Labinoti - Elbasan

[miko]

Të kuqtë nuk arrijnë të ndalin dot vrullin e portokallinjve

Bejzade i tregon "targën" Partizanit


"Radiografia"
5'- Kroson Ahmataj nga e majta. Bejzade pason me kokë për Merxhën, që gjuan keq.
9'- Allmuça godet fuqishëm jashtë zonës, por topi përfundon jashtë.
30'- Goditje e lirë për Partizanin në një pozicion të favorshëm. Ekzekuton Halili, por topi devijohet me kokë nga Dede.
33'- Asllani provon nga 20 metra largësi, por topi i devijuar nga një mbrojtës kontrollohet nga Ed.Bakaj.
40'- Dallku godet fuqishëm prirët me portën, por topi ndalet vetëm nga shtylla e majtë e portës.
44'- Metaj përfiton nga një pasiguri e mbrojtjes së Elbasanit dhe për pak sa nuk shënon, por ndërhyn Kotorri në kohë.
45'- Abilaliaj ka rastin më të mirë në pjesën e parë, ku përballë Kotorrit nuk arrin ta shmangë.
49'- Kroson Merxha nga e majta dhe Bejzade fare pranë nuk arrin ta devijojë topin për në rrjetë.
50'- Kroson Bezade dhe Dede, i lirë në zonë, godet me kokë mbi traversë.
69'- Dede përfiton nga një pasim i Bejzades. Gjuan brenda zonës, por pret Ed.Bakaj.
76'- Abilaliaj ka rastin më të mirë për të shënuar, por, pasi manovron bukur në zonën kundërshtare, godet shumë dobët.
77'- Pas një ngulmimi të gjatë para zonës së Partizanit, Bejzade nuk e ka të vështirë të shtyjë topin në rrjetë, pas një topi të marrë nga e majta e sulmit, 0-1.
-86'- Memelli shpërthen nga e majta, por topi i dhënë prej tij nuk shfrytëzohet nga sulmuesit e tjerë.
88'- Në një aksion vetjak, Bejzade shmang tërë mbrojtjen e Partizanit dhe nuk e ka të vështirë të shënojë golin e dytë, 0-2.

"Komenti"
Ndodhi ajo që pritej. Edhe dje, Partizani nuk arriti ta shmangë humbjen e radhës me një Elbasan, që nuk lëshon aspak përballë një skuadre të mbushur me lojtarë të rinj. Rezultati i takimit të sotëm e shtyn dhe për pak kohë shpalljen matematike të Tiranës kampione të këtij sezoni. Ashtu siç ka ndodhur rëndom në takimet e fundit, të kuqtë kishin mungesa të shumta në formacion. Për fat të keq, ata duhej të bënin pa shërbimin e organizatorit të tyre, Dorian Bylykbashi, të pezulluar për arsye kartonësh. Sikur të mos mjaftonte kjo, nuk është aktivizuar as Sasha Delaini, pas një dëmtimi në stërvitje. Ndryshim shihej edhe në portë, ku në vend të Agollit ishte Ed.Bakaj. Portokallijtë vinin me një formacion të kompletuar, ku theksi i është vënë sulmit, me treshen e fuqishme Kaçi, Memelli dhe Bejzade. Loja nisi me miqtë, që hidhen menjëherë në sulm në kërkim të avantazhit të shpejtë. Ahmataj është shumë efikas me lojën e tij nga e majta, kroset e të cilit nuk u shfrytëzuan siç dyhej nga sulmuesit. Pas një fillimi të vrullshëm të miqve, loja përqendrohet në mesfushë, duke e ulur ndjeshëm rrezikshmërinë në portat respektive. Partizani mundohet më shumë të mbrohet dhe kërkon të shfrytëzojë kundërsulmin me topa të gjatë në drejtim të Abilaliajt, që shumë herë u shfaq i rrezikshëm para portës kundërshtare. Rasti më ideal i pjesës së parë ishte ai i minutës së 45-të, kur sulmuesi i kuq nuk arrin të shmangë Kotorrin në hyrje të zonës. Me sa duket, portokallijtë e kishin menduar më të lehtë përballë djemve të Memës, që ishin vendosur mirë në fushë. Pjesa e dytë ka të njëjtën fytyrë me të parën, me Elbasanin që kërkon me ngulm shënimin e golit dhe Partizanin që pret në gjysmëfushën e tij. Megjithëse ushtrojnë presion të vazhdueshëm, portokallijtë janë nervozë me veprimet e tyre, duke bërë gabime të shumta në pasime. Të kuqtë, të kthyer në gjysmëfushën e tyre, nuk e harrojnë sulmin, ku me kundërzbritje të shpejta shfaqen rrezikshëm para portës së Kotorrit. Dhe në një rast të tillë, Abilaliaj, që është rreziku numër një i sulmit kryeqytetas, shpërdoron mundësinë më të mirë për të kaluar të kuqtë në avantazh, ku pas një topi të marrë nga mesfusha, depërton në zonën e Elbasanit dhe bën më të keqen, duke e goditur topin mbi traversë. Ligji i futbollit është shumë i rreptë: po nuk shënove, e pëson. Një minutë më vonë, atë që nuk e bëri sulmuesi i kuq, e bën Bejzade, i cili fare pranë portës shënon golin e avantazhit për miqtë. Këtu fillon kapitullimi i Partizanit. Të kuqtë, megjithëse mundohen të dalin përpara, janë të pafuqishëm t'i çojnë deri në fund aksionet e tyre. Elbasani e kontrollon mirë lojën dhe në rastin më të mirë që i jepet shënon golin e nokautit me anë të të njëjtit autor, Bejzades, i cili shmang këdo që i del përpara dhe përballë portierit shënon lehtësisht. Elbasani arrin fitoren e tretë gjatë këtij sezoni përballë Partizanit, që më shumë mendon për sezonin e ardhshëm. Mema ka hedhur në fushë një formacion me emra krejtësisht të rinj, ku përveç El.Bakajt, Metajt, Abilaliajt Peqinit dhe Ed.Bakajt, janë provuar dhe Hasmetaj me Capon. Gjithsesi, të kuqtë rezistuan mirë deri në gjysmën e pjesës së dytë, kur Bejzade kaloi miqtë në avantazh. Elbasani kryen detyrën dhe pret rezultatin e ndeshjes së sotme në "Niko Dovana", ku një hap fals i Tiranës do ta shtynte edhe për pak kohë kurorëzimin e kampiones së re.

"Deklarojnë"
Artan Bushati, trajneri i Elbasanit
"Partizani na vuri në vështirësi në një pjesë të madhe të lojës. Megjithëse me emra të rinj, Partizani ishte vendosur mirë në fushë dhe nuk na lejoi shumë hapësira në mbrojtje. Mendoj se Mema kishte bërë një zgjidhje të mirë taktike. Në pjesën e dytë arritëm t'i shfrytëzojmë më mirë mundësitë që na u dhanë, duke shënuar dy gola. Ne erdhëm me objektiva të qarta dhe në fund ia dolëm mbanë. Tashmë nuk na mbetët tjetër veçse të respektojmë kampionatin deri në fund dhe të fitojmë dy ndeshjet e mbetura."
Sulejman Mema, trajner Partizanit, nuk u prononcua.

"Të veçanta"
- Në tribunën përballë nuk ndodhej asnjë tifoz, kështu që ajo dukej e shkretë, sikur të mos kishte ndeshje.
- Presidenti Xhani nuk ishte i pranishëm në tribunën "VIP", siç bëri dhe në ndeshjen e kaluar me Tiranën.
- Si gjithmonë, në tribunën "VIP" ndodhej ambasadori hungarez, që është i pranishën në çdo takim të Partizanit.
- Numri i tifozëve të pranishën në tribunë nuk i kalonte të 200, si rrallëherë në përplasjet midis këtyre dy skuadrave.


Marrë nga www.sportishqiptar.com.al



Elbasani tashmë ka vërtetuar se është nga ekipet më të mirat (në mos më i miri) i Superligës.Këtë fakt nuk e vërtetojnë vetëm rezultatet e sivjetshme por edhe fakti që stadiumi nuk ka patur as edhe një herë në këtë sezon kaq pak sportdashës.

Forca çuna.......


Ja dhe një foto e ndeshjes së djeshme....

[BlueBaron]

... Urime ekipit simpatik te Elbasonit per vendin e dyte. E keni te çimentuar tani dhe nuk keni frike se jua rremben njeri . Jeni me te vertete ekipi me i mire kete vit, pasi SK TIRANA jane "Galaktiket" e Superliges dhe nuk mund te krahasohen me ekipet e tjera qe luajne ne Superlige . Urime dhe per vendin ne Kupen UEFA dhe ishallah keni fat dhe kaloni ndonje tur ...


Ashtu siç rrin yjet
yjet perreth hones
ashtu rrin tifozat
tifozat rreth TIRONES ...

[miko]

Verdheblutë duken të vendosur për të mos e njohur humbjen edhe në fazën e katërt me Tiranën

Elbasani: Kampionë, do t'ju mundim përsëri!


Megjithëse ekipet e çiftit të kësaj jave, Tirana dhe Elbasani, janë shpallur para kohe, përkatësisht kampionë dhe nënkampionë të superligës për këtë edicion, ndeshja e kësaj fundjave midis tyre ka ngjallur interes të pazakontë. Dy ekipet më të mira të këtij kampionati, në ndeshjen e tyre të katërt do të synojnë të tregojnë edhe një herë se i meritojnë plotësisht pozicionet ku ndodhen. Këto ekipe janë të vetmet që nuk i lëshuan "armët" asnjëherë gjatë këtij aktiviteti, duke e mbajtur të ndezur garën thuajse deri në fundin e saj. Ndërsa Tirana ka qenë ekipi që ka bërë ligjin në futbollin shqiptar gjatë viteve të fundit, në kampionatin e sivjetëm bardheblutë patën një rival të fortë, që shpeshherë e vuri në diskutim kryesimin e Tiranës. Për të gjithë sportdashësit, takimet midis Elbasanit dhe Tiranës në kampionatin e sivjetëm do të mbeten të paharrueshme. Por pa dyshim që më i bukuri ndër ta është ai i 23 tetorit 2004, kur verdheblutë do të mposhtnin 3?1 në "Ruzhdi Bizhuta" Tiranën e pathyeshme prej muajsh të tërë. Këtu kushdo filloi të bindej se Elbasani nuk ishte rastësisht ndjekësi më i afërt i Tiranës. Javët në vazhdim e treguan mjaft qartë se Elbasani ishte një prej pretendentëve për titull. Në fazën e katërt, verdheblutë dhanë maksimumin, por diferencën me kryesuesen Tirana nuk mundën ta ngushtojnë dot. Kjo pasi edhe kryeqytetasit e ruajtën ecurinë e rezultateve pozitive, duke u shpallur javën e kaluar kampionë të superligës për të tretin vit radhazi. Por elbasanasit, të trishtuar nga humbja e shansit për ta fituar këtë trofe, do të përpiqen ta ngushëllojnë veten, duke synuar ta mundin sërish Tiranën këtë javë. Në kampin verdheblu, gjatë kësaj jave po punohet që ekipi i Elbasanit të tregojë në stadiumin "Qemal Stafa" se ata janë më të fortë se Tirana. "Kampionë, do t'ju mundim përsëri," - është refreni i punës që po bëhet për këtë ndeshje. Kjo ambicie e Elbasanit është nxitur si nga trajnerët dhe presidenca, ashtu edhe nga nga tifozeria verdheblu. Ata do të ndihen të kënaqur nëse ekipi i tyre i zemrës do ta fitojë ndeshjen e fundit me Tiranën. Do të ishte afërsisht sikur Elbasani të shpallej fitues i kampionatit në superligë.


Dy mijë elbasanas në "Qemal Stafa"
Të paktën dy mijë elbasanas parashikohet të jenë të pranishëm në tribunat e stadiumit "Qemal Stafa" për të ndjekur përballjen e çiftit Tirana?Elbasani mbrëmjen e së shtunës. Për një pjesë të tifozërisë, presidenca verdheblu do ta sigurojë udhëtimin vajtje?ardhje falas, ndërsa pjesa tjetër do të lëvizë me automjetet personale. Sipas burimeve zyrtare, në dispozicion të tifozerisë verdheblu janë 20 autobusë dhe lëvizja do të bëhet në mënyrë të organizuar. Pjesëmarrja masive e tifozerisë elbasanase është e lidhur me ecurinë e shkëlqyer të ekipit të tyre të zemrës dhe ata do t'i nxitin verdheblutë që të luajnë si kampionë përballë Tiranës.



Marrë nga www.sportishqiptar.com.al




Kampionë na prisni se po vijmë........


Le të zhvillohet një ndeshje e bukur të shtunën në Tiranë,duke i dhuruar spektakël të pranishmëve në stadium nga dy ekipet më të mira të Superligës.

Më i miri le të fitojë.............

Dmth Elbasani.....


Ps.Skuthi i vogël rrofsh plako për vizitën nga lagja edhe për "komplimentet" ... ....ah se desh harroja NGUSHËLLIME .......LooooooL


Gjithë të mirat

[BlueBaron]

... Hajdeni se po ju presim. Merrni spango per me vete per te arrnuar rrjeten e portes .
Miko rrofsh plako per ngushellimet, nejse, duarbosh si ju nuk ngelem. Megjithese ju kenaqeni me pak, vendi dyte ju duket shume, kot nuk thone:
- Gabeli kur ka vaj, lyen dhe by-then ...

[miko]

Tirana-Elbasani, dueli i 121-të mes tyre


- 120 herë janë vënë përballë njëri-tjetrit këto dy ekipe. Tirana ka fituar 64, ndërsa Elbasani 25 takime. Në 21 raste është sigluar barazimi, kurse golaverazhi është 228-109 për bardheblutë.
- Në qytetin e Elbasanit, më 20.4.1930, këto ekipe janë ndeshur për herë të parë. Fitorja do t'u buzëqeshte miqve tiranas me rezultatin e pastër 2-0. Ishte ky sukses që Tirana do ta arrinte 11 herë
radhazi. Kuptohet që këto përbëjnë dhe serinë më të gjatë të fitoreve të badhebluve, që do të ndërpriteshin në ndeshjen e 12-të mes tyre, kur në Elbasan do të nënshkruhej barazimi, 1-1. Do të ishte ky barazimi i tyre i parë. Kurse fitoren e parë Elbasani do ta merrte vetëm në takimin e 15-të, pikërisht në fushën e vet me rezultatin 3-2.
- Vetëm në Tiranë janë luajtur 60 ndeshje. Përsëri Tirana ruan epërsinë e bilancit: 48 fitore për kampionët, vetëm 5 për verdheblutë dhe 7 barazime. Golaverazhi është 144-39 për kryeqytetasit.
- Fitoret më të thella kundër Elbasanit, Tirana i ka arritur si më poshtë: 9-0, më 17.6.1934; 9-0, më 3.2.1952; 9-2, më 12.6.1932 dhe 8-1, më 12.5.1968. Fitoret më të thella ndaj Tiranës, Elbasani i ka marrë si më poshtë: 3-0, më 21.4.1974 dhe 3-0, më 28.11.1982.
- Ndërkaq, 3 është numri i barazimeve radhazi të nënshkruara mes këtyre dy ekipeve: 0-0, më 5.11.1972; 1-1, më 15.4.1973 dhe 1-1, më 7.11.1973.
- Mes këtyre dy skuadrave 31 ndeshje kanë përfunduar në barazime. Kështu me rrjeta të paprekura janë regjistruar 12 takime, 1-1 (10 raste); 2-2 (8 raste) dhe 3-3 (vetëm një herë).
- Me 5 gola diferencë kanë përfunduar dy takime, ndërsa me 6 gola diferencë ka dalë vetëm një ndeshje.
- Me 7 gola diferencë kanë dalë dy takime; njëri 8-1, më
12.5.1968 dhe tjetri 9-2, më 12.6.1932 dhe me 9 gola diferencë sërish janë dy ndeshje me të njëjtin rezultat, 9-0.
- Takimi i 25-të jubilar është fituar nga Tirana 2-1, më 22.5.1955; i 50-ti 1-0 nga Elbasani, më 2.4.1972; i 75-ti 4-2 për Tiranën, më 9.9.1984 dhe i 100-ti është fituar nga Tirana 3-1, më 26.2.1994.
- Për Tiranën, golin e 100-të e ka shënuar B.Ishka, më 5.3.1961 në Elbasan (rezultati 3-1 për tiranasit), të 150-tin R.Alushi në Elbasan, më 24.9.1978 (rezultati 3-2 për Elbasanin) dhe të 200-tin gol e ka shënuar I.Fortuzi në Tiranë, më 2.4.1995 (tiranasit fituan 2-1). Ndërsa golin e 50-të për elbasanasit e ka shënuar F.Lleshi në Elbasan, më 7.11.1973 (rezultati 1-1), ndërsa të 100-tin J.Brahja, më 24.12.2003 (rezultati përsëri i njëjtë 1-1).
- Fitoren e fundit ndaj Elbasanit, Tirana e ka arritur më 22.5.2004 me rezultatin 5-2. Barazimi i fundit është ai i datës 5.3.2005 me
rezultatin 2-2. Fitoren e fundit kundër Tiranës, Elbasani e ka
arritur në fazën e parë të këtij kampionati, më 24.10.2004 në Elbasan me rezultatin 3-1.




Bushati: Objektivi ynë, fitorja

"Megjithëse gjithçka është mbyllur dhe rezultati nuk do të sillte ndonjë ndryshim në tabelën e renditjes, ne do të kërkojmë shumë në këtë ndeshje. Objektivi ynë, si në çdo ndeshje, është për të fituar dhe sot do të luajmë për të justifikuar vendin që kemi zënë në tabelë. Jo vetëm kaq, por do të tregojmë karakterin e fortë që ka ky ekip. Ne duam patjetër të jemi kampionë nga ana morale. Kontigjenti i lojtarëve është i plotë, nuk kam asnjë mungesë, apo të dëmtuar dhe janë tepër të motivuar për ndeshjen e radhës në trasfertë. Në "Qemal Stafa" do t'u tregojmë të gjithëve se ne mund të meritojmë diçka më shumë se vendi i dytë," - është shprehur në deklaratën e tij trajneri i Elbasanit, Artan Bushati.




Merxha: Ta tregojmë se kush është Elbasani

"Do të synojmë që ta mbyllim në mënyrë sa më dinjitoze kampionatin. Kështu tha pasditen e djeshme mesfushori Eriol Merxha i Elbasanit. Futbollisti verdheblu, një nga më të mirët e këtij ekipi, mendon se Elbasani do t'i fitojë edhe dy ndeshjet e mbetura. Ai thekson se edhe këtë të shtunë në Tiranë ekipi i Elbasanit shkon për tripikëshin. "Ne jemi një ekip që nuk ka ndërmend të tolerojë askënd, aq më tepër kur është fjala për Tiranën. Në mesjavë ne e pamë se kush ishte Tirana dhe Teuta që janë dy ekipet që merituan edhe trofetë e vitit. Na vjen keq që ne nuk arritëm të fitonim as kupën e as kampionatin, edhe pse kemi shkëlqyer në këto aktivitete tepër të rëndësishme futbollistike. Ndoshta ishim edhe të pafat, ose nuk ditëm të menaxhonim mirë ndonjë situatë jo fort të favorshme gjatë aktivitetit. Megjithatë verdheblutë treguan se ishin një prej ekipeve më të mira, si në kupë, edhe në kampionat. Askush nuk mund ta mohojë këtë edhe pse Elbasani nuk është fitues i tyre sivjet. Duke qenë se në prag është ndeshja e katërt e radhës me kampionët më të rinj të vendit, ekipi ynë do të përpiqet të shpalosë edhe një herë vlerat e tij të shkëlqyera. Përbërja dhe niveli cilësor i Elbasanit do të shfaqen sërish në stadiumin "Qemal Stafa" me të gjithë potencialin e tyre," - shprehet Merxha. Sipas tij, këtë të shtunë verdheblutë kanë rastin t'u tregojnë kampionëve të saposhpallur të superligës se Elbasani është më i fortë dhe se ai do të jetë fitues i kësaj sfide. "Ndaj Tiranës nuk do të kursehemi, por do të luajmë maksimalisht. Do të përpiqemi të bëjmë një ndeshje tepër korrekte e mjaft të bukur. Qëllimi ynë është që të luajmë për rezultat edhe pse ai ka vetëm vlera statistikore, por edhe për të kënaqur sportdashësit që do të ndjekin takimin midis dyshes që meriton kryesimin e superligës. Nuk besoj se do të ndodhë ndryshe nga këto që parashikohen. Kam bindjen se edhe njëherë verdheblutë do të dinë të tregojnë cilësitë e tyre më të mira," - përfundon Merxha.





Laze: Sot, mes tifozëve verdheblu

Në ndeshjen e sotme midis Tiranës dhe Elbasanit presidenti i verdhebluve, Arben Laze, ka vendosur të braktisë tribunën VIP për të qëndruar midis tifozëve të ekipit të tij. Këtë vendim presidenti i Elbasanit e ka marrë për të respektuar mijërat e tifozëve verdheblu, të cilët e kanë ndjekur ekipin e tyre të zemrës në të gjitha stadiumet e Shqipërisë, shpeshherë edhe duke sakrifikuar nga buxheti i familjeve të tyre. Në një prononcim për mediat, Laze u shpreh se këtë të shtunë ai do të jetë një prej tifozëve më të zjarrtë të verdhebluve në tribunën e stadiumit "Qemal Stafa" dhe shpreson që të jetë sa më fatsjellës për Elbasanin. "Duke synuar fitoren ndaj bardhebluve, ne pretendojmë që t'i tregojmë opinionit sportiv shqiptar se Elbasani është moralisht kampion i këtij edicioni. Por krahas kësaj, në këtë sfidë të rëndësishme Elbasani do të kërkojë fitoren e dytë ndaj Tiranës, pas dy barazimeve të arritura gjatë këtij aktiviteti, për të treguar edhe një herë vlerat më të mira të verdhebluve. Besoj se në takimin e kryesuesve të superligës do të jenë të pranishëm një numër rekord spektatorësh. Jo më të paktë do të jenë edhe tifozët verdheblu në stadium," - thekson Laze. Paraditen e sotme do të jenë në dispozicion të tifozërisë të paktën 20 autobusë. Në rast fitoreje të Elbasanit ndaj Tiranës, të cilën Laze nuk e vë në diskutim, festa do të jetë e verdhebluve në kthim. "Eshtë e natyrshme që ta festojmë fitoren, sepse ajo flet shumë për një ekip si Elbasani në këtë fundkampionati. Le të shpresojmë se e shtuna e superligës do të ketë për protagonist kryesor të saj Elbasanin, i cili tani po mendon për UEFA-n," - përfundon Laze.




Marrë nga www.sportishqiptar.com.al




Le të zhvillohet një ndeshje e bukur sot në Tiranë,duke mënjanuar zgjebsa të ndryshëm që duan ta prishin këtë spektakël.

Më i miri le të fitojë...


Ps.Skuthi i vogël o plako nuk i ulen vlerat Tiranës nga asnjëri nga ne,edhe nqs kemi bë ndonjë koment e kemi bë më shumë për qyfyre.E fortë shumë ajo fjala e urtë





Gjithë të mirat

[gabriel]

Elbasani eshte ekipi qe ka luajtur me bukur kete kampionat.
Kjo duket dhe ne ndeshjet e fituara perballe Tirones. Sa here qe eshte ndeshur e ka rraf tironen.... mrena dhe jashte......
Bravo Elbasoni.... ka qene bukuria e kampionatit...

[BlueBaron]

... Hallall i qofte ekipit te Elbasonit. Me Tironen gjithnji kane dhone maksimumin, por gjynof qe nuk e kane dhone kete maksimum edhe me ekipet e tjera ...

[miko]

Verdheblutë vërtetuan me fitoren ndaj Tiranës se janë skuadra më e mirë mes të fortave të këtij sezoni

Elbasani, kampioni moral i sezonit

Nëse do të llogariteshin vetëm ndeshjet me skuadrat më të forta të kampionatit, me siguri që ekipi i Elbasanit do të ishte kampion për këtë sezon. Verdheblutë duhen përgëzuar për këtë kampionat, pasi ishin të vetmit që bënë oponencën e bardhebluve, duke vërtetuar ambiciet që ka kjo skuadër pas sponsorizimit të presidentit Arben Laze, i cili gjatë gjithë sezonit ka ditur t'i nxisë lojtarët për të dhënë më të mirët. Kjo u pa edhe në ndeshjen e fundit me Tiranën, ku Elbasani doli me kokën lart nga "Qemal Stafa". Ekipi i drejtuar nga Artan Bushati ka ditur të mposhtë ekipet më të forta të kampionatit, duke pasur një bilanc të mirë me pretendentët e këtij sezoni, si Tirana, Partizani dhe Teuta. Me të drejtë, elbasanasit mund të quhen fituesit moralë të këtij kampionati, pasi kanë mundur Tiranën dy herë, ndërsa dy herë të tjera kanë nënshkruar barazimin. Dikush mund të thotë se çfarë vlen morali, kur nuk fiton kampionatin? Në këto momente vlen shumë, pasi Elbasani do të shkojë psikologjikisht më i përgatitur në Kupën UEFA dhe me një moral më të lart sezonin tjetër. Nuk është se ekipi nuk kalon ndonjë një minikrizë gjatë një sezoni të tërë, pasi edhe ekipe të mëdha ndërkombëtare e kalojnë një gjë të tillë, por verdheblutë kanë pasur vetëm një moment të tillë (këtu kanë ndikuar më shumë faktorët e jashtëm) dhe e kanë kaluar shumë shpejt atë. Këtë gjë e tregon edhe mbyllja me sukses nga një trajner i vetëm, pasi pothuaj të gjitha skuadrat kanë ndërruar nga një trajner. Ajo çka është më e rëndësishmja, trajneri dhe futbollistët vazhdojnë të kenë mbështetjen e presidentit dhe tifozerisë, një element pozitiv që të bën të ecësh përpara. Dihet që një ditë cikli do të mbarojë, por për momentin ky ekip ka merita. Të gjesh motivim në këtë fund të kampionatit, kur një nga objektivat e ke përmbushur, është vërtet për t'u admiruar. Janë katër fitore rresht të Elbasanit. Duke mos llogaritur fitoren me Egnatian, tri të tjerat janë vërtet për t'u përgëzuar, pasi janë arritur me Vllazninë, Partizanin dhe Tiranën. Të marrësh dy fitore njëra pas tjetrës në "Qemal Stafa" rrallëkush ekip nga rrethet e ka bërë në historinë e kampionateve tona. Ja, pra, ky është Elbasani i sotëm, që kërkon të përfaqësohet denjësisht edhe në Europë. Verdheblutë duhen përgëzuar edhe për një gjë tjetër, ishin të vetmit gjatë këtij sezoni që kanë afruar më shumë spektatorë në stadium, madje dhe në trasfertë, dhe kjo u duk edhe në ndeshjen e fundit. Me siguri që presidenti Laze do t'i motivojë edhe në ndeshjen e fundit ndaj Shkumbinit, ku gjithsesi ekipi është i karikuar, pasi kërkon të "hakmerret" edhe për humbjen e fazës së tretë që solli ngjarjet e bujshme të Peqinit. Tani ajo ndeshje ka mbetur prapa dhe tifozët kërkojnë vetëm të shohin futboll të bukur dhe shumë gola. Gjynah që Elbasani nuk ka pasur ndonjë golashënues të spikatur që të luftonte për "Këpucën e artë". Megjithatë, kjo tregon sesa i kompletuar është ky grup, ku mund të shënojnë të gjithë dhe ekipi nuk varet nga individë të veçantë, por nga puna e secilit, duke filluar nga trajneri dhe duke mbaruar deri te lojtari i fundit i stolit.


Verdheblutë, dy ditë pushim
Ekipi i Elbasanit do të pushojë dy ditë pas fitores që arriti të shtunën ndaj Tiranës. Kështu ka menduar stafi drejtues, si shpërblim për fitoren si dhe për t'u dhënë mundësi lojtarëve të marrin forca për ndeshjen e fundit me Shkumbinin, që është sërish një ndeshje prestigji për verdheblutë, madje konsiderohet si derbi i prefekturës. Të martën, verdheblutë do të rifillojnë stërvitjen. Edhe për ndeshjen e fundit nuk ka mungesa, apo të dëmtuar. Deri të shtunën e ardhshme gjithçka mund të ndodhë, por për momentin Elbasani është i plotë.



Marrë nga www.sportishqiptar.com.al


Urime urime çuna për ndeshjen e bukur si dhe për fitoren.Titulli "Kampionë moralë" nuk i mjafton ekipit të Elbasanit.Le të punojmë më shumë për përmisimin tonë,në mënyrë të tillë që të kemi një ekip me vazhdueshmëri përsa i përket rezultateve pozitive të cilat sjellin si rrjedhojë dhe fitime trofeshë.Le të tregojmë në ndeshjet e Uefa-s që meritojmë diçka më shumë,nga titulli "kampionë moralë"...


Forca çuna.....



Gjithë të mirat

[ElMajico]

Miki nuk do i mbushesh mendje ketyre..

Rendesi ka qe ia mlodhem Tirones mire e mire kete vit.

Skuthi po ce duam ne nje kamiponat si ky ku Tirona Jote = Federaten...pffff gzojuni titullit se e merituat qafsha ijen....

[miko]

Ahmataj: Elbasani, një sezon pozitiv


Kapiteni i verdhebluve tregon se ekipi gjithmonë ishte brenda objektivit dhe asnjëherë nuk e rrezikoi


"Deri diku jemi shpërblyer për punën tonë, megjithatë edhe me këtë që arritëm jemi të kënaqur." Kështu mendon kapiteni i Elbasanit, Julian Ahmataj, për sezonin që po mbyllet. Mbrojtësi elbasanas ka kontribuar shumë në suksesin e sivjetëm, duke sjellë jo vetëm eksperiencën, por duke qenë një lider për ekipin e tij. Duke luajtur me Elbasanin, Ahmataj së fundi hyri edhe në planet e trajnerit të kombëtares dhe nuk është ndonjë çudi që atë ta shohim në një nga grumbullimet e ardhshme të kombëtares sonë. Ahmataj kërkon që paraqitjen e tij të mirë ta vazhdojë edhe në Kupën UEFA. Ja intervista e kapitenit të Elbasanit, dhënë për gazetën "Sporti shqiptar":
- Ç'mendim keni për ecurinë e ekipit këtë sezon?
- Ecuria duket qartë edhe nga vendi që zumë këtë kampionat. Elbasani gjatë gjithë kampionatit ka qenë një ekip kompakt, i koaluduar mirë, ka zhvilluar lojëra të bukura, ku dhe rezultatet nuk na ka munguar, sepse të gjithë e kanë kryer siç duhej detyrën e tyre. Mund të them se deri diku u shpërblyem për punën që kemi bërë.
- Pse mendoni se deri diku u shpërblyet?
- Mendoj kështu se meritonim më shumë në këtë kampionat, megjithëse gjatë rrugës janë lënë disa pikë, por kjo jo për faj të ekipit. Nuk dua të ndalem në ndeshje konkrete, pasi të gjithë e dinë. Gjithashtu, me ekipet rivale kemi shënuar rezultate tepër pozitive, gjithashtu jemi ekipi që ka pësuar më pak gola.
- A mendoni se ekipi ka qenë gjithmonë brenda objektivit?
- Sigurisht që kemi qenë brenda objektivit tonë, sepse kemi ruajtur vendin e dytë gjatë gjithë kampionatit, njëkohësisht kemi mbajtur nën presion dhe ekipin e Tiranës për vendin e parë.
- Keni menduar për të ardhmen tuaj?
- Eshtë akoma herët për të folur për një gjë të tillë. Së pari, dua të kontribuoj edhe në një sukses tjetër me Elbasanin, siç është Kupa UEFA, ku të gjithë e dinë tashmë objektivin tonë, pastaj do të ulem të bisedoj për kontratën e re.
- Synimi i Elbasanit në Europë?
- Një paraqitje sa më dinjitoze dhe rezultative. Pikësynimi jo vetëm imi, por i gjithë kolektivit është të kalojmë turin e parë, për të treguar se jo më kot kemi arritur deri aty. Jemi një ekip që edhe në kompeticione të tilla arrijmë të përballemi më së miri. Kryesorja është që të zhvillojmë një lojë të bukur dhe t'i kënaqim tifozët tanë.
- Po për ndeshjen e fundit me Shkumbinin?
- Si gjithmonë, vetëm fitore jo vetëm për faktin se është një derbi, por duhet të ruajmë ecurinë pozitive të ekipit dhe ta mbyllim sa më mirë këtë kampionat. Nuk duhet të harrojmë se "Ruzhdi Bizhuta" nuk do të njohë humbje, aq më tepër dhe tifozët, të cilët na kanë mbështetur jo vetëm në ndeshjet brenda, por edhe jashtë. Aktualisht jemi të pamposhtur në shtëpi dhe këtë duhet ta ruajmë sa më gjatë. Kjo është një arsye më shumë pse duhet fituar.
- Mos ndoshta ndeshja e fundit do të jetë edhe një "hakmarrje" për rezulatin e fazës së tretë në Peqin?
- Ne jemi profesionistë dhe, si të tillë, nuk duhet të tregohemi gjaknxehtë. Ajo ndeshje i përket së kaluarës dhe është e kotë t'i kthehemi. E thashë, do të luajmë për fitore për arsye të tjera dhe jo për këtë.
Martin JANKU

Verdheblutë, të plotë ndaj Shkumbinit
Ekipi i Elbasanit do të jetë i plotë në ndeshjen e fundit me Shkumbinin. Edhe pse verdheblutë e kanë përmbushur objektivin dhe është shansi më i mirë që trajneri Bushati që aktivizojë lojtarë të rinj, kjo gjë nuk ka për të ndodhur, ose më mirë aktivizimi i të rinjve do të bëhet në varësi të rezultatit. I gjithë grupi është i plotë, pasi nuk ka të dëmtuar dhe të skualifikuar.


www.sportishqiptar.com.al


Hajde çuna mbylleni këtë kampionat me kokën lart.

Fitore ndaj Shkumbinit që edhe festa të ketë lezet..

Do të jemi gjithmonë pranë jush...

Gjithë të mirat