Labinoti - Elbasan

[miko]

Elbasani, merr hak ndaj Teutës


Teuta me mungesa të dukshme në formacion ka pësuar humbjen e dytë radhazi në kampionat përballë një Elbasani me formacion të konsoliduar pas faljes së Ahmatajt nga komisioni i disiplinës. Elbasani ka arritur një fitore që e konsolidon në vendin e dytë, madje e bën që të shpresojë në ndonjë hap të gabuar të Tiranës. Pjesa e parë e takimit ka filluar më mirë për durrsakët, që me anë të Daniel Xhafës kanë rrezikuar në minutat e 8-të, 17-të dhe 24-t portën e Kotorrit. Durrsakët, që kanë në këtë pjesë edhe erën në favor, arrijnë që të shënojnë me anë të Xhafës, por goli anulohet për pozicion jashtë loje. Elbasani reagon kryesisht me anë të kundërsulmit, ku dyshja Ahmataj?Bejzade funksionon mjaft mirë. Eshtë pikërisht Bejzade, që pasi godet shtyllën e portës durrsake në minutën e 30-të, ka shfrytëzuar mjaft mirë një harkim të nisur nga një goditje dënimi nga Ahmataj, duke e përplasur me kokë topin në rrjetën e portës së Kapllanit. Elbasani shënon dhe Teuta fut në lojë Mancakun, që në ditën e varrimit të gjyshes së tij sakrifikon për ekipin, duke u futur në fushën e lojës. Minuta e 40-të do t'u jepte durrsakëve shansin më të mirë për të barazuar rezultatin. Daniel Xhafa fiton një penallti dhe atje është Mancaku që godet nga pika e 11-metërshit, por portieri Kotorri nuk lejon që topi të përfundojë në rrjetë. Teuta humbet rastin më të mirë për të barazuar, në një kohë që pjesa e dytë do të kishte një tablo krejt tjetër. Teuta, që pritej të ushtronte presion për të barazuar rezultatin, nuk ka forcën e duhur për ta bërë një gjë të tillë. Elbasani mbrohet mirë dhe i mbyll të gjitha korridoret e kërkuara nga Daniel Xhafa dhe Mancaku në bazë të një strategjie të qartë për të barazuar rezultatin. Rastet e Hasanit, Mancakut, Xhafës për Teutën nuk kanë ndryshuar asgjë në pjesën e dytë. Elbasani ka marrë tri pikë të arta në Durrës përballë një Teute që ndjeu peshën e lodhjes në mesjavë dhe mungesat e disa futbollistëve të rëndësishëm në ekip. Tashmë për Teutën kampionati është një formalitet, në një kohë që Elbasani ka konsoliduar vendin e dytë dhe shpreson në ndonjë hap të gabuar të Tiranës, e cila javës tjetër do të ndeshet sërish me Vllazninë. Por edhe Elbasani ka një ndeshje mjaft të vështirë, atë me Dinamon, që kundërshtarëve të fortë u ka marrë edhe pikë të plota. Të shohim se çfarë emocionesh do të na dhurojnë këta skuadra javën tjetër.

Deklaroi:" Artan Bushati, trajner i Elbasanit: "Ishte një ndeshje e vështirë në trasfertë, duke parë edhe gjendjen e mirë që aktualisht po kalon Teuta. Kemi konsoliduar me këtë fitore vendin e dytë dhe do t'i qëndrojmë pas Tiranës për të përfituar nga ndonjë hap fals. Në pjesën e dytë arritëm të menaxhojmë golin e shënuar në pjesën e parë dhe fituam. E kam parë me kujdes Teutën në ndeshjen e së mërkurës me Partizanin, ku luajti me ritëm të lartë. Mendoj se edhe fati ishte me ne në këtë fitore të merituar përballë një ekipi të fortë si Teuta.

" Të veçanta: - Bledar Mancaku, në ditën që varrosi gjyshen e tij, ka sakrifikuar duke luajtur për ekipin. Ai madje ka qenë fare pranë shënimit të golit pas goditjes së 11-metërshit. - Me humbjen e pësuar me Elbasanin, Teuta i ka thënë lamtumirë vendit të tretë në klasifikim, duke i hedhur sytë në kupë. - Një pjesë e tifozëve durrsakë e kanë braktisur stadiumin para përfundimit të ndeshjes, duke parë lojën pa ritëm të Teutës në pjesën e dytë.



Marrë nga www.sportishqiptar.com.al

[BlueBaron]

Sporti Shqiptar

Besnik Sulaj, presidenti i Dinamos, dhe Gjergj Ruli, shefi i klubit blu, lëshojnë deklaratën bombë.

Plas çështja "doping" në kampionatin shqiptar. Janë pikërisht drejtuesit më të lartë të klubit "Dinamo", të cilët kanë marrë përsipër të vendosin para përgjegjësisë ato skuadra që stimulojnë futbollistët e tyre me anë të substancave të ndaluara psikomotore.

Për presidentin Besnik Sulaj dhe shefin e klubit, Gjergj Ruli, duhet të fillojë medoemos hetimi nga ana organet kompetente, në bashkëpunim me Federatën Shqiptare të Futbollit, për të gjetur fajtorët që duan të përfitojnë në rrugë të paligjshme. Akuza e dy krerëve më të lartë të Dinamos është e përqendruar më shumë te skuadra e Elbasanit, e cila në këtë sezon ka shfaqur një formë të jashtëzakonshme fizike, duke hedhur shumë hije dyshimi. Në deklarimin e tyre ekskluziv për "Sportin shqiptar", Sulaj dhe Ruli bëjnë të ditur se do t'i bëjnë një kërkesë zyrtare qeverisë së futbollit shqiptar, që në këtë fundsezoni të marrë një vendim për bërjen analizave të të gjithë futbollistëve të superligës. Nëse një gjë e tillë nuk realizohet, presidenti dhe shefi i klubit blu kërcënojnë se do ta çojnë çështjen "doping" në organet më të larta të UEFA-s.

Sulaj: Urgjentisht, analizat Elbasanit
Ka qenë shumë i prerë në lidhje me problemin në fjalë presidenti i Dinamos, Besnik Sulaj. Bosi i bluve është i bindur se në kampionatin shqiptar janë disa futbollistë që përdorin substanca të ndaluara. Edhe pse nuk jep emra konkretë, Sulaj i ka dyshimet e tij më të mëdha te skuadra e Elbasanit, që në këtë kampionat ka bërë paraqitje të një forme fizike që të ngjason me kampionatin italian. "Së bashku me shefin e klubit, Gjergj Rulin, kam marrë përsipër të bëj të ditur se në kampionatin shqiptar konsumohen doza të substancave të ndaluara farmaceutike. Për këtë, do t'i bëjmë një kërkesë zyrtare Federatës Shqiptare të Futbollit, që të nisë urgjentisht bërjen e analizave të gjakut dhe urinës për të gjithë futbollistët e superligës. Po habitem në këtë sezon me formën fizike që po tregojnë sidomos futbollistët e Elbasanit dhe për këtë kërkoj që në përfundim të ndeshjes të së shtunës, një komision i caktuar të bëjë të gjitha analizat e nevojshme atyre dhe Dinamos njëkohësisht. Mendoj se tani është koha e përshtatshme që t'i themi "ndal" një problemi shumë të madh që ka zaptuar kampionatet më të forta në botë dhe që prej disa muajsh po jep shenja edhe në Shqipëri. Nëse Federata Shqiptare e Futbollit nuk do ta marrë parasysh kërkesën tonë, ne do të jemi të detyruar që t'i drejtohemi organizmit më të lartë të UEFA-s për të vendosur drejtësinë në vend."

Ruli: Koha e duhur për një hap të tillë.
Sipas shefit të bluve, fundsezoni është periudha më e mirë që të gjithë futbollistëve t'u bëhen analizat e gjakut dhe të urinës, për të provuar nëse kanë ose jo shenja të përdorimit të substancave të ndaluara. "Nga informacionet që kam, periudha më e mirë për realizimin e këtyre analizave është fundi i sezonit. Fakti që pasojat e përdorimit të substancave psikomotore mbeten deri në 6 muaj në gjak, do të thotë se jemi në kohën e duhur për të ndërmarrë një hap të tillë. Edhe unë kam dyshimet e mia për elbasanasit, të cilët në këtë sezon kanë dhënë një rendiment që nuk shihet në kampionatin shqiptar. Për këtë po bëjmë gati një kërkesë zyrtare drejtuar federatës sonë, e cila ndoshta në bashkëpunim edhe me prokurorinë, të nisë hetimet dhe njëkohësisht analizat e çështjes së shumëpërfolur "doping". Në realizimin e këtyre analizave, duhet të përfshihen edhe ekipet e tjera të superligës, së bashku edhe me Dinamon, ku me çdo kusht të vihen para përgjegjësisë fajtorët," - e mbyll deklarimin e tij shefi i klubit "Dinamo", Gjergj Ruli.

[miko]

Dinamo: Elbasan mos na keqkupto!

Shkrimi i djeshëm në gazetën "Sporti shqiptar" me titull: "Skuadra e Elbasanit përdor doping", ka krijuar tronditje në sportin shqiptar. Ja se si u shpreh zëdhënësi i shtypit i Dinamos dje për gazetën "Sporti shqiptar": "Nuk e prisnim që fjalët tona të keqkuptoheshin. Duam të bëjmë të ditur se në atë shkrim është folur në përgjithësi për fenomenin "doping". E theksojmë edhe një herë, se kemi dyshimet tona që në superligë dhe në tërë sportin shqiptar ka sportistë që përdorin substanca të ndaluara, fenomen për të cilin duhet hetuar dhe nëse është e vërtetë, të merren masa për t'u ndalur. Klubi ynë e sheh mëse normale që të ndërmerret një nismë e tillë për të mirën e të gjithëve dhe luftës së ndershme sportive. Madje, ne jemi gati që testi anti-doping të nisë që me ndeshjen Elbasani-Dinamo, duke filluar me ekipin tonë të Dinamos. Prandaj Elbasan, mos na keqkupto! Sqarojmë edhe një herë, se ne nuk kemi asgjë me ekipin e Elbasanit, për të cilin ruajmë respekt për rezultatet e arritura gjatë këtij sezoni,"- sqaron zëdhënësi i klubit "Dinamo".


Marrë nga www.sportishqiptar.com.al





Më vjen shumë keq për këto SHPIFJE,dhe janë të tilla pasi vetë deklarata e tij sot rrëzon me një dinakëri për tu pasur zili çka ai person deklaroi dje.

Nuk fitohen ndjeshjet kështu o trima,ndeshjen fitoje në fundjavë në fushën ne blertë.Pastaj i harruan Dinamovitët se ekipi i tyre është ai që na ka digjeneruar në kupat europiane.I harroi Presidenti i Dinamos se shiti akoma dhe ndeshjen me rumunët vitin e shkuar për kupën Uefa (më duket apo Intertoto)...

Edhe sportishqiptar.com.al sikur e ka dhe ai pak "meritën" e tij duke i fryrë gjërat,dhe duke luajtur rolin e "ndërmjetsit"....(gjynah se kam pasur respekt për këtë gazetë)

Mund të quhet dhe si lojë e këtij stafi në bashkëpunim me Drejtuesit të Dinamos me qëllimin për ti dhënë një interes tjetër kësaj ndeshje...

Dhe sigurisht dhe sportishqiptar del më i fituari në këtë "komedi" shet më shumë në kurriz të një ekipi shembull sivjet....

[miko]

Elbasani: Tek ne nuk ka doping!


Sapo kanë mësuar nga gazeta "Sporti shqiptar" se presidenti dhe shefi i klubit "Dinamo" e akuzojnë skuadrën e Elbasanit për përdorim dopingu, verdheblutë kanë kërkuar të argumentojnë të kundërtën përpara mediave nëpërmjet presidentit Arben Laze dhe trajnerit Artan Bushati. Rreth orës 10:30 të së mërkurës, dy figurat kryesore të verdhebluve, tepër të qetë, kanë komunikuar me gazetarët rreth asaj që ka deklaruar në formë akuze presidenti dhe stafi i klubit të Dinamos. Interesimi i gazetarëve ka qenë i pazakontë për të mësuar sa më shumë detaje nga njëshi i verdhebluve, i cili nga ana e tij është përpjekur që më së shumti të mohojë akuzat e ngritura nga drejtuesit e klubit "Dinamo". Presidenti i verdhebluve ka bërë një deklaratë për shtyp lidhur me pavërtetësinë e akuzave të bëra publike, duke renditur një sërë argumentesh.
"Në radhë të parë, jemi befasuar nga deklarata e publikuar në një gazetë sportive nga presidenti dhe shefi i klubit "Dinamo", sikur Elbasani gjatë këtij edicioni ka përdorur doping. Me një deklaratë dashakeqe, të mbushur me shpifje, ata hedhin poshtë vlerat sportive dhe financiare të klubit të Elbasanit. Ky klub me traditë të hershme, historia e të cilit fillon që në vitin 1913, do të mbetet i pastër dhe nuk mund ta njollosë askush. Rezultatet e shkëlqyera të arritura nga ana e ekipit tonë deri tani janë fryt i punës së të gjithë klubit dhe e grupit të futbollistëve të talentuar. Si mund të akuzohet në mënyrë kaq banale dhe pa asnjë bazë një ekip si Elbasani, që ka në përbërje të tij lojtarë profesionistë, një pjesë e të cilëve edhe anëtarë të ekipeve tona kombëtare? Nuk do të kishte kuptim që lojtarë të cilët janë në fillimet e karrierës së tyre të jenë përdorues të dopingut. Nuk më duket bindëse për shumë arsye akuza e ngritur, aq më tepër që një pjesë e futbollistëve tanë janë emra të shquar të kampionatit të superligës. Nga ana tjetër, akuza duket bajate në një kohë që nga ekipi ynë luajnë me kombëtaren disa lojtarë, të cilët në asnjë mënyrë FSHF-ja nuk do t'i lejonte të bëheshin anëtarë të ekipeve përfaqësuese të Shqipërisë. Në ekipin e Elbasanit ka futbollistë me dinjitet, si Oltion Osmani, që është shpallur kampion me Vllazninë, Julian Ahmataj me Dinamon, Nevil Dede me Tiranën, Safet Osja me Vllazninë, Skerdi Bejzade me Partizanin, Albert Kaçi me Vllazninë, Klodian Asllani me Dinamon, Klevis Dalipi në Portugali, si dhe lojtarë të nderuar të kombëtares, si Armend Dallku, Tefik Osmani, Hetlem Çapja dhe Mardian Kacollja. Në këto kushte, klubi i futbollit "Elbasani" është i hapur t'u nënshtrohet pa përjashtim të gjitha analizave që do të kërkojë FSHF-ja. Kjo çështje është në nderin e FSHF-së që t'i shkojë deri në fund. Presidenca e Elbasanit do të bëjë padi civile dhe penale për akuzat e pabaza. Të mbajnë përgjegjësi ata që e kanë sajuar këtë makinacion,"- përfundon deklarata për shtyp e presidencës së Elbasanit.
Më pas, presidenti Arben Laze dhe trajneri Artan Bushati u janë përgjigjur pyetjeve të gazetarëve.


www.sportishqiptar.com.al....



Sportishqiptar na qenka "albitri"....


Kjo është përgjigja zyrtare e Sk.Elbasanit.

[miko]

Laze: Dinamo ta harrojë fitoren në Elbasan



"Këtë që kërkojnë të bëjnë me Elbasanin, drejtuesit e Dinamos do ta vuajnë mbi kurrizin e tyre, sepse ne jemi të bindur që gjithçka është veçse një shpifje, që ka për qëllim të shkatërrojë nga ana psikologjike verdheblutë në prag të sfidës që kemi në prag. Por do t'i kujtoja Dinamos se ne nuk mund të na trondisin shpifje të tilla. Përkundrazi, jam i bindur që Elbasani do t'i tregojë Dinamos të shtunën se do të dalë e humbur në mënyrën më shembullore. Me këtë duam t'u themi dinamovitëve se ata do të zbresin nga vendi i tretë. Këtë vend ata do ta qajnë dhe as të mos shpresojnë se mund ta kapin vendin e dytë, të cilin jo vetëm e kemi merituar, por duhet të ishim më lart sesa kaq. Si president i Elbasanit dua t'i bëj të ditur opinionit sportiv se do t'i mbaj premtimet. Dinamo mund t'i ketë bërë vetë gjëra të tilla, për të cilat presidenti dhe shefi i tyre na akuzojnë ne tani që jemi ngjitur në elitën e futbollit shqiptar. Pas këtyre akuzave do të dimë që të pranojmë të kundërtën. Dhe të turpëruar do të jenë ata që bënë shpifje të tilla për Elbasanin, për të cilin është investuar dhe punuar shumë gjatë këtij sezoni futbollistik," - është shprehur presidenti i Elbasanit në lidhje me ndeshjen e radhës.


Marrë nga www.sportishqiptar.com.al


Përgjigja më e mirë e Elbasanit do jetë shpartallim total i Dinamos në fushën e blertë.Kjo është përgjigja më e mirë e ekipit tonë ndaj xhelozisë injorante dinamovite.


Gjithë të mirat

[JaCk_DaniELs]

Po qe do ta harrojne fitoren ska dyshim kjo gje qe keshtu po shume fjalle te kota

"ELBASANI" Do fitoje: dhe gjithe tifozet e "Dinamos" mose vijne kote se do rrifeni

dhe une nuke po shkruaj me se kjo gje dihet qe "ELBASNI" DO FITOJE

[inter_forever]

ELBASANI - DINAMO 1- 1.

Në minutën e 28-të, ekipi i Elbasanit arrin të shënojë golin e epërsisë. Merita ka qenë e dyshes K.Dalipi-Kaçi, të cilët kanë organizuar një aksion model nga e djathta. Topi ka përfunduar tek Asllani, i cili ka qenë tepër i saktë, duke e përcjellë atë në kuadratin e Likës.

Në minutën e 64-t, Qorri rrëzohet në zonë dhe gjyqtari akordon 11-metërsh, që realizohet nga Gaye. Vendësit e kanë kontestuar së bashku me tifozërinë dhe kjo e ka tensionuar disi atmosferën. Megjithatë, loja në fushë është mbyllur pa incidente. Incidentet kanë ndodhur pas ndeshjes, ku shumë tifozë elbasanas kanë dalë duke protestuar.



Një pjesë e tifozëve kanë qëlluar me gurë, madje kanë ngritur edhe barrikada. Disa prej tyre kanë qëlluar në drejtim të makinës së deputetit Taulant Dedja, duke e dëmtuar atë. Po kështu është dëmtuar me gurë edhe makina e ambasadorit hungarez në Tiranë, i cili ndodhej dje në Elbasan për të ndjekur ndeshjen. Tifozët elbasanas kanë qenë aq të irrituar, sa nuk e kanë përmbajtur dot veten, por kanë pushtuar sheshin para stadiumit "Ruzhdi Bizhuta", duke goditur e thyer xhama makinash aty. Madje protesta e tyre ka përshkuar edhe disa nga rrugët kryesore të qytetit, derisa ka ndërhyrë policia, e cila ka ndaluar rreth 18 persona.

Nëse deklarata e presidentit dinamovit, Besnik Sulaj, se Elbasani përdor doping, ka shërbyer për thirrje të tifozerisë elbasanase ndaj tij, penalltia e dhënë nga gjyqtari Arjan Likja, e ka acaruar tej mase situatën, aq sa është dashur ndërhyrja e forcave të rendit për të normalizuar gjithçka.


Deklarojnë:

Artan Bushati, trajner i Elbasanit: "Do të thoja se bëmë një paraqitje të mirë. Shënuam një gol, por edhe humbëm disa raste. Në pjesën e dytë luajtëm me koncepte të qarta, por tendenca e gjyqtarit me njëanshmërinë e tij na dëmtoi rëndë. Pak u dukën shenja lodhjeje, por përgjithësisht ekipi tregoi karakter dhe forcë. Vlerësoj sakrificën e Ahmatajt dhe Asllanit dhe theksoj se nuk do të kemi probleme me vendin e dytë, pasi do ta zgjidhim matematikisht javën e ardhshme.

Agim Canaj, trajner i Dinamos: "Mendoj se ndeshja ishte vlerësuar nga të dy ekipet. Sulmuam që në fillim dhe në tri raste mund të kishin kaluar në avantazh. Për fat të keq, u ndëshkuam, por nuk u dorëzuam. Në gjysmën e mbetur të lojës u vendosëm më mirë, madje dominuan dhe arritëm te barazimi. Nuk mund ta gjykoj rastin e 11-metërshit, pasi nuk arrita ta shoh qartë. Për Elbasanin kam përshtypjet më të mira dhe e meriton vendin që mban. Nga ky takim mund të kishim dalë edhe me fitore."

Marre nga ''SPORTI SHQIPTAR''

Ka ndodh si me NAFTETARIN para disa viteve...ku u be lufte e papare ndonjehere....U dogjen makina dhe u sulmuan arbitrat dhe ekipi Dinamos...Lojtaret e Dinamos kane ikur naten me ndihmen e forcave speciale ..

Presidenti Dinamos eshte shkaktari kryesor i asaj qe ndodhi ...deklaratat e tij kane ndikuar ne acarimin e situates deri ne protesta te hapura dhe incidente...
Megjithese sot ai filloi ta dredhe muhabetin ...duke pergenjeshtruar ato deklarata ... ..

[Pasiqe]

Helmi i Dinamos nuk ka te sosur. E ka shijen te ngjashme me ate te shokut te vet, gjarprit partizan.

Jua thote nje tifoz i Tirones, solidar me elbasanllinjte ne lufte kunder morrave te kuq dhe gjarperve blu.

[miko]

Lideri i skuadrës së Elbasanit thotë se ata që shkaktuan dhunën nuk janë tifozët e vërtetë verdheblu

Dede: Tifozët, të irrituar prej gjyqtarëve

"Skuadra e Elbasanit është paragjykuar gjatë këtij sezoni, sidomos në ndeshjet e fundit. Nuk e di me ç'qëllim bëhet, por nuk është mirë të vazhdohet kështu." Kështu e nis prononcimin për "Sportin shqiptar" Nevil Dede, i cili po mbyll sezonin e tij të parë me ekipin e Elbasanit, një sezon i suksesshëm për të, pasi ai së bashku me skuadrën është drejt realizimit të njërës nga objektivat madhorë, pjesëmarrjen në Kupën UEFA, kompeticion që kishte mbetur ëndërr në sirtar për shumë vite për këtë ekip me tradita. Por Dede, ashtu si lojtarë të tjerë të Elbasanit, është mërzitur nga ngjarjet e fundit. "Po të shohësh ndeshjet e fundit, Elbasanit i janë dhënë katër penallti në dëm të tij, duke prishur edhe rezultatin. Ajo çka është më e rëndësishme, penalltitë kanë qenë të dyshimta, madje skandaloze dhe, natyrisht, i kemi kontestuar. Prandaj tifozët tanë kanë ardhur nga ndeshja në ndeshje më të inatosur, deri në ndeshjen me Dinamon, kur kontestimet morën përmasa të tilla. Duhet të dini një gjë, se janë vetëm një pjesë e vogël e tifozëve elbasanas, madje që nuk e ndjekin rregullisht skuadrën, që bëjnë ato veprime të dhunshme, pasi unë kam kontakte me tifozë të vërtetë të Elbasanit dhe jam i bindur që nuk do ta bënin kurrë një gjë të tillë. Nëse flitet që në stadium është sharë gjyqtari, apo veprime irrituese të tifozërisë, këto janë gjëra që ndodhin edhe në vende të tjera. Me këtë nuk dua të them që meqë ngjajnë edhe në vende të tjera, pse mos të bëhen edhe këtu. I dënoj ashpër veprimet e dhunshme të tyre," - shprehet Nevil Dede, lideri i skuadrës verdheblu, që ka qenë protagonist në suksesin e sivjetëm të Elbasanit. Në fakt, po të shohim ndeshjet e fundit të Elbasanit, duke u nisur nga ndeshja me Shkumbinin, kur këta të fundit fituan ndeshjen me 11-metërsh, vëmë re se ndaj verdhebluve janë dhënë disa penallti. Edhe në Durrës u dha një e tillë, por ndoshta elbasanasit qenë me fat kur Mancaku gaboi. 11-metërshi i ndeshjes me Dinamon ndoshta ka mbushur kupën për Elbasanin. Por Dede tregohet i sinqertë, kur thotë se edhe forma e futbollistëve nuk ka qenë në nivelin e duhur, gjë që ka ndikuar edhe në disa rezultate. "Jam i ndërgjegjshëm të them që edhe ne futbollistët nuk kemi qenë në formën tonë më të mirë, duke mos e kënaqur publikun ashtu si duhet. Kanë ndikuar shumë faktorë, por e përsëris që irritimin publiku e ka më shumë nga padrejtësitë që i janë bërë ekipit," - shton Dede, i cili mendon që Elbasani pothuajse e ka siguruar vendin e dytë, ndërsa për kreun thotë se është i pamundur, gjithmonë duke u nisur nga kalendari i ndeshjeve. Por një problem tjetër del në pah, pasi me këtë tifozeri të ashpër Elbasani mund të rrezikojë në ndeshjet e Kupës UEFA. Por ndryshe mendon Nevil Dede, i cili ka një eksperiencë në ndeshjet ndërkombëtare. "Ndeshjet e kompeticioneve europiane kanë tjetër organizim dhe gjyqtarë profesionistë, që gabojnë shumë më pak dhe nuk janë kaq tendenciozë, gjë që nuk mund ta irritojnë tifozerinë, përkundrazi keni për të parë që edhe nëse dalim të humbur, kundërshtari ka për t'u duartrokitur," - përfundon Nevil Dede.


Marre nga www.sportishqiptar.com.al








Denoj dhe une me kete shkrim incidentet e mbas ndeshjes me Dinamon.Keto rrugacerira nuk perfaqsojne ne asnje % tifozerine sportdashse elbasanase.C'ka ndodhi ne stadium eshte dhe nje here per t'u marre shembull.

Perse do me pyesni??

Sepse ne krizen kaq te gjate ne te cilen po kalon futbolli shqiptar,Sk.Elbasani eshte ekipi i vetem sot per sot ne Shqiperi qe mbledh te pakten 5-6 mije sportdashes ne shkallet e stadiumit Ruzhdi Bizhuta cdo jave.Dhe ne te njejten kohe kur ka ekipe me emer "te madh" qe presin nga 1-2 mije bileta.

Argumenti i mesiperm tregon qarte vleresimin real te qytetareve dhe sportdashave elbasanas ndaj perpjekjeve gjigandeve te Drejtuesve se Klubit Elbasani si dhe Ekipit per ti kthyer bukurine qe i takon futboillit shqiptar dhe duke i sjellur nje kuptim ketij kampionati monoton (pasi dirigjohet ecuria e tij nga qarqe josportive,per mendimin tim).

Meqe Fshf-ja prape nuk ben asgje konkrete qe futbolli shqiptar te dali nga kjo krize,atehere nuk na ngelet gje tjeter vecse te largohemi nga shkallet e stadiumit dhe tja fusim per ndonej birre diten kur ekipi yne i zemres lufton ndaj Gjyqtareve te paafte dhe keqberes dhe ndaj nje Fshf-je indiferente.

Kur njerezit qe kane ne dore fatet e Kampionatit Shqiptar do ti hapin syte atehere do te jete shume vone per ti kthyer ato mijra vete qe jetojne cdo jave me emocione te tilla.

Nuk e shkruajta kete shkrim vetem e vetem se jam i irrituar nga gjyqtari i ndeshjes me Dinamon por dhe nqs veme re,ne kurriz te Elbasanit jane bere shume padrejtesi ne vecanti kete vit,kur ecuria e ekipit ka qene per tu marre shembull (le te mos harrojme ku ishim para 3-4 vjetesh),pra sic shprehesha me siper keto padrejtesi duhet qe organet kompetente ti konstatojne dhe ti denojne.Padrejtesite ne kurriz te sportadeshve elbasanas jane bere fatkeqesisht nga gjyqtare te paafte e te drejtuar per dicka te tille,por dhe nga "klane" keqberese josportive.

Shpresojme qe ne te ardhmen nuk do perseriten me "gabime" te tilla nga ana e gjyqtareve te paafte.

Shpresoj qe ne te ardhmen te mos arrijme ne asnje menyre ne incidentet e mbas ndeshjes,pasi ne ishim ato qe denuam incidentet alla peqinas.

Elbasansit jane sportdashes me gjithe kuptimin e fjales,dashurojne ekipin tyre te zemres dhe nuk jane rrugace.

Gjithe te mirat

[miko]

T.Osmani: Ta tregojmë forcën në Tiranë

"Elbasani, edhe pse e ka siguruar matematikisht vendin e dytë, është i vendosur të luajë për fitore edhe në tri ndeshjet e mbetura." Kështu tha pas fitores së arritur ndaj Vllaznisë mbrojtësi korçar i Elbasanit, Tefik Osmani, i cili ishte një prej më të mirëve në fushë gjatë këtij takimi. Pavarësisht se ekipi e ka realizuar objektivin që klubi verdheblu kishte përcaktuar në këtë edicion, T.Osmani thekson se kjo nuk do të thotë se ai edhe kolegët e tij janë të kënaqur aq sa duhet nga ky sukses. "Meritonim më shumë gjatë këtij kampionati. Kemi qenë pa dyshim ndër më të mirët e superligës dhe këtë e dinë të gjithë ata që e kanë ndjekur Elbasanin në ndeshjet e zhvilluara, si në "Ruzhdi Bizhuta", edhe jashtë tij. E kemi filluar garën duke i luajtur shumicën e ndeshjeve në fushat asnjanëse, ose në ato të ekipeve kundërshtare, për shkak të rikonstruksionit të stadiumit të Elbasanit dhe kemi arritur rezultate mjaft të larta. Kjo hapi rrugën e verdhebluve drejt suksesit, i cili kaloi përmes vështirësish e pengesash të panumërta," - është shprehur Tefik Osmani, i cili me këtë ekip fitoi edhe kombëtaren shqiptare. Sipas mbrojtësit korçar, jo rrallëherë verdhebluve u janë hequr nga duart pikë të çmuara, të cilat dalëngadalë e çuan në 8 pikë diferencën me kryesuesen e superligës. "Mendoj se meritonim më shumë se sa vendi i dytë. Ekipi ynë është shquar për korrektësinë dhe që nuk ka pranuar kurrë të bëhet pjesë e pazareve. Përkundrazi, në çdo ndeshje, verdheblutë janë përpjekur të marrim maksimumin në mënyrë sa më të merituar. Për mua ka qenë fat që u aktivizova në përbërje të Elbasanit gjatë këtij edicioni. Kjo skuadër do të mbetet e paharrueshme në historinë e karrierës sime. Duke qenë pjesë e këtij ekipi së bashku me mbrojtësin kosovar Dallku, arritëm të bëhemi pjesë e ekipit kombëtar, që është një nga arritjet më kryesore. Siç e kam thënë edhe herë tjetër, një meritë jashtëzakonisht të madhe për arritjen e suksesit të Elbasanit ka presidenti, i cili afroi në fillim të sezonit në klubin verdheblu futbollistët më të mirë të mundshëm. Tani që kampionati do të luhet për të njohur zyrtarisht fituesin e titullit, për Elbasanin kuptohet puna nuk do të njohë mungesë serioziteti," - shton Tefik Osmani, i cili mendon se ekipi i tij do të përpiqet t'u tregojë kryeqytetasve edhe një herë se verdheblutë janë më të mirë se sa Tirana. "Mendoj se do ta ngushtojmë diferencën aktuale me kreun, edhe pse nuk duket se mund të përfitojmë ndonjë gjë për sa i takon çështjes së titullit. Megjithatë, synimi ynë kryesor mbetet të kënaqim sportdashësit tanë me lojërat tona deri në fund. Nëse nuk do të na kishin dënuar gjyqtarët në disa takime, për Elbasanin kryesuesja aktuale jo vetëm do të ishte arritur nga verdheblutë, por titullin nuk do ta merrte dot. Mirëpo tani situatat janë në favor të bardhebluve dhe Elbasanit i mbetet të mendojë për të qenë i suksesshëm në pjesëmarrjen e tij në UEFA," - përfundon Tefik Osmani.








Belisha, emri i ri për Elbasanin

Radhët e ekipit të Elbasanit do të përforcohen në prag të ndeshjeve për Kupën UEFA me disa lojtarë cilësorë, që kryesisht luajnë në superligë. Njëri prej tyre, sipas drejtuesve të klubit verdheblu, është edhe Amarildo Belisha, i cili aktualisht luan për ngjyrat e Vllaznisë. Ky futbollist, gjatë fazës përgatitore të verës së kaluar u rreshtua tek Elbasani, krahas Osjes, Kaçit dhe Mashit. Por klubi i Vllaznisë nuk e lejoi mesfushorin Belisha që të aktivizohej për ngjyrat e Elbasanit dhe e detyroi të kthehej në Shkodër në fillim të aktivitetit. Mungesa e një mesfushori organizator tek Elbasani nuk u kompensua dot me lojtar tjetër, prandaj Belisha mbeti ëndërr e klubit verdheblu. Tani presidenca e Elbasanit kërkon ta përfshijë shkodranin Belisha në ekipin verdheblu.


K.Dalipi: Golin ua kushtoj tifozëve
"Goli ndaj Vllaznisë është për të gjithë tifozët e Elbasanit, të cilët kanë qenë motivi kryesor në këtë kampionat për ne. Kanë qenë pikërisht ata që më kanë nxitur gjatë gjithë kësaj periudhe. Do të mundohem sërish t'ua shpërblej këtë përkrahje," - është shprehur sulmuesi i Elbasanit, Klevis Dalipi, i cili shënoi golin e fitores në ndeshjen me Vllazninë. Klevis Dalipi ka shënuar disa gola të rëndësishëm për Elbasanin në këtë sezon.







Marrë nga www.sportishqiptar.com.al



Luftoni djema deri në fund...

Do të jemi gjithmonë pranë jush...

Oleeee Oleeee




Gjithë të mirat