duhet t'i besojmë të gjithë. Koha do ta tregojë se presidenca e Elbasanit do t'i realizojë ambiciet që ka shpallur në kohën që mori përsipër të financojë verdheblutë," - është shprehur drejtori teknik i Elbasanit, Artin Kovaçi, cili ka marrë shkak nga disa deklarata të futbollistëve verdheblu, të cilët janë shprehur për largim

-------------------------------------------------------------------------------------------------------
Nr.2

Pas dorëheqjes së Bushatit, presidenca verdheblu piketon pasardhësin e tij

Demollari-Josa, kandidatë për stolin e Elbasanit

Sulejman Demollari ose Mirel Josa, por ndoshta edhe të dy së bashku mund të jenë drejtuesit e rinj të Elbasanit. Kandidaturat e lartpërmendura nuk janë të vetmet, por nga burime pranë presidencës verdheblu janë cilësuar si më kryesoret. Madje emrat e dy ish-futbollistëve të shquar të ekipit tonë përfaqësues si kandidatë për trajnerë të ekipit të Elbasanit janë mbajtur sekret. Edhe vetë Demollari e Josa mësohet se janë shprehur që emrat e tyre të mos përfliten pa u zyrtarizuar një kontratë e tyre me klubin verdheblu. Në fakt, presidenti i klubit të Elbasanit, Arben Laze, pak ditë më parë ka deklaruar se është menduar për pasardhësit e trajnerit Artan Bushati. Në opinionin sportiv elbasanas, në mesjavë kanë filluar të përfliten emrat e disa trajnerëve të mirënjohur shqiptarë, midis të cilëve Demollari e Josa cilësohen si trajnerët e rinj të mundshëm të Elbasanit. Këta sivjet bënë një figurë mjaft të mirë në drejtimin e ekipeve që u besuan dhe nuk ka dyshim që do të ishin zgjedhje të pranueshme për Elbasanin. Ata edhe si ish-futbollistë edhe si trajnerë gëzojnë një respekt të pazakontë në opinionin sportiv elbasanas. Kështu që arritja e një marrëveshjeje midis tyre e presidencës verdheblu që në fillim të sezonit do të cilësohej zgjidhje e përsosur në kohën e duhur. Por duhet theksuar se gjithçka është ende e pazyrtarizuar nga njëshi i klubit verdheblu, Arben Laze. Ambiciet e presidentit të Elbasanit për të ndërtuar një ekip edhe më të fortë se sa ky i këtij edicioni janë për t'u marrë në konsideratë. Në sezonin e ardhshëm sportiv, Laze është shprehur se do të afrojë në klubin që ai financon trajnerë dhe futbollistë me përvojë, që garantojnë suksesin në mënyrë të padiskutueshme. Të paktën me piketimet që ai ka bërë që në ditët e para të mbylljes së kampionatit paralajmërohet qartë se përsëri Elbasani do të jetë në elitën e futbollit shqiptar. Në qytetin e Elbasanit, këtë gjë e besojnë dhe e dëshirojnë të gjithë. Futbolldashësit elbasanas shpresojnë se presidenca verdheblu do të arrijë të bëjë çdo gjë në kohën që i takon dhe ashtu siç duhet. Megjithatë, Laze ka premtuar se surprizat që ai do të bëjë sivjet do të jenë të shumta e të këndshme për opinionin sportiv.

----------------------------------------------------------------------------------------------------
Nr.3

Portieri elbasanas do të ulet fillimisht me presidencën verdheblu, pastaj do të shikojë ofertat e tjera

Kotorri: Pas Elbasanit vijnë të tjerët

Në përfundim të kampionatit, portieri i Elbasanit, Elvis Kotorri, rezulton të jetë më i suksesshmi për sa i takon numrit të pakët të golave të pësuar gjatë 36 javëve që ai mbrojti kuadratin e verdhebluve. "Për mua, ky është një nga sezonet më të suksesshme që nga koha kur e kam filluar futbollin. Porta jonë u ndëshkua vetëm 27 herë, shifër kjo mjaft e ulët, krahasuar me atë të ekipeve të tjera. Sigurisht, këta tregues cilësorë janë produkt i nivelit të shkëlqyer të ekipit nga fillimi deri në fund të sezonit. Personalisht kisha fatin të jem në kreun e listës së portierëve më të mirë të superligës, kjo pasi kam pësuar më pak gola dhe mesatarisht më pak se një për çdo ndeshje. Natyrisht që një meritë të padiskutueshme në pësimin e shumë pak golave e ka pasur edhe reparti i mbrojtjes. Por edhe forma ime përgjithësisht ka qenë mjaft e mirë, sidomos gjatë fazës së fundit të kampionatit. Aktivizimi në çdo ndeshje, me gjithë ndonjë kontestim të vogël të dikujt, besoj se ka qenë i merituar. Jam përpjekur të jap maksimumin dhe ia kam arritur pothuajse gjithmonë. Në pjesën më të madhe të ndeshjeve kam luajtur rol vendimtar në mbrojtjen e rezultateve pozitive të ekipit. Jam ndier shumë keq kur jemi ndëshkuar, sidomos në ndeshje të rëndësishme, por falë gjendjes shumë të mirë të ekipit i kam kapërcyer situatat kritike. Tani që gara ka përfunduar, jam i qetë që ia arritëm të dalim faqebardhë para klubit dhe opinionit sportdashës elbasanas. Përfundimi me tregues tepër të kënaqshëm i aktivtetit na jep kurajo për të qenë më ambiciozë për të ardhmen. Eshtë e natyrshme që Elbasani të synojë të paraqitet sa më mirë edhe në turin e parë të Kupës UEFA," - shprehet portieri Kotorri. I pyetur nëse do të jetë pjesë e Elbasanit në këtë aktivitet ndërkombëtar, Kotorri thotë: "Shpresoj se do të jemi po ai grup që luajti në kampionat dhe është e ligjshme që të jenë të gjithë futbollistët që e siguruan pjesëmarrjen në Europë pjesë e verdhebluve në UEFA. Më pas, edhe unë kam të drejtën të zgjedh ekipin me të cilin do të luaj në edicionin e ri. Do të kërkoj aq sa meritoj dhe asgjë më shumë. Fillimisht do të ulemi në bisedime me presidencën e Elbasanit, sepse moralisht i jemi borxhlinj asaj dhe nuk ka kuptim të largohemi pa diskutuar më tej. Për momentin kam dy oferta serioze, por nuk kam ndër mend të futem në bisedime pa e mbyllur misionin e nisur me verdheblutë. Nga ekipi i Elbasanit jam larguar vetëm gjatë një kampionati për shkaqe që dihen dhe mbeten besnik i verdhebluve. Por në futbollin profesionist flitet për konkurrencë dhe kontrata të kushtueshme, pjesë e të cilave më pëlqen që të jem gjithmonë. Sivjet presidenti Arben Laze arriti të rindërtonte një ekip të shkëlqyer, të cilit i plotësoi të gjitha kushtet për të përballuar me sukses kampionatin. Falë investimeve serioze të tij, futbolli i qytetit të Elbasanit u ngjit në elitë dhe gjasat që janë edhe në sezonin e ardhshëm ky ekip të ruajë ritmin. Në Elbasan, të gjithë duan që verdheblutë të jenë kampionët e ardhshëm, por kjo kërkon shumë punë dhe sigurisht financime më të mëdha. Ndoshta sponsorët Laze?Çërraga, krahas mbështetjes së bashkisë, nuk do të jenë të vetmit që do të investojnë për futbollin elbasanas. Ata tashmë janë futur në historinë e klubit verdheblu si investitorët më seriozë dhe shpërblimi për ta do të jetë një pjesëmarrje sa më dinjitoze në UEFA. Le të shpresojmë se do të përsëritet historia e largët, kur Flamurtari i Vlorës trondiste futbollin europian."

---------------------------------------------------------------------------------------------------
Nr.4

1842 votues: Elbasani meritonte titullin kampion

Anketa më e fundit e së përditshmes sportive "Sporti shqiptar", në anketën e saj on-line, ka nxjerrë Elbasanin si skuadrën që meritonte fitoren finale të kampionatit të 66-të kombëtar. Në fakt, paraqitja e mirë e skuadrës verdheblu gjatë këtij edicioni ka bërë për vete shumë tifozë, të cilët kanë parë sesi skuadra e drejtuar nga Bushati ka lënë pas vetes emrat më të mëdhenj të futbollit shqiptar. Kështu, në anketën e organizuar nga "Sporti shqiptar", se cila prej Dinamos, Elbasanit e Tiranës meritonte titullin kampion, nga 1842 votues, 1081 prej tyre kanë zgjedhur skuadrën elbasanase. Në vend të dytë, me 671 vota, është renditur skuadra kampione, Tirana. Dinamo ka marrë numrin më të vogël të votave, vetëm 90 të tilla. Në fakt, kjo anketë ka pasur si qëllim të vëzhgonte popullaritetin e skuadrave të renditura në treshen e parë të kampionatit tonë dhe Elbasani ka pësuar një hov të jashtëzakonshëm, sidomos po të kemi parasysh se vetëm një sezon më parë skuadra verdheblu diskutonte qëndrimin në kategorinë e më të mirëve. Suksesi i arritur në këtë votim on-line, tregon më së miri progresin e bërë nga Elbasani, i cili ka mundur të pushtojë zemrat e tifozërisë shqiptare.

-----------------------------------------------------------------------------------------------------


Marrë nga www.sportishqiptar.com.al

[miko]

Nr.1


Kapiteni dhe sulmuesi i kombëtares maqedonase, Artim Shaqiri, mund të quhet blerja e parë e nënkampionëve.

Artim Shaqiri, surpriza e parë verdheblu

Kapiteni dhe sulmuesi i kombëtares maqedonase, Artim Shaqiri, mund të quhet blerja e parë e Elbasanit pas përfundimit të kampionatit. Presidenti Arben Laze ka qenë mbrëmë me futbollistin shqiptar në Elbasan dhe gjithçka paraprakisht është rënë dakord që sulmuesi i njohur i përfaqësueses maqedonase të luajë për ngjyrat verdheblu. Kontrata do të firmoset më 15 qershor, datë kur do të organizohet edhe festa për suksesin e ekipit të Elbasanit, ku presidenti Laze do të zbulojë të tjerë emra cilësorë. Në fakt, "dashuria" mes Elbasanit dhe Artim Shaqirit ka nisur që verën e kaluar, por ai preferoi që edhe një vit të luajë në Angli me skuadrën e Uest Bromuiçit (ËBA) në Premier Ligë, megjithëse sezonin që sapo përfundoi është aktivizuar shumë pak. Shaqiri është mjaft i njohur në kampionatin anglez, pasi ka ndërruar disa ekipe, por ai mbahet mend për dy gjëra. Ai kujtohet për zënkën e bujshme me David Bekamin në ndeshjen me kombëtaren e Anglisë në Shkup dhe për golat fantastikë që ka shënuar në Angli, kur Maqedonia arriti një barazim historik me përfaqësuesen që drejtohej nga Erikson. Pra, Shaqiri është një lojtar me bagazh dhe mjaft i njohur në arenën ndërkombëtare dhe eksperienca e tij mund ta ndihmojë shumë ekipin e Elbasanit, si në paraqitjen në Kupën UEFA, ashtu edhe në edicionin e ardhshëm në kampionatin shqiptar, ku sërish Elbasani shkon me pretendime. Verdheblutë kanë vuajtur disi në repartin e sulmit, por ardhja e talentit Shaqiri mund të përforcojë këtë repart dhe t'i japë një dorë më shumë. Nëse një lojtar cilësor largohet, një tjetër vjen te verdheblutë. Si duket, presidenca elbasanase nuk ka aspak ndër mend të ndalë atë hov që këtij ekipi. Të shohim se çfarë surprizash të tjera do të na sjellë në ditët e ardhshme kjo presidencë, pasi gjasat janë që Elbasani të jetë sërish ndër të parët, të paktën duke u nisur nga deklarata e Arben Lazes.

------------------------------------------------------------------------------------------------------

Nr.2


Nënkampionët, festa e suksesit më 14 qershor

Elbasani do t'i paraprijë pjesëmarrjes së verdhebluve në kupën UEFA me një festë që do t'i kushtohet suksesit që ata shënuan në edicionin e sivjetëm të superligës. Renditja e Elbasanit në vendin e dytë, duke i shpallur ata nënkampionë të Shqipërisë, është cilësuar një arritje tepër e madhe, pasi në këto nivele futbolli elbasanas nuk ishte ngjitur që nga edicioni 1983?1984, ku paraardhësi i ekipit aktual, Labinoti, shpallej kampion i Shqipërisë. Burime pranë presidencës verdheblu konfirmon se po bëhen të gjitha përpjekjet për të bërë një festë mdhështore në qendër të qytetit të Elbasanit me pjesëmarrjen e të gjithë dashamirësve të futbollit e të gjithë personaliteteve të shquara të këtij sporti ndër vite.


Drejtuesit verdheblu piketojnë mbrojtjen
Presidenca e Elbasanit, ndërsa futbollistët janë duke shijuar pushimet, po punon për të krijuar ekipin me të cilin do të konkurrojë në kampionatin e ri. Që tani nga ana e njëshit të klubit verdheblu po bëhen përpjekje serioze për të ndërtuar një repart me mbrojtësa të nivelit të lartë, sikurse ishte ai i këtij edicioni që lamë pas. "Jam në kontakt me lojtarë të shquar që luajnë si mbrojtës dhe besoj se dalëngadalë disa prej tyre do të vendosin të vishen verdheblu. Sigurisht, do të ndihem keq pa i pasur më në ekip ata që dhanë maksimumin për Elbasanin vitin e fundit, por kjo nuk do të thotë se do të mbetemi si "peshku pa ujë" për të ardhmen. Futbollistë të nivelit cilësor që luajnë në mbrojtje ka plot dhe shumë shpejt disa do të zgjedhin Elbasanin," - shprehet presidenti Laze

---------------------------------------------------------------------------------------------------

Nr.3

Presidenti verdheblu jep garanci për një ekip të madh, madje pas dy ditësh do të zbulojë një emër shumë cilësor.

Laze: Elbasani, pretendent edhe vitin tjetër

"Elbasani sërish do të jetë mes ekipeve të mira. Natyrisht, ne do të kërkojmë titullin, por kurrë nuk mund t'ia lejojmë vetes që të biem poshtë vendit të tretë." Kështu ka deklaruar presidenti i ekipit të Elbasanit, Arben Laze, i cili premton se nuk do ta lërë në asnjë moment ekipin e tij të zemrës, përkundrazi do të vazhdojë të ndërtojë një skuadër të madhe. I pyetur për gjendjen aktuale, kur shumë futbollistë kërkojnë të divorcohen, numri një i klubit verdheblu përgjigjet: "Unë kam një parim dhe këtë e kam thënë që ditën e parë me lojtarët e mi. Të gjithë janë të lirë dhe mund të zgjedhin vetë ekipin që dëshirojnë. Do t'u bëj ofertën time dhe kujt t'i pëlqejë, le të rrijë. Nuk mbaj askënd me zor. Besoj se të gjithë e kanë provuar korrektesën time." Pra, heshtja e presidentit të Elbasanit nuk do të thotë se ai ka hequr dorë nga ekipi i qytetit të tij. Laze po ndjek me imtësi çdo lëvizje. Ai kërkon të futet në merkato qetë-qetë, duke mos përmendur emra të bujshëm para kohe dhe në fund të gjithë të zhgënjehen. Në kontaktin që patëm me të, Laze thotë që është në bisedime me një lojtar shumë cilësor, madje pas 2-3 ditësh mbaron gjithçka, por ai sërish tregohet i matur, duke mos zbuluar emrin para kohe. "Jam në bisedime me një nga lojtarët më cilësorë të futbollit në Shqipëri. Përvoja nuk ma lejon që ta zbuloj emrin para kohe, pasi mund të na prishte punë të dyja palëve. E di që sportdashësit janë të paduruar dhe presin emra të rinj në skuadër, por unë po ju them që të mos mërziten, pasi kanë për të parë sërish një Elbasan pretendent, si në kupë, ashtu edhe në kampionat. Nuk do të ketë asnjë tolerim. Tani jemi të destinuar të fitojmë. I jemi futur kësaj pune me një qëllim dhe duhet ta arrijmë atë," - shton më tej njeriu që e ngriti sërish Elbasanin në majat më të larta të futbollit shqiptar. Në prag janë ndeshjet e Kupës UEFA dhe verdheblutë do të ndeshen pas 20 vjetësh në kupat europiane. Edhe për këtë presidenti Laze nuk mërzitet, madje është i bindur që ekipi i tij do ta kalojë turin e parë. "Nga sa jam informuar, shorti na vë përballë një ekip ballkanas. Jam i bindur që kushdo ekip që të bjerë, Elbasani do ta kalojë me sukses turin e parë. Kuptohet që do të përgatitemi për këtë sfidë, në mënyrë që të kënaqim tifozët tanë të zjarrtë, që për mua kanë qenë një faktor i rëndësishëm në suksesin tonë," - thekson Laze. Thashethemeve të dyshes drejtuese Demollari-Josa, që kanë dalë në opinionin sportiv për pasardhësin e Artan Bushatit, presidenti verdheblu përgjigjet prerazi: "Nuk kam kontaktuar me asnjërin prej tyre. Eshtë e vërtetë që unë jam për drejtues të rinj në moshë dhe ndoshta kështu kanë marrë udhën edhe thashethemet për këta dy trajnerë. Unë i respektoj ata dhe ndoshta në momentin e duhur mund të jenë edhe kandidatë, por për momentin nuk kam folur me ta." Me pak fjalë, Arben Laze premton se do të ndërtojë sërish një skuadër të denjë dhe nuk do të heqë dorë nga sponsorizimi për futbollin elbasanas, madje garanton të gjithë tifozët verdheblu që ekipi i tyre i zemrës do të jetë sërish në majat më të larta

-------------------------------------------------------------------------------------------------------


Marrë nga www.sportishqiptar.com.al

[miko]

Nr.1

Sot fillon grumbullimi i verdhebluve

Futbollistëve të Elbasanit u duhet t'u japin fund pushimeve, të cilat i filluan pas mbylljes së kampionatit, sepse verdheblutë janë pjesëmarrës në Kupën UEFA. Sipas burimeve zyrtare nga klubi i Elbasanit, bëhet e ditur se ekipi do të grumbullohet këtë javë për të nisur po gjatë këtyre ditëve përgatitjet për ndeshjet ndërkombëtare të turit paraeliminator në Kupën UEFA. Në fakt, më parë ishte parashikuar dita e djeshme për paraqitjen në klubin verdheblu të futbollistët që do të jenë në përbërje të Elbasanit gjatë përfaqësimit të tij në Europë, por është gjykuar që ata të mbërrijnë nga dita e sotme në zyrat e drejtuesve të tyre. Në këtë grumbullim janë thirrur të gjithë futbollistët. Të gjithë kanë shprehur gatishmëri të plotë për të qenë në dispozicion të trajnerëve verdheblu, madje edhe disa titullarëve që janë në prag të nënshkrimit të kontratave me klube të tjera. Kështu, ka shumë mundësi që Elbasani të luajë në Kupën UEFA po me ata futbollistë që e ngjitën në elitë në kampionatin e sivjetëm të superligës. Nga ana e tij, presidenti i Elbasanit, Arben Laze, beson se edhe katërshja e famshme e mbrojtësve të ekipit verdheblu të edicionit 2004?2005, Ahmataj?Dede?T.Osmani?Dallku, do të luajnë për ngjyrat e Elbasanit në Kupën UEFA. Gjithashtu, nuk vihet në dyshim as pjesëmarrja e "jabanxhinjve" të tjerë te ky ekip, siç janë Bejzade, Osja, Kaçi, Asllani dhe Memelli. Ishte kontributi i tyre që e çoi Elbasanin për herë të tretë si pjesëmarrës në kupat e Europës, prandaj ata duhet ta respektojnë veten dhe ekipin me të cilin luajtën. Megjithatë, le të presim se kush do të paraqitet dhe kush jo në klubin e Elbasanit.

--------------------------------------------------------------------------------------------------------

Nr.2

Seth Ablade, sërish në skenë për Elbasanin

Futbollisti ganez Seth Ablade, i cili u aktivizua në kampionatin shqiptar me Elbasanin në sezonin 2003?2004, është shfaqur sërish në skenë. Përsëri ai ka shprehur dëshirën të kthehet në vendin tonë, madje duke kërkuar të luajë me të njëjtin ekip ku edhe u bë i njohur në futbollin shqiptar. Dy ditë më parë, ai ka komunikuar me dy miqtë e tij të ngushtë në Shqipëri, të cilëve u ka kërkuar informacion të hollësishëm për situatën që mbizotëron në klubin verdheblu. Mesfushori 21-vjeçar Seth Ablade shkëlqeu në kampionatin shqiptar që u aktivizua me Elbasanin, me të cilin shënoi edhe disa gola spektakolarë. Ai u largua në mënyrë enigmatike nga ky ekip dhe, siç u mësua më vonë, kjo ka ndodhur pas një përplasje të fortë për çështjen e pagesës me presidentin e atëhershëm të Elbasanit. Momenti i largimit të tij u përcoll me keqardhje nga opinioni sportiv, i cili e vlerësonte ganezin Ablade si më të mirin e verdhebluve. Në të njëjtën kohë, futbollisti me ngjyrë kishte shprehur dëshirën që të merrte pasaportë shqiptare dhe të luante për ngjyrat e përfaqësueses sonë. Por këto ëndrra të tij u ndërprenë në mes. Siç duket, Ablade nuk e ka harruar për asnjë moment Elbasanin dhe Shqipërinë deri më sot. Gjatë vitit të fundit ai është aktivizuar në Malajzi, por nuk i ka shkëputur kurrë lidhjet me Shqipërinë. Tani që pritet të fillojë edhe merkatoja e futbollistëve, ai ka trokitur vetë dhe ndoshta mund të rikthehet te verdheblutë. Nëse ka pësuar rritje të formimit profesional si futbollist, Elbasani do të ketë në dorë një nga mesfushorët më të mirë që ka pasur në radhët e tij që nga koha kur luante Ferdinand Bilali. Megjithatë, drejtuesit e Elbasanit nuk kanë dhënë hollësi për rastin Ablade.

-------------------------------------------------------------------------------------------------------

Marrë nga www.sportishqiptar.com.al

[miko]

Nr.1

Elbasanasit, stërvitje të organizuar

Jo të gjithë futbollistët që u aktivizuan me Elbasanin në sezonin e fundit janë duke bërë pushime absolute. Edhe ata që kanë shkuar në plazh nuk e kanë lënë pas dore stërvitjen, por në mënyrë të pavarur i kanë rezervuar asaj një pjesë të vogël të kohës. Ndërsa pjesa tjetër, që aktualisht jetojnë në qytetin e Elbasanit, për çdo ditë të organizuar në grupe të vogla, po e vazhdojnë stërvitjen të kufizuar me kohë. Gjatë orëve të para të mëngjesit ata bëjnë vrapime në mjediset e parkut "Rinia" në periferi të qytetit, ndërsa pasdite zhvillojnë ndeshje në fushat e minifutbollit për të ruajtur formën e tyre të zakonshme sportive. Por pas pak ditësh pushimet e pjesshme të verdhebluve do t'i zëvendësojë periudha përgatitore për Kupën UEFA

------------------------------------------------------------------------------------------------

Nr.2


Presidenti i verdhebluve ka bërë të ditur se legjenda e kuqezinjve është kandidati kryesor për postin e trajnerit

Laze: Strakosha, eja drejto Elbasanin!

Listës së kandidaturave të spikatura për postin e trajnerit të ri të ekipit të Elbasanit këtë javë i është shtuar edhe një tjetër emër i njohur i futbollit shqiptar. Madje propozimi i bërë për kandidaturën më të re për postin e trajnerit që do të drejtojë verdheblutë është thënë nga presidenti Arben Laze. Dëshira e financuesit kryesor të klubit është që trajneri i ri i verdhebluve të jetë ish-kapiteni legjendar i përfaqësueses së Shqipërisë, Foto Strakosha. "Kam një respekt të pazakontë për këtë figurë të shquar të sportit tonë, i cili ka vullnet për të bërë edhe sakrifica kur është e nevojshme. Kam besim se Strakosha do të na e plotësojë dëshirën për të ardhur në Shqipëri si trajner i Elbasanit," - ka deklaruar presidenti Laze. Ndërsa ka marrë miratimin e të gjithëve për t'i propozuar Strakoshës postin e trajnerit te verdheblutë, presidenti i Elbasanit që prej disa ditësh ka filluar kontaktet me ish-kapitenin e përfaqësueses. Nga ana e tij, Laze e ka pikë të dobët çështjen e trajnerit që do të marrë përsipër të përgatisë Elbasanin, prandaj ka zgjedhur një nga personalitetet e fushës së futbollit të kohëve të fundit. "Vetëm me një trajner ambicioz mund të futemi me pretendime në kampionatin e ri, prandaj duhet të kemi në krye të ekipit një si Strakosha, i cili, edhe pse nuk ka pasur ekipe në drejtim, ka përvojë të mjaftueshme ta bëjë shkëlqyeshëm këtë," - është shprehur Laze, i cili gjatë kësaj jave ose deri në mesjavën tjetër do të përfundojë një marrëveshje paraprake me kandidatin për trajner. Midis të gjithë atyre që e synojnë postin e trajnerit të Elbasanit, më i preferuari rezulton Foto Strakosha. Në këtë vlerësim që i bëhet atij ndikojnë së tepërmi shumë faktorë, ku mbi të gjitha është karriera e tij e pasur futbollistike dhe kontributi i çmuar në radhët e kombëtares deri në moshën 40-vjeçare. Aktualisht, burime të afërta me presidencën e verdhebluve theksojnë se dëshira e presidentit Arben Laze mund të realizohet, pasi Strakosha me një Elbasan të përbërë nga futbollistë profesionistë të njohur mund ta pasurojë edhe më shumë karrierën e tij sportive. Pak ditë më parë, për të njëjtin post u lakuan emrat e Demollarit dhe Josës, por tashmë ata janë të angazhuar në punë të tjera, gjë që do të thotë se nuk janë rivalë të kandidaturave të reja për trajner te verdhebluve. Megjithatë, gjithçka mbetet e hapur dhe një gjë është e sigurt, se Elbasani do të ketë së shpejti një trajner tjetër për kampionatin e ri. Do të jetë Strakosha, apo dikush si ai, apo edhe më i mirë se ish-kapiteni i kuqezinjve? Këtë do ta mësojmë javës tjetër. Presidenti i Elbasanit është i vendosur që edhe në edicionin e ri ai do të ketë një ekip që do të jetë protagonisti kryesor i aktivitetit.

----------------------------------------------------------------------------------------------------


Marrë nga www.sportishqiptar.com.al


Çfarë bëhet kështu mer aman.Vetëm më keni lënë.

Hidhni ndonjë koment se jam ba si tip gazetari,ngela duke sjellë lajme nga sportshiptar me copy-paste.

Shumë suksese ekipit tonë të zemrës.Zgjedhja e Strakoshës nqs realizohet është diçka shumë pozitive për mendimin tim.

Gjithë të mirat

[miko]

Mbrojtësi veteran, shpesh dhe kapiten i verdhebluve, kërkon të kontribuojë edhe në Kupën UEFA

O.Osmani: Edhe një sezon tjetër tek Elbasani

Një nga futbollistët elbasanas që ka luajtur mjaft vite në përbërje të ekipit verdheblu është edhe mbrojtësi Oltion Osmani. Ai gjatë sezonit të fundit, për shkak të konkurrencës mjaft të fortë në repartin e mbrojtjes, për disa javë ka mbetur në stolin e rezervave. Megjithatë, mbetet një lojtar me vlera, edhe pse në shumicën e rasteve është aktivizuar pjesërisht në disa ndeshje, pasi gjendja e futbollistëve të tjerë të repartit të mbrojtjes ka qenë në lartësinë e duhur. Pavarësisht nga forma e mirë që ka pasur, mbrojtësi Oltion Osmani e ka pasur të detyruar të qëndrojë në stolin e verdhebluve. Kjo nuk e ka shqetësuar atë, pasi për Osmanin rëndësi ka që ecuria e Elbasanit ka qenë pozitive nga fillimi deri në fund të aktivitetit. Në ndeshjet që u aktivizua mbrojtësi O.Osmani ka mbajtur edhe shiritin e kapitenit, si dhe ka bërë një prezantim të pëlqyeshëm. "Jam i kënaqur me atë që kam dhënë në fushën e lojës në ndeshjet që jam aktivizuar. Një ndihmë të madhe në këtë drejtim kanë pasur edhe kolegët e tjerë të ekipit. Renditja në vendin e dytë ishte plotësisht e merituar. Kuptohet që suksesi i këtij kampionati nuk duhet të mbetet me kaq. Ai kërkohet që të pasurohet me një pjesëmarrje sa më të mirë në turin paraeliminator të Kupës UEFA dhe në kampionatin e ri. Duke qenë se disa prej titullarëve janë shprehur për një largim të mundshëm nga Elbasani, është momenti më i mirë për të menduar për zëvendësimin e tyre me lojtarë po aq cilësorë si ata. Personalisht dëshiroj të mbetem te verdheblutë, nëse ekipi do të ketë po atë mbështetje financiare dhe atë organizim të përsosur sikurse gjatë edicionit të fundit. Jam i bindur që presidenti Arben Laze dhe drejtuesit e klubit do të dinë ta menaxhojnë periudhën e riorganizimit, ashtu sikurse pretendojnë. Përvoja është e mjaftueshme në këto aspekte dhe mbetet çështje kohe ristrukturimi i ekipit për garat ndërkombëtare që e presin muajin e ardhshëm, si dhe për ato zyrtare kombëtare, që fillojnë në fund të muajit gusht. Gjithçka mbetet e hapur dhe ata futbollistë që nuk kanë ndër mend të largohen për tek ekipet e tjera do të futen në bisedime me presidentin verdheblu fillimisht. Vetëm nëse nuk do të gjejmë me kompromis një zgjidhje të pëlqyeshme, atëherë do të mendojmë për ndonjë ekip ku e shohim veten po aq mirë si tek Elbasani," - shprehet mbrojtësi i mirënjohur Oltion Osmani. Ai thotë se edhe për disa vite do t'i përkushtohet futbollit, sepse ndihet mjaft mirë për ta vazhduar me sukses karrierën si në rininë e tij. Osmani ndihet optimist për të ardhmen e tij dhe të ekipit në të cilin dëshiron të luajë edhe një sezon tjetër. Mbrojtësi i njohur beson se Elbasani do të jetë i suksesshëm në Kupën UEFA. Ai shpreson që edhe në kampionatin e ri shumë prej titullarëve do të mbeten pjesë e verdhebluve, sepse Elbasani duhet të jetë një ekip i fortë për ta bërë sa më të bukur garën.

Laze e Bushati bidedojnë për Kupën UEFA
Kur kanë mbetur edhe pak ditë që ekipi i Elbasanit të grumbullohet për ndeshjet e Kupës UEFA, presidenti Arben Laze dhe trajneri Artan Bushati janë takuar midis tyre për të diskutuar rreth mënyrës se si do të organizohen paraprakisht punët. Gjatë një takimi miqësor midis tyre u është kushtuar vëmendje e madhe çështjeve që lidhen me paraqitjen e verdhebluve në kupën europiane. Detajet e këtij takimi nuk janë bërë të ditura, por kuptohet që Laze e Bushati kanë skicuar gjithçka është e nevojshme përpara grumbullimit të ekipit të Elbasanit, si dhe për vendin ku do të zhvillohet periudha përgatitore dhe përforcimet e nevojshme.



Marrë nga www.sportishqiptar.com.al

[miko]

Presidenca verdheblu kërkon futbollistë të tjerë si Dallku

Elbasani, merkato edhe nga Kosova

Krahas disa lojtarëve që mund të vijnë nga kampionatet e huaja, sivjet tek Elbasani mund të ketë futbollistë nga Kosova. Ndërsa gjatë kampionatit që kaloi u aktivizua me shumë sukses te verdheblutë mbrojtësi kosovar nga Vushtria, Armend Dallku, nuk do të jenë të paktë ata që do të përfshihen në merkaton e klubit të Elbasanit gjatë periudhës në vazhdim. Siç duket, presidenti Arben Laze, pas largimit të mbrojtësit të përfaqësueses, kërkon të afrojë disa të tjerë si ai në ekipin që financon. Në fakt, një emër i njohur i futbollit kosovar u lakua që në fillim të këtij viti, por afrimi i tij qe i pamundur. Tani që ai dhe futbollistët e tjerë cilësorë të përzgjedhur nga menaxheri i klubit verdheblu janë të lirë, presidenti i Elbasanit ka kërkuar që ata të zgjedhin ekipin që financohet prej tij. Në sezonin e fundit, kosovari Armend Dallku, falë paraqitjes së suksesshme, arriti të bëhej edhe anëtar i ekipeve kombëtare të Shqipërisë dhe tani pretendon të luajë me një ekip të Bundesligës. Kuptohet, një shans kaq të mirë për mbrojtësin kosovar e dha ekipi verdheblu. Duke qenë se edhe sivjet synohet që Elbasani të jetë një prej pretendentëve kryesorë për trofe, afrimi i futbollistëve cilësorë nga Kosova do t'u jepte mundësi maksimale atyre për të kaluar edhe në kombëtaren e Shqipërisë. Burime konfidenciale pranë menaxherit të klubit thonë se ka mundësi që pa u mbyllur ky muaj disa lojtarë cilësorë me moshë të re nga Kosova të jenë kontigjent i verdhebluve. Si për çdo rast tjetër, edhe për kosovarët presidenca e Elbasanit nuk ka dhënë detaje.


Verdheblutë, përgatitorja ndoshta në Austri
Përveç disa pikëpyetjeve që ekzistojnë rreth përbërjes që do të ketë formacioni i Elbasanit që do të konkurrojë në Kupën UEFA, edhe vendi ku do të zhvillohet periudha përgatitore nuk është përcaktuar përfundimisht. Që nga përfundimi i kampionatit dhe deri tani, presidenca verdheblu ka bërë përpjekje për të gjetur një vend sa më të përshtatshëm për të zhvilluar përgatitjet për ndeshjet ndërkombëtare. Megjithëse janë parë disa qendra stërvitore në vende të ndryshme, nuk është vendosur se ku do të kryhet periudha e përgatitjeve të Elbasanit për Kupën UEFA. Vitet e fundit, stërvitja e verës është kryer në Strugë dhe në Ohër të Maqedonisë, por sivjet pretendimet e verdhebluve janë për kushte më të mira. Kjo është e lidhur edhe me faktin që ata kanë objektiva serioze për ndeshjet paraeliminatore të Kupës UEFA. Sipas drejtuesve të klubit "Elbasani", për momentin vendi më i preferuar mbetet Graci i Austrisë, por ndërkohë edhe alternativa të tjera janë në diskutim. Megjithatë, ky është një problem plotësisht i zgjidhshëm, ndërsa si shqetësim mbetet ndërtimi i ekipit të ri.


Marrë nga www.sportishqiptar.com.al

[miko]

Elbasani, përgatitorja vijon në Maqedoni

Verdheblutë, fazën e dytë të periudhës përgatitore për ndeshjet e Kupës UEFA do ta zhvillojë në Maqedoni. Në këtë shtet, elbasanasit do të kenë mundësi të marrin edhe informacionin e nevojshëm për kundërshtarin e tyre, i cili është një prej ekipeve më të njohura të këtij vendi. Ndërsa qyteti ku do të sistemohen verdheblutë gjatë kësaj periudhe stërvitore mund të jetë Struga ose Ohri, pasi që të dyja afrojnë kushte të mira për t'u përgatitur, por për këtë do të jenë drejtuesit e ekipit ata që do të vendosin. Në Maqedoni verdheblutë do të mbërrijnë në fillim të muajit korrik dhe do të stërviten atje për një periudhë 10-ditore.


E.Dalipi, Osja dhe Kuçi me provime
Disa nga futbollistët e ekipit të Elbasanit që ndjekin studimet në Universitetin "Aleksandër Xhuvani" janë të detyruar që të shkëputen përkohësisht nga stërvitja për të marrë pjesë në provimet e radhës, atë sezonit të verës. Gjatë këtyre ditëve, futbollistët Endri Dalipi, Safet Osja dhe Egert Kuçi janë duke u përballur me një ngarkesë jo të vogël pune stërvitore dhe studimore. Për ta koha për të pushuar është shumë e pakët.


Kosovari Cecelia në pritje të vlerësimit
Që nga filimjava, në radhët e ekipit të Elbasanit ndodhet edhe mesfushori nga Vushtria e Kosovës, Faton Cecelia. Ai po provohet gjatë fazës përgatitore që verdheblutë po zhvillojnë në qytetin e Pogradecit dhe shumë shpejt do të vendoset për të ardhmen e tij. Ai është në pritje të vlerësimit, por teknikët e Elbasanit nuk kanë ndër mend të nxitohen. Mesfushori 22 vjeçar nga Vushtria do të jetë në qendër të vëmendjes gjatë një ndeshjeje miqësore që do të zhvillojë Elbasani në fund të këtij muaji. Vetëm atëherë do të merret vendimi për kosovarin Cecelia, nëse do të jetë pjesë e ekipit për të ardhmen.

------------------------------------------------------------------------------------------------

Marrë nga www.sportishqiptar.com.al


Unë çuditem me spekullimet e vazhdueshme që bëhen.Një herë do shkonin në Turqi një herë në Austri kurse tani na i çonkan djemtë në Maqedoni.

Nuk e di po nuk po më pëlqen aspak kjo "lëkundje" e treguar kohët e fundit,qoftë në lidhje me largimin e shumë lojtarëve cilësorë,qoftë me mosforcimin e duhur të ekipit me lojtarë cilësorë,qoftë me këto të ashtuquajturat "lëkundje" në vendimet e tyre.Nuk mund të ndërtojmë një ekip serioz kështu...

Uroj të jem gabim e të nxitohem por kam frikë se nuk mund të kemi suksesin e vazhdueshmërinë e rezultateve që kishim vitin e kaluar.Gjithsesi ne kemi për të qenë gjithmonë pranë djemve tanë....

Forca çuna ....

Gjithë të mirat

[miko]

Nr.1

Elbasani hap dyert për të rinjtë

Sivjet, në radhët e Elbasanit do të afrohen më shumë futbollistë nga ekipi i të rinjve sesa gjatë edicionit të kaluar. Aktualisht, dy futbollistë 18-vjeçarë janë thirrur në grumbullimin që është bërë në Pogradec dhe së afërmi do të afrohen edhe dy të tjerë për t'u aktivizuar në ekipin e parë. Ky grup futbollistësh me perspektivë parashikohet që të jenë pjesë e rëndësishme e Elbasanit gjatë garave zyrtare të ardhshme. Aktualisht po marrin pjesë në fazën përgatitore në Pogradec portieri 18-vjeçar Alban Hoxha dhe futbollisti Bakiu.


Gati kontratat për titullarët
Në fundjavë është parashikuar që të lidhen kontratat e reja me disa nga futbollistët titullarë që do të luajnë sivjet për ngjyrat e ekipit të Elbasanit. Paraprakisht, ky grup ka rënë dakord me presidencën për çështjen e pagesës dhe për mënyrën se si do të bëhet ajo gjatë periudhës që do të zhvillohen garat zyrtare. Sikurse thuhet, për 11 futbollistët e formacionit bazë hedhja e firmave në kontratë do të mbyllet përpara ndeshjes ndërkombëtare me Vardarin. Ndërsa të tjerët do ta kryejnë këtë formalitet deri në kohën e përcaktuar si kufiri maksimal nga FSHF-ja.


Gazheli mund të zëvendësojë Dallkun
Elbasanasit mund ta zëvendësojnë kosovarin Dallku me një mbrojtës të kampionatit shqiptar. Para disa ditësh, vendi i mbrojtësit nga Vushtria i është propozuar futbollistit Judmir Gazheli. Ky mësohet që e ka mirëpritur ftesën dhe se është futur në bisedime me presidencën verdheblu për çështjen e kontratës. Nëse këto bisedime mbyllen me sukses, ky futbollist do t'i bashkohet Elbasanit pa u mbyllur kjo javë.


Vrapi dhe Nuhiu firmosin për verdheblutë
Endri Vrapi dhe Arben Nuhiu janë dy futbollistët më të rinj që i janë afruar ekipit të Elbasanit. Mbrojtësi tiranas dhe mesfushori shqiptaro-maqedonas dje kanë hedhur firmën për verdheblutë dhe i janë bashkuar ekipit në Pogradec për t'u stërvitur. Pas Devollit, dy blerjet e djeshme e çojnë në tre numrin e blerjeve me kontratë. Të mos harrojmë që janë afruar edhe disa të tjerë, si Nora dhe Cecelia, por ata mund të marrin pjesë vetëm në Kupën UEFA.


Nr.2

Një "spiun" i Vardarit në miqësoren e Elbasanit

Gjatë ndeshjes miqësore të Elbasanit me Teutën në tribunë është parë edhe një person nga Shkupi i Maqedonisë, i cili ka kryer rolin e "spiunit", duke parë gjendjen e kundërshtarit në prag të Kupës UEFA. Kundërshtari i Elbasanit po mundohet të marrë sa më shumë informacion rreth ekipit verdheblu. Drejtues të Elbasanit janë shprehur se edhe një përfaqësues i tyre mund të ndjekë ndonjë ndeshje miqësore të Vardarit.


Nr.3

Bejzade: I vështirë kualifikimi me Vardarin

Në kampin verdheblu ka mendime të ndryshme rreth çështjes së kualifikimit të ekipit të Elbasanit për në turin tjetër pas ndeshjeve ndaj Vardarit të Shkupit. Disa janë të bindur se elbasanasit do ta sigurojnë kualifikimin që në takimin e parë që do të zhvillohet në stadiumin "Ruzhdi Bizhuta", ndërsa të tjerë mendojnë se gjithçka do të zgjidhet në ndeshjen e kthimit. Mesfushori Skerdi Bejzade është i mendimit se kualifikimi me Vardarin e Shkupit do të jetë i vështirë.
- Jeni njohur me kundërshtarin për Kupën UEFA. Cili është mendimi juaj për këtë ekip dhe si e parashikoni kualifikimin?
- Personalisht gjykoj se nuk jemi aq të favorizuar nga shorti, sikurse janë shprehur gjatë këtyre ditëve drejtues, apo futbollistë të Elbasanit. Mendoj se kemi përballë një ekip me emër të madh në futbollin maqedonas, i cili realisht është për t'u respektuar për vlerat e tij. Sigurisht që do të ishte më e lehtë për ne kualifikimi në rast se do të luanim me ekipe të dobëta që marrin pjesë në kupën UEFA, por shorti është short dhe duhet t'i bindemi. Vardari merr pjesë në UEFA me pretendime dhe, nisur nga ky fakt, e mendoj të vështirë kualifikimin.
- Pra, ju gjykoni se Elbasanit do t'i duhet një volum i madh loje për të shkuar në turin tjetër?
- Absolutisht po. Duhet të jemi realistë që ndeshjet ndërkombëtare janë të nivelit të lartë dhe kësaj është e nevojshme t'i përgjigjemi me një ekip sa më cilësor. Kundërshtari ynë ka pasur një ecuri shumë të mirë në kampionatin e fundit dhe pritet të luajë përballë nesh me formacionin e tij më të mirë të mundshëm. Kuptohet qartë që ekipi maqedonas është për t'u vlerësuar si një kundërshtar i fortë që nuk të fal kollaj. Kështu që verdhebluve do t'u duhet të djersijnë shumë për t'u kualifikuar.
- Çfarë e bën tjetër të vështirë kualifikimin?
- Këto vështirësi do të jenë të mëdha, pasi Elbasanit do t'i mungojnë në mbrojtje futbollistët që dihen tashmë. Largimi i katërshes së mbrojtjes është një nga arsyet pse e mendoj të vështirë ballafaqimin në UEFA. Nëse do të luanin për ngjyrat e verdhebluve Dede, Dallku, Osmani dhe Ahmataj, ne do të shkonim përtej parashikimeve tona në Kupën UEFA. Pavarësisht nga këto boshllëqe të krijuara si pasojë e lëvizjeve të lojtarëve pas mbarimit të kampionatit, në ekip ka lojtarë që do të luajnë në këtë repart po me atë përkushtim.
- Kanë mbetur pak më shumë se dy javë kohë deri kur do të luhet ndeshja Elbasani?Vardari. Cila është gjendja aktuale e verdhebluve?
- Për mendimin tim, çdo gjë po funksionon mirë. Prej afro 10 ditësh, Elbasani është grumbulluar në Pogradec, ku po zhvillon periudhën përgatitore për këtë ndeshje. Më vjen sinqerisht mirë që ka një atmosferë kaq të nxehtë dhe miqësore për këtë përfaqësim të verdhebluve në futbollin europian.
- Vardari ka jo vetëm një histori të pasur në futbollin e vendit fqinj, por ka në përbërje edhe lojtarë të talentuar. A është kjo një pengesë e fortë për t'u kapërcyer nga Elbasani?
- Ne e kemi të qartë si historinë, ashtu edhe gjendjen aktuale të kundërshtarit tonë në UEFA dhe po përgatitemi t'i kundërvihemi me "armët" tona më të forta. Shpresojmë se do të jemi të suksesshëm dhe se do të kualifikohemi, me gjithë vështirësitë që kemi përpara. Kohë ka ende për të bërë lëvizjet e duhura në ekipin tonë, që t'i kundërvihemi Vardarit me shumë dinjitet.
- Shpeshherë pëshpëritet se Elbasani do të përsërisë historinë e lavdishme të Flamurtarit të Vlorës. Si do ta komentonit këtë?
- Kjo do të ishte fantastike. Por duhet të jemi realistë. Më vjen keq që aktualisht forca e ekipit tonë nuk mund të shfaqet kaq magjishëm, por prapëseprapë dua ta besoj se Elbasani duhet të përsërisë historinë e Flamurtarit.



Marrë nga www.sportishqiptar.com.al

Nga gjithë këto lajme mua më ka pëlqyer shumë afrimi i dy djemve tanë.Është diçka shumë pozitive nqs djemtë do ambjentohen shpejt me ekipin e avash avash të jenë pjesë e formacionit bazë.Jam i sigurtë që me ekipet e vogla është bërë goxha punë serioze ndër vite dhe kjo ka sjellë si rezultat,formimin e mjaft talenteve.
Kto përforcimet nuk e di por më duken si të nxituara edhe nuk jam i sigurtë nqs janë zgjidhjet më të mira.Na mungon Lideri në ekip,që do të thotë shumë në lidhjen e ekipit gjë që e cila vëret re shumë në teren.Përsa i përket këtij "spiunit" hë çti komentosh.. Bujrum po ta dini se petllat nuk i shpëtoni kollaj lool

Sa për ndeshjen me maqedonsit,nuk dua të tregohem irealist po unë për vete jam shumë optimist për kualifikimin në fazën e dytë.Pastaj kismet Zotit lool

Forca çuna....



Gjithë të mirat

[dodoni]

Ky mesfushori Arben Nuhiu, kam degjuar se eshte lojtar shume i mire qe ka luajtur edhe me Hajdukun e Splitit, Beverenin ne Belgjike, Turqi etj.

Mendoj qe Elbasani jo vetem qe nuk eshte dobesuar me largimin e Dedes, Dallkut, Osmanit dhe Ahmatajt por edhe eshte perforcuar edhe me teper, me afrimin e Arben Nuhiut, Devollit, Vrapit, Nores, Cecelise etj.

I urojme Elbasanit kalimin e sa me shume tureve ne kupen e UEFA-s sivjet.

Tu-tung