Labinoti - Elbasan

[miko]

Presidenti i verdhebluve, Arben Laze, reagon pas deklaratës së Shkëlqim Muçës

Laze: Ne s'kemi zv.president në FSHF

Menjëherë pas deklaratës së shefit të klubit "Tirana", Shkëlqim Muça, se FSHF-ja është në favor të Elbasanit, presidenti i verdhebluve, Arben Laze, në një prononcim për gazetën "Sporti shqiptar", shprehet se skuadrën e Elbasanit nuk mund ta ndalin presionet e vazhdueshme të rivalëve të tij. "Nuk kuptoj shkakun pse Muça është shprehur në këtë mënyrë, sepse skuadra e Elbasanit deri tani ka ardhur në krye të kampionatit me forcat dhe punën e saj dhe jo nga ndihma e ndokujt tjetër",- shprehet "bosi" elbasanas. Ndërkohë, Laze i kundërpërgjigjet me disa pika Muçës, duke shtuar se FSHF-ja ndodhet në Tiranë dhe jo në Elbasan. "Në Elbasan ndodhet Metalurgjiku dhe jo FSHF-ja, por dua t'i kujtoj Muçës dhe të gjithë dashamirësve të futbollit tonë, se deri tani Elbasani kryeson me djersën e tij dhe se në çdo ndeshje, skuadra verdheblu ka marrë maksimumin. Nuk e prisja këtë deklaratë të Muçës, por dua të shtoj se, Elbasanit i është mohuar një gol që të gjithë u shprehën se ishte i rregullt në takimin me Vllazninë, por mos harrojmë edhe ndeshjen me Teutën një vit më parë, apo dhe në ndeshjen me Besën, ku gjyqtari e përsëriti dy herë goditjen e dënimit. Megjithatë dua të shtoj se vetë Muça duhet të tregohet më i matur. Njëri prej donatorëve të Tiranës, Avni Nuri, ka të vëllain zëvendëspresident të FSHF-së dhe dihet, që Lut Nuri ka raste që qëndron edhe në stol të ekipit bardheblu, ndërsa Elbasani nuk ka asnjë përfaqësues të tillë apo edhe më të vogël në detyrë në FSHF. Prandaj nuk ka pse Muça aludon me thëniet e tij. Kemi luajtur edhe të premten, ashtu siç kemi luajtur edhe të shtunën dhe të dielën. Nuk shoh ndonjë favor të madh këtu. Kampionati ka hyrë në dy fazat më të nxehta të tij dhe lufta për titullin është bërë edhe më e ashpër. Elbasani është në vendin e parë dhe sigurisht që rivalët tanë janë xhelozë për këtë, por të gjithë tifozët shqiptarë e dinë se Elbasani e kryeson me meritë kampionatin dhe është bukuria e këtij sezoni. Mos harrojmë se në ndeshjen e fundit me Tiranën, kanë qenë vetë tifozët bardheblu që na kanë thënë: Hallall ju qoftë! Ne nuk u trembemi këtyre deklaratave, janë thjesht presione psikologjike kundër ekipit të Elbasanit, por futbollistët tanë nuk mund të dekurajohen nga këto thënie të Muçës. Më vjen keq për Muçën, sepse nuk i shkon për shtat të shprehet në këtë mënyrë. Sa për kalendarin e ndeshjeve, unë mund t'i them Muçës, se thjesht është respektuar kalendari. Elbasani nuk është skuadër që pret nga të tjerët, ne jemi në luftë të vetëm dhe do të luftojmë deri në fund për titullin. Dua të shtoj edhe këtë. Deri tani nuk ka pasur ndonjë gjyqtar elbasanas të gjykojë Elbasanin në takimet me Tiranën, apo skuadra të tjera të kryeqytetit, ashtu siç ka pasur gjyqtarë tiranas që na kanë gjykuar neve ndaj tyre. Skuadra e Tiranës së bashku me Shkëlqim Muçën, të shohin më mirë punët e tyre dhe mos të merren me ne. Unë me ekipin tim i sfidoj ata në përballjet direkte. Mua personalisht, nuk më interesojnë se çfarë bëjnë rivalët, por vetëm mendoj që ekipi im të marrë maksimumin në çdo takim, duke filluar që nga kjo javë me Dinamon, ku skuadra verdheblu do të ketë një trasfertë tepër të vështirë, por jo të pamundur për ta kaluar",- përfundon Arben Laze, presidenti i Elbasanit.

20 autobusë me tifozë ndaj Dinamos

Presidenca e klubit ka vendosur 20 autobusë në dispozicion të tifozërisë verdheblu, për takimin e kësaj jave me Dinamon. Përballja mes këtyre dy ekipeve pritet të jetë tepër e fortë, ndërkohë që në klubin e Elbasanit, kanë nisur që prej ditës së djeshme përgatitjet për këtë takim. Edhe ish-futbollistët e Elbasanit, do të kenë në dizpozicion të takimit me Dinamon një autobus falas. Gjithçka do të paguhet nga klubi i Elbasanit.

Elbasani, vija sulmuese e plotë
Elbasani ka vijuar stërvitjen e parë normalisht, për javën anti-Dinamo. Skuadra e drejtuar nga Daja është duke u përgatitur intensivisht për sfidën e radhës, ndërkohë me grupin është bashkuar edhe sulmuesi Klevis Dalipi, i cili ka mbërritur nga Portugalia dhe tashmë, është në dispozicion të trajnerit. Me kthimin e Dalipit, Elbasani ka të gatshëm gjashtë sulmues cilësorë, Qorrin, Dalipin, Norën, Bejzaden, Rizvanollin dhe Stojkun, pa harruar edhe të riun Kuçi.





Marre nga www.sportishqiptar.com.al



Koment

Bravo Beno se dhe nje pergjigje shume korekte.

Ju delet e tjera qe grriceni me tifozerine elbasanase lexoni pak paragrafin e nenvizuar e merrni shembull si organizohen ultrasit Verdh e Blu


Forca cuna

[miko]

Blutë me vështirësi barazojnë 1-1, duke treguar edhe njëherë, se nuk janë në gjendje për të pretenduar

Dinamo frenohet sërish nga Elbasani


Dinamo - Elbasani 1-1

Dinamo: Lika, E.Xhafa (Asllani 82'), Kastel, Kone', Ahmataj (Diop 67'), Alikaj (Çaval 46'), Deliallisi, Poçi, Vinçetiç, Pema, Gudjabi. Trajner: I.Kataliniç.
Elbasani: Kotorri, Brahja, Dede, Vrapi, Abraham, Nora (Tetova 77'), Çapja, Osja, Qorri (Stojku 86'), Bejzade, Rizvanolli (K.Dalipi 68'). Trajner: I.Daja.

Shënues: Qorri 32', Diop 73'.
Gjyqtarë: S.Velçani (Patos), E.Miho, I.Shima (Durrës).
Kartonë të verdhë: Ahmataj, Deliallisi, Kone', Qorri, Abraham.

"Radiografia"
2'- Alikaj kroson nga e majta një top në zonë për Gudjabin, mbrojtësi Vrapi largon me vështirësi rrezikun.
4'- Brahja gjendet i lirë përballë portës, godet fortë, Lika i kundërpërgjigjet duke grushtuar, ndërkohë topi shkon te këmbët e Qorrit, i cili me një të majtë potente prek vetëm rrjetën e jashtme.
8'- Shpërthim i Pemës në krahun e djathtë, kroson për Poçin të lirë brenda zonës, fieraku me një gjuajtje në formë gërshëre, për pak sa nuk shënon golin e parë të takimit.
15'- Vinçetiç nxjerr të lirë Pemën në të djathtë të sulmit, që kroson për shokët në zonë, por portieri mik më i shpejtë, rrëmben topin në ajër.
25'- Nora kroson nga e djathta e sulmit elbasanas, topi është më i lartë se se duhet dhe i jep mundësi dinamovitëve të organizohen.
32'- Brahja insiston në krahun e djathtë, kroson saktë në zonë për Qorrin, i cili nuk fal me një gjuajtje potente vetëm pak metra larg portës, duke ndëshkuar ish-skuadrën e tij. 0-1 për Elbasanin.
36'- Alikaj kërkon të marrë krahun e majtë, fut një top te shtylla e dytë, por Abraham për të mos ndërlikuar situatën, e largon topin në goditje këndi.
45'- Nora në kufijtë e zonës lëshon një "predhë" drejt portës, por Lika në gatishmëri grushton dhe shpëton portën nga goli i dytë.
49'- Çaval i sapofutur, depërton bukur mes mbrojtësve, pason për Pemën saktë, i cili i vetëm me portierin Kotorri, gabon fatalisht për të barazuar rezultatin, pasi gjuajta ishte e dobët dhe Abraham e largoi menjëherë "sferën".
52'- Nora i shërben saktë Rizvanollit në zonë, që godet jashtë.
62'- Bejzade shërben sërish për Rizvanollin, sulmuesi lirohet bukur nga mbrojtësi Kone', por gjuajtja drejt portës lë për të dëshiruar.
66'- Ahmataj i rrëmben topin Abrahamit brenda zonës, godet menjëherë dhe Kotorri kundërpërgjigjet duke pritur dhe njëkohësisht duke mos lejuar që rrjeta të prekej.
71'- Çaval depërton bukur mes mbrojtësve, gjuan fort, por Dede në çastin final e devijon topin në goditje këndi. Kroson Vinçetiç për Gudjabin, senegalezi gjuan fort, por sërish has në gatishmërinë e portierit mik që grushton topin.
73'- Sulm i gjatë i dinamovitëve, Pema godet me kokë, grushton Kotorri në goditje këndi. Kroson Vinçetiç, ku pas spondit me Gudjabin, senegalezi tjetër Diop, e shtyn me forcë topin drejt rrjetës, duke barazuar kështu rezultatin. 1-1.
85'- Goditja e Pemës me kokë, është e pafuqishme për të kaluar në avantazh.

Komenti
Dinamo barazon 1-1 me Elbasanin, në ndeshjen më të rëndësishme të javës së 20-të. Pritej me shumë interes ky 90-minutësh për të dyja skuadrat, por që në fushë u zhvillua një lojë që nuk e kaloi nivelin mesatar. Elbasani ishte ai që doli më i fituar nga ky takim, duke parë se përballë kishte një kundërshtar të tendosur, që kërkonte me çdo kusht ta shkurtonte diferencën në renditje. Të parët që kaluan në avantazh ishin miqtë, të cilët përfituan mirë nga një kundërsulm me Brahjen në krahun e djathtë dhe goli erdhi pikërisht nga këmbët e një "ishi", pikërisht Ilir Qorrit. Për dinamovitët, ky ishte një shok shumë i rëndë dhe deri në fund të pjesës së parë, për asnjë moment nuk e morën veten për të shkuar te barazimi. Fraksioni i dytë i lojës, i sheh blutë më të orientuar drejt sulmit dhe pas aksioneve të gjata, arrijnë të barazojnë me anë të senegalezit Papa Diop. Minutat më pas, përshkohen nga ndërprerje të shumta për shkak dëmtimesh, çka bëri që ritmi i lojës të binte ndjeshëm. Në fund, trajneri Ivan Kataliniç provon edhe kartën fituese, Klodian Asllanin, por asgjë nuk ishte e thënë të ndryshonte në këtë takim, që ashtu si në fazën e parë, mbyllet sërish në barazim. Ajo që duhet thënë, është fakti se ky takim nuk e justifikoi besimin e tifozëve, sidomos atyre dinamovitë, të cilët prisnin një nivel më të lartë loje nga vetë protagonistët e fushës. Nga ana tjetër Elbasani është i kënaqur, kur bëhet fjalë se barazoi në kryeqytet, teksa, në javën e ardhshme, do të presë Skënderbeun në fushën e vet. Për Dinamon duhet thënë se, nuk është ende një pretendente serioze për titullin kampion, duke parë të gjitha ballafaqimet direkt me Elbasanin, Partizanin dhe Tiranën. Derbi i ardhshëm Partizani-Dinamo, duket se do të shohë përballë dy skuadra të zhgënjyera dhe që sigurisht, do të kërkojnë t'ia lënë krizën në derë njëra-tjetrës.


Deklaruan pas ndeshjes
Ivan Kataliniç, trajneri i Dinamos:
Nuk ishte e thënë që ta fitonim këtë takim, pasi Elbasani u mbrojt shumë mirë dhe kundërsulmoi rrezikshëm në pjesën e parë. Kjo bëri që ne të ndëshkoheshim shumë shpejt dhe më pas, të mos dilnim në lojën tonë. Në pjesën e dytë, me zëvendësimet e kryera arritëm të barazonim, madje, treguam edhe një gjendje më të mirë fizike se sa Elbasani. Me atë se çfarë u pa në fushë, barazimi ishte rezultati më i drejtë i këtij takimi. Tani s'na mbetet gjë tjetër, veçse të presim që ky kundërshtar të gabojë në takimet e ardhshme, pasi Dinamo nga ana e vet, nuk ka ditur ta mposhtë, në asnjë prej tre ballafaqimeve në këtë kampionat.
Ilir Daja, trajneri i Elbasanit:
Në pjesën më të madhe të kohës ishim superiorë ndaj Dinamos, ku patëm disa raste të pastra për gol, por që nuk ditëm t'i shfrytëzonim. Shpenzuam shumë energji në fraksionin e parë të lojës, çka bëri që në minutat e fundit, të ndienim disi lodhje në këmbët tona. Dinamo arriti të barazonte me goditje standarte, por duhet thënë se, ne meritonim më shumë se sa kaq. Gjithsesi, jam i kënaqur me lojën që djemtë shfaqën dhe javës tjetër presim të qetë Skënderbeun në fushën tonë.

Të veçanta
- Përpara fillimit të takimit, u mbajt një minutë heshtje, në nderim të presidentit të Kosovës, Ibrahim Rugova, i cili u nda dje nga jeta.
- Të dy presidentët e skuadrave, Sulaj dhe Laze, u ulën përkrah njëri-tjetrit në tribunën VIP.
- Tifozeria në shkallët e stadiumit "Qemal Stafa", ishte pothuajse e njëjtë në numër, afërsisht 5.000. Gjatë ndeshjes, ato u konfliktuan dhe kjo solli ndërhyrjen e shpejtë të forcave policore.
- Kristian Çaval, i ardhuri i vetëm në merkaton e dimrit, bëri debutimin e tij me fanellën e Dinamos.
- Në protokollin e ndeshjes, blutë ishin vetëm me 5 lojtarë rezervë, nga 7 që është e lejuar, gjë e cila tregon se Dinamo ka mungesë të theksuar lojtarësh titullaër, pas largimeve të tre amerikano-latinëve, Ballços dhe Miles.
- Dëmtimi i Tetovës solli panik për disa çaste, pasi mesfushori nuk po jepte asnjë shenjë, ndërkohë që ambulanca u tregua e gatshme për ta çuar durrsakun në spital, por gjendja më pas u përmirësua



Marrre nga www.sportishqiptar.com.al

[s0ni]

Vazhdoni keshtu se do na keni gjithmone prane jush.

Para cuna

Forca Elbasani


Gjithmone Verdh e Blu

lol Miki me gjithe keto mesazhe qe ke bere ketu si s'ja ke marre kenges

Duam gol ne duam gol
Elbasani loz futboll
duam fitore dhe mos u ndani
ne therrasim Elbasani

[miko]

Sipas trajnerit verdheblu, skuadra e tij ka luajtur mirë, por duhet të ketë kujdes në vazhdim

Daja, ai që qëndron me "këmbë në tokë"

Gjithmonë i matur në fjalët që shqipton edhe në prag të takimeve të javës, por edhe gjatë ditëve të stërvitjes, trajneri i Elbasanit, Ilir Daja, gjithmonë qëndron me "këmbë në tokë". Ashtu siç ishte shprehur një ditë përpara ndeshjes se, Elbasani do të synojë maksimumin me Dinamon, trajneri Daja, në fund të takimit ka mbetur shumë i kënaqur nga loja dhe rezultati, ndonëse në vetvete, tiranasi që ka dalë nga shkolla e madhe e Dinamos, shton se ekipi meritonte fitoren. "E kishim vlersuar këtë takim dhe mendoj se grupi në fushë i zbatoi me tepër kujdes detyrat e dhëna. Duhet të përgëzoj të gjithë futbollistët për shpirtin e garës, por dua të shtoj se Elbasani ishte më afër fitores. E them këtë, pasi synimet tona dihen tashmë nga të gjithë dhe ashtu siç erdhën ngjarjet, Elbasani, me atë çka paraqiti në fushë, e meritonte fitoren. Skuadra tani duhet të shohë përpara për takimin e radhës dhe sigurisht, që puna intensive e ekipit do të vazhdojë edhe këtë javë", - shprehet Daja. Ndërkohë, për sa i përket humbjes së Partizanit, Daja thotë: "Unë jam trajner i Elbasanit dhe nuk merrem me ekipet e tjera. Natyrisht që rezultati më interesoi. Besa na vuri në vështirësi një javë më parë në Elbasan dhe nuk është çudi që fitoi". Daja shton se futbollistët e tij, kanë një ngritje në nivelin e lojës dhe kjo, si rezultat i një faze përgatitore tepër pozitive. "Në këtë fazë të tretë, duhet të grumbullojmë sa më shumë pikë, pasi edhe kalendari e favorizion disi ekipin tim, po të kujtojmë se pas kësaj jave me Skënderbeun, Elbasani do të udhëtojë në Durrës me Teutën dhe më pas, do të presim në dy takime radhazi, Lushnjen dhe Vllazninë, në fushën tonë. Megjithatë, unë mbetem i mendimit që nuk ka ndeshje të lehta, në qoftë se në fushë nuk futesh për të fituar", - përfundon, trajneri Ilir Daja.

Verdheblutë, sot stërvitja e parë e javës
Barazimi me Dinamon dhe humbja e Partizanit, i ka kënaqur së tepërmi drejtuesit e Elbasanit, ndonëse skuadra e tyre me lojën e zhvilluar, mund edhe të kishe fituar tre pikët në takimin me blutë. Verdheblutë, sot pasdite, do të nisin stërvitjen e parë për këtë javë. Në fundjavë, ata do të presin ekipin e Skënderbeut, që pas rezultateve të fundit, vjen me moral të lartë në Elbasan.

Elbasani, shpërblim edhe për barazimin
Elbasani, pas barazimt me Dinamon, ka marrë një premio të majme, ndonëse shuma e vënë nga presidenca për fitoren, ishte shumë herë më e madhe se barazimi. Megjithatë, presidenca i ka shpërblyer futbollistët e saj edhe për barazimin e arritur, që nuk është pak, pasi distanca me Partizanin, tani është rritur në katër pikë. Ndërkohë që, nuk është bërë e ditur nga stafi drejtues, shuma e premios që futbollistët kanë marrë për barazimin me Dinamon.




Sulmuesi Ilir Qorri, do të ishte i lumtur, nëse goli i tij do i jepte fitoren ekipit

Qorri: Elbasani ishte më pranë fitores

Elbasani edhe këtë javë ka ruajtur kreun, madje duke e rritur edhe me një tjetër pikë, distancën me ekipin e Partizanit, që mban vendin e dytë. Verdheblutë e Dajës kanë bindur në lojë dhe rezultat përballë Dinamos, e cila në këto javët e fundit është forcuar së tepërmi në lojën e saj. Elbasani, falë një lojë tepër të organizuar, si në mbrojtje, por edhe në vijën sulmuese, arriti të përballojë me sukses në trasfertë ekipin e Dinamos, që tashmë njihet nga të gjithë, për forcën e saj në kampionatin tonë kombëtar të futbollit. Rreshtimi që trajneri Ilir Daja hodhi në fushën e lojës ishte tepër rezultativ, ku duhet theksuar se ekipi i Elbasanit kundër Dinamos, ka luajtur që nga minuta e parë me katër "snajperat" e tij, Bejzade, Rizvanolli, të mbështetur nga Nora dhe Qorri. Pikërisht ky i fundit, pas më shumë se pesë javësh, është rikthyer te goli. Ilir Qorri ka shënuar falë klasit të tij, një gol ndaj ish-ekipit të tij. Ai në takimin me blutë, ka qenë një nga futbollistët më të mirë në fushë, sidomos në lojën e zhvilluar në krah. Jo vetëm se arriti të shënojë golin e parë dhe të vetëm për verdheblutë, por nga ana tjetër, ka marrë një notë tepër pozitive edhe nga trajneri Daja. "Skuadra ka zhvilluar një ndeshje pozitive përballë Dinamos, por në 15 minutat e fundit, ekipi i Elbasanit u ndëshkua nga një pakujdesi në mbrojtje dhe kjo, erdhi mbase si rrjedhojë e presionit që Dinamo shfaqi në minutat e mbetura të takimit. Mendoj se deri diku, Elbasani bindi në lojë dhe në rezultat. Në fillim e nisëm mirë lojën, ku edhe krijuam disa raste për shënim. Në futboll gjithçka ndodh. Ne ishim shumë pranë me rastet e krijuara për të dyfishuar dhe ja që në një moment Dinamo barazon. Megjithatë, unë shpresoj që ky barazim të na shërbejë për takimin e ardhshëm, si dhe për vazhdimësinë, pasi na presin takime shumë të vështira, ku dihet se tashmë, kampionati ka hyrë në një fazë shumë interesante", - shprehet Ilir Qorri. Ndërsa kur e pyet për rikthimin e Qorrit te goli, pikërisht kundër ish-ekipit të tij, elbasanasi shprehet: "Jam i gëzuar që shënova, por do të isha i lumtur, nëse goli im do të ishte i vetmi i takimit. Kisha kohë pa e gjetur rrugën e rrjetës. Goli ishte si rezultat i punës së ekipit, i cili zhvilloi një ndeshje tepër pozitive. Për sa i përket ekipit të Dinamos, mendoj se vlerat i njohim të gjithë. Sigurisht që është një skuadër tepër e motivuar në fushën e lojës, por Elbasani e kishte parashikuar se do të ishte një takim i vështirë, por jo i pamundur për ne. U pa qartë forca reale e Elbasanit. E them këtë, pasi me Dinamon ekipi tregoi më grintë dhe dëshirë për të fituar, po ta krahasojmë me takimin që zhvilluam me Besën. Elbasani me këtë takim tregoi edhe punën e mirë, që ekipi ka zhvilluar në fazën përgatitore. Megjithatë, tani na duhet të shikojmë përpara, sepse takimi i radhës nuk do të jetë i lehtë. Suksesi i ekipit është te forca kolektive e grupit dhe mbi të gjitha, sepse Elbasani i vlerëson maksimalisht të gjitha ekipet njësoj. Këtë javë do të presim Skënderbeun, një skuadër që na mposhti në fazën e dytë. Do ta vlerësojmë maksimalisht, për t'i shlyer borxhin dhe pa dyshim, që java e ardhshme pritet të sjellë pse jo, një tjetër shkëputje të Elbasanit nga rivalët, duke parë që kalendari e favorizon disi ekipin tonë, pasi Partizani do të përballet me Dinamon në derbi dhe Tirana do të presë Besën. Ky është sezoni i Elbasanit, askush mos të dyshojë. Falenderoj tifozërinë e zjarrtë të Elbasanit, për mbështetjen e madhe që i dhanë ekipit. Ky kampionat do të jetë një dhuratë, për ata tifozë të jashtëzakonshëm".




Marre nga www.sportishqiptar.com.al