Labinoti - Elbasan

[Qerim]

Urime Elbasanit per fitoren 2-0 ndaj Vllaznise !

[miko]

Nr.1

Sulmuesi gjirokastrit i Elbasanit, Arlind Nora, kërkon të mbajë në tonus kolegët, pavarësisht kreut

Nora: Eshtë fillimi, titulli do shumë mund

Midis "jabanxhinjve" të shumtë që janë në përbërje të Elbasanit, në këtë edicion është edhe sulmuesi gjirokastrit Arlind Nora. Ai ka ardhur te verdheblutë për të bërë karrierë dhe në njëfarë mënyre ia ka arritur deri tani, por gjithsesi nuk ndihet i kënaqur aq sa duhet me veten. "Nuk kam arritur atë që pretendoj, pasi, për fat të keq, nuk po më ndahen dëmtimet," - shprehet sulmuesi Nora gjatë një prononcimi për gazetën "Sporti shqiptar". Ky futbollist ka një përgjegjësi të madhe në radhët e sulmit verdheblu, sepse nga ai pritet që të kontribuohet më shumë se çdo lojtar tjetër në realizimin e golave në portat kundërshtare. Nora është përzgjedhur midis shumë kandidatëve për në sulmin e elbasanasve, prandaj nga ky futbollist klubi ka pretendime për më shumë rendiment në të ardhmen. "Në përgjithësi, jam munduar që ta justifikoj kalimin tek Elbasani, i cili pa dyshim është një nga ekipet më të mira të kampionatit. Kam disa muaj që luaj për ngjyrat verdheblu dhe ndihem mjaft mirë te ky ekip, ku punohet në kushte të kënaqshme dhe me objektiva seriozë. Ajo që na e lehtëson së tepërmi punën është përbërja cilësore e Elbasanit dhe mbështetja jashtëzakonisht e fuqishme financiare e presidencës. Midis tyre shquhen pa dyshim kapiteni Dede dhe Bejzade, dy nga shtyllat kryesore të Elbasanit, por edhe ne të tjerët po përpiqemi të mos mbetemi më larg nivelit të tyre. Kampionati ka vetëm pak javë që ka filluar dhe ne kemi arritur me meritë të padiskutueshme të kryesojmë, por kjo nuk do të thotë se kemi arritur gjithçka. Sipas meje, duhet të vazhdojmë përgatitjet për të fituar ndeshjet njëra pas tjetrës, pasi për të mbërritur te titulli janë për t'u luajtur edhe 30 takime të tjera. Pra, kemi shumë rrugë për të përshkruar dhe duhet kujdes i madh në të gjitha ndeshjet, për të mos i çuar dëm sukseset e këtij fillim kampionati. Ndërprerja e përkohshme e garës do të na shërbejë për të riparuar ato pak dobësi që kemi shfaqur në ndeshjet e deritanishme. Kam besim se fitoreve nuk do t'u ndahemi, si në fushën tonë edhe në trasfertë. Do të këmbëngulim që të marrim maksimumin në seancat stërvitore dhe të respektojmë me përpikëri detyrat nga ana e trajnerit për të mbajtur kryesimin. Nuk do ta ulim kurrë ritmin, por përkudrazi do ta shtojmë vrullin tonë në të ardhmen," - shton Nora. Sipas tij, ky kampionat po shfaqet me të gjitha komplekset e tij dhe është i mbushur me të papritura. "Elbasani është në gjendje ta përballojë pa ndroje garën dhe të vazhdojë të udhëheqë pa iu trembur përforcimeve që po përgatiten të bëjnë rivalët. Ne jemi në rrugën e duhur dhe nuk kemi për të ndryshuar drejtim," - përfundon sulmuesi Arlind Nora, që pretendon të shfaqet mjaft i rrezikshëm në javët e ardhshme të superligës.

--------------------------------------------------------------------------------------------------------

Nr.2

Elbasani, miqësore gjatë javës

Nga ana e verdhebluve, periudha e ndërprerjes së kampionatit do të shfrytëzohet maksimalisht për t'u përgatitur për sfidat e radhës, por edhe për të testuar dy?tre lojtarë të huaj që mund të jenë blerjet e fundit. Po kështu, gjatë 10 ditëve të ardhshme, ky ekip ka planifikuar të zhvillojë ndeshje miqësore me ekipe të kategorive të ulëta të qarkut të Elbasanit. Të paktën dy takime miqësore do të luhen gjatë ditëve në vazhdim, me qëllim mbajtjen në formë të skuadrës. Trajnerët e verdhebluve nuk kanë dhënë hollësi për kohën kur do të luhen këto miqësore, ndërsa edhe dje ka vazhduar përgatitja në fushën e kompleksit sportiv "Shefqet Lamçe".



Marre nga www.sportishqiptar.com.al

[miko]

Kapiteni dhe mbrojtësi i verdhebluve, Nevil Dede, thekson se ndeshjet me rivalët janë deçizive


Për të dytin vit radhazi, një nga mbrojtësit më të mirë të kampionatit shqiptar, Nevil Dede, luan për ngjyrat e Elbasanit dhe që nga kjo periudhë verdheblutë janë ngjitur në elitën e futbollit shqiptar. Nëse një vit më parë Elbasani shpallej nënkampion i vendit, sivjet ky ekip pretendon shumë më tepër sesa kaq. Kapiteni Nevil Dede, në një intervistë për gazetën "Sporti shqiptar", shpjegon mekanizmin e punës, që ka sjellë sukseset e verdhebluve kohët e fundit, si dhe synimet e tyre në kampionatin aktual.
- Elbasani kryeson i vetëm në superligë. Rastësi apo një arritje plotësisht e merituar për ekipin tuaj?
- Nuk ka asnjë dyshim që Elbasani është në kreun e renditjes në mënyrë plotësisht të merituar. Lojërat dhe rezultatet e ekipit tonë kanë treguar se verdheblutë mund të kishin edhe më shumë pikë sesa kanë aktualisht. Në ndeshjet e deritanishme ne jemi përpjekur që të marrim maksimumin, duke luajtur mbi të gjitha për fitore. Nuk mund ta quash asnjëherë të rastësishëm kapjen e kreut të superligës nga një ekip si ky i yni, që ka një ecuri për t'u patur zili.
- Sivjet keni rrëmbyer kreun prej disa javësh dhe përpara Elbasani ka një ndeshje të vështirë në transfertë me Partizanin. A gjykoni se ekipi juaj do të frenohet nga të kuqtë?
- Para së gjithash ne shpresojmë që të ruajmë ritmin, pra të mos humbim pikë as në transfertën me Partizanin. Edhe në këtë ndeshje ne do të mundohemi të bëjmë më të mirën e mundshme, sikurse kemi bërë edhe në ndeshjet e tjera gjatë këtij kampionati. Niveli i kënaqshëm që ka ekipi ynë aktualisht dhe rezultatet e larta që kemi arritur deri tani na japin siguri për të ardhmen. Edhe në Tiranë ndaj Partizanit në takimin e radhës do të mundohemi që t'i tregojmë kundërshtarit se jo vetëm jemi më të mirë se ai, por edhe të marrim një fitore. Pra as që mund ta çojmë ndërmend se të kuqtë mund të na frenojnë.
- Për momentin ato ekipe që mendohen si rivalët tuaj ndodhen disa shkallë poshtë Elbasanit në renditje. Si do ta komentonit?
- Ne, qysh këtë javë do të luajmë me njërin prej atyre ekipeve që është deklaruar se këtë kampionat pretendon për trofe. Sivjet kamponati është duke u zhvilluar më interesant se ai i sezonit të kaluar dhe rivaliteti është më i madh. Rivalët tanë janë mundur edhe nga ekipe që janë rikthyer në superligë këtë vit, gjë që tregon se asnjë kundërshtar nuk duhet nënvlerësuar, pavarësisht në cilin pozicion ndodhet aktualisht në renditje. Kështu që edhe Partizani, që ka humbur disa ndeshje, nuk do të thotë se është ekip i dobët. Për mendimin tim të gjithë rivalët janë seriozë dhe ndeshjet direkte me ta do të tregojnë se kush është më i miri i superligës.
- Presidenca ka në plan të afrojë futbollistë të tjerë cilësorë...
- Kjo është diçka shumë pozitive. Kontigjenti aktual është i kënaqshëm dhe për meritë të tij ekipi është ngjitur në këto nivele ku jemi. Ajo që do të thoja është se ata lojtarë që do të afrohen, të jenë shumë më të mirë sesa ata që janë. Realizimi i blerjeve të tjera do ta lehtësonte punën dhe do të thoja se kështu suksesi ynë do të jetë i padiskutueshëm.
- Pra, Dede sivjet mund të ngrejë trofeun e titullit të kampionit si futbollist i Elbasanit?
- Endrra e çdo futbollisti është të arrijë më të mirën me cilindo ekip që luan. Tek Elbasani, si te çdo ekip tjetër, e rëndësishme për mua mbetet që të jap maksimumin. Rëndësi ka që trofetë t'i meritojë më i miri dhe besoj se një të tillë e meritojmë ne sivjet.



Marre nga www.sportishqiptar.com.al

[miko]

Nr.1

Partizani Elbasani, sfida e 99-të mes tyre

Këto dy ekipe janë ndeshur 98 herë mes tyre. Partizani ka dalë faqebardhë 56 herë, Elbasani vetëm 17, ndërsa "paqja" është aritur në 25 raste. Golaverazhi flet për të kuqtë, 169 82. Partizani e nisi dominimin ndaj verdhebluve që në ndeshjen e parë të luajtur mes tyre, 5 0, më 2.4.1950 në Elbasan. Kaq e vërtetë është kjo sa golin e parë kundër të kuqve, Elbasani e ka realizuar vetëm në takimin e 11 të, më 18.5.1961. Guzi është jo vetëm autori i golit të parë elbasanas, por edhe i fitores së parë verdheblu, 1 0. Vetëm në stadiumet e kryeqytetit janë luajtur 48 ndeshje. Të kuqtë kanë fituar 38 prej tyre, verdheblutë vetëm 6 kurse në barazim kanë dalë 4 takime. Golaverazhi është 109 40 për Partizanin. Në barazim kanë përfunduar 25 ndeshje. Ndeshja e 25 të jubilare është luajtur më 31.5.1970 (rezultati 1 1); e 50 ta, më 14.11.1982 (0 0) dhe e 75 ta më 23.4.1993 (6 0 për të kuqtë). Fitoren e parë si pritës, të kuqtë e kanë arritur më 21.3.1951 (rezultati 2 0). Fitoren e parë si udhëtues verdheblutë e kanë rrëmbyer më 22.4.1979 (1 0). Barazimi i parë në kryeqytet është nënshkruar më 11.10.1964 (1 1). Fitoret më të thella kundër Elbasanit, Partizani i ka siguruar si më poshtë: 6 0, më 23.4.1993; 5 0, më 14.4.1954; 5 0, më 2.4.1950 dhe 5 0, më 27.6.1954. Fitoren më të thellë ndaj Partizanit, Elbasani e ka arritur më 14.6.1973 (3 0). Ndaj të kuqve, Elbasani nuk ka shkuar më shumë se 2 fitore radhazi dhe këto në 3 seri. Janë nënshkruar jo më shumë se 2 barazime radhazi dhe këto në 3 seri. Golin e 50 të jubilar kundër Elbasanit, Partizani e ka realizuar më 29.5.1966; të 100 tin më 10.3.1985 dhe të 150 tin më 19.2.1999. në të dy rastet e para të kuqtë qenë fitues përkatësisht 2 1 dhe 2 1 dhe të tretin 1 1. Ndërkaq golin e 25 të jubilar ndaj Partizanit, Elbasani e ka shënuar më 23.10.1977; të 50 tin më 25.12.1988 dhe të 75 tin më 17.10.2004. Në të tre rastet verdheblutë kanë fituar, përkatësisht 2 1, 2 0 dhe 2 1. Fitoren e fundit kundër Elbasanit, të kuqtë e kanë arritur më 1.5.2004 me rezultatin 2 1. Fitoren e fundit ndaj Partizanit, Elbasani e ka arritur më 6.5.2005, në shifrat 2 0. Barazimi i fundit mes këtyre ekipeve është ai i datës 15.12.2004, 2 2.


Nr.2

Mesfushori i verdhebluve Skerdi Bejzade është i bindur në rezultatin pozitiv ndaj të kuqve

Elbasani, më autoritar se Partizani

Emocionet e kryendeshjes së javës së 7 të, që do të zhvillohet të dielën mes Partizanit dhe Elbasanit në kryeqytet, kanë filluar të ndihen fuqishëm në kampet e të dyja palëve pa mbërritur ende dita e kësaj ndeshjeje. Verdheblutë do të udhëtojnë drejt Tiranës për t'u kthyer që andej fitimtarë, ndërsa të kuqtë do të përpiqen me të gjitha mundësitë të frenojnë nënkampionët. Elbasani ndodhet në pozitat e kryesuesit dhe ato duhet t'i përforcojë më shumë nga ndeshja në ndeshje. Për ta, ndeshja e së dielës në trasfertë me Partizanin është një nga më të vështirat e kësaj faze. Mesfushori-sulmues i verdhebluve, Skerdi Bejzade, e cilëson ndeshjen një sfidë rivalësh. "Besoj se do ta justifikojmë interesimin që ka ngjallur kjo ndeshje tradicionale, që është pa dyshim më e rëndësishmja e javës," - shprehet Bejzade, i cili me lojën e tij ka qenë përcaktues në arritjen e rezultateve pozitive të Elbasanit gjatë kësaj faze. Bejzade, në çdo ndeshje i ka mbajtur në alarm të plotë mbrojtjet e kundërshtarëve dhe ka arritur jo vetëm të realizojë disa gola me vlerën e tri pikëve, por ka shërbyer si askush tjetër për shokët e ekipit. Bejzade së bashku me kapitenin Dede janë një pjesë e rëndësishme e Elbasanit dhe po e udhëheqin këtë ekip drejt suksesit. Bejzade mendon se për t'u realizuar objektivat kërkohet që rendimenti i ekipit të Elbasanit të rritet edhe më tepër në javët në vazhdim. "Që në ndeshjen me Partizanin këtë të diel ne do të tregojmë se e kemi përmirësuar dukshëm nivelin e lojës krahasuar me javët e mëparshme. Kjo ndeshje duhet të dominohet plotësisht nga verdheblutë. Kundërshtari ynë i radhës është një nga ekipet pretendente për trofe në superligë, që meriton shumë vëmendje. Deri diku, të kuqtë kanë treguar se kanë nivel të kënaqshëm dhe me përforcimet që kanë bërë së fundi janë një ekip që mund të na vërë në vështirësi. Duke i marrë parasysh këta tregues, ne do të futemi në fushë për të dhënë maksimumin si kryesues të superligës. Kam besim të palëkundur si te vetja, ashtu edhe te shokët e ekipit, që do të tregohemi autoritarë në fushë dhe do ta sulmojmë kundërshtarin pareshtur. Më e rëndësishme për ne mbetet që ta fitojmë ndeshjen me meritë, madje do të dëshiroja që të shënoja në portën e Partizanit, sepse e ndiej veten në formë," - thekson Skerdi Bejzade, i cili gjatë periudhës dyjavore që kampionati u ndërpre ka pasur edhe një dëmtim të lehtë, por që tashmë e ka rikuperuar. "Nuk mund t'ia lejojmë vetes të na ikin nga duart pikë në ndeshjet e kësaj faze, në një kohë që në të ardhmen gara do të bëhet edhe më luftarake. Duhet ruajtur ritmi për ta pritur me qetësi takimin tjetër më kampionen Tirana. Do të dimë t'i tregojmë kundërshtarit se në vendin e parë jemi me meritë dhe jo të rastësishëm. Sportdashësit elbasanas duhet të jenë të sigurt se do të shohin një Elbasan që ka forca t'u dhurojë gola dhe spektakël në ndeshjen me Partizanin, sepse prania e tyre në stadium është mbështetje e fuqishme. Elbasani do të bindë edhe një herë se për momentin është ekipi më i mirë i superligës. Investimet serioze të presidencës dhe puna profesionale e trajnerëve do të shpërblehen me rezultate sa më të larta," - përfundon golashënuesi i Elbasanit, Skerdi Bejzade.


Elbasani, i shqetësuar nga dëmtimet
Ekipi i Elbasanit, në prag të ndeshjes me Partizani, nuk e ka plotësisht të gatshëm formacionin bazë. Disa nga titullarët janë duke vuajtur nga dëmtimet, ose me gjendje gripale. Të premten nuk ka dalë në seancën stërvitore të pasdites as kapiteni Dede, ndërkohë që K.Dalipi, Devolli dhe ndojë tjetër nuk janë riaftësuar plotësisht. Megjithatë, sipas mjekut të Elbasanit, deri të dielën shpresohet që të gjithë lojtarët që kanë pasur shqetësime ditët e fundit do të jenë të gatshëm për të luajtur ndaj Partizanit.


-------------------------------------------------------------------------------------------------------


Marre nga www.sportishqiptar.com.al

[miko]

Verdheblutë komplikojnë gjithçka për sa i përket kualifikimit në çerekfinale të kupës

Elbasani, hap fals në kupë me Pogradecin


Pogradeci Elbasani 2 0
Shënues: Ohadera 56', Tepelena 89'

Pogradeci: E.Agolli, Muska (A.Agolli 54'), Apuari, Balla, Jahaj, Çerepi, Ohadera, Eboh, Çekiçi (Tepelena 72'), Kreka (Hajdari 59'), Laçka. Trajner: A.Abazi.
Elbasani: Kotorri, Brahja, Dede, Abraham, Osmani, Merxha (E.Dalipi 72'), Çapja (Bajollari 70'), Osja, Tetova (Devolli 54'), K.Dalipi, Nora. Trajner: I.Daja.
Gjyqtarë: S.Çekaj (Laç), S.Avdo, A.Saliaj (Tiranë)
Kartonë të verdhë: Eboh, Bajollari, Tepelena

Komenti
Pogradeci ndoshta ka bërë surprizën më të bukur dje në ndeshjet e para të turit të tretë të kupës, teksa ka mundur nënkampionët me rezultat bindës, 2-0. Bënë një zgjidhje të bukur trajnerët pogradecarë, duke preferuar mesfushën të fuqishme dhe sulm të shpejtë, gjë që dha raste të pastra për shënim. Laçka, Jahaj, Çerepi ishin pranë golit në pjesën e parë. Por nxitimi bëri që ata të mos ndryshonin rezultat. Dihej që synimi i Pogradecit ishte që të paraqisnin një lojë rezultative para sportdashësve të vet. Ndërsa Elbasani u paraqit me formacionin e tij, që ndoshta do të luajë të shtunën me Tiranën. Sigurisht, tek elbasanasit mungoi dëshira për lojë të fortë dhe kjo u duk gjatë gjithë ndeshjes. Pogradeci paraqiti një ekip kompakt, tepër kolektiv dhe në shumë momente ishte më superior ndaj Elbasanit. Pjesa e dytë ishte më e bukur për dy ekipet, të cilët arritën të shpalosnin edhe teknikën e tyre. Njëfarë epërsie e Pogradecit solli golin e parë, ku nigeriani Ohadera, një nga më të dalluarit, arrin që individualisht të shmangë disa futbollistë dhe mjeshtërisht të shënojë. Elbasanasit, duke i besuar më shumë përvojës së tyre, u afruan rrallë në zonën pogradecare. Duhet pranuar që mbrojtësit pogradecarë ishin mjaft pozicionalë dhe hera herës u bën promotorë të aksionëve nga krahët. Duke parë në tërësi formacionin pogradecar, ai ishte më shumë i motivuar për lojë bindëse, sigurisht edhe për të shënuar. Kronika foli shumë për ta, gjithmonë duke parë rastet e pasura për shënim. Guximi i trajnerëve pogradecarë ishte edhe në aktivizimin e 18-vjeçarëve Kreka, Jahaj dhe Agolli. Ndërsa Elbasani u dallua për racionimin e lojës dhe kjo falë përvojës së tij. Futbollistët Tetova, Nora, Merxha e patën të vështirë të krijojnë raste për shënim dhe mesfushorët vendës, të udhëhequr nga Çerepi, i prishën planet e tyre. Goli i dytë i pogradecarëve u shënua nga Tepelena, i cili e kishte ndeshjen e parë me Pogradecin. Fitore e bukur, që tregoi edhe rritjen e lojës së pogradecarëve në ndeshjet e fundit. Për Elbasanin, që është edhe një nga pretendentët e fitimit të kupës, gjithçka është komplikuar për sa i përket kualifikimit në çerekfinale. Megjithatë, verdheblutë besojnë se mund ta përmbysin këtë rezultat. Kështu, brenda pak ditësh, Elbasani ka bërë dy hapa falsë brenda pak ditësh, një humbje në kampionat dhe një kupë. Kjo e dyta mund t'i kushtojë edhe skualifikimin.


Deklarojnë:
Ardi Abazi, trajner i Pogradecit: "Futbollistët tanë kanë disa ndeshje që po fitojnë me lojë bindëse. Sigurisht, edhe pse takimi ishte i vështirë, ai u vlerësua. Zbatuam me përpikëri udhëzimet tona. Dua t'i përshëndes të gjithë për atë çka arritën dhe mbetemi si staf me dëshirën për të dhënë takime të këtij niveli. Elbasani dihet që është ekip i elitës dhe në gjirin e vet ka futbollistë profesionistë, por kjo nuk na demoralizoi aspak, përkundrazi u mobilizuam dhe e fituam me meritë këtë ndeshje, çka na jep shpresë për të shkuar më tej. "
Ilir Daja, trajner i Elbasanit: "Përgjegjësia bie mbi mua, sepse ekipi nuk tregoi nivel. I gjithë takimi ishte fair play. Nuk arritëm të shfaqim nivel, sepse luajtëm pa motivim. Presim takime më të vështira dhe duam t'i kurorëzojmë me sukses, poe nëse luajmë si sot, nuk kemi gjë në vijë. Sa për kualifikimin, sigurisht që do të ketë vlerësim tjetër ndeshja e kthimit. Edhe pse kemi humbur 2-0 në ndeshjen e parë, them se gjithçka është e hapur. Në ndeshjen e sotme, ndoshta më shumë mendjen e kemi pasur te Tirana sesa te Pogradeci."


Marre nga www.sportishqiptar.com.al



Mesa duket lekundjet po fillojne dhe ne kampin verdheblu.E kam theksuar shpesh here qe,ajo qe ne na mungun eshte vazhdueshmeria ne loje.Eshte ajo vazhdueshmeri e cila verteton progresin e nje ekipi,dhe fatkeqesisht ekipi yne i zemres do shume pune akoma per te qene ne te vertete konkurues i denje per kreun e renditjes e per fitimin e trofeut Kampion.Nuk eshte vetem humbja nga Partizani dhe renia nga kreu i renditjes,por vjen dhe ky rezultat i dobet e i shoqeruar me nje loje akoma me te dobet,kundrejt nje ekipi modest si ai i Pogradecit ne Kupe,qe me ben te dyshoj per nje minikrize ne kampin verdheblu.Duhet qe ekipi te gjeje fuqine ti rikthehet rezultateve pozitive perpara se te jete teper vone.Le ta luftojme deri ne fund kete rast te paster qe po na jipet sivjet...
Per mua ky sezon eshte akoma me atraktiv,per faktin qe monopoli i Tiranes ka marre fund keshtu qe i jipet mundesia 3-4 ekipeve relativisht me te dobta se Tirana te shpresojne per trofe.Le te shpresojme qe sivjet cdo gje do jete ne favor tone e trofeu do te shkoje ne Elbasan per te dyten here mbas kaq shume vitesh.

Ps.Shume lexojne por pak (asnje) shkruan...


Gjithmone Verdh e Blu

[miko]

Zëvendëspresidenti i Elbasanit, Gentian Çërraga, thotë se për ekipin e tij nuk ka kthim prapa

Çërraga: Në të dy frontet, kupë dhe kampionat

Presidenca verdheblu është shfaqur më ambicioze se kurrë gjatë kësaj jave, duke konfirmuar se tani Elbasani do të konkurrojë jo vetëm për të fituar kampioantin, por edhe Kupën e Shqipërisë. Zëvendëspresidenti Gentian Çërraga, i cili ka mbetur mjaft i kënaqur nga niveli i lojës që paraqiti Elbasani në ndeshjen kualifikuese për Kupën e Shqipërisë ndaj Pogradecit, thotë se verdheblutë janë kualifikuar me meritë për turin çerekfinal, edhe pse kundërshtari i tyre nuk ka qenë ndonjë prej rivalëve për këtë trofe. "Ajo që më entuziazmon dhe më bën të besoj në arritjen e suksesit të dyfishtë nga Elbasani në këtë edicion futbollistik është mënyra e shkëlqyer që i bëri interpretimit të lojës shumica e lojtarëve në ndeshjen e mesjavës, përfshi këtu edhe talentin Ilir Qorri, të sapombërritur në radhët tona. Fakti që jemi në kreun e renditjes dhe në garë për Kupën e Shqipërisë do të thotë që përgjegjësitë për realizimin e objektivave bëhen më të mëdha, si përpara lojtarëve dhe trajnerëve, edhe ndaj presidencës. Deri tani kemi shënuar suksese që meritojnë të vlerësohen, por mundësitë kanë qenë gjithnjë për më tepër. Megjithatë, tani duhet të mendojmë që të mos u ndahemi sukseseve, pasi të gjitha ndeshjet janë të vështira. Ne e provuam në kupë që në një moment nënvlerësimi mund të rrezikosh të gjitha sukseset. Prandaj ekipi ynë duhet të vlerësojë seriozisht çdo kundërshtar. Të gjithë e kanë merituar kualifikimin, pa dyshim edhe Vllaznia, e cila skualifikoi Besën, një nga ekipet më të mira aktualisht të superligës. Nisur nga emrat e ekipeve që do të garojnë për këtë trofe, them se gara edhe këtu do të jetë e ashpër," - shprehet Çërraga. Ndërsa duke gjykuar për nivelin e kampionatit, Çërraga thotë se ai është më i mirë sesa kampionati i kaluar. "Numri i pretendentëve për titull është shtuar dhe gjeografia shtrihet nga Prefektura e Elbasanit deri në Durrës dhe Shkodër. Elbasani tani e tutje është i dënuar që të marrë vetëm fitore. Përforcimet e fundit janë një siguri më shumë për realizimin e objektivave tona dhe ato do të konkretizohen patjetër. Këtë fundjavë do të udhëtojmë për në qytetin fqinj të Peqinit, ku do të synojmë fitoren ndaj Shkumbinit. Natyrisht që kjo është një ndeshje e vështirë, por plotësisht e mundshme për t'u fituar nga verdheblutë. Ajo që do të dëshiroja, përveç fitores, është edhe mbizotërimi i një atmosfere mjaft të ngrohtë në prag të këtij derbi. Kurrsesi nuk ka vend për atmosferë ndryshe në ndeshje të tilla kur luajnë skuadra të qyteteve fqinje, të cilat jo vetëm furnizojnë njëra-tjetrën me futbollistë cilësorë, por kanë edhe lidhje të shumta farefisnore. Besoj se kësaj radhe mbi gjithçka do të triumfojë qytetaria elbasanase dhe ajo peqinase," - përfundon zëvendëspresidenti i Elbasanit, Gentian Çërraga.

Policë të shumtë për Shkumbini-Elbasani
Derbi i Prefekturës së Qarkut të Elbasanit, që do të luhet këtë të shtunë, do të shoqërohet me përforcime të shumta policore. Shkak për këtë janë bërë incidentet dhe problemet që i kanë shoqëruar takimet midis Shkumbinit dhe Elbasanit gjatë viteve të fundit. Ndërkohë, klubet përkatëse kanë marrë masa të forta organizative për mbarëvajtjen e këtij takimi mjaft të rëndësishëm. Po kështu, edhe shoqatat e tifozëve peqinas dhe elbasanas do të oragnizohen për të bërë tifozëri sa më të qytetëruar gjatë këtij takimi.

Dëmtohen Vrapi dhe Devolli
Në prag të ndeshjes së radhës, në ekipin e Elbasanit dy lojtarë janë të dëmtuar dhe aktivizimi i tyre është në pikëpyetje për ndeshjen me Shkumbinin. Por trajneri Ilir Daja shpreson që edhe këta dy lojtarë të jenë të gatshëm për derbin e prefekturës të shtunën. Ai që do të vendosë për aktivizimin e tyre është mjeku. Dy titullarëve u mbetet edhe një ditë kohë për t'u riaftësuar.



Marre nga www.sportishqiptar.com.al

[asteri]

Forca elbasani!!!
Skerdi Bejzade i jep fitoren Elbasanit ne Peqin kunder Shkumbinit Gola te shenuar ne min e 49 dhe 59 dhe ka shkurtuar rezultatin shkumbini me ane te Stafes ne min e 90''
Jemi te paret ne kryesim me 2 pike diference nga Besa(pas barazimit me lushnjen ne kavaje)5 pike larg partizanit dhe tirane(Tirana e cila fitoi ndaj partizanit me rezultatin 1-0 me gol te realizuar nga Devi Muka ne min e 93
Forca Labinoti!!!!

[Dr Rieux]

Forca Labinoti!!!!

Ore po ca Labinoti flisni pash zotin. Gjith ai qytet me histori dhe kulture nuk identifikohet dot me fshatin e Labinotit vetem se para 60 vjetve aty qeka mbajtur nje mbledhje partizane me pjesemarrjen e qoftlargut. Bile mundesisht ndrrojani dhe emrin temes.

[miko]

Fitorja me Besen eshte nje hap me shume per realizimin e objektivit principal tonin,ate drejt titullit Kampion.Le te shpreojme qe cunat do te kene vazhdimesi ne loje e do na sjellin perseri ato emocione qe i presim kaq kohe...

Ja dhe nje faqe rreth ekipit tone te zemres.

http://www.kselbasani.com/

Gjithmone Verdh e Blu

[miko]

Elbasani thyen Dinamon, shkëputet 7 pikë

Verdheblutë thyejnë serinë e barazimeve me blutë, duke vendosur supremacinë në superligë

Elbasani - Dinamo 3-0

Shënues: Çapja 25', Vrapi 56', Bejzade 68' (11-m)

Elbasani: Kotorri, Brahja, Dede (T.Osmani 79'), Vrapi, Abraham, Merxha, Çapja (Kuçi 88'), Osja, Tetova (Devolli 75'), Bejzade, Qorri. Trajner: I.Daja.
Dinamo: Lika, Diop, E.Xhafa, Ahmataj, Deliallisi (Mile 75'), Poçi, Vinçetiç, Asllani (Ledesma 51'), Gudjabi, Kastel (Eskudero 29'), Moiragi. Trajner: V.Bici.
Gjyqtarë: M.Sopjani (Durrës), G.Maloku (Tiranë), A.Mali (Patos)
Kartonë të verdhë: Tetova, Diop
Kartonë të kuq: Vinçetiç, Diop

"Radiografia"
2' Bejzade depërton bukur, por devijon mbrojtja mike.
5' Kapiteni Dede gjuan bukur me kokë, por pa sukses.
7' Vrapi e hedh topin nga vija anësore drejt e në portë dhe Lika për pak sa nuk përfundon brenda portës bashkë me topin.
9' Çapja e kroson topin nga goditja e këndit dhe Bejzade gjuan me shpejtësi, por ndërhyn Lika.
11' Lika grushton me vështirësi një top të hedhur nga rivënia anësore prej Vrapit.
15' Qorri ka krosur drejtpërdrejt në zonë nga e djathta dhe Bejzade me kokë e ka dërguar topin pranë shtyllës së djathtë pingule.
16' Qorri provon të gjuajë nga larg për të gjetur të papërgatitur Likën, por jashtë.
25' Kombinime të shkëlqyera të Bejzades me Abrahamin, i cili me mjeshtëri e kalon topin te mesfushori Çapja, që ka gjuajtur dhe Lika detyrohet ta nxjerrë topin nga porta. 1 0 për Elbasanin.
32' Ahmataj gjuan me kokë, por mbi traversë.
36' Tetova gjuan, por Lika i vëmendshëm e mbërthen topin përpara se t'ia rrëmbejë Bejzade i kudondodhur.
38' Brahja kombinon me Merxhën, ky bllokohet nga mbrojtja dinamovite në momentin e finalizimit.
45'- Dinamovitët kundërzbresin në qendër dhe Gudjabi i ndodhur në zonë gjuan, por topi kalon mbi traun e kuadratit të Kotorrit.
47'- Merxha e Bejzade kombinojnë bukur disa herë me njëri-tjetrin dhe ky i fundit gjuan, por jashtë kuadratit të Likës.
54'- Kroson Poçi në drejtim të Gudjabit, por ky nuk arrin të godasë me kokë.
56'- Qorri ekzekuton në mënyrë të shkëlqyer një goditje dënimi. Topi i krosuar prej tij goditet me kokë pas një kërcimi të fuqishëm të Vrapit dhe 2 0 për Elbasanin.
60'- Dinamovitët nervozohen në fushë, duke krijuar momente tensioni. Vinçetiç, gjatë një dyluftimi me Tetovën ndërhyn ashpër dhe qëllimshëm ndaj tij, duke e dëmtuar. Gjyqtari i nxjerr kartonin e kuq.
62'- Pa kaluar as dy minuta Diop ndërhyn në mënyrë flagrantë ashpër ndaj futbollistit Çapja, duke u ndëshkuar me kartonin e dytë të verdhë dhe më pas me të kuq.
68'- Elbasani fiton një 11-metërsh, pasi një prej mbrojtësve të Dinamos e ka prekur topin me dorë. Bejzade ekzekuton mjeshtërisht. 3 0 për Elbasanin.
78'- Bejzade ka mundësi ta thellojë edhe më tej avantazhin, por nuk arrin të godasë dot.
81'- Devolli kroson te Vrapi, ky gjuan, por jashtë.
82'- Çapja gjuan nga distanca dhe pret me vështirësi Lika.
84'- Merxha nxjerr në pozicion të volitshëm shënimi Abrahamin, por topi kalon mbi traun e kuadratit të mbrojtur nga Lika.
87'- Ahmataj ekzekuton bukur një goditje dënimi, por topi pritet nga Kotorri.
89'- Bejzade pason për te Kuçi dhe ky për pak sa nuk shënon golin e katërt.

Komenti
Ekipi dhe qyteti i Elbasanit kanë kaluar në delir pas fitores së djeshme me Dinamon. Përveç një fitoreje të thellë dhe të merituar, tripikëshi i djeshëm i ka bërë verdheblutë që të ëndërrojnë që tani për titullin. Dhe për këtë kanë të drejtë, pasi diferenca me vendin e dytë tani ka shkuar në 7 pikë. Janë edhe shumë ndeshje para, por të 12 mijë tifozët e djeshëm në "Ruzhdi Bizhuta" janë kënaqur dhe kanë festuar sikur dje të kishim fituar titullin. Po si rrodhën ngjarjet në këtë ndeshje? Që në fillim Elbasani ka qenë kërkues, ku Bejzade në sulm ka qenë gjithmonë shqetësues. Dinamo është përpjekur në dy raste, por sulmuesi Gudjabi ka qenë i pambështetur si duhet nga shokët e tij, duke qenë i shkëputur dhe duke i dhënë mundësi mbrojtjes elbasanase ta ndalte pa problem. Presioni i ekipit vendës pas minutës 20 të pjesës së parë ka qenë i madh, që ka çuar edhe te goli i parë për verdheblutë. Ka qenë një gjuajtje pa shumë pretendime e Çapjes, por duke gjetur cepin e portës së portierit Lika, i cili edhe pse është zgjatur shumë, nuk ka mundur dot as ta prekë topin. Pas këtij momenti, Elbasani është bërë me krahë, duke luajtur më fort, në mënyrë që ta mbyllte takimin që në pjesën e parë. Por Dinamo është mbrojtur fort, duke shpresuar vetëm te kundërsulmi, që është edhe "arma" kryesore e bluve, por që në ndeshjen e djeshme nuk ka rezultuar ashtu. Pjesa e parë është mbyllur me avantazhin e një goli të Elbasanit. Në pjesën e dytë ekipet kanë hyrë më të mobilizuar, pasi ndeshja ishte e hapur për të dy skuadrat. Elbasani nuk lëshoi, edhe pse ishte në avantazh, përkundrazi filloi të sulmonte edhe më shumë, në mënyrë që të shënonte golin e sigurisë. Dhe ai ka ardhur shpejt. Kur mendohej që të shënonte Bejzade, apo shtatlartë të tjerë të Elbasanit, ka qenë Vrapi që i ka habitur të gjithë me kërcimin e tij, tek shënon me kokë pas një krosi në zonën dinamovite. I gjithë stadiumi është çuar në këmbë. Pas golit të dytë blutë fillojnë të nervozohen shumë, ndërsa verdheblutë ruajnë qetësinë. Vinçetiç ndërhyn qëllimisht për të dëmtuar Tetovën dhe gjyqtari nuk heziton t'i nxjerrë kartonin e kuq. Asnjë protestë për këtë. Kroati është larguar kokulur nga fusha e lojës. Vetëm dy minuta më pas është Diop që merr kartonin e dytë të verdhë dhe Dinamo mbetet me 9 lojtarë dhe në disavantazh të dy golave, kur duheshin edhe gati 30 minuta lojë. Nga kjo përfiton Elbasani, i cili fiton një 11-metërsh, pasi një lojtar dinamovit prek topin me dorë në zonën e tij. Bejzade gjuan me forcë dhe siguri, duke shënuar golin e tretë dhe të kapitullimit për blutë. Pas kësaj minute, Dinamo është hedhur e gjitha në sulm, por verdheblutë kundërsulmojnë rrezikshëm, por shpesh kapen në pozicion jashtë loje. Në minutat e fundit Elbasani tërhiqet plotësisht dhe ruan rezultatin, duke dashur të mos pësojë dëmtim ndonjë lojtar, apo të marrë ndonjë karton të verdhë. Ndërsa Dinamo është e pafuqishme që me 9 lojtarë të shënojë të paktën golin e nderit. Përfundimisht, një fitore e merituar e Elbasanit, që e ngjit në kuotën e 26 pikëve, duke lënë pas Besën dhe Tiranën me 19 pikë. Ndërsa Dinamo mbetet në kuotën e 18 pikëve, duke rënë në vendin e katërt. Verdheblutë javës që vjen shkojnë në Korçë, një trasfertë e vështirë, ndërsa Dinamo ka akoma një ndeshje të vështirë, pasi para është derbi me Partizanin.

Deklarojnë:
Ilir Daja, trajner i Elbasanit: "Jemi totalisht të kënaqur nga ajo çfarë bënë lojtarët në fushën e lojës. Me sinqeritet këtë fitore do të thoja se ia dedikojmë tifozërisë së shkëlqyer elbasanase, e cila si gjithmonë na ka mbështetur fuqishëm edhe ndaj bluve. Do të thoja se tifozëria na ka motivur për t'u ngjitur në këto nivele po aq sa edhe faktorë të tjerë. Pa dyshim që roli kryesor në arritjen e këtyre sukseseve po luhet nga dyshja e presidentëve Laze Çërraga, pasi janë investimet e tyre serioze që kanë bërë të mundur që ky Elbasan të mos ketë frikë asnjë kundërshtar."
Vasil Bici, trajner i Dinamos: "Ndeshja me Elbasanin ka qenë një nga ndeshjet më të dobëta që ka zhvilluar deri tani ekipi i Dinamos. Për mendimin tim, ishte një gjykim i njëanshëm, me shumë të meta dhe që nuk i shkon për shtat një ndeshjeje të tillë, sepse ia prishi bukurinë, duke dhënë faulle dhe duke krijuar situata tensioni. Gjyqtari ndikoi në rezultatin final."



Marre nga www.sportishqiptar.com.al



Koment

Fitorja ndaj Dinamos na mobilizon me shume per arritjen e objektivit tone.Mesa duket trajnieri Daja ka sjelle nje filozofi te re ne lojen verdh e blu duke kombinuar spektaklin dhe rezultatet pozitive.Mentaliteti luftues e fitimtar duhet ruajtur deri ne etapen e fundit e mos zhgenjehen cunat nga ky distancim pikesh.Le te mos harrojme qe kampionati eshte vetem ne mesin e tij keshtu qe kemi shume pune akoma perpara.Rivalet tone per titull jane momentalisht vetem ekipet kryeqytetase te cilat jane kurdohere te gatshme te perfitojne nga gabimet tona...

Fakti qe nje ndeshje futbolli sjell 12000 sportdashes ne stadium per te pare ekipin tyre te zemres,per standartet shqiptare tregon shume...tregon se puna serioze qe behet nga stafi i ekipit eshte vleresuar ne maksimum nga sportdashesit elbasanas.E kam theksuar dhe here te tjera qe ekipet e tjera duhet te marrin shembull nga keta sportdashes qe cdo jave mbeshtesin fuqishem ekipin e tyre kudo qofte ai.Po me llogje te bukura nuk mbushen stadiumet e as me deklarata luftash,stadiumet mbushen me pune serioze e me rezultate te mira.Pra kush eshte i zoti le te na kopjoje se si mbushet stadiumi ne 2005...

Le te shpresojme qe rezultatet pozitive do kene vazhdimesi,duke na dhuruar akoma dhe nje here shijen e pazevendesueshme te titullit kampion...aq me teper kur arrin kete objektiv i vetem kundra te gjitheve....

Gjithmone Verdh e Blu